27 nō Fepuare–5 nō Māti

Mataio 8 ; Mareko 2–4 ; Luka 7

« ’Ua ora ’oe i tō fa’aro’o »

E ha’amata tā ’oe fa’aineinera’a nō te ha’api’i ’a tuatāpapa ai ’oe nā roto i te pure i te Mataio 8 ; Mareko 2–4 ; ’e Luka 7. E ha’amaita’i te Mai, pe’e mai—nō te mau ta’ata hō’ē ’e te ’utuāfare i tā ’oe tuatāpapara’a ’e e fa’atupu mai i te mau mana’o ha’api’ira’a hau atu i tei hōhorahia i’ō nei.

Tītau i te mana’o

’Ua ’itehia mai paha i te mau pīahi i te mau mana’o pūai i roto i tā rātou iho tuatāpapara’a i te mau temeio i roto i teie mau pene (hi’o te tāpura nō te mau fa’aorara’a a te Fa’aora i roto i te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare). ’A feruri i te ani i te mau pīahi ’ia fa’a’ite mai i tō rātou mana’o i te hō’ē hoa pīahi ’aore rā i te tā’āto’ara’a o te piha ha’api’ira’a.

Ha’api’i i te ha’api’ira’a tumu

Mataio 8 ; Mareko 2 ; Luka 7

E tupu te mau temeio mai te au i te hina’aro o te Atua ’e tō tātou fa’aro’o ia Iesu Mesia.

• Nāhea ’oe i te fa’a’ohipa i te mau ’ā’amu o te mau temeio a te Fa’aora nō te tauturu i te mau pīahi ’ia fa’arahi i tō rātou fa’aro’o iāna ? E ani ia rātou ’ia pāpa’i mai ni’a i te tāpura ’ere’ere e rave rahi fa’aorara’a temeio o te Mataio 8 ; Mareko 2 ; ’e Luka 7. E nehenehe te mau pīahi e ’āparau e mea nāhea te mau ta’ata tei fa’aorahia i te fa’a’itera’a i tō rātou fa’aro’o i te Mesia. E aha tā teie mau ’ā’amu e ha’api’i nei nō ni’a i te fa’aro’o ’e te mau temeio ? ’Ia fa’a’ite mai te mau pīahi i te tahi atu mau parau mau nō ni’a i te fa’aro’o ’e te mau temeio nō roto mai i te Moromona 9:15–21 ; Etera 12:12–16 ; Moroni 7:27–37 ; ’e Te Ha’api’ira’a Tumu ’e te mau Fafaura’a 35:8 (hi’o ato’a Arata’ira’a nō te mau pāpa’ira’a mo’a, « Temeio »). I fea tō tātou ’itera’a i te mau temeio ’a fa’a’ohipa ai tātou i te fa’aro’o ia Iesu Mesia ?

• Tē ha’api’i nei te ’ā’amu o te temeio i roto i te Mareko 2:1–12, e te tahi atu ’ohipa, i te faufa’a nō te ’ohipa-’āmui-ra’a ma te tāhō’ē nō te tauturu i te Fa’aora ’ia aupuru i te feiā i roto i te fifi pae vārua ’aore rā i te pae tino. ’A feruri i te ani i te mau pīahi ’ia hi’o fa’ahou i te ’ā’amu i roto i te mau pāpa’ira’a mo’a ’e ’ia fa’a’ite mai i te tahi atu ā mau mana’o nō roto mai i te parau poro’i a Elder Chi Hong (Sam) Wong « Fa’aora i roto i te tāhō’ē » (Liahona, Novema 2014, 14–16 ; hi’o ato’a « Te tahi atu ā mātēria tauturu » E aha tā tātou i ’apo mai nā roto mai i te Mareko 2:1–12 nō ni’a i te faufa’a o te ’ohipa-’āmui-ra’a ma te tāhō’ē nō te tāvini i te feiā i roto i te fifi ? (hi’o ato’a Mareko 3:24–25).

Mareko 4:35–41

E mana tō Iesu Mesia nō te ’āfa’i mai i te hau i rotopū i te mau vero o te orara’a nei.

• E ’ite paha ’oe i te tahi o te mau fifi e fa’aruruhia ra e tā ’oe mau pīahi. Nō te mea ho’i ē e mau tāmatara’a tō tātou pā’āto’a i te hō’ē taime o tō tātou orara’a, ’a hi’o fa’ahou i te ’ā’amu i roto i te Mareko 4:35–41 ’o tē fa’apa’ari nei i te fa’aro’o o te mau pīahi ē, e ’āfa’i mai te Fa’aora i te hau ia rātou. ’A hōro’a i te pīahi tāta’itahi i te hō’ē ’api parau, ’e e ani ia rātou ’ia pāpa’i i ni’a i te hō’ē pae te hō’ē tāmatara’a tā rātou i fāri’i. I te tahi atu pae, e ani ia rātou ’ia pāpa’i i te tahi mea nō roto mai i te Mareko 4:35–41 ’o te fa’auru ia rātou ’ia fāriu atu i ni’a i te Fa’aora i te roara’a o tō rātou mau tāmatara’a. E fa’aitoito i te mau pīahi ’ia fa’a’ite mai i te mea tā rātou i pāpa’i, mai te mea e hina’aro rātou e nā reira.

