20–26 nō Māti

Mataio 13 ; Luka 8 ; 13

« E tari’a tōna ’ei fa’aro’ora’a ra, e fa’aro’o ’oia »

’A tai’o ai ’oe, ’a feruri i te mau uira’a a tā ’oe mau pīahi, ’a tāmata ai rātou i te ta’a maita’i i te mau pōro’i o te mau parabole. E aha te mea e fifi ai te ta’a-maita’i-ra’a ? Nāhea tā ’oe tuatāpapara’a i te fa’aineine ia ’oe ’ia pāhono atu i tā rātou mau uira’a ?

Tītau i te mana’o

’A hi’o fa’ahou ’e te piha ha’api’ira’a i te « Mau mana’o nō te tauturu i tā ’oe iho tuatāpapara’a i te pāpa’ira’a mo’a » i roto i te Mai, pe’e mai—nō te mau ta’ata hō’ē ’e te ’utuāfare. E ani i te mau pīahi ’ia fa’a’ite mai i te mau rāve’a tā rātou i fa’a’ohipa nō te tuatāpapa i te Mataio 13 ’e Luka 8 ; 13.

Ha’api’i i te ha’api’ira’a tumu

Mataio 13:1–23

E ti’a i tō tātou ’ā’au ’ia ineine nō te fāri’i i te parau a te Atua.

• Nāhea ’oe i te fa’a’ohipa i te parabole nō te ta’ata ueue huero nō te fa’auru i tā ’oe mau pīahi ’ia fa’aineine i tō rātou ’ā’au nō te fāri’i i te parau a te Atua ? E pāpa’i ’oe mau pipi ’e vetahi ’ē i ni’a i te tāpura ’ere’ere. E ani i te mau pīahi ’ia tai’o i te Mataio 13:10–17 ’e ’ia ’imi mai nāhea tō te Fa’aora fa’a’itera’a i te ta’a-’ē-ra’a i rotopū i tāna mau pipi ’e te tahi atu mau ta’ata tei fa’aro’o i tāna mau parabole. I muri iho e ani i te mau pīahi ’ia fāfā māite i te mau ’īrava 18–23, nō te hi’o e aha te tumu « i turi ai » tō tātou tari’a ’aore rā i tāpiri ai tātou i te mata i te mau mea pae vārua. E aha te arata’ira’a tā tātou e fāri’i nei i tō tātou nei ’anotau nō ’ō mai i te Atua ra ’e tāna mau tāvini ? Nāhea tātou ’ia utaru i te « repo maita’i » nō te fāri’i i tā rātou arata’ira’a ? (’īrava 23).

• E ani ’oe i te tahi mau pīahi ’ia haere ineine mai nō te ha’api’i i te hō’ē tuha’a o te pōro’i a Elder Dallin H. Oaks « Te parabole nō te ta’ata ueue huero » (Liahona, Mē 2015, 32–35). E aha tā tāna pōro’i i hōro’a fa’ahou mai i tō tātou hāro’aro’ara’a nō ni’a i te parabole ?

Mataio 13:24–35, 44–53

E tauturu te mau parabole a Iesu ia tātou ’ia māramarama i te tupura’a, te fā, ’e te faufa’a o tāna ’Ēkālesia.

• Nāhea ’oe i te tauturu i te mau pīahi ’ia ta’a maita’i i te parau mau nō ni’a i te ’Ēkālesia, tei ha’api’ihia i roto i te mau parabole a Iesu i roto i te Mataio 13 ? E pāpa’i ’oe i te tahi mau parabole i ni’a i te tāpura ’ere’ere (hi’o te arata’i ha’api’ira’a nō teie hepetoma i roto Mai, pe’e mai—nō te ta’ata hō’ē ’e te ’utuāfare ’e Te Ha’api’ira’a a te mau Peresideni o te ’Ēkālesia : Iosepha Semita, [2007], 293–303). E tuatāpapa te mau pīahi hō’ē ’aore rā hau atu mau parabole ’aore rā ’ei pupu na’ina’i ’e ’ia fa’a’ite mai e aha tā rātou i ’apo mai nō ni’a i te tupura’a ’e te hope’ara’a o te ’Ēkālesia a te Mesia.

’Ua riro te bāsileia o te ao mai te hō’ē ’upe’a a te ta’ata rava’ai.

