Tē ha’api’i nei Iesu i te ta’ata i te pae tahatai, nā James Tissot

20–26 nō Fepuare

Mataio 6–7

« I ha’api’i ho’i ’oia ia rātou ma te mana »

’A fa’aineine ai ’oe i te ha’api’i, ’a ha’amata nā roto i te fa’aineinera’a ia ’oe iho. ’A tai’o Mataio 6–7, ’e ’a pāpa’i i tō ’outou mana’o pae vārua. Nā teie e tauturu ia ’oe ’ia fāri’i i te heheura’a e nāhea ’ia pāhono maita’i atu i te mau hina’aro o tā ’oe mau pīahi. ’A ’imi i muri iho i teie arata’ira’a nō te mau mana’o tauturu nō te ha’api’ira’a.

Tītau i te mana’o

E ani i te mau pīahi ’ia fa’a’ite mai i te mau tuha’a nō te a’ora’a i ni’a i te mou’a tā rātou e mana’o ra ē, e hina’aro-rahi-hia i teie mahana. ’A fa’aitoito i te mau pīahi ’ia fa’ananea mai i mau mana’o o te tahi ’e te tahi.

Ha’api’i i te ha’api’ira’a tumu

Mataio 6–7

Mai te mea e fa’aro’o ’e e ha’apa’o tātou i te mau ha’api’ira’a a te Fatu, e patuhia tō tātou orara’a i ni’a i te hō’ē niu pāpū.

• E aha te mau ha’api’ira’a ta’a ’ē nā roto mai i te Mataio 6–7 ’o te ha’amaita’i rahi i te mau pīahi tā ’oe e ha’api’i ra ? ’A feruri i te pāpa’i i ni’a i te tāpura ’ere’ere e rave rahi mau fa’ahorora’a nō roto mai i te Mataio 6–7 tē vai nei teie mau ha’api’ira’a. E nehenehe te mau pīahi e mā’iti hō’ē o teie mau fa’ahorora’a nō te tuatāpapa muhu ’ore noa ’e ’ia pāpa’i i muri iho i ni’a i te tāpura ’ere’ere te mau parau mau pae vārua ato’a tā rātou i ’apo mai. Nāhea teie mau ha’api’ira’a i te ha’amaita’i i tō tātou orara’a ?

• ’Ua fa’ahope te Fa’aora i tāna a’ora’a nā roto i te hō’ē parabole ’o te nehenehe e tauturu i tā ’oe mau pīahi ’ia ta’a maita’i i te faufa’a rahi ’ia ora i te mau ha’api’ira’a a te Fa’aora (hi’o Mataio 7:24–27 ; hi’o ato’a Helamana 5:12). Nō te fa’ahōho’a i teie parabole, e nehenehe te mau pīahi e ha’a ’āmui nō te patu i te hō’ē niu pūai ma te fa’a’ohipa i te mau ’ōfa’i, te mau ’āu’a, ’aore rā te tahi atu mau mātēria ’e ’ia tāmata i muri iho i te pūai o tā rātou mau niu. Penei a’e e nehenehe ato’a rātou e tāpa’o i tā rātou mau mātēria patura’a ma te mau mea tā rātou e nehenehe e rave nō te fa’a’ohipa i te mau ha’api’ira’a a te Fa’aora. Nāhea teie mau mea i te tauturu ia tātou ’ia pāruruhia i te mau vero o te orara’a nei ?

Mataio 6:5–13

’Ua ha’api’i te Fa’aora ia tātou e nāhea ’ia pure.

• E nehenehe te tuatāpapara’a i te pure a te Fatu e tauturu i te mau pīahi ’ia ’ite mai e nāhea ’ia ha’amaita’i i tā rātou iho mau pure, ma te pe’era’a i te hi’ora’a o te Fatu. E ani atu ia rātou ’ia pāpa’i i ni’a i te tāpura ’ere’ere te mau pereota nō roto mai i te Mataio 6:9–13 (’aore rā Luka 11:1–4) tei ha’aputapū ia rātou. ’A feruri hōhonu ai tātou i te mau parau a te Fa’aora, e aha tā tātou i ’apo mai nō ni’a i te pure ? E mea maita’i ’ia fa’ahiti te mau pīahi i te tahi o te mau parau a te Fa’aora, mai te mau mea tā rātou e hina’aro e parau i roto i tā rātou iho mau pure. ’Ei hi’ora’a, e nehenehe te pereota « hō mai i te mā’a e au ia mātou i te mau mahana ato’a » ’ia parauhia mai teie te huru « ’a tauturu mai iā’u i roto i tā’u mau tauto’ora’a ’ia fa’a’amu i tō’u nei ’utuāfare ».

• I muri iho i te tai’ora’a i te Mataio 6:5–13 ’ei piha ha’api’ira’a, e nehenehe ’oe e ’āparau i te mau uira’a mai teie : Nāhea te pure i te ha’apūaira’a i tō ’outou aura’a ’e te Metua i te ao ra ? Nāhea te pure i te tauturura’a ia ’outou ’ia ’ite i te hina’aro o te Atua ?