• ’Ua niuhia te hīmene « E mea pūai te vero » (Te mau Hīmene, N°52) i ni’a i te ’ā’amu i roto i te Mareko 4:35–41. Penei a’e e ’ite mai te mau pīahi i te mau parau i roto i te hīmene ’o te tū’ati atu i te mau parau i roto i te mau pāpa’ira’a moa. E fa’a’ite ato’a ’oe i te hō’ē hōho’a e fa’a’ite ra i te ’ohipa e tupu ra (hi’o Buka hōho’a o te ’evanelia, N°40) ’e e tāu’aparau i te taime te ta’ata pēni e fa’ahōho’a ra. E aha te tahi atu mau rāve’a e nehenehe ai ’oe e tauturu i te mau pīahi ’ia ta’a maita’i i te aura’a ’e te mana o teie temeio ?

Mai te mata’u tae atu i te fa’aro’o, nā Howard Lyon

Luka 7:36–50

’A fa’a’orehia ai tā tātou mau hara, e hōhonu atu ā tō tātou here i te Fa’aora.

• E aha tā tātou i ’apo mai nā roto mai i te hi’ora’a o te vahine ’e te ha’api’ira’a a te Fa’aora i roto i te Luka 7:36–50 ’a tūtava ai tātou ’ia fa’a’orehia tā tātou iho mau hara ? Nāhea te tātarahapa i te tauturu ia tātou ’ia ha’afātata atu ā ia Iesu Mesia ? Nāhea teie ’ā’amu i te fa’auru i tō tātou hi’ora’a i te feiā tei hara ?

Te tahi atu ā mātēria tauturu

« E ’ite atu ra Iesu i tō rātou fa’aro’o ».

’Ua fa’a’ite mai o Elder Chi Hong (Sam) Wong i te mana’o i muri nei nō ni’a i te ’ā’amu i roto i te Mareko 2:1–12 :

« Tē hina’aro nei au e fa’a’ite atu ia ’outou i te tahi ā faufa’a mo’e tei ’itehia i roto i teie ’ā’amu nō te pāpa’ira’a mo’a. Tei roto i te ’īrava 5 : E ’ite atu ra Iesu i tō rātou fa’aro’o’ (reta tei fa’ahuru-’ē-hia). ’Aita vau i haru i te reira nā mua a’enei―tō rātou fa’aro’o. …

« O vai teie mau ta’ata tā Iesu e parau nei ? E nehenehe e parau ē, ’o nā ta’ata ïa e maha tei amo i te ta’ata hāpepa, te ta’ata hāpepa iho, te mau ta’ata tei pure nōna ’e te mau ta’ata ato’a tei tae mai i reira nō te fa’aro’o i te porora’a a Iesu ma te ’ana’anatae marū noa i roto i tō rātou ’ā’au ’ia tupu te temeio. E nehenehe atoa e parau ē, ’o te hō’ē hoa fa’aipoipo, hō’ē metua, hō’ē tamaiti ’aore rā, hō’ē tamāhine, hō’ē misiōnare, hō’ē peresideni pupu autahu’ara’a, hō’ē peresideni Sōtaiete Tauturu, hō’ē ’episekōpo, ’e hō’ē hoa i te ātea ’ē roa. E nehenehe tātou pā’āto’a e tauturu i te tahi ’e te tahi. E ti’a ia tātou ’ia ’ana’anatae i te ’imi i te fa’aora i te feiā i roto i te ’ati » ( « Fa’aora i roto i te tāhō’ē », Liahona, Novema 2014, 16).

Ha’amaita’i i tā tātou ha’api’ira’a

’A fa’a’ite pinepine i te ’itera’a pāpū. E nehenehe tō ’outou ’itera’a pāpū ’ōhie ’e te hōhonu nō te parau mau pae vārua e riro ’ei fa’aurura’a pūai i ni’a i te feiā tā ’outou e ha’api’i ra. ’Aita tō ’outou ’itera’a e tītauhia ’ia pūai ’aore rā ’ia roa roa. E nehenehe, ’ei hi’ora’a, e riro ’ei ’itera’a ’ōhie noa nō te temeio i te fāri’ira’a i te ’evanelia i roto i tō ’outou orara’a.