Jen Kabun̄ n̄an E, jān Dana Mario Wood

Jānwōd 9–15

Matu 2; Luk 2

Jaar Itok N̄an Kabun̄ n̄an E

M̦okta jān am̧ riiti ļōmņak ko ilo unin tōl in, ekkatak Matu 2 im Luk 2, im je en̄jake in jetōb ko am̧. Menin enaaj jipan̄ eok bōk revelesōn kōn ekōjkan n̄an tōpar aikuj ko ilo em̧m̧an tata an kūlaaj eo am̧.

Kajjitōk bwe ren Kwaļo̧k

Ekōjkan am̧ maron̄ kōketa ro uwaan kūlaaj eo n̄an kwaļo̧k kōļmenļo̧kjeņ ko im en̄jake ko ewōr ippāer ilo aer kar ekkatak jeje ko rekwojarjar er make im ippān baam̧le ko aer? Men̄e remaron̄ jeļā kōn bwebwenato ko kōn ļotak eo an Rilo̧mo̧o̧r eo ilo Matu 2 im Luk 2, remaron̄ aolep iien bōk kōļmenļo̧kjeņ in jetōb ko rekāāl. Ļōmņak in kajjitōk ippān jejjo ro uwaan kūlaaj eo n̄an kwaļo̧k juon ennaan raar loe me ekar kabwilōn̄ er ilo juon wāween ekāāl.

Katakin Katak eo

Matu 2:1–12; Luk 2:1–38

Elōn̄ rikam̧ool ro kōn ļotak eo an Kraist.

• Bwebwenato ko kōn rikabun̄jar ro ilo Matu 2:1–12 im Luk 2;1–38 remaron̄ jipan̄ ro uwaan kūlaaj eo kejōkļo̧kjeņ kōn wāween ko rej kwaļo̧k aer iakwe n̄an Rilo̧mo̧o̧r eo. Etale jaat eo kōn ennaan ko kōn ļotak eo an Kraist ilo unin tōl eo an wiik in lo Itok, Ļoor Eō—N̄an Kajjojo Armej im Baam̧le Ko. Jet armej ilo kūlaaj eo am̧ emaron̄ wōr aer kōļmenļo̧kjeņ ko n̄an kwaļo̧k jān m̧akūtkūt in, ak kwomaron̄ kōm̧m̧ane m̧akūtkūt eo āinwōt juon kūlaaj. Etke ej aorōk bwe rikam̧ool rein kōn Kraist raar itok jān elōn̄ jekjek ko an mour? Ewi wāween ad maron̄ in ļoor waanjon̄ak ko aer?

  

  Seperd ro raar erom jet iaan rikam̧ool ro m̧oktata kōn ļotak eo an Rilo̧mo̧o̧r.

• M̧okta jān an rikam̧ool rein rekar kabun̄jar n̄an nin̄nin̄ Kraist, rej kappukōt E. N̄an jipan̄ ro uwaan kūlaaj eo ekkatak jān waanjon̄ak ko aer, kwomaron̄ je ioon boot eo taitōļ kein: Seperd ro, Anna, Simeon, im Rimāletlet ro. Innām ro uwaan kūlaaj eo remaron̄ etale Matu 2 im Luk 2 im je ioon boot eo ta eo armej rein raar kōm̧m̧ane n̄an pukōt Rilo̧mo̧o̧r eo. Ta eo bwebwenato kein rej elmakote kōn jet iaan wāween ko jemaron̄ pukōt Kraist?

Matu 2:13–23

Ro jinen im jemen remaron̄ bōk revelesōn n̄an kōjparok baam̧le ko aer.

• N̄an jino juon iien ekōnono kōn ekōjkan an Jemedwōj Ilan̄ kar tōl Josep im Meri ilo eddo eo aer āinwōt ro jinen im jemen Rilo̧mo̧o̧r eo, ļōmņak in kajjitōk ippān ro uwaan kūlaaj eo n̄an laajrake ioon boot eo jet iaan kauwōtata ko jej jelm̧ae rainin. Ta eo jej ekkatak jān Matu 2:13–23 kōn ekōjkan kappukōt kōjparok jān kauwōtata kein? Ekōjkan an revelesōn an juon make kar jipan̄ kōj kōjparok baam̧le ko ad ak ro jet rejitōnbōro jān kauwōtata? Ta kapilōk eo rikanaan ro im rijilōk ro raar letok n̄an jipan̄ kōj lo ineem̧m̧an eo ilo jetōb?

