Wintō kūlaaj eo emarok ilo Nauvoo Illinois Tampeļ, jān Tom Holdman

Jānwōde 23–29.

Matu 3; Mark 1; Luk 3

“Kom̧in Kōpooj Iaļ an Irooj”

Ilo am̧ riiti im kejōkļo̧kjeņ kōn Matu 3; Mark 1; im Luk 3, rekoote im̧we ko kwoj būki. Menin enaaj karuwaineneitok Jetōb eo ilo am̧ m̧aanjabpopo n̄an katakin. Ilo kakobaba n̄an ļōmņak in katak ko ilo laajrak in, ekkatak ļōmņak ko ilo Itok, Ļoor Eō—N̄an Kajjojo Armej im Baam̧le Ko maron̄ ukukōte n̄an kōjerbale ippān kūlaaj eo am̧.

Kajjitōk bwe ren Kwaļo̧k

N̄an jipan̄ ro uwaan kūlaaj eo kwaļo̧k ekōjkan an ekkatak jān Kallim̧ur Ekāāl kōjeraam̧m̧an mour ko aer, kwomaron̄ je kajjitōk kein ioon boot eo: Ta eo kwaar kōm̧m̧ane kōnke kōn ta eo kwaar riiti ilo Kallim̧ur Ekāāl ilo wiik in? Kajjitōk ippān ro uwaan kūlaaj n̄an kwaļo̧k uwaak ko aer.

Katakin Katak eo

Matu 3:1–12; Luk 3:2–18

Rikaļoor ro an rej kōpooj er make im ro jet n̄an bōk Jisōs Kraist.

• Ekōjkan ad m̧aanjabpopo kōn lotok eo an juon rilotok aorōk? Juon kajjitōk rōt in emaron̄ jipan̄ eok kwaļo̧k kadkad in juon iien ekōnono kōn ekōjkan an Jon Ripeptaij kar kōpooj armej ro n̄an bōk Jisōs Kraist. Innām kwomaron̄ ajije kūlaaj eo n̄an jilu kumi ko. Kajjojo kumi remaron̄ riiti n̄e ejjab Matu 3:1–6; Matu 3:7–12; ak Luk 3:10–15, kappukōt ekōjkan an Jon Ripeptaij kar kōpooj armej ro n̄an bōk Jisōs Kraist ilo mour ko aer. Kōm̧m̧an bwe kajjojo kumi en bōk iien n̄an kwaļo̧k ta eo raar loe.

Jon Ripeptaij ej Kwaļo̧k Naan ilo Āne Jem̧aden, jān Robert T. Barrett

Luk 3:2–14

Jej aikuj in “jebar leen ekkar n̄an ukeļo̧k.”

• Ilo Luk 3:8, Jon Ripeptaij ekar katakin armej ro bwe m̧okta jān aer maron̄ kar peptaij, raar aikuj in kwaļo̧k “leen ko,” ak kein kam̧ool, kōn aer ukweļo̧k. Ekōjkan am̧ maron̄ jipan̄ ro uwaan kūlaaj eo kile kein kam̧ool eo kōn ukweļo̧k eo aer make? Kwomaron̄ kajjitōk ippāer n̄an etale Luk 3:8–14 im pukōt ta eo Jon ekar watōke “leen ko” an ukweļo̧k. Remaron̄ barāinwōt etale Moronai 6:1–3 im Katak im Bujen Ko 20:37. kwomaron̄ jin̄aik juon leen wōjke ioon boot eo im kōm̧m̧an bwe ro uwaan kūlaaj eo ren ļebōļe leen eo ioon wōjke eo kōn “leen ko” an ukweļo̧k rej loe. Menin emaron̄ barāinwōt juon iien em̧m̧an n̄an kōnono kōn ta meļeļe in n̄an m̧ool in ukweļo̧k.

Matu 3:13–17

Jej ļoor Jisōs Kraist kōn peptaij im bōk Jetōb Kwojarjar eo.

