Te fa’ahuru-’ē-ra’a-hia te Mesia

Te fa’ahuru-’ē-ra’a, nā Carl Heinrich Bloch.

10–16 nō ’Ēperēra

Mataio 15–17 ; Mareko 7–9

« ’O te Mesia ’oe »

Hō’ē o tā ’oe mau fā tumu ’ei ’orometua ha’api’i ’o te tauturura’a ïa ia vetahi ’ē ’ia patu i tō rātou fa’aro’o ia Iesu Mesia. ’Ia haʼamana’o noa i te reira ʼa tuatāpapa ai ʼoe i te mau pāpaʼiraʼa moʼa i teie hepetoma. E aha tā ’oe i ’ite mai ’o te nehenehe e tauturu i te mau pīahi ’ia ti’aturi hōhonu atu ā iāna ?

ītona fa’a’itera’a

Tītau i te mana’o

Hō’ē rāve’a nō te fa’aitoito i te mau pīahi ’ia tuatāpapa rātou iho ’e tō rātou ’utuāfare i te pāpa’ira’a mo’a ’o te anira’a ïa ia rātou ’ia fa’a’ite mai i te mau hepetoma ato’a, nāhea tā rātou tuatāpapara’a i te mau pāpa’ira’a mo’a i te tauturura’a ia rātou ’ia fāri’i i te heheura’a ’e i te ha’amaita’i i tō rātou orara’a. ’Ei hi’ora’a, nāhea tā rātou tuatāpapara’a i teie mau pene i te fa’auru i te mau mā’itira’a tā rātou i rave i teie hepetoma ?

ītona ha’api’ira’a

Ha’api’i i te ha’api’ira’a tumu

Mataio 16:13–17

E tae mai te ’itera’a pāpū nō Iesu Mesia nā roto i te heheura’a.

• ’Ua ti’a paha i te hō’ē o tā ’oe mau pīahi ’ia ha’amāramarama atu i te tahi ta’ata e nāhea ’oia i te ’itera’a ē e parau mau te ’evanelia ? I roto i te Mataio16:13–17, e aha tā te Fa’aora i ha’api’i e nāhea tātou ’ia fāri’i i te hō’ē ’itera’a pāpū ? E fa’ati’a atu ’oe, nāhea tō Alama fāri’ira’a i tōna ’itera’a pāpū (hi’o Alama 5:45–46) ’aore rā e aha tā te Fatu i ha’api’i ia Oliver Cowdery nō ni’a i te heheura’a (hi’o Te Ha’api’ira’a Tumu ’e te mau Fafaura’a 6:14–15, 22–23 ; 8:2–3). I tō ’outou mana’o e aha tā Petero ’aore rā tā Alama ’aore rā tā Oliver Cowdery e parau atu, ’āhani ’ua ui mai te tahi ta’ata ia rātou mea nāhea tō rātou ’itera’a ē, e parau mau te ’evanelia ?

• Penei a’e tē vai ra te ta’ata i roto i tā ’oe piha tei pure nō tō rātou iho heheura’a, ’aita rā i ’ite nāhea ’ia ’ite atu i te reira ’ia tae ana’e mai te heheura’a. I ni’a HearHim.ChurchofJesusChrist.org, e ’ite mai ’oe i te mau video i reira te feiā fa’atere o te ’Ēkālesia e fa’ata’a mai ai, nāhea rātou ’ia ’ite i te reo o te Fatu. E māta’ita’i atu hō’ē ’aore rā hau atu o teie mau video ’e te piha ha’api’ira’a ’e e tāu’a parau e aha tā te mau video e ha’api’i nei nō ni’a i te fāri’ira’a i te heheura’a. E aha te tahi atu mau ha’api’ira’a ’aore rā mau pāpa’ira’a mo’a e ha’aferuri i te piha ha’api’ira’a, ’o te tauturu i te tahi ta’ata ’ia ’ite i te heheura’a nōna iho. (’Ei hi’ora’a, hi’o 1 Te mau Ari’i 19:11–12 ; Galatia 5:22–23 ; Enosa 1:1–8 ; Te Ha’api’ira’a Tumu ’e te mau Fafaura’a 6:22–24 ; 8:2–3 ; 9:7–9.)

Mataio 16:13–19 ; 17:1–9

E mea faufa’a te mau tāviri o te autahu’ara’a nō tō tātou fa’aorara’a.

• Nō te ha’amata i te hō’ē ’āparaura’a nō ni’a i te mau tāviri o te autahu’ara’a, e pāpa’i ’oe i teie mau fa’ahorora’a i ni’a i te tāpura ’ere’ere : Mataio 16:19 ; Te Ha’api’ira’a Tumu ’e te mau Fafaura’a 107:18–20 ; 128:8–11 ; 132:18–19, 59 ; Iosepha Semita—’Ā’amu 1:72 ; ’e « Te mau tāviri o te autahu’ara’a » i roto i te Arata’i nō te mau pāpa’ira’a mo’a (scriptures.ChurchofJesusChrist.org). I muri iho e ani i te mau pīahi ’ia tai’o hō’ē ’aore rā hau atu o te mau ’īrava ’e ’ia fa’a’ite mai i te mea tā rātou i ’apo mai nō ni’a i te mau tāviri o te autahu’ara’a. Nō te aha tātou e hina’aro ai te mau tāviri o te autahu’ara’a ?

• Nō te tauturu i te mau pīahi ’ia ha’apūai i tō rātou ’itera’a pāpū nō ni’a i te fa’aho’i-fa’ahou-ra’a-hia mai te mau tāviri o te autahu’ara’a i te mau mahana hope’a nei, e ani atu i te ’āfara’a o te piha ’ia tuatāpapa i te Mataio 17:1–9 ’e i te tahi atu ’āfara’a ’ia tuatāpapa i Te Ha’api’ira’a Tumu ’e te mau Fafaura’a 110. E fa’a’ite mai rātou i muri iho i te tahi ’e te tahi i te mea tā rātou i ’apo mai ’e ’ia tāpa’o i te mau tū’atira’a i roto i nā ’ā’amu e piti. E tauturu ato’a te video « Priesthood Keys: The Restoration of Priesthood Keys [Te mau tāviri o te autahu’ara’a : Te fa’aho’i-fa’ahou-ra’a-hia mai te mau tāviri o te autahu’ara’a » (ChurchofJesusChrist.org).

ti’i o Petero e tāpe’a ra i te mau tāviri

Te mau tāviri o te autahu’ara’a ’o te mana fa’atere ïa nō te arata’i i te fa’a’ohipara’a i te autahu’ara’a.

Mareko 9:14–30

’Ia ’imi ana’e tātou i te fa’aro’o rahi hau atu, e ha’amata tātou ma tō tātou fa’aro’o e vai ra.

• ’Ua fa’a’ohipa Elder Jeffrey R. Holland i te ’ā’amu o te hō’ē metua tāne e ’imi ra ’ia fa’aorahia tāna tamaiti, nō te ha’api’i nāhea e ti’a ia tātou ’ia ha’afātata atu i te Fatu ’ia ’ite ana’e tātou i te nava’i ’ore o tō tātou fa’aro’o (hi’o « E te Fatu, ’ua fa’aro’o vau », Liahona, Mē 2013, 93–95). I muri a’e i te tai’ora’a i te Mareko 9:14–30 ’ei piha ha’api’ira’a, e ’āparau ’āmui ’outou i nā hi’ora’a e toru a Elder Holland (hi’o « Te tahi atu ā mātēria tauturu »).

ītona mātēria tauturu

Te tahi atu ā mātēria tauturu

E toru hi’ora’a nō te tauturu ia tātou ’ia rahi atu ā te fa’aro’o.

I muri a’e i te fa’ati’a-fa’ahou-ra’a i te ’ā’amu i roto i te Mareko 9:14–29, ’ua ha’api’i Elder Jeffrey R. Holland :

« Te hi’ora’a mātāmua o teie ’ā’amu, ’oia ho’i, ’a fa’aruru ai ’oia i te tāmatara’a o te parau nō te fa’aro’o, ’ua fa’ahiti mai te metua tāne i tōna pūai nā mua, ’e i reira noa iho tōna fa’ahitira’a mai i tōna ’ōti’a. E mea pāpū tāna parau fa’ahiti mātāmua ’e e ’aita e mata’ura’a : « E te Fatu, ’ua fa’aro’o vau ». Tē parau atu nei au i te mau ta’ata ato’a o tē hina’aro nei ’ia rahi mai te fa’aro’o, ’a ha’amana’o i teie ta’ata ! I te mau taime o te taiā ’aore rā te fē’a’a ’aore rā te taime fifi rahi, ’a mau pāpū noa i tei noa’a ia ’outou, noa atu ē e mea iti te reira.

« Te piti o te hi’ora’a, e mea ta’a ’ē ri’i ïa i te hi’ora’a mātāmua. ’Ia tupu ana’e mai te mau fifi ’e te mau uira’a, ’eiaha e ha’amata i tā ’outou tītorotorora’a nō te fa’aro’o nā roto i te paraura’a ē ’aita roa atu tā ’outou, inaha e riro mai te reira mai tō ’outou huru ‘ti’aturi ’ore’ … ’Aita vau e ani nei ia ’outou ’ia fa’ahua e fa’aro’o tō ’outou, tā ’outou e ’ore e mau nei. Tē ani atu nei rā vau ia ’outou ’ia vai parau mau noa nō te fa’aro’o tā ’outou e mau ra …

« Te hi’ora’a hōpe’a : ’Ia tae ana’e mai te fē’a’a ’aore rā te fifi, ’eiaha e mata’u i te ani atu i te tauturu. Mai te mea e hina’aro tātou i te reira ma te ha’eha’a ’e te parau mau, mai tā teie metua tāne i rave, e nehenehe tātou e fāri’i i te reira » (« E te Fatu, ’ua fa’aro’o vau », Liahona, Mē 2013, 93–94).

Ha’amaita’ira’a i tā tātou ha’api’ira’a

Ui i te mau uira’a ’o te tītau i te ’itera’a pāpū. E riro te uira’a i te mau uira’a ’o te fa’aitoito i te mau pīahi ’ia fa’a’ite mai i tō rātou ’itera’a pāpū ’ei rāve’a maita’i nō te ani manihini i te Vārua. ’Ei hi’ora’a, ’ia tāu’a parau ana’e ’outou i te Mataio 16:13–17, e nehenehe ’outou e ui atu, « E aha tā ’outou i ’apo mai nō ni’a i te Fa’aora tei ha’apūai i tō ’outou ’itera’a pāpū nōna ’ei Fa’aora ? » (Hi’o Ha’api’ira’a mai tā te Fa’aora, 32.)