6–12 nō Fepuare

Ioane 2–4

« ’Ia fānau faʼahou ʼoutou e tiʼa ai »

E riro te taiʼoraʼa i te Ioane 2–4 ʼei rāveʼa maitaʼi nō te haʼamata i te faʼaineineraʼa nō te haʼapiʼi. ʼA pāpa’i i te mau faʼaʼiteraʼa pae vārua tā ʼoe i fāriʼi, ʼe ʼa faʼaʼohipa i teie arataʼiraʼa nō te ʼite mai i te tahi atu mau ʼite ʼe mau manaʼo nō te haʼapiʼi.

Tītau i te mana’o

ʼA pāpaʼi e toru upoʼo parau i niʼa i te tāpura ’ere’ere : Ioane 2, Ioane 3, ’e Ioane 4. ʼA hōroʼa i te mau pīahi te tahi minuti nō te taiʼo faʼahou i teie mau pene, ʼe e ani ia rātou i muri iho ’ia pāpaʼi i raro aʼe i te upoʼo parau tātaʼitahi hōʼē ʼīrava tei tauturu ia rātou ’ia taʼa maita’i i te haʼapiʼiraʼa tumu ʼe te mau ʼohipa i tupu i roto i taua pene ra. ʼA tāuʼaparau i te mau ʼīrava tā rātou i pāpaʼi.

Ha’api’i i te ha’api’ira’a tumu

Ioane 2:1–11

« Te mau temeio a Iesu Mesia, « ’ua fa’a’ite mai i tōna hanahana ».

• Tē parau nei Te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare ’ia tai’o i te Ioane 2:1–11 nō te hi’ora’a ātea o te hō’ē ta’ata i reira ’a fa’ariro ai Iesu i te pape ’ei uaina. Penei a’e e fa’a’ite mai te mau pīahi i te mau mana’o tei noa’a ia rātou nā roto i te ravera’a i te reira. E aha tā tātou i ’apo mai nō ni’a i te Fa’aora nā roto mai i teie mau ’īrava ? Nāhea teie temeio i te faʼaʼitera’a i te hanahana o te Atua ?(hi’o ’īrava 11).

Ioane 2:13–22

E nehenehe tātou e pāruru i te mau vāhi ʼe te mau mea moʼa.

• Nō te tauturu i te mau pīahi ’ia ha’api’i mai nā roto mai i te ’ā’amu o Iesu i te tīahira’a i te mau ta’ata taui moni i rāpae i te hiero, e ani atu ’oe ia rātou ’ia feruri i te tahi atu mau mea, ta’a ’ē i te mau hiero, tā te Fatu e fa’ariro nei ’ei mea mo’a. Nāhea tātou i te pāruru i te mo’ara’a o teie mau mea mo’a ?

Ioane 3:1–21

E ti’a ’ia fānau-faʼahou-hia tātou nō te tomo atu i roto i te bāsileia o te Atua.

• Nāhea tātou i te fa’ata’a i te hō’ē ta’ata i te aura’a ’ia fānau-faʼahou-hia ? ʼA feruri i te ani i te mau pīahi ’ia haʼapiʼipiʼi e nāhea rātou i te pāhono atu i teie uiraʼa ʼe te pīahi i pihaʼi iho iāna. ’A nā reira ai rātou, e nehenehe rātou e ’āparau i te mau uira’a mai teie : E aha tā tātou i ’apo mai nā roto mai i te mau parau a Iesu i roto i te Ioane 3:3–7 ? Nāhea te tātarahapara’a, te bāpetizora’a ’e te ha’amaura’a i te tauturu ia tātou ’ia fānau-fa’ahou-hia ? E tauturu te mau fa’ahitira’a parau i roto i « Te tahi atu ā mātēria tauturu » i teie ’āparaura’a.

• Tē ti’aturi nei te tahi pae o te mau ta’ata ē, e’ita te hō’ē ta’ata e nehenehe mau e taui. Terā rā, ’ua riro o Nikodemo ’ei hi’ora’a nō te hō’ē ta’ata tei taui ’ei hope’ara’a nō te pe’era’a i te ’evanelia a Iesu Mesia. Nō te tauturu i te mau pīahi ’ia ʼite i te reira, e ani ’oe ia rātou ’ia ʼimi i roto i te Ioane 3:1–2 ; Ioane 7:45–52 ; ʼe Ioane 19:39–40. E aha tā tātou i haʼapiʼi mai nā roto mai i teie mau pāpaʼiraʼa moʼa nō ni’a i te huru ʼe te mau tiʼaturiraʼa o Nikodemo ? E mea nāhea ’oia i te tauira’a i muri mai ? E aha te mau hiʼoraʼa tā tātou e faʼaʼite atu nō niʼa i te mau taʼata tei taui maoti te ʼevanelia ?

Ioane 4:5–34

’Ua pūpū mai Iesu Mesia te « pape ora » ia tātou ʼe te « ’i’o » nō te rave i te ʼohipa a te Atua.