Mataio 7:7–11

E pāhono te Metua i te ao ra i te mau pure.

• Nō te tauturu i te mau pīahi ’ia ha’apūai i tō rātou fa’aro’o ē, e fa’aro’o ’e e pāhono te Atua i tā rātou pure, e nehenehe ’oe e pāpa’i ani, ’imi, ’e pātoto i ni’a i te tāpura ’ere’ere. E ani i muri iho i te mau pīahi ’ia ’imi mai i roto i te mau pāpa’ira’a mo’a te mau hi’ora’a o te mau ta’ata tei « ani », tei « ’imi », ’e tei « pātoto » (’ei mau hi’ora’a, hi’o 1 Nephi 11:1 ; Etera 2:18–3:6 ; Iosepha Semita—’Ā’amu 1:11–17). E aha tā tātou i ’apo mai nā roto i teie mau hi’ora’a nō ni’a i te fāri’ira’a i te mau pāhonora’a i tā tātou mau pure ?

• Te tahi mau hi’o-’ā’ano-ra’a faufa’a rahi nō te Mataio 7:7–11 e ’itehia i roto i te ’Īritira’a a Iosepha Semita nō te Mataio 7:12–17 (i roto te Parau hi’u o te Bibilia). I roto i teie mau ’īrava, ’ua feruri a’ena te mau pipi a Iesu i te tahi mau tumu ē, e hōro’a mai te ta’ata nō te ’orera’a e ’imi i te parau mau nō ’ō mai i tō rātou Metua i te ao ra. E ani atu i te mau pīahi ’ia feruri ē, tē vai nei hō’ē hoa tō rātou ’o tē fa’ataiā nei i te ani i te arata’ira’a ’aore rā i te mau ha’amaita’ira’a a te Fatu. E aha tā te mau pīahi e ti’a e parau nō te fa’aitoito i teie hoa ? Nāhea rātou ’ia fa’a’ohipa i te mau parau a te Fa’aora i roto i te Mataio 7:7–11 ?

Mataio 7:15–20

E nehenehe tātou e ’ite i te mau peropheta mau ’e te mau peropheta ha’avare nā roto i tā rātou mau hotu.

• ’Ua fārerei nā paha tā ’oe mau pīahi i te mau ha’api’ira’a ha’avare ’e te tahi atu mau rāmāra’a a te ’enemi, i ni’a ānei i te itenati ’aore rā nā roto mai i te tahi atu mau rāve’a. ’Ua fa’aro’o ato’a paha rātou vetahi mau ta’ata i te fa’ahapara’a i te mau tāvini a te Fatu. Nāhea ’oe i te tauturu ia rātou ’ia ’ite e nāhea ’ia ta’a i te mau peropheta ha’avare ’e tā rātou ha’api’ira’a ’e te mau peropheta mau ’e tā rātou ha’api’ira’a ? ’A fa’a’ite atu i te tahi mau paeha’a mā’a hotu ’e e ani e aha tā tātou e parau, nō tei hea tumu rā’au teie mau mā’a hotu. Nāhea teie ravera’a e tauturu ai ia tātou ’ia ta’a maitai i te Mataio 7:15–20 ? E nehenehe ato’a ’outou e tai’o ’āmui i te tahi mau poro’i a te mau peropheta ora ’aita i maoro a’enei. E aha te mau « hotu » ’aore rā te mau hope’ara’a nō te pe’era’a i tā rātou a’o e fa’atupu mai ?

  

  E nehenehe tātou e ’ite i te mau peropheta mau nā roto i tā rātou mau hotu.

• E tauturu te Mataio 7:15–20 ’ia patu i te fa’aro’o o te mau pīahi i roto i te misiōni hanahana a te peropheta Iosepha Semita. E aha te mau hotu o te ’ohipa a Iosepha Semita tei fa’aotihia ? Nō te tahi mau mana’o, ’a hi’o i te parau poro’i a Elder Neil L. Andersen « Iosepha Semita » (Liahona, Novema 2014, 28–31). Nāhea tātou ’ia fa’a’ohipa i te fa’aaura’a a te Fa’aora i roto i te Mataio 7:15–20 nō te fa’a’ite pāpū atu i tō tātou mau hoa ’e tō tātou ’utuāfare nō ni’a i te peropheta Iosepha ?

Ha’amata’ira’a i tā tātou ha’api’ira’a

’Eiaha e mata’u i te muhu ’ore. « E tītau te mau uira’a maita’i i te taime nō te pāhono. E tītau te reira i te ferurira’a, te ’imira’a ’e te fa’aurura’a. Te taime e tīa’i ai ’outou i te mau pāhonora’a, e nehenehe e riro ’ei taime maita’i nō te feruri-māite-ra’a. E tinai i te fa’ahemara’a ’ia fa’aoti ’oi’oi i te reira ma te pāhono i tā ’outou iho uira’a, ’aore rā te tu’ura’a mai i te tahi atu mea » (Te Ha’api’ira’a mai tā te Fa’aora,, 31).