2–8 nō Tēnuare

Mataio 1 ; Luka 1

« ’Ia nā-reira-hia mai au mai tā ʼoe i parau na »

Hou ’oe ’a taiʼo ai i te tahi atu ā mātēria nō te tuatāpapara’a, ’a taiʼo ʼe ’a feruri i te Mataio 1 ʼe Luka 1, ’e ’a pāpa’i i tō ʼoe mau manaʼo pae vārua. ’A vaiiho i te Vārua ’ia arata’i i tā ’oe fa’aineineraʼa. I muri iho ’a hiʼo haere i te mau manaʼo i roto i teie arataʼiraʼa ʼe i roto i te Mai, peʼe mai—nō te taʼata hō’ē ʼe te ʼutuāfare.

Tītau i te mana’o

Te fā tumu a Mataio, a Luka, ʼe a te tahi atu feiā pāpaʼi ʼevanelia ʼo te faʼaʼite-pāpū-raʼa ïa ē ’o Iesu Mesia ’o te Tamaiti ïa a te Atua. Hōro’a i te mau pīahi te tahi nau minuti nō te tai’o fa’ahou i te Mataio 1 ’aore rā Luka 1 ’e ’ia fa’a’ite mai i te hō’ē ’īrava ’o te patu i tō rātou fa’aro’o ia Iesu Mesia. ʼA parau atu i te mau pīahi ē ’a tuatāpapa ai rātou i te Faufaʼa ʼĀpī i teie matahiti, e nehenehe rātou e hāmani i te hō’ē tāpura o te mau ʼīrava ’o tē faʼaʼite pāpū nei ē ’o Iesu Mesia te Tamaiti a te Atua. E nehenehe atoʼa ʼoe e tāpeʼa mai i teie tāpura nō te piha haʼapiʼiraʼa.

Ha’api’i i te ha’api’ira’a tumu

Mataio 1:18–25 ; Luka 1:5–80

E haʼa te Metua i te ao ra nā roto atu i tāna mau tamariʼi haʼapaʼo nō te faʼatupu i tāna mau ʼōpuaraʼa.

• E rahi atu ā te mau ʼitera’a rau maitaʼi e fāriʼihia e te mau pīahi i roto i tā rātou tuatāpaparaʼa i te Faufaʼa ʼĀpī i teie matahiti, mai te mea e ʼapo mai rātou i te mau haʼapiʼiraʼa nā roto mai i te mau ’iteraʼa rau o te mau taʼata tā rātou i taiʼo. Nō te tauturu ia rātou ’ia nā reira, e pāpaʼi ’oe i te mau iʼoa o te mau taʼata i roto i te Mataio 1 ʼe Luka 1 i niʼa i te tāpura ’ere’ere, ’oia ato’a te mau fa’ahorora’a pāpaʼiraʼa moʼa nō ni’a i teie mau taʼata, mai teie te huru :

  • Maria (Luka 1:26–56)

  • Iosepha (Mataio 1:18–25)

  • Elisabeta (Luka 1:5–7, 24–25, 40–45, 57–60)

  • Zakaria (Luka 1:5–23, 59–64)

  E aha tā tātou i ’apo mai nā roto mai i teie mau ’ā’amu ’o te tauturu ia tātou i teie mahana ?

• Nō te tauturu i te mau pīahi ’ia feruri hōhonu atu ā nō ni’a ia Maria ’e tōna ti’ara’a i roto i te fa’anahora’a a te Metua, e nehenehe ’oe e fa’a’ite atu i te video « Hō’ē melahi i te fa’a’itera’a i te fānaura’a o te Mesia ia Maria » ’e « ’Ua oa’oa ’āmui o Maria ’e o Elisabeta » (ChurchofJesusChrist.org). ’Aore rā e tai’o ’āmui i te Luka 1:26–38, 46–56, mā te ’imi i te mau mea tā Maria i parau ’o tē fa’a’ite mai nei i te tahi mea nō ni’a i tōna huru ta’ata. E aha atu ā te mea tā tātou i haʼapiʼi mai nō niʼa ia Maria ?

Luka 1:5–25

E tae mai te mau haʼamaitaʼiraʼa a te Atua i te taime tāna i faʼataʼa.

