16–22 nō Tēnuare

Ioane 1

ʼUa ʼitea ia māua te Mesia

’A tai’o ai ’e ’a feruri ai ’outou i te Ioane 1, ’a pure nō te arata’ira’a pae vārua i roto i tā ’outou hōpoi’a ’ia ha’api’i nō ni’a i te ’itera’a pāpū ’o Ioane. Tāpa’o i te mau mana’o tā ’outou e fāri’i. E nehenehe teMai, peʼe mai—Nō te mau taʼata hō’ē ʼe te mau ʼutuāfare ’e te mau manaʼo i roto i teie fa’anahora’a e tauturu ’ia faʼauru i tā ʼoutou mau pīahi ’ia māramarama ʼe ’ia faʼaʼohipa i te haʼapiʼiraʼa tumu i roto i teie nei pene.

Tītau i te mana’o

Nō te tauturu i te mau pīahi ’ia faʼaʼite mai i te mea tā rātou i haʼapiʼi mai, e nehenehe ʼoutou e ani ia rātou ’ia pāpaʼi i te mau uiraʼa, te mau manaʼo, ’e ʼaore rā te mau ʼite nō roto mai i tā rātou taiʼoraʼa i niʼa i te mau ʼapi parau ʼe ’ia tuʼu atu te reira i roto i te hōʼē fa’ariʼi. ʼA huti i te mau ʼapi parau nā roto mai i te fa’ariʼi nō te tāu’aparau i roto i te piha haʼapiʼiraʼa.

Ha’api’i i te ha’api’ira’a tumu

Ioane 1:1–5

I vai nā Iesu Mesia « i te mātāmua ra i te Atua ra hoʼi ».

• E aha tā Ioane i haʼapiʼi nō niʼa i te Mesia hou tōna fānauraʼahia ? Nō te aha e mea faufaʼa roa ’ia ʼite i te mau ʼohipa ʼa te Mesia i roto i te oraraʼa mātāmua ? E riro ʼei tautururaʼa ’ia pāpaʼi i teie mau uiraʼa i niʼa i te tāpura ’ere’ere ʼe ’ia ani i te mau pīahi ’ia ʼimi i te mau pāhonoraʼa i roto i te Ioane 1:1–5 (hiʼo atoʼa i Te ʼ’īritiraʼa ʼa Iosepha Semita, Ioane 1:1–5 [i roto i te Tābula Buka ʼa te Bibilia] ; Mose 1:32–33 ; arata’ira’a tumu parau, « Iesu Mesia, Orara’a nā mua a’e i teie orara’a »). E nehenehe ato’a te mau pīahi e fa’a’ite mai e aha tā rātou i ha’api’i mai nō ni’a i te mau ti’ara’a o te Mesia hou te tāhuti nei i roto i « Te Mesia Ora : Te ’itera’a pāpū o te mau ’Āpōsetolo » (ChurchofJesusChrist.org).

• Mai te mea e hinaʼaro ʼoutou i te faʼaʼohipa i teie mau ʼīrava nō te paraparau nō niʼa i te mau hāmaniraʼa ʼa te Fatu, e nehenehe ʼoutou e taiʼo i te Ioane 1:3 ʼe ’ia faʼaʼite i te mau hōhoʼa o tē faʼaʼite nei i te nehenehe o te fenua. E nehenehe ’outou e fa’a’ite i te video « Tō tātou fare » (ChurchofJesusChrist.org). ʼA ani i te mau pīahi ’ia faʼaʼite mai nāhea te mau poietera’a ʼa te Faʼaora e tauturu ai ia rātou ’ia ʼite i tōna here.

Ioane 1:1-14

ʼO Iesu Mesia te māramarama.

• E nehenehe e ani i te mau pīahi ’ia ’imi i te mau hi’ora’a ato’a nō te ta’o māramarama i roto i te Ioane 1:1–14. Nō te aha te māramarama i riro ai ’ei ta’o maita’i nō te fa’ahōho’a ia Iesu Mesia ? E nehenehe te mau pīahi e fa’a’ite mai nāhea te Fa’aora ’e tāna ’evanelia e hōro’a mai ai i te māramarama pae vārua i roto i tō rātou orara’a. ʼEi tuhaʼa nō teie tāuʼaraʼa parau, e hina’aro ’outou ē ’ia taiʼo rahi atu ā rātou nō niʼa i te māramarama ʼo te Mesia i roto i Te Haʼapiʼiraʼa tumu ʼe te mau Fafaura’a 84:45–46 ; 88:11–13, ’e ʼaore rā ’ia faʼahaere atu ia rātou i ni’a i te « Māramarama ʼo te Mesia » i roto i te titionare a te Bibilia. Nāfea e nehenehe ai ia tātou ’ia fa’a’ite i te māramarama o te Fa’aora ia vetahi ’ē ?

  

  E hōroʼa mai te Faʼaora ʼe tāna ʼevanelia i te māramarama pae vārua.