Luk 2:40–52

Jekdo̧o̧ņ āinwōt juon jodikdik, Jisōs ekar kalimjōk wōt kōm̧anm̧an ankilan Jemen.

• Bwebwenato eo kōn an Jisōs katakin ilo tampeļ eo ke E ekar 12 wōt iiō dettan emaron̄ in eļap tata kajoor n̄an jodikdik ro me rej ļōmņak kōn jipan̄ eo remaron̄ kōm̧m̧ane n̄an jerbal eo an Anij. Kwomaron̄ ajije kūlaaj eo n̄an ruo iaan ruo n̄an riiti Luke 2:40–52 ippān doon (lale kōļmenļo̧kjeņ eo jān Josep Smith Ukok loe ilo Luke 2:46, footnote c). Kajjojo pea remaron̄ bōk jejjo minit ko n̄an kwaļo̧k ippān doon ta eo ej im̧we er kōn bwebwenato in. Ta iien ko rem̧m̧an repād ippād n̄an kwaļo̧k ta eo jejeļā kake kōn gospel eo? Ta en̄jake ko jemaron̄ kwaļo̧ki?

• Ta eo Luk 2:40–52 ej katakin kōj kōn ta eo em̧m̧an ippān Jisōs āinwōt juon jodikdik? Jon̄ak eo n̄an eddōkļo̧k an juon make ekar elmakote ilo Luk 2:52 emaron̄ im̧we juon iien ekōnono kōn ta eo jej kōm̧m̧ane n̄an erom āinwōt Kraist. Kwomaron̄ elmakote bwe ro uwaan kūlaaj eo ren kejekļo̧kjeņ kōn ekōjkan aer ļapļo̧k ilo māletlet (jeļāļo̧kjeņ), kōjellin (ilo ānbwin), utiej ippān Anij (ilo jetōb), im utiej ippān ro jet (iaio). Aaet remaron̄ kōm̧m̧ani kōttōpar ko ilo juon ak elōn̄ļo̧k eria kein. Eļan̄n̄e kwoj kōņaan wōnm̧aanļo̧k wōt ilo juon iien ekōnono kōn erom āinwōt Kraist ilo eria kein, eļap tata eļan̄n̄e kwoj katakin jodikdik ro, ļōmņak in kōjerbal ennaan eo ilo “Kein Jipan̄ ko Jet.”

Kein Jipan̄ ko jet

Jipan̄ ajri ro im jodikdik ro eddōkļo̧k “ilo jouj ippān armej im Anij.”

Būreejtōn Steven J. Lund ekar kwaļo̧k kadkad in būrookraam̧ eo an Ajri im Jodikdik ro, eo ej pedped jidik in ilo Luk 2:52, ilo wāween in:

“Būrookram̧ eo an Ajri ro im jodikdik ro ej juon kein jerbal n̄an jipan̄ aolep ajri in Būraimere im jodikdik ro n̄an eddōkļo̧k ilo rikaļooraņ im n̄an bōk juon tōmak eobrak kōn visōn kōn elmen wāween m̧ōņōņō. Remaron̄ itok im bōk kūņaer n̄an ikdeleel kōn iaļ eo im tōlļo̧k me enaaj bōk er ilo iaļen bujen in, ijo renaaj peptaij im kapen kōn menin letok eo an Jetōb Kwojarjar im ejjab etto pād doulul ko ak kūlaaj ko an Doulul eo an Jiron̄ ro, ijo renaaj jipan̄ ro jet en̄jake m̧ōņōņō n̄an leļo̧k jerbal in jipan̄ āinwōt Kraist. Renaaj kōm̧m̧ani kōttōbar ko, reļļap ak reddik, me enaaj bōk peļan n̄an mour ko aer im jipan̄ er erom̧ eļapļo̧k āinwōt Rilo̧mo̧o̧r” (“Pukōt Lan̄lōn̄ ilo Kraist,” Liaona, Nob. 2020, 36–37).

Kōkōm̧anm̧anļo̧k Ad Katakin

Kakobaik rūkkatak ro im raar jab katak jeje ko rekwojarjar ilo m̧oko m̧ōer. Men̄e jet iaan ro uwaan kūlaaj eo remaron̄ jab maron̄ riiti Matu 2 im Luk 2 m̧okta jān kūlaaj eo, rej maron̄ in wōt kwaļo̧k kōļmenļo̧kjeņ ko eļap meļeļeier. Kanooj lale bwe aolep ro uwaan kūlaaj eo ewōr aer iien ko rem̧m̧an n̄an bōk koņan im jipan̄ iien ekōnoo eo.