• Tē vai ra paha te feiā i roto i tā ’oe piha, mai ia Elisabeta ʼe Zakaria, tē ora ra ma te parauti’a ʼe ʼaita rā i fāriʼi i te haʼamaitaʼiraʼa i hina’arohia. E ani i te piha ’ia ʼimi i roto i te Luka 1:5-25 te mau haʼapiʼira’a tā rātou e nehenehe e tātara mai nā roto mai ia Elisabeta ʼe ia Zakaria nō niʼa i te tīaʼiraʼa a te Fatu. E aha te tahi atu mau hiʼoraʼa nō niʼa i te tīa’ira’a i te taime a te Fatu tā te mau pīahi e nehenehe e faʼaʼite mai nā roto i tō rātou iho oraraʼa ʼaore rā te mau ʼāʼamu i roto i te mau pāpaʼiraʼa moʼa ? E aha tā tātou i ʼapo mai i roto i teie mau hi’ora’a ? E ti’a ato’a i te mau pīahi e tāu’aparau i te fa’ahitira’a parau i roto i « Te tahi atu ā mātēria tauturu ».

Luka 1:26–38

« ʼAore roa hoʼi e mea e ʼore e tiʼa i te Atua ».

• E uiui paha te mau pīahi i te tahi taime—mai ia Maria—e nāhea te mau ʼōpuaraʼa ’aore rā te mau fafauraʼa a te Atua nō rātou i te fa’atupuhia. Nō te tauturu i te mau pīahi ’ia hāro’aro’a ē nā roto i te mana o te Atua e tupu te mau mea atoʼa, ’a faʼaʼite atu i te hōhoʼa Te faʼaʼiteraʼa : Te fāraʼa te melahi Gaberiela ia Maria (Buka ’anoihi ’evanelia,, N 28) ʼe e ani ia rātou ’ia taiʼo ʼāmui i te Luka 1:26–38. E aha tā tātou e ’apo mai nō niʼa i te upoʼotiʼaraʼa i niʼa i te mea e ’ore e maraʼa nā roto i te tuatāpaparaʼa i te mau parau ʼe te mau ʼohipa ʼa Maria ? ’A ani i te mau pīahi ’ia faʼaʼite mai i te mau taime ’a tauturu ai te Atua ia rātou ’ia rave faʼaoti i te tahi mea tā rātou i manaʼo eʼita roa e maraʼa ia rātou ’ia rave.

Te tahi atu ā mātēria tauturu

Tīa’iraʼa i te Fatu.

Te ’itera’a ē, e rave rahi o tātou e uiui nei nō te aha e ti’a ia tātou ’ia tīa’i i te mau ha’amaita’ira’a a te Atua, ’ua parau Elder Jeffrey R. Holland :

« Te pāhonora’a i teie mau uira’a ‘’Oia, e ti’a i te Atua ’ia fa’atae i reira noa i teie mau semeio, terā rā, i teienei ’e ’aore rā ’āraua’e, e ha’api’i mai tātou ē, nāna ’e nāna ana’e iho e fa’ata’a i te taime ’e te mau pu’e tau o tō tātou tere tāhuti nei’ … Te fa’aro’o, ’o te tu’ura’a ïa i te ti’aturi i ni’a i te Atua i roto i te taime maita’i ’e te ’ino, noa atu ā te tahi māuiui e ’itehia e tae atu ai tōna rima i te hōhorara’a nō tātou. …

«… I te feiā rā ’e ti’aturi ia Iehova e noa’a ïa te ’eta’eta ’āpī [’e] e pe’e rātou i ni’a mai te i ni’a i te pererau o te ’aeto ra ; e horo rātou, ’e e ’ore e rohirohi ; … e haere ā ho’i rātou, ’e e ’ore e matapōurihia’ [Isaia 40:31 ; reta tei fa’ahuru-’ē-hia]. Tē pure nei au ē ’aita e maoro’—i reira ra ’e ’aore rā ’āraua’e—e tae mai te reira mau ha’amaita’ira’a ia ’outou tāta’itahi e ’imi ra ’ia māmā tō ’outou ’oto ’e ’ia ora mai i tō ’outou māuiui. Tē hōro’a nei au i tō’u ’itera’a pāpū nō te here o te Atua ’e nō te Fa’aho’i-fa’ahou-ra’a o tāna ’evanelia hanahana, ’o te pāhonora’a ho’i i te mau fifi ato’a e fa’aruru tātou i roto i te orara’a ». (« Tīa’ira’a i te Fatu, » Liahona, Novema. 2020, 116–17).

Haʼamaitaʼiraʼa i tā tātou haʼapiʼiraʼa

E faʼaitoito i te mau pīahi ’ia tuatāpapa i te mau pāpaʼiraʼa moʼa i te fare. Hōʼē rāveʼa e nehenehe ai ʼoutou e faʼaitoito i te tuatāpaparaʼa i te pāpaʼiraʼa moʼa i te fare ’o te hōroʼaraʼa ïa i te taime i te mau pīahi ’ia faʼaʼite mai i te mau ʼite ʼe te mau manaʼo nō roto mai i tā rātou iho tuatāpaparaʼa ʼe te tuatāpaparaʼa ʼutuāfare.(hi’o Ha’api’ira’a mai tā te Fa’aora, 29).