• Nō te tauturu i te mau pīahi ’ia hi’o mana’o i te ’ohipa i ha’api’ihia nō ni’a i te Fa’aora i roto i te Ioane 1, e nehenehe ’outou e fa’a’ite e rave rahi hōho’a (’oia ato’a hō’ē nō roto mai i te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare) ’o tē fa’a’ite ra i te mau tuha’a o te orara’a o Iesu Mesia ’e te misiōni hanahana. ʼA ani i te mau pīahi ’ia ʼimi i roto i te Ioane 1:1–14, i te mau taʼo ’e ʼaore rā te mau pereota e nehenehe e riro ’ei mau upoʼo parau nō te mau hōhoʼa.

Ioane 1:35–51

E nehenehe tātou e fāri’i i tō tātou iho ʼiteraʼa pāpū nō niʼa i te Faʼaora ʼe i muri iho e ani ia vetahi ’ē « ʼa haere mai, ’e ’a hiʼo ».

• I roto i te Ioane 1, te aniraʼa « ʼa haere mai, ʼe ’a hiʼo » e ’itehia e piti taime (hiʼo ʼīrava 39, 46). Eʼita paha tātou e fāna’o i te ʼite mata atu i te Faʼaora mai ia Anederea ʼe Natanaela, e nehenehe rā tātou e pāhono atu i taua aniraʼa ra. E aha te aura’a mau « ’a haere mai, ’e ’a hi’o » i tō tātou nei ’anotau ?

• E tai’o te mau pīahi i te Ioane 1:35–51 ’e e fa’a’ite mai e aha tā rātou i ha’api’i mai nō roto mai i teie mau ’īrava nō ni’a i te anira’a ia vetahi ’ē ’ia ha’api’i mai nō ni’a i te Mesia (hi’o ato’a « Te tahi atu mau rāve’a tauturu » ’e ’aore rā te video « Anira’a ia vetahi ’ē ’a haere mai, ’e ’a hi’o » i ni’a ChurchofJesusChrist.org). E nehenehe ato’a rātou e fa’a’ite mai nāhea tō rātou ’itera’a i te mau rāve’a ’ōhie nō tē ani ia vetahi ’ē « ’a haere mai, ’e ’a hi’o ».

Te tahi atu mau mātēria tauturu

E nehenehe tātou e ani ia vetahi ’ē « ʼa haere mai, ʼe ’a hiʼo ».

ʼUa haʼapiʼi mai ʼo Elder Neil L. Andersen :

« ʼUa haʼapiʼi mai te Faʼaora ia tātou nāhea ’ia faʼaʼite i te ʼevanelia. Mea au nāʼu te ʼāʼamu ʼo Anederea, tei ani atu, ’e Rabi, e tiʼa ʼoe i hea ?’ [Ioane 1:38]. ʼUa nehenehe ia Iesu i te pāhono atu i te vāhi i reira ʼoia i ora ai. ’Aita rā, ’ua parau atu ʼoia ia Anederea, « ’a haere mai, ’e ’a hi‘o ».[Ioane 1:39]. E mea au nā’u ’ia feruri ē, tē parau ra te Fa’aora, ’a haere mai, ’e ’a hi’o, ’eiaha noa te vāhi i reira vau e ora ai, te huru ato’a rā o tō’u orara’a. ʼA haere mai, ʼe ’a hi‘o ʼo vai au. ʼA haere mai ʼe ʼa fāri’i i te Vārua’. ʼAita tātou i ʼite i te mau mea atoʼa nō ni’a i taua mahana ra, ʼua ʼite rā tātou ē, i tō Anederea ’iteraʼa i tōna taea’e ʼo Simona, ʼua parau atu ʼoia, ’Ua ’itea ia māua … te Mesia’ [Ioane 1:41].

« ’O rātou o te faʼaʼite i te hō’ē hiaʼai i roto i tā tātou mau tāuʼaraʼa parau, ʼua nehenehe ia tātou i te peʼe i te hi’ora’a ʼo te Faʼaora ’ia ani atu ia rātou, ʼa haere mai, ʼe ’a hi’o.’ E fāriʼi vetahi i tā tātou aniraʼa, ’e tē vai ra, ʼaita. ’Ua mātau tātou pā’āto’a i te hō’ē ta’ata tei ani-manihini-hia e rave rahi taime hou ’a fāri’i ai i te anira’a ’a haere mai, ’e ’a hi’o’ » (« E temeio te reira, » Liahona, Mē 2013, 79).

Ha’amaita’ira’a i tā tātou ha’api’ira’a

Tauturu i te mau pīahi ’ia fa’aau i te mau pāpa’ira’a mo’a ia rātou iho. E nehenehe taua titauraʼa ra tā te Mesia i hōroʼa i tāna mau pipi—ʼa haere mai, ʼe ’a hiʼo—e tauturu i te mau pīahi tā ʼoutou e haʼapiʼi ra ’ia hinaʼaro i te peʼe atu i te Faʼaora. ʼA faʼaitoito i te mau pīahi ’ia faʼaau i te mau haʼapiʼiraʼa tei ʼitehia i roto i te mau pāpaʼiraʼa moʼa i tō rātou iho oraraʼa ʼe ’ia ani ia vetahi ’ē ’ia nā reira atoʼa. (Hiʼo 1 Nephi 19:23 ; Haʼapiʼiraʼa mai tā te Faʼaora, 21.)