Iesu e haere ra ’e te mau pipi e ’amo ra i te mau ’ete faraoa

27 nō Māti–2 nō ʼĒperēra

Mataio 14 ; Mareko 6 ; Ioane 5–6

« ’Eiaha e mata’u »

’A fa’aineine ai ’oe nō te ha’api’i nā roto mai i te Mataio 14 ; Mareko 6 ; ’e Ioane 5–6, ’a hi’o i te mau pōro’i faufa’a roa nō tā ’oe piha ha’api’ira’a. ’A nā reira ai ’oe, ’a feruri e nāhea i te ’ume mai i te mau pīahi i roto i te hō’ē ’itera’a rau faufa’a roa ’e te mau pāpa’ira’a mo’a.

ītona fa’a’itera’a

Tītau i te mana’o

Hō’ē rāve’a nō te ha’amata i te hō’ē tāu’ara’a parau ’o te anira’a ïa i te tahi mau pīahi ’ia mā’iti tāta’itahi rātou hō’ē pene o te tai’ora’a ’e ’ia fa’a’ite mai i te hō’ē pōro’i faufa’a roa nō rātou nō roto mai i taua pene ra. ’A fa’a’ite mai ai rātou, e ui atu te tahi atu mau pīahi i te mau uira’a ’aore rā e hōro’a mai i te tahi atu mau mana’o.

ītona ha’api’ira’a

Ha’api’i i te ha’api’ira’a tumu

Ioane 5:16–47

’O Iesu Mesia te Tamaiti Here a te Metua i te ao ra.

• I roto i te Ioane 5, ’ua hōro’a mai Iesu e rave rahi mau fa’a’itera’a nō ni’a iāna iho, tōna Metua, ’e tōna aura’a ’e te Metua. Nō te tauturu i te piha ’ia ’ite i teie mau fa’a’itera’a, ’a tāmata i te vāhi ia rātou ’e ’a hōro’a ia rātou te tahi minuti nō te tāpura i te mau parau mau ato’a e ’itehia mai ia rātou i roto i te mau ’īrava 16–47 nō ni’a i te huru o te Atua ’e o Iesu Mesia, ’e tō rāua aura’a. E ani i te mau pupu ’ia tai’o mai te tahi i muri mai i te tahi i te mau parau mau nō roto mai i tā rātou tāpura. Nāhea teie mau parau mau i te tauturu ia tātou ’ia māramarama maita’i a’e i tō tātou Metua i te ao ra ’e tāna Tamaiti ? Nāhea tātou i te pe’e i te hi’ora’a ha’apa’o o Iesu Mesia i te Metua ?

• Tē ani nei te hō’ē ’ātivite i roto i te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare i te mau pīahi ’ia tāpa’o i te mau taime ato’a e fa’a’ohipa Iesu i te parau Metua i roto i te Ioane 5:16–47. E ani i te tahi mau pīahi ’ia fa’a’ite mai e aha tā rātou i ’apo mai ’a fa’aoti ai rātou i te ’ātivite. E ani ia rātou ’ia fa’a’ite mai i te mau mana’o tei noa’a ia rātou nō ni’a i te Metua i te ao ra ’e tāna Tamaiti Here.

Mataio 14:15–21 ; Mareko 6:33–44 ; Ioane 6:5–14

E ti’a i te Fa’aora ’ia fa’arahi i tā tātou mau pūpūra’a ha’eha’a nō te fa’atupu i tāna mau ’ōpuara’a.

• E aha te mea e tauturu ai i te mau pīahi ’ia ’ite mai i te aura’a nō rātou iho i roto i te temeio a Iesu i te fa’a’amura’a e pae tauatini ta’ata ? E ui atu ’oe, nāhea te tai’ora’a i te parau o te temeio e fa’arahi ai i tō rātou fa’aro’o nō te mana o te Fa’aora nō te ha’amaita’i ia rātou tāta’itahi. E nehenehe rātou e ’āparau mai i te hō’ē taime ’a fa’arahi ai ’aore rā ’a tāta’ipiti ai te Fa’aora i tā rātou mau tauto’ora’a nō te tauturu ia rātou ’ia fa’aoti i te tahi mea e ’ore roa e noa’a ia rātou i te rave. ’Oia ato’a, hou te piha ha’api’ira’a, e nehenehe ’oe e ani i te mau pīahi ’ia ’āfa’i mai i roto i te piha ha’api’ira’a hō’ē hōho’a ’aore rā hō’ē tao’a ’o te fa’ahōho’a i tō rātou ’itera’a rau.

  mau faraoa ’e nā i’a

  Ma te temeio, ’ua fa’atāmā’a Iesu e pae tauatini ta’ata ia e pae faraoa ’e e piti i’a.

• E tauturu te video « The Feeding of the 5,000 [Te fa’atāmā’ara’a e 5 000 ta’ata] » (ChurchofJesusChrist.org) i te mau pīahi ’ia feruri i te temeio e fa’ata’ahia ra i roto i teie mau ’īrava. E aha te tahi mau parau ri’i i roto i teie ’ā’amu tei fa’arahi i tō tātou fa’aro’o i te Fa’aora ? Nāhea te Fa’aora i te fa’atāmā’a ia tātou i te pae vārua ? E aha te taime tātou i te fa’a’amura’ahia ’e i te pāturura’ahia e Iesu Mesia ?

Mataio 14:22–33

Tē ani mai nei Iesu Mesia ia tātou ’ia tu’u i tō tātou mata’u ’e tō tātou fē’a’a i te hiti ’ia nehenehe tātou e haere hope roa iāna ra.

• E tauturu te ’ā’amu i roto i te Mataio 14:22–33 i te mau pīahi ’ia fa’arahi i tō rātou fa’aro’o i te Fa’aora ’e tō rātou hina’aro ’ia pe’e atu iāna. ’A ani i te mau pīahi ’ia tai’o i teie ’ā’amu, ma te ha’apa’o maita’i i te mau parau e parauhia e te Mesia, e Petero ’e te tahi atu mau ’āpōsetolo. Nāhea te mau parau a Iesu i te tauturura’a ia Petero ’ia noa’a te fa’aro’o nō te fa’aru’e i te poti ’e ’ia haere nā ni’a i te ’are ? Nāhea te mau ti’aorora’a a Iesu « ’a fa’aitoito » ’e « ’eiaha e mata’u » (’īrava 27) e tano ai ia tātou i teie mahana ? E aha tā tātou e ha’api’i mai nā roto mai ia Petero nō ni’a i te aura’a ’ia riro ’ei pipi na Iesu Mesia ’e ’ia ti’aturi iāna ? E fa’aitoito ’oe i te mau pīahi ’ia feruri ’e ’ia fa’a’ite mai i te mau ’itera’a rau i reira rātou, mai ia Petero, i te fa’aotira’a e pe’e i te Fa’aora, noa atu e ’ere te hope’ara’a i te mea pāpū roa. E ani ia rātou ʼia faʼaʼite mai e aha tā rātou i ’apo mai nā roto mai i tō rātou ’itera’a. Nāhea Iesu Mesia i te haerera’a mai e tauturu ia tātou i roto i tō tātou mau taime mata’u ’aore rā fē’a’a ?

Ioane 6:22–71

’Ei mau pipi nā te Mesia, e ti’a ia tātou ’ia hina’aro e ti’aturi ’e e fāri’i i te parau mau, noa atu e mea fifi roa ’ia nā reira.

• E hōro’a mai te mau mea i tupu i roto i te Ioane 6 i te hō’ē hi’ora’a ātea hina’arohia, ’ia ui ana’e mai te ta’ata nō ni’a i te ha’api’ira’a tumu, te ’ā’amu ’aore rā te mau fa’aturera’a a te ’Ēkālesia a te Mesia. Nō te tauturu i tā ’oe mau pīahi ’ia māramarama i teie mau ’ohipa i tupu, e pāpa’i ’oe i teie mau uira’a mai teie i muri nei i ni’a i te tāpura ’ere’ere nō rātou nō te pāhono : E aha tā te mau ta’ata e tīa’i ra ? (hi’o ’īrava 26). E aha tā Iesu i pūpū atu ia rātou ? (hi’o ’īrava 51). E aha tā te mau ta’ata i ’ore i ta’a maita’i ? (hi’o mau ’īrava 41–42, 52). E ui atu ’oe i te mau uira’a mai teie te huru nō te tauturu i te mau pīahi ’ia fa’a’ohipa i teie ’ā’amu i tō rātou orara’a : E aha te tahi mau rāve’a tā tātou e nehenehe e mā’iti nō te haere nā muri i te Mesia, noa atu e mau uira’a ’aore rā e mau fē’a’ara’a tō tātou ? (hi’o ’īrava 66). E aha te tahi mau ha’api’ira’a tumu, mau ’ōro’a, ’aore rā te tahi atu mau « parau nō te ora mure ’ore » ’o te nehenehe ana’e e ’itehia i roto i te ’Ēkālesia a te Mesia tei fa’aho’i-fa’ahou-hia mai ?(hi’o mau ’īrava 67–69). Nō te mau hi’ora’a nō roto mai i te hō’ē ’āpōsetolo nō teie ’anotau, hi’o te a’ora’a a te peresideni M. Russell Ballard « ’Ia vai ra tātou e haere ai ? », (Liahona, Novema 2016, 90–92).

Ha’amaita’ira’a i tā tātou ha’api’ira’a

’A fa’aro’o. « Te fa’aro’ora’a e ’ohipa ïa nō te here … ’A ani i te Metua i te ao ra ’ia tauturu mai ia ’outou ’ia māramarama i te mea tā tā ’outou mau pīahi e parau ra. ’A ha’apa’o maita’i ai ’outou i tā rātou mau poro’i tei parau-vaha-hia mai ’aore rā ’aita i parauhia, e māramarama maita’i a’e ’outou i tō rātou mau hina’aro, tō rātou mau māna’ona’ora’a ’e tō rātou mau hia’ai » (Ha’api’ira’a mai tā te Fa’aora, 34