Tē ti’a ra Iesu i roto i te medebara

I roto i te medebara, nā Eva Koleva Timothy

30 nō Tēnuare–5 nō Fepuare

Mataio 4 ; Luka 4–5

« Tei niʼa iho iāʼu te Vārua o te Fatu »

ʼA tuatāpapa ai ʼoe ia Mataio 4 ʼe Luka 4–5, ʼa pāpa’i i tō ʼoe mana’o pae vārua. Nā te reira e ani i te fa’aururaʼa e nāhea ’ia pāhono maita’i a’e i te mau hinaʼaro o tā ʼoe mau pīahi. ’Ia feruri atoʼa paha ʼoe e faʼaʼohipa i te Mai, peʼe mai—nō te taʼata hō’ē ʼe te ʼutuāfare ʼe teie atoʼa arataʼiraʼa nō te ʼite mai i te tahi atu mau manaʼo.

’ītona fa’a’itera’a

Tītau i te mana’o

Tei roto i te taiʼoraʼa nō teie hepetoma teie faʼahitiraʼa parau : « ʼŪmere mai ra rātou i tāna haʼapiʼiraʼa : Tē mana ra hoʼi tāna parau » (Luka 4:32 ; hi’o ato’a Mareko 1:22). E ani i te mau pīahi ’ia fa’a’ite mai i te mau ’īrava nō roto mai i te Mataio 4 ’e Luka 4–5 ’o tei tauturu ia rātou ’ia ’ite i taua mana ha’api’ira’a tumu ra nō rātou iho.

’ītona ha’api’ira’a

Ha’api’i i te ha’api’ira’a tumu

Mataio 4:1–11 ; Luka 4:1–13

ʼUa hōroʼa mai te Metua i te ao ra ia tātou i te mana ʼe te rāveʼa nō te pātoʼi i te faʼahemaraʼa.

• E nehenehe te ʼāʼamu o te Faʼaora i te pātoʼiraʼa ia Sātane e tauturu i te mau pīahi ’ia ʼite i te mau rāveʼa tā Sātane e tāmata nei i te faʼahema ia rātou. ’Ia mā’iti te mau pīahi i te hōʼē o te mau faʼahemaraʼa i roto i te Mataio 4:1–11 ʼaore rā Luka 4:1–13 ʼe ’ia feruri i te hōʼē ā faʼahemaraʼa o teie tau (e tauturu mai te faʼahitiraʼa parau i roto i « Te tahi atu ā mātēria tauturu »). Nō te aha e mea maitaʼi ’ia ʼite ē, ʼua faʼaruru te Faʼaora i te hō’ē ā mau faʼahemaraʼa mai tā tātou e faʼaruru nei i teie mahana ? Nō te aha ’ua ti’a i te Mesia ’ia pātoʼi i te faʼahemaraʼa ? Nō te tahi atu mau hiʼoraʼa nō te mau taʼata tei pātoʼi ia Sātane, ʼa hiʼo Genese 39:7–20 ; 2 Nephi 4:16–35 ; ’e Mose 1:10–22.

• E aha te mea e tauturu ai i te mau pīahi ’ia pātoʼi i te faʼahemaraʼa ? E ani ia rātou ’ia hi’o fa’ahou te Mataio 4:1–11 ’aore rā Luka 4:1–13 nō te ’apo mai e nāhea te ’ite o te Fa’aora nō ni’a i te mau pāpa’ira’a mo’a i te tauturura’a iāna ’ia pāhono atu ia Sātane, mai tāna i nā reira ’a parau ai ’oia, « ’ua pāpa’ihia ». ’A hōro’a i te taime i te mau pīahi ’ia hi’o mai « Fa’ahemara’a » i roto i te Arata’i nō te mau pāpa’ira’a mo’a ’o te nehenehe e fa’a’aito ’e e ha’apūai ia rātou i te taime e ’ite ai rātou ē, tē fa’ahemahia ra rātou.

Luka 4:16–32

’O Iesu Mesia, te Mesia tei tohuhia.

• Nō te tauturu i tā ʼoe mau pīahi ’ia taʼa maitaʼi aʼe i teie ʼāʼamu i roto ia Luka 4:16–32, ʼa haʼamāramarama atu ē, te aura’a o te parau Mesia ’oia ho’i « tei faʼatāhinuhia ». ʼA taiʼo ai te mau pīahi te Luka 4:18–21, e ani ia rātou ’ia feruri e aha te auraʼa ’ia parau ē ’o Iesu te Mesia, ʼaore rā tei Faʼatāhinuhia. E riro ato’a ’ei ’ohipa maita’i ’ia tai’o rātou « tei fa’atāhinuhia » i roto i te Arata’i nō te pāpa’ira’a mo’a. Nāhea Iesu i te paraura’a ē ʼo ʼoia te Mesia i teie mahana ? E nehenehe te mau pīahi e fa’ati’a mai e mea nāhea tō rātou ʼiteraʼa ē, ʼo Iesu Mesia ’o tō rātou ïa Faʼaora.

