Annou adore li, pa Dana Mario Wood

9–15 Janvye.

Matye 2; Lik 2

Nou vini pou n adore li

Anvan w li ide ki nan plan leson sa a, etidye Matye 2 ak Lik 2, epi ekri enpresyon espirityèl ou genyen. Sa ap ede w resevwa revelasyon sou pi bon fason pou w satisfè bezwen klas ou a.

Envite Pataj

Kijan w ka ankouraje manm klas la pou yo pataje ide ak eksperyans yo te fè pandan yo t ap etidye ekriti sa yo endividyèlman epi avèk fanmi yo? Malgre yo ka pwobableman familyarize avèk istwa nesans Sovè a nan Matye 2 ak Lik 2, yo ka toujou jwenn lòt ide espirityèl. Panse pou w envite kèk manm nan klas la pou yo pataje yon mesaj yo te jwenn ki enpresyone yo nan yon nouvèl fason.

Anseye Doktrin nan

Matye 2:1–12; Lik 2:1–38

Gen anpil temwen pou nesans Kris la.

• Istwa moun ki te vin adore yo nan Matye 2:1–12 ak Lik 2:1–38 ka ede manm klas ou a medite sou fason yo montre lanmou yo pou Sovè a. Revize tablo sou temwen nesans Kris la nan plan leson semèn sa a nan Vini, Suiv Mwen—Pou Moun yo ak Fanmi yo.. Kèk moun nan klas ou a ka petèt jwenn kèk ide nan aktivite sa a ke yo ta renmen pataje, oubyen ou ka fè aktivite sa a kòm yon klas. Poukisa li enpòtan pou temwen Kris sa yo te sòti nan diferant sosyete nan lavi a? Kòman nou ka suiv egzanp yo?

  

  Bèje yo te pami kèk nan premye temwen nesans Sovè a.

• Anvan temwen sa yo te ka adore Kris, tibebe a, yo te chèche li. Pou ede manm klas la aprann nan egzanp yo, ou gen dwa ekri tit sa yo sou tablo a: Bèje,; Ana; Simeon, ak Wa Maj.. Apresa, envite manm klas la pou yo chèche nan Matye 2 ak Lik 2 epi ekri sou tablo a kisa moun sa yo te fè pou yo te chèche Sovè a. Kisa istwa sa yo sigjere sou kèk nan fason nou ka chèche Kris la?

Matye 2:13–23

Paran yo ka resevwa revelasyon pou pwoteje fanmi yo.

• Pou kòmanse yon diskisyon sou fason Papa nou ki nan Syèl la te gide Jozèf ak Mari nan wòl yo antanke paran Sovè a, panse envite manm klas la pou yo ekri sou tablo a yon lis kèk nan danje n ap rankontre jodia. Kisa nou aprann nan Matye 2:13–23 sou fason pou nou jwenn pwoteksyon kont danje sa yo? Kijan revelasyon pèsonèl te ede nou pwoteje fanmi nou ak lòt moun nou renmen kont danje? Ki konsèy pwofèt ak apot yo bay pou ede nou jwenn sekirite espirityèl?

Lik 2:40–52

Menm lè l te jèn, Jezi te konsantre sou fè volonte Papa l.

• Istwa Jezi ki t ap anseye nan tanp la lè l te gen sèlman 12 zan an ka puisan espesyalman pou jèn kap mande tèt yo ki kontribisyon yo ka pote nan travay Bondye a. Ou gen dwa divize klas la an de pa de pou yo li Lik 2:40–52 ansanm (gade ide ki nan Tradiksyon Joseph Smith nou jwenn nan Lik 2:46 la, referans c). Chak gwoup ta ka pran kèk minit pou youn pataje avèk lòt sa ki enspire yo nan istwa sa a. Ki opòtinite nou genyen pou nou pataje sa nou konnen osijè levanjil la? Ki eksperyans nou ka pataje?

• Kisa Lik 2:40–52 anseye nou sou kijan Jezi te ye lè l te jèn? Modèl pou pwogresyon pèsonèl yo sigjere nan Lik 2:52 a ta ka enspire yon diskisyon sou sa n ap fè pou nou vin plis tankou Kris la. Ou gen dwa sigjere pou manm klas yo reflechi sou fason y ap pwogrese nan sajès (entelektyèlman), nan wotè (fizikman), ak nan gras devan Bondye (espirityèlman), ak nan gras devan lòt moun (sosyalman). Yo gen dwa menm fikse bi nan yonn oubyen plis nan domèn sa yo. Si w ta renmen kontinye yon diskisyon sou fason pou w vin tankou Kris la nan domèn sa yo, sitou si w ap anseye jèn yo, panse itilize deklarasyon ki nan seksyon “Resous adisyonèl” la.

Resous adisyonèl

Ede timoun yo ak jèn yo grandi “nan sajès, nan matirite, epi nan gras Bondye avèk lèzòm.”

President Steven J. Lund te dekri pwogran timoun ak jèn nan, ki baze an pati sou Lik 2:52, nan fason sa a:

“Pwogram Timoun ak Jèn nan se yon zouti ki prepare pou ede chak timoun Primè ak jèn pwogrese nan chemen disip la epi akeri yon vizyon ranpli lafwa sou sa chemen bonè a sanble. Yo ka vini pou prepare ak tann avèk enpasyans pou siy ak pano endikatè sou chemen alyans lan kote yo pral batize epi konfime avèk don Sentespri a epi byento pou yo fè pati yon kowòm ak klas jènfi yo, kote yo pral santi lajwa nan ede lòt moun gras ak yon seri aksyon sèvis kretyen. Y ap fikse objektif, gwo kou piti, ki pral pote balans nan lavi yo pandan y ap vin pi sanble ak Sovè a” (“Jwenn lajwa nan Kris la,” Liahona, Novanm 2020, 36–37).

Amelyore ansèyman nou

Enkli patisipan ki pa t etidye ekriti yo lakay yo. Menmsi kèk nan manm klas la te gen dwa pa t ka li Matye 2 ak Lik 2 anvan klas la, yo ka toujou pataje ide yo. Asire w ke w fè tout manm nan klas la jwenn opòtinite pou yo patisipe ak kontribye nan diskisyon an.