baam̧le eo ej lale alboom in pija eo

Tijem̧ba 26–Jānwōde 1

Jej Bōk Eddo in Ad Make Ekkatak

Ilo am̧ riit im kejōkļo̧kjeņ kōn eoon in jeje ko rekwojarjar ilo laajrak in, rekoote im̧we ko ilo jetōb kwoj būki. Menin enaaj karuwaineneiktok Jetōb eo n̄an m̧aanjabpopo eo am̧. Itok, Ļoor Eō—N̄an Kajjojo Armej im Baam̧le Ko im ļoor ļōmnak ko remaron̄ jipan̄ eok im̧we armej ro ilo kūlaaj eo am̧ n̄an ekkatak Kallim̧ur Ekāāl iiō in.

pija ej bōk jikin kwaļo̧k

Kajjitōk bwe ren Kwaļo̧k

Juon iaan kōttōpar ko am̧ āinwōt juon rūkaki ej n̄an rōjan̄ ro uwaan an kūlaaj eo n̄an ekkatak jān jeje ko rekwojarjar ippāer make im ippān baamļe ko aer. Ron̄ kōn en̄jake ko an ro jet emaron̄ im̧we er n̄an kappukōt en̄jake ko aer make Kōn menin, ilo jinoin kajjojo kūlaaj, kajjitōk ippān ro uwaan kūlaaj eo n̄an kwaļo̧k eoon in jeje ko rekwojarjar jān ekkatak eo aer me ekar im̧we ak kabwilōn̄ er.

pija eo ej bōk jikin katakin

Katakin Katak eo

Ekkatak ej aikuji jerbal ilo tōmak.

• Ewi wāween am̧ maron̄ im̧we ro uwaan kūlaaj eo n̄an niknikļo̧k wōt ilo ekkatak eo aer, ijello̧kin likūt eļap tata eddo eo ioon rūkaki eo? En̄in juon ļōmņak. Kadļo̧k juon men emeo̧eo̧ n̄an juon uwaan kūlaaj eo, eo kwaar kajjitōk im̧aanļo̧k ippān n̄an jab kōm̧m̧an jabdewōt n̄an bauri. Kōjerbal m̧akūtkūt in n̄an jino juon iien ekōnono kōn eddo ko an rūkkatak ro im rūkaki ro ilo aer ekkatak gospel eo. Āinwōt jet rūkkatak, ewi wāween ad “baur” ta eo kar katakin ilo kūlaaj ko? Ennaan ko loi ilo “Kein Jipan̄ ko Jet” emarōn jipan̄ ilo iien ekōnono in.

• Aolep ro uwaan kūlaaj eo ewōr aer make eddo n̄an karuwainenetok Jetōb eo n̄an kūlaaj eo. N̄an jipan̄ ro uwaan kūlaaj eo meļeļe menin, kajjitōk ippāer n̄an riit Alma 1:26 im Katak im Bujen Ko 50:13–22; 88:122–23 im kwaļo̧k ta eo rūkaki ro im ro uwaan kūlaaj eo remaron̄ kōm̧m̧ane n̄an karuwaineneiktok Jetōb eo. Emaron̄ in jipan̄ n̄an je uwaak ko aer ioon boot eo ium̧win taitōļ ko āinwōt kein: Ta eo rūkaki ro remaron̄ kōm̧m̧ane im Ta eo rūkaki ro remaron̄ kōm̧m̧ane. Ro uwaan kūlaaj eo remaron̄ kōm̧m̧ane juon peba kileplep kōn uwaak ko aer me maron̄ kwaļo̧ki ilo jejjo wiik ko rej itok.

Jej aikuj in jeļā m̧ool eo kōn kōj make.

• Elōn̄ eoon ko ilo Kallim̧ur Ekāāl rej katakin pedped in katak ko me remaron̄ tōl kappukōt m̧ool eo ad. Waanjon̄ok ko ekoba Luk 11:9–13; Jon 5:39; 7:14–17; im 1 Korint 2:9–11. Kwomaron̄ karuwaineneik ro uwaan kūlaaj eo am̧ me rej riiti eoon kein ilo ekkatak eo aer make n̄an kwaļo̧k ta eo raar ekkatak. Ak kwomaron̄ riit eoon kein āinwōt juon kūlaaj im kajjitōk ippān ro uwaan kūlaaj eo n̄an kwaļo̧k ekōjkan aer kar bōk naan in kam̧ool ko aer.

  likao ro im jiron̄ ro ilo kūlaaj ruum̧ eo

  Kappukōt ekkatak kōn tōmak enaaj jipan̄ kōj bōk naan in kam̧ool ko ad make.