• Tē vai ra paha te tahi mau haʼapiʼiraʼa maita’i nō te ’apo mai ma te hi’ora’a, nō te aha te mau ta’ata nō Nazareta i ’ore ai e fāriʼi ia Iesu ʼei Mesia tei tohuhia. E aha te mau tumu, ’ei hi’ora’a, tei fa’ahitihia i roto i te Luka 4:22–24 ? I muri iho, e nehenehe te mau pīahi e fa’aau i teie mau huru ’e tō te vāhine ’ivi nō Zarephata ’e tō Naamana i roto i te Faufa’a Tahito, te mau ta’ata e ’ere i te ’āti ’Īserā’ela (hi’o Luka 4:25–27). E nehenehe ʼoe e fārerei ’e e ani nā mua a’e i te tahi mau pīahi ’ia haere ineine mai nō te fa’ati’a poto mai i teie mau ʼāʼamu tāta’itahi (hiʼo 1 Te mau Ariʼi 17:8–24 ; 2 Te mau Ariʼi 5:1–17 ; Luka 4:16–30). E aha tā teie mau ’ā’amu e ha’api’i nei ia tātou nō ni’a i te noa’ara’a te fa’aro’o ia Iesu Mesia ? Tē ’ite ra ānei tātou i te mau poroʼi nō tātou i roto i te mau parau a te Faʼaora i tō Nazareta ?

Mataio 4:18–22 ; Luka 5:1–11

Tē pe’era’a i te Mesia ’o te fa’aru’era’a ïa i tō tātou hina’aro ’e tē fāri’ira’a i tōna.

• I te tahi taime, ʼaita roa e auraʼa te arataʼiraʼa tā te Fatu e hōroʼa mai ia tātou i te haʼamataraʼa. E ’imi te mau pīahi i roto i te Luka 5:1–11, i te mea tā te Faʼaora i ani atu ia Petero ʼe nō te aha Petero i fēʼaʼa ai i tāna mau arataʼiraʼa. Nāhea teie ’ohipa i tupu i te faʼahuru-’ē-ra’a i te mana’o o Petero nō niʼa i te Faʼaora ʼe nō niʼa iāna iho ? E ani i te mau pīahi ’ia faʼaʼite mai i te ’ohipa tei tupu nō rātou i reira tō rātou faʼaʼitera’a i tō rātou faʼaroʼo i roto i te arataʼiraʼa nō te raʼi mai, noa atu ē ʼaita tō rātou māramarama i hope roa. E aha te hopeʼa ’a faʼaʼohipa ai rātou i tō rātou faʼaroʼo ?

  Tō Iesu piʼiraʼa ia Petero ʼe ia Anederea i te pae tahatai

  « ʼA peʼe mai iā’u, e faʼariro vau ia ʼōrua ʼei rava’ai taʼata » (Mataio 4:19).

• Mai te mau taʼata rava’ai tei « faʼaruʼe i te mau mea atoʼa » nō te peʼe ia Iesu Mesia (Luka 5:11), tē vai ra te mau mea e tiʼa ia tātou ’ia faʼaruʼe nō te riro ʼei mau pipi nāna. E aha tā te Mataio 4:18–22 e parau nei nō niʼa i te huru ʼe te faʼaroʼo o Petero, Anederea, Iakobo ʼe Ioane ? Penei a’e e mea maita’i ’ia ’āfa’i mai i te hō’ē ’ūpe’a rava’ai i roto i te piha ha’api’ira’a. I muri iho, e ani i te mau pīahi ’ia pāpa’i i te mau mea ’ua ineine rātou e fa’aru’e ’aore rā ’ua fa’aru’e a’ena rātou nō te pe’e i te Mesia ’e ’ia tu’u atu te reira i roto i te ’ūpe’a. ʼA feruri i te ani i te tahi mau pīahi ’ia faʼaʼite mai, nāhea tō rātou oraraʼa i te tauira’a ʼa māʼiti ai rātou i te faʼaruʼe i te mau mea atoʼa nō te peʼe i te Faʼaora.

’ītona mātēria tauturu

Te tahi atu ā mātēria tauturu

Te mau huru faʼahemaraʼa

I muri a’e i te paraparaura’a nō ni’a i te mau fa’ahemara’a tā te Fa’aora i fa’aruru i roto i te medebara, ’ua fa’a’ite mai te peresideni David O. McKay e toru huru o te mau fa’ahemara’a :

« (1) Te faʼahemaraʼa nō te hiaʼai māʼa ʼaore rā, te mateono ;

« (2) Te toparaʼa i roto i te te’ote’o, te fāito ʼahu, ʼaore rā, te ahaaha ;

« (3) Te hinaʼarora’a i te mau tao’a o te ao nei ʼaore rā, te mana ʼe te faʼaterera’a i ni’a i te mau fenua ʼaore rā, te mau tao’a fenua o te taʼata » (Te mau Haʼapiʼira a te mau Peresideni o te ʼĒkālesia : David O. McKay [2003], 82).

Ha’amaita’ira’a i tā tātou ha’api’ira’a

ʼA haʼamaūruru i tā ʼoutou mau pīahi. « ’Eiaha e ha’apa’o rahi roa i te ha’api’ira’a ’a mo’ehia ia ’outou i te ha’amāuruuru i te mau pīahi nō tō rātou ’āmuira’a mai. E hinaʼaro rātou ’ia ʼite ē, tē māuruuru nei ʼoutou nō tō rātou hina’aro ’ia faʼaʼite i tō rātou manaʼo ʼe tō rātou ʼiteraʼa pāpū » (Haʼapiʼiraʼa mai tā te Faʼaora, 33).