• N̄an etale bwebwenato eo kōn peptaij eo an Jisōs Kraist, kajjieon̄e ļōmņak in: Kajjitōk ippān ro uwaan kūlaaj eo kōn ekōjkan aer maron̄ kōjerbal Matu 3:13–17 n̄an katakin juon armej, ro āinwōt juon ajri, ak juon eo jān bar juon kabun̄, kōn peptaij. (Remaron̄ barāinwōt kōjerbal pija eo ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le Ko.) Ta men ko raorōk an peptaij renaaj kar kōmejajaik? Remaron̄ kōmālmeli ļōmņak ko aer kōn katakin doon.

• N̄an jipan̄ ro uwaan kūlaaj eo kejōkļo̧kjeņ kōn aorōk eo an mour kōn bujen peptaij ko aer, kwomaron̄ kajjitōk ippān juon n̄an riiti ennaan eo an Elder David A. Bednar ilo “Kein Jipan̄ ko Jet.” Ro uwaan kūlaaj eo remaron̄ lem̧ōņōņō in kwaļo̧k en̄jake ko aer kōn peptaij ko aer make im bujen peptaij ko aer. Remaron̄ barāinwōt al juon al kōn ļoor Rilo̧mo̧o̧r eo, eo āinwōt “Come, Follow Me” (Hymns, nō. 116).

• Jon Ripeptaij ekar katakin bwe Riļo̧mo̧o̧r eo enaaj kar peptaij “kōn Jetōb Kwojarjar eo im kōn kijeek (Matu 3:11). Peptaij kōn kijeek ej waļo̧k n̄e jej kapen im jej bōk menin letok eo an Jetōb Kwojarjar. Etke ej aikuj wōr ippād menin letok eo an Jetōb Kwojarjar n̄an eddōkļo̧k ilo aelōn̄ in kiin̄ eo an Anij? Ta eo ej waļo̧k n̄an ro rej peptaij kōn kijeek im kōn Jetōb Kwojarjar ilo kōj? (lale Alma 5:14). Pija in alooj eo “Baptism of the Holy Ghost” (ChurchofJesusChrist.org) emaron̄ jipan̄ iien ekōnono eo.

Kein Jipan̄ ko jet

Bujen peptaij ko ad.

Elder David A. Bednar ekar katakin: “Bujen peptaij ej kobaiki jilu pedped in katak ko: (1) n̄an m̧ōņōņō in bōk iood make etan Jisōs Kraist, (2) n̄an keememej E iien otemjej, im (3) n̄an kōjparok kien ko An. Kōjeram̧m̧an eo an kallim̧ur in ilo kōjparok bujen in ej ‘bwe [jen] bōk Jetōb eo An [ippād] iien otemjej’ [Katak im Bujen Ko 20:77]. Kōn menin, peptaij ej kōppopo eo eaorōk n̄an bōk mālim im iien em̧m̧an n̄an jem̧jerā eo an Jetōb Kwojarjar eo ej m̧ōttan eo kein kajilu ilo bōran Anij” (“Iien Otemjej Jeorļo̧k Jero̧wiwi ko Ami,” Liaona, Māe 2016, 60).

Kōn juon waanjon̄ak kōn juon ļaddik edik ej kōjparok bujen peptaij ko an, lale bwebwenato eo ilo jinoin ennaan eo an Sister Carole M. Stephens “Jej Ke Jeļā Ta Ewōr Ippād?” (Liaona, Nob. 2013, 115–17).

Kōkm̧anm̧anļo̧k Ad Katakin

Katakin katak eo pedped in katak eo. Hyrum Smith ekar katakin, “Kwaļo̧k pedped in katak ko m̧oktata an Gospel eo—kwaļo̧ki im bar kwaļo̧ki; kwonaaj lo men jab in raan n̄an raan, ļōmņak ko rekāāl im eļapļo̧k meram kōn er enaaj waļo̧k n̄an kwe. Kwomaron̄ eddōkļo̧k ioer ejjeļo̧k oktak n̄an alikkar meļeļe kaki. Innām kwomaron̄ kōm̧m̧an bwe ren ļapļo̧k an alikkar aer meļeļe jān ro kwoj katakin” (in History, 1838–1856 [Manuscript History of the Church], volume E-1, 1994, josephsmithpapers.org).