• E aha tā tātou i ’apo mai nō ni’a i te faufa’a ’ia riro ’ei melo nō te ’Ēkālesia, nā roto mai i te mau parabole nō te tao’a rahi i roto i te fa’a’apu ’e te poe tao’a rahi, e ’itehia i roto i te Mataio 13:44–46 ? ’Ua rave paha te tahi mau pīahi (’aore rā te mau ta’ata tā rātou i mātau) i te mau tusia—e mea rahi ānei ’aore rā e mea na’ina’i ānei—nō te riro ’ei mau melo nō te ’Ēkālesia. ’A ani i te mau pīahi ’ia fa’a’ite mai i te mau tusia tā rātou i rave ’aore rā tā rātou i ’ite ia vetahi ’ē i te ravera’a nō te riro ’ei melo nō te ’Ēkālesia. E aha te mau ha’amaita’ira’a tei tae mai i te pae hope’a ? E ani i te mau pīahi ’ia feruri i te mea tei tūra’i ia rātou ’ia fa’atusia nō te Fa’aora.

Mataio 13:24–30, 36–43

I te hope’a o teie nei ao, e ha’aputuputu te Fatu i te feiā parauti’a ’e e ha’amou ’oia i te feiā ’ino.

• Nāhea ’oe i te tauturu i tā ’oe mau pīahi ’ia ’apo mai i te mau ha’api’ira’a nā roto mai i te parabole o te sitōna ’e te zizania nō te tauturu ia rātou ’ia vai noa ’ei feiā mo’a itoito i te mau mahana hope’a nei ? ’A ha’amata i te ani i te hō’ē pīahi ’ia ha’apoto mai i te parabole ’e tōna aura’a. E aha te tahi mau ha’api’ira’a i roto i teie parabole e au i tō tātou nei ’anotau ? Nō te aha e mea faufa’a roa ’ia ’ite ē e fa’ati’a te Fatu i tāna feiā mo’a ’ia « tupu ’āpipiti » (Mataio 13:30) ’e te feiā ’ino ē tae noa atu i te taime nō te ’ō’otira’a ? Nāhea tātou i te tāpe’a pūai noa i tō tātou fa’aro’o ia Iesu Mesia, ’a hā’atihia ai tātou ato’a i te ’ino ? Nāhea te Mesia i te tauturu ia tātou ? E hōro’a mai Te Ha’api’ira’a Tumu ’e te mau Fafaura’a 86:1–7 ’e te fa’ahitira’a a Elder L. Tom Perry i roto i « Te tahi atu ā mātēria tauturu » i te tahi atu ā mau mana’o nō ni’a i te fa’a’ohipara’a i teie parabole i teie mahana hope’a nei.

Te tahi atu ā mau mātēria tauturu

E ti’a ia tātou ’ia fa’a’amu i te maita’i.

’Ua ha’api’i o Elder L. Tom Perry ē : « ’Ua ’itehia i taua ’enemi tahito ra o te mau ta’ata ato’a e rave rahi mau rāve’a nō te ueue ātea ’e te ’ā’ano i te zizania. ’Ua ’itehia iāna te mau rāve’a nō te tomo roa i roto i te mo’ara’a o tō tātou mau fare. Nō te ’ā’ano o te mau rāveʻa ’ī’ino o te ao nei, mai te huru ra ē, ’aita e rāve’a fa’ahou nō te vāere i te reira. Tē tae mai nei te reira nā roto mai i te niuniu ’e nā roto i te reva, i roto roa i taua iho ra mau mātini tā tātou ho’i i hāmani nō te ha’api’i ’e nō te fa’a’oa’oa ia tātou. ’Ua tupu ’āpipiti noa te sitōna ’e te zizania. E ti’a i te ta’ata ti’a’au i te fa’a’apu ’ia fa’a’amu ma tōna pūai ato’a i te mea maita’i ’e ’ia ha’apūai ’e ’ia fa’anehenehe i te reira ia ’ore te zizania e haru i te mata ’aore rā i te tari’a » (« Te ’itera’a i te hau vai maoro ’e te patura’a i te mau ’utuāfare mure ’ore », Liahona, Novema 2014, 44).

Ha’amaita’i i tā tātou ha’api’ira’a

Fa’atumu i tā ’outou ha’api’ira’a i ni’a i te ha’api’ira’a tumu. ’Ia pāpū maita’i ē, tē fa’atumu nei tā ’outou mau tāu’ara’a parau i ni’a i te ha’api’ira’a tumu niu i roto i te mau pāpa’ira’a mo’a. E nehenehe ’outou e nā reira nā roto i te anira’a atu i te mau pīahi ’ia tai’o nā mua a’e i te mau pāpa’ira’a mo’a, ma te fa’atumu i tā ’outou tāu’ara’a parau i ni’a i te mau pāpa’ira’a mo’a, ’e te anira’a i te mau pīahi ’ia fa’a’ite mai i tō rātou ’itera’a pāpū nō ni’a i te ha’api’ira’a tumu. (Hi’o Ha’api’ira’a mai tā te Fa’aora,, 20–21.)