• E hinaʼaro tō tātou tino i te māʼa ʼe te pape i te mau mahana atoʼa. ʼUa faʼahiti Iesu i teie mau hinaʼaro pā’āto’a, ’a haʼapiʼi ai ʼoia i te vahine nō Samaria ʼe tāna mau pipi (hi’o Ioane 4:5–34). Nō te tauturu i te mau pīahi ’ia taʼa maita’i e aha tā te Faʼaora e haʼapiʼi ra, e nehenehe ʼoe e tāpiri i te mau hōhoʼa o te māʼa ʼe te pape i niʼa i te tāpura ’ere’ere ʼe e ani i te mau pīahi ’ia pāpaʼi i raro aʼe i te hōhoʼa tātaʼitahi i te mau parau mau nō te mā’a ’e te pape pae vārua tā Iesu i haʼapiʼi. Nāhea te Fa’aora i te ha’amāha i tō tātou po’ia pae vārua ’e tō tātou po’ihā pae vārua ?

  

  ’Ua pūpū mai Iesu Mesia i te pape ora ia tātou.

• E tauturu te feruriraʼa nō ni’a i te haerera’a i mua o te ʼiteraʼa pāpū nō Iesu Mesia o te vahine nō Samaria i tā ’oe mau pīahi ’ia feruri, e mea nāhea tō rātou ʼitera’a ē ʼo ’oia te Mesia. ʼEi piha haʼapiʼiraʼa, ʼa hiʼo i te mau parau tā te vahine nō Samaria i faʼaʼohipa nō te faʼahiti i te Faʼaora i roto i te Ioane 4:6–30. E aha tā teie mau parau e faʼaʼite mai nei nō niʼa i tōna ʼite ʼo vai ra Iesu ? Nāhea tātou i te tupura’a i te rahi i roto i tō tātou ʼiteraʼa pāpū ē, ʼo ʼoia tō tātou Faʼaora ?

Te tahi atu ā mātēria tauturu

E aha te auraʼa ’ia fānau-faʼahou-hia.

ʼUa haʼapiʼi Elder David A. Bednar ē : « Te faʼafāriuraʼa … e mea pūai ïa, e ’ere i te mea riʼiriʼi noa—te hōʼē fānauraʼa ʼāpī ʼe te hōʼē tauiraʼa pāpū ’o tā tātou e manaʼo nei ʼe ’o tā tātou e hinaʼaro nei, ʼe i te mea tā tātou e feruri nei ʼe e rave nei, ʼe tō tātou huru i teienei. Nō reira, e faʼatupu te natura mau o te ʼevanelia a Iesu Mesia i te hōʼē tauiraʼa pāpū ʼe te tāmau i roto i tō tātou nei nātura, ʼo tei fa’atupuhia nā roto i tō tātou ti’aturiraʼa i ‘te mana, ʼe te aroha, ʼe te maitaʼi hoʼi o te Mesia mo’a’ (2 Nephi 2:8). ’A mā‘iti ai tātou i te peʼe i te Fatu, ʼua mā’iti ïa tātou ’ia tauihia—ʼe ’ia fānau-faʼahou-hia i te pae vārua ». (« E ti’a ia ’outou ’ia fānau-fa’ahou-hia », Liahona, Mē 2007, 20).

’Ua ha’api’i te peresideni Dallin H. Oaks : « ʼUa fānau-faʼahou-hia tātou ’ia tomo anaʼe tātou i roto i te hōʼē fafauraʼa ’e tō tātou Faʼaora nā roto i te fānauraʼa i te pape ʼe i te Vārua ʼe ma te raveraʼa i niʼa iho ia tātou te iʼoa o Iesu Mesia. Tē faʼaʼāpī nei tātou i taua fānau-faʼahou-raʼa ra i te mau sābati atoʼa ’a rave ai tātou i te ʼōro’a mo’a. Tē haʼapāpū nei te feiā moʼa i te mau mahana hopeʼa nei ē ʼo rātou tei fānau-faʼahou-hia nā roto i teie rāveʼa ʼei mau tamāroa ʼe ʼei mau tamāhine rātou a Iesu Mesia tei fānau-vārua-hia (hiʼo Mosia 5:7 ; 15:9–13 ; 27:25). Terā rā, nō te faʼatupu i te mau haʼamaitaʼiraʼa tei faʼataʼahia nō teie tiʼaraʼa ’ia fānau-faʼahou-hia, e tiʼa ia tātou ’ia haʼapaʼo noa i tā tātou mau fafauraʼa ’e ’ia tāpeʼa e tae roa i te hopeʼa » (« Have You Been Saved ? », Ensign, Mē 1998, 56).

Haʼamaitaʼiraʼa i tā tātou haʼapiʼiraʼa

’Aita te ʼorometua haʼapiʼi i te mea maitaʼi aʼe i te pīahi. E mea faufaʼa rahi tā ʼoutou ʼohipa ’ei ʼorometua, e ʼere rā ʼoutou te tumu anaʼe nō te faʼaururaʼa i roto i te piha haʼapiʼiraʼa. ʼA tauturu i te mau pīahi ’ia ’apo mai nā roto i te Vārua ʼe ’ia faʼaʼite mai i te tahi ’e te tahi i te mea tā rātou i haʼapiʼi mai.