• Jerbal 17:10–12 ej kōmeļeļeik Armej ro Rekwojarjar me raar etale jeje ko rekwojarjar im kar bōk kam̧ool eo aer kōn m̧ool eo. N̄an kōketak ro uwaan kūlaaj eo n̄an ļoor waanjon̄ok ko aer, riiti eoon kein ippān doon im kajjitōk ippān ro uwaan kūlaaj eo n̄an kwaļo̧k eoon in jeje ko rekwojarjar me raar kōkajoorļo̧k naan in kam̧ool ko aer kōn gospel eo.

Ekōjkan ad maron̄ kōm̧m̧an bwe ekkatak eo ad kōn jeje ko rekwojarjar en ļapļo̧k meļeļe in?

• Ejaake juon iminene an ekkatak jeje ko rekwojarjar emaron̄ in pen n̄an ro uwaan kūlaaj eo me rej en̄jake bwe ejjeļo̧k aer iien, meļeļe, ak kapāāl ko. Ta eo kwomaron̄ kōm̧m̧ane n̄an jipan̄ er wejepedik? N̄an jipan̄ uwaan kūlaaj eo bōk lōke eo n̄an ekkatak jeje ko rekwojarjar, kwomaron̄ kwaļo̧k meļeļe in jān “Ļōmņak ko n̄an Kōkōm̧anm̧anļo̧k Ekkatak Jeje Ko Rekwojarjar Am̧ Make” ilo Itok, ļoor Eō—N̄an Kajjojo Armej im Baam̧le Ko. Bōlen kwe ak ro uwaan kūlaaj eo remaron̄ kwaļo̧k en̄jake ko kōn kōjerbal jet iaan ļōmņak kien ak en̄jake ko jet eļap meļeļeier n̄an ekkatak jeje ko rekwojarjar. Kwomaron̄ barāinwōt kāālet juon jebta ilo Kallim̧ur Ekāāl im kajjieon̄ ekkatak kake āinwōt juon kūlaaj kōjerbal jet iaan ļōmņak kein.

pija ej bōk jikin kein jipan̄ ko

Kein Jipan̄ ko Jet

Bōk jeļāļo̧kjeņ in jetōb eo n̄an kōj make.

Rikanaan eo Josep Smith eaar katakin: “Men ko an Anij rej an eļap aer aorōk; im iien, im en̄jake, im mejmejkaruo im kejōkļo̧kjeņ im kwojarjar emaron̄ in wōt lo er. Am̧ ļōmņak, O m̧aan eo! eļan̄n̄e kwonaaj tōl juon jetōb n̄an ļomo̧o̧r, aikuj in ajeded lōn̄ļo̧k utiej in wōt lan̄ ko routiej tata, im pukōti n̄an im kejōkļo̧kjeņ ilo merok lep, im depakpak in n̄an indeeo—kwoj aikuj kōnono ippān Anij. Ewi jon̄an ļap in nōbar im utiej eo rej ļōmņak ko an Anij, jān metak in kōļmenļo̧kjeņ ko an būruōn armej!” (Teachings of Presidents of the Church: Joseph Smith [2007], 267).

Elder David A. Bednar ekar kōmeļeļeik: “Eļan̄n̄e kom̧ aolep ak n̄a jeļā kōn Jisōs Kraist im gospel eo An em̧ōj an jepļaaktok kōn wōt ta eo armej ro jet rej katakin ak jiron̄ kōj, innām pedped in naan in kam̧ool eo ad kōn E im jerbal eo An raan-ko āliktata ej ekkal ioon bok. Jen jab lukkuun pedped ioon ak baroik meram in gospel in im jeļā eo jen armej ro jet—men̄e jet ro jej iakwe im leke er” (“Pojak n̄an Bōk Aolep Menin Aikuj Otemjeļo̧k,” Liaona, Māe 2019, 102).

Kōkm̧anm̧anļo̧k Ad Katakin

Pedped wōt ioon katak eo. Kanooj lale bwe iien ekōnono ko an kūlaaj eo ren pād wōt ilo jeje ko rekwojarjar im katak ko an rikanaan ro. Kwomaron̄ kōm̧m̧ane menin kōn kajjitōk kajjitōk ko āinwōt kein: “Ta m̧ool ko an gospel eo jej ekkatak jān kakobaba ko jekar ron̄?” ak “Juon emaron̄ ke kwalo̧k juon eoon in jeje ko rekwojarjar me ej iookļo̧k ta eo jekar kōnono kake?” (Lale Teaching in the Savior’s Way, 20–21.)