16–22 Janvye.

Jan 1

Nou Jwenn Mesi a

Lè w ap li ak medite sou Jan 1, priye pou asistans espirityèl nan yon responsablite w pou w anseye temwayaj Jan an. Ekri enpresyon w resevwa yo. Vini, Suiv Mwen—Pou Moun yo ak Fanmi yo ak ide sa yo kapab ede w enspire moun ki nan klas ou a pou yo konprann ak aplike doktrin ki nan chapit sa a.

Envite Pataj

Pou ede manm klas la pataje sa y ap aprann yo, ou ta gen dwa mande yo pou yo ekri kesyon, kòmantè, oswa ide yo jwenn nan sa y ap li sou ti moso papye yo epi pou yo mete yo nan yon resipyan. Rale moso papye nan resipyan an pou w diskite sou yo avèk klas la.

Anseye Doktrin nan

Jan 1:1–5

Jezikri te “avèk Bondye nan kòmansman an.”

• Kisa Jan te anseye konsènan Kris premòtèl la? Poukisa li enpòtan pou nou konn wòl premòtèl Kris la? Sa ta kapab itil pou w ta ekri kesyon sa yo sou tablo a epi mande manm klas la pou yo chèche repons yo nan Jan 1:1–5 (gade tou nan Tradiksyon Joseph Smith, Jan 1:1–5 [nan apendiks Bib la]) ; Moyiz 1:32–33; Gid pa Sijè, “Jezikri, Egzistans Premòtèl”). Manm klas la ta kapab pataje tou sa yo aprann konsènan wòl premòtèl Kris la nan “Kris Vivan an: Temwayaj Apot yo” (ChurchofJesusChrist.org).

• Si w ta renmen itilize vèsè sa yo pou w pale de tout sa Senyè a kreye yo, ou ta kapab li Jan 1:3 epi montre foto ki dekri bote tè a. Ou ta gen dwa pase videyo “Fwaye Nou an” (ChurchofJesusChrist.org). Envite manm klas la pou yo di kijan kreyasyon Sovè a ede yo santi lanmou L.

Jan 1:1–14

Jezikri se Limyè a.

• Anvizaje mande manm klas la pou yo chèche chak ka kote mo limyè a mansyone nan Jan 1:1–14. Poukisa limyè se yon bon mo pou dekri Jezikri? Manm klas la ta kapab pataje kijan Sovè a ak levanjil Li a bay limyè espirityèl nan lavi yo. Kòm yon pati nan diskisyon sa a, ou ta gen dwa envite manm klas la pou yo li plis bagay sou Limyè Kris la nan Doktrin ak Alyans 84:45–46; 88:11–13, oubyen ou ta kapab voye yo nan “Limyè Kris la” nan Diksyonè Bib la. Kijan nou ka pataje lanmou Li avèk lòt moun?

  

  Sovè a ak levanjil Li a bay limyè espirityèl..

• Pou ede manm klas yo vizyalize sa yo anseye apwopo Sovè a nan Jan 1, ou gen dwa montre yo plizyè foto (enkli youn nan sa k nan plan leson semèn sa a nan Vini, Suiv Mwen—Pou Moun yo ak Fanmi yo) a ki dekri aspè nan lavi Jezikri ak misyon divin ni. Envite manm klas yo pou yo gade nan Jan 1:1–14, pou yo chèche pawòl oubyen ekspresyon ki ta ka sèvi kòm tit pou foto yo.

Jan 1:35–51

Nou ka akeri pwòp temwayaj pa nou konsènan Sovè a epi apre sa nou envite lòt moun pou yo “vin wè.”

• Nan Jan 1, envitasyon pou nou “vin wè” a parèt de fwa (gade nan vèsè 39, 46). Nou gen dwa ka pa gen chans pou n wè Sovè a fizikman jan Andre ak Natanayèl te wè l la, men nou ka aksepte menm envitasyon an. Kisa “vin wè” ta kapab vle di jodi a?

• Manm klas ta kapab li Jan 1:35–51 epi pataje sa yo aprann nan twa vèsè sa yo konsènan envite lòt moun aprann konnen Kris la (gade tou nan “Resous Adisyonèl yo” oubyen videyo “Envite Lòt yo pou yo ‘Vin Wè’” sou ChurchofJesusChrist.org). Yo te kapab di tou kijan yo twouve fanson senp ak natirèl pou envite lòt yo pou yo “come and see.”

Resous adisyonèl

Nou ka envite lòt moun pou yo “vin wè.”

Èldè Neil L. Andersen te anseye:

“Sovè a te anseye nou kijan pou nou pataje levanjil la. Mwen renmen istwa Andre a, ki te mande: ‘Mèt, ki kote w abite?’ [Jan 1:38]. Jezi te kapab reponn pou l te di l ki kote L t ap viv. Men olyedesa, li te di Andre, ‘Vin wè’ [Jan 1:39]. M renmen panse ke sa Sovè a te vle di l reyèlman se te: ‘Vin wè, non sèlman ki kote m ap viv men kijan m ap viv tou. Vin wè kiyès mwen ye. Vin santi Lespri a.’ Nou pa konn tout sa k te pase jou sa a, men nou konnnen ke lè Andre te jwenn Simon, frè l la, li te deklare: ‘Nou jwenn … Kris la’ [Jan 1:41].

“Pou moun ki montre yo enterese nan konvèsasyon nou yo, nou ka suiv egzanp Sovè nan envite yo pou yo ‘vin epi wè.’ Genyen ki ap aksepte envitasyon an, e gen lòt ki p ap aksepte. Nou tout konn yon moun yo te envite plizyè fwa anvan pou l te aksepte yon envitasyon pou l ‘vin wè’” (“Se Yon Mirak,” Lyawona, Me 2013, 79).

Amelyore Ansèyman Nou

Ede moun ki ap aprann yo konpare ekriti yo avèk tèt yo. Menm envitasyon Kris la te fè disip Li yo—pou yo vin wè a—ka ede moun w ap anseye yo vin gen dezi pou yo suiv Sovè a. Ankouraje manm klas yo pou yo aplike prensip yo jwenn nan ekriti yo nan lavi pa yo epi pou yo envite lòt moun fè menm bagay la tou. (Gade 1 Nefi 19:23; Anseye nan fason Sovè a,21.)