6–12 nō Māti

Mataio 9–10 ; Mareko 5 ; Luka 9

« ’O taua Tino ’Ahuru ma Piti nei tā Iesu i fa’atono »

’Ia tai’o ’oe te Mataio 9–10 ; Mareko 5 ; ’e Luka 9, ’a ’imi i te fa’aurura’a a te Vārua Maita’i nō ni’a i te mau hina’aro o te feiā tā ’oe e ha’api’i ra. E tauturu te pāpa’ira’a i tō ’oe mau mana’o pae vārua ia ’oe ’ia fa’aineine nō te hō’ē ’itera’a rau ’o te ha’amaita’i ia ’oe ’e te mau melo o tā ’oe piha ha’api’ira’a.

Tītau i te mana’o

E ani ’oe i te mau pīahi ’ia pāpa’i tāta’itahi i ni’a i te hō’ē ’api parau te hō’ē parau mau tā rātou i ’apo mai nā roto mai i te mau pāpa’ira’a mo’a i teie hepetoma, ’oia ato’a te mau ’īrava pāpa’ira’a mo’a. I muri a’e i te ha’aputura’a i te mau ’api parau, ’a mā’iti e rave rahi nō te tai’o atu i tō te piha ha’api’ira’a. Nāhea tātou ’ia fa’a’ohipa i teie mau parau mau i roto i tō tātou orara’a ?

Ha’api’i i te ha’api’ira’a tumu

Mataio 9

E mana tō te Mesia nō te fa’aora ia tātou i te pae tino ’e i te pae vārua.

• E rave rahi fa’aorara’a temeio a te Fa’aora e ha’api’i ato’a nei i te mau parau mau pae vārua. Nō te tauturu i te mau pīahi ’ia māramarama i te reira, e vāhi ’oe i te piha ’ei maha pupu ’e e hōro’a i te pupu tāta’itahi hō’ē o teie mau tuha’a parau i muri nei : Mataio 9:2–8 ; Mataio 9:18–19, 23–26 ; Mataio 9:20–22 ; ’e Mataio 9:27–31. E ani i te pupu tāta’itahi ’ia tuatāpapa i te temeio i fa’a’itehia i roto i tā rātou tuha’a ’īrava ’e ’ia ha’apoto mai i te reira nō tō te piha ha’api’ira’a. E aha te mau parau mau pae vārua tā tātou i ’apo mai nā roto mai i teie mau temeio ?

’A ti’aturi i te Fatu, nā Liz Lemon Swindle

Mataio 10

’Ua hōro’a te Fatu i tāna mau tāvini i te mana nō te rave i tāna ’ohipa.

• E tauturu te ha’amanara’a a te Fa’aora i tāna mau ’āpōsetolo ia tātou i roto i tā tātou tāta’itahi mau hōpoi’a. E mana’o paha tō te mau pīahi nō teie tumu parau nō roto mai i tā rātou iho tuatāpapara’a ; ’ei hi’ora’a tē vai nei te hō’ē ’ātivite nō ni’a i teie tumu parau i roto i te Mai, pe’e mai—nō te ta’ata hō’ē ’e te ’utuāfare. ’A ani ia rātou ’ia fa’a’ite mai i te mea tā rātou i ’apo mai ’aore rā i ha’a mai ’ei pupu na’ina’i nō te fa’aoti i te ’ātivite i roto i te piha ha’api’ira’a. E ani i te mau pīahi ’ia fa’a’ite mai i te ’ohipa i tupu nō rātou, ’a fāri’i ai rātou i te mana o te Fa’aora, ’a rave ai rātou i tō rātou mau pi’ira’a.

• Nāhea te tuatāpapara’a i te ha’amanara’a tā te Mesia i hōro’a i tāna mau ’āpōsetolo i roto i te Mataio 10 i te tauturu tā ’oe mau pīahi ’ia ta’a maita’i i te ti’ara’a o te mau peropheta ’e te mau ’āpōsetolo nō teie ’anotau ? E riro paha ’ei tauturu ’ia fa’aau i te ha’amanara’a a te Fa’aora i nā ’Ahuru ma Piti ’āpōsetolo i te ha’amanara’a i hōro’ahia i te pupu mātāmua nō te Tino ’Ahuru ma Piti ’āpōsetolo i roto i teie tau tu’ura’a ’evanelia, e ’itehia i roto i « Te tahi atu ā nātēria tauturu ». Penei a’e e fa’a’ite mai te mau pīahi nāhea rātou i te fa’aurura’ahia e te tāvinira’a a te mau ’āpōsetolo ora. ’A fa’a’ite i tō ’oe ’itera’a pāpū nō ni’a i te pi’ira’a hanahana ’o te mau peropheta ’e te mau ’āpōsetolo ora, ’e ’a ani i te mau pīahi ’ia fa’a’ite mai i tō rātou ’itera’a pāpū.

Mataio 10:17-20

’Ia tāvini ana’e tātou i te Fatu, e fa’auru ’oia ia tātou i te mea e parau atu.

• E taiā te mau ta’ata i te tahi taime ’ia ha’ap’i’i ’aore rā ’ia paraparau ia vetahi ’ē i te ’evanelia. ’Ua fafau rā te Fatu i te mau pipi ē, e tauturu ’oia ia rātou ’ia ’ite i te mea e parau atu. E aha tā tātou e ti’a ’ia rave nō te fāri’i i te tauturu tei fafauhia mai e te Fatu nō tātou iho ? E ani i te mau pīahi ’ia tai’o i te Mataio 10:19–20 ; Te Ha’api’ira’a Tumu ’e te mau Fafaura’a 84:85 ; ’e Te Ha’api’ira’a Tumu ’e te mau Fafaura’a 100:5–8 nō te ’ite mai i te mau pāhonora’a i teie uira’a. I ahea tō te Vārua Maita’i tauturura’a ia ’outou ’ia ’ite i te mea e parau atu ? E nehenehe ’oe e fa’a’ite atu i tō ’oe ’ite rau ’e e ani i te mau pīahi ia fa’a’ite mai i tō rātou iho.

Te tahi atu ā mātēria tauturu

E ha’amanara’a i te mau ’āpōsetolo o te mau mahana hope’a nei.

I te taime ’a pi’ihia ai te tahi mau melo mātāmua nō te pupu nō te Tino ’Ahuru ma Piti ’āpōsetolo i teie tau tu’ura’a ’evanelia, ’ua hōro’a Oliver Cowdery ia rātou i te hō’ē ha’amanara’a mai tā Iesu Mesia i hōro’a i roto i te Mataio 10. ’Ua parau ’oia :

« E ’aro atu ’outou i te mau mana’o hape o te mau fenua ato’a … Nō reira, tē fa’aara atu nei au ia ’outou ’ia fa’ananea atu ā i te ha’eha’a rahi, nō te mea ’ua ’ite au i te te’ote’o o te ’ā’au ta’ata. ’A ara, ’oi fa’ateitei ai te feiā fa’ahua o te ao ia ’outou. ’A ara, ’oi haruhia ai tō ’outou mau mana’o here ’e te mau tao’a nō te ao nei. ’Ia nā mua rā tā ’outou tāvinira’a. … [E] tītauhia ’ia fāri’i ’outou i te hō’ē ’itera’a pāpū nō te ra’i mai nō ’outou iho, ’ia ti’a ia ’outou ’ia fa’a’ite pāpū atu i te parau mau …

« ’… E ti’a ia ’outou ’ia fa’a’ite pāpū atu i teie pōro’i i te mau ta’ata ato’a e fa’ariro ia rātou iho ’ei feiā pa’ari. ’E e nehenehe taua mau huru ta’ata ra e hāmani ’ino ia ’outou ; e tītau mai i tō ’outou ora. ’Ua tītau tāmau noa nā te ’enemi i te ora o te mau tāvini a te Atua. Nō reira e ti’a ia ’outou ’ia vai ineine i te mau taime ato’a nō te fa’atūsia i tō ’outou ora, mai te peu e tītau mai te Atua i te reira nō te fa’ahaere i mua ’e nō te patu i tāna ’ohipa …

« I reira ’oia e rave tāta’itahi ai i tō rātou rima ma te parau atu, e rave ānei ’outou ma te ’ā’au tae i tā ’outou tufa’a nō teie misiōni, nō te poro i te ’evanelia ma te itoito ato’a i piha’i iho i tō ’outou mau taea’e, mai te au i te huru ’e te ’ōpuara’a o te hōpoi’a o tā ’outou i fāri’i ?’ ’Ua pahono tāta’itahi mai rātou ma te ha’apāpūra’a (i roto « Minutes and Blessings, 21 February 1835, » Minute Book 1, 159–161, 164, josephsmithpapers.org ; ’ua fa’atanohia te pāpa’ira’a ’e te tomara’a).

Ha’amaita’i i tā tātou ha’api’ira’a

E fa’a’ite pāpū i te mau ha’amaita’ira’a. ’Ia ani ana’e ’outou i te mau pīahi ’ia rave, ’a fa’a’ite pāpū i tā ’outou ma pīahi ē, e fāri’i rātou i te mau ha’amaita’ira’a tā te Atua i fafau ’ia rave ana’e rātou ma te fa’aro’o i tāna mau ha’api’ira’a. ’Eiaha te mau ha’amaita’ira’a ’ia riro ’ei tumu mātāmua roa nō te ha’apa’ora’a, ’ua hina’aro rā te Metua i te ao ra e ha’amaita’i i te tā’āto’ara’a o tāna mau tamari’i. (Hi’o Ha’api’ira’a mai tā te Fa’aora, 35.)