3–9 nō ’Ēperēra

Pāsa

« E hade ē, tei hea tō ’oe rē ? »

’A fa’aineine ai ’oe nō te ha’api’i i teie hepetoma, ’a feruri e nāhea te tāu’ara’a parau i roto i tā ’oe piha ha’api’ira’a i te sābati nō pāsa, e paturu ai i te fa’aro’o ia Iesu Mesia ’e i tāna tāra’ehara.

Tītau i te mana’o

E ani i te mau pīahi, nahea rātou e pāhono ai i te mau uira’a mai teie « E aha te tāra’ehara a Iesu Mesia ? » ’e « E nāhea vau ’ia fāri’i i te mau ha’amaita’ira’a o te tāra’ehara a te Mesia ? » E ani ia rātou ’ia fa’a’ite mai i te mau pāpa’ira’a mo’a tā rātou i tai’o i teie hepetoma ’o te tauturu i te pāhono i teie mau uira’a.

Ha’api’i i te ha’api’ira’a tumu

’Ua fa’aora Iesu Mesia ia tātou i te hara ’e te pohe, ’ua ha’apūai ia tātou i roto i tō tātou mau paruparu, ’e ’ua tāmahanahana ia tātou i roto i tō tātou mau tāmatara’a.

• ’Ua ta’a maita’i ānei i tā ’oe mau pīahi ē, tē tāmāhanahana nei Iesu ia tātou i roto i tō tātou mau tāmatara’a ’e tē ha’apūai nei ia tātou i roto i tō tātou mau paruparu, ma te fa’aorara’a ia tātou i te hara ’e i te pohe ? Hō’ē rāve’a nō te tauturu ia rātou ’ia ’ite i teie mau parau tumu ’oia ho’i ’o te pāpa’ira’a ïa i teie mau parau i ni’a i te tāpura ’ere’ere : Hara, Pohe, Tāmatara’a, Paruparu. E tai’o mai te pīahi tāta’itahi hō’ē o te mau pāpa’ira’a mo’a tei tāpurahia i roto i « Te tahi atu ā mātēria tauturu » ’e ’ia feruri mea nāhea te Fa’aora i te tauturu ia tātou ’ia upo’oti’a ’aore rā ’ia fa’a’oroma’i i teie mau mea. E nehenehe te mau pīahi e pāpa’i i muri iho i te mea tā rātou i ’apo mai nā roto mai i teie mau pāpa’ira’a mo’a i raro a’e i te upo’o parau tātai’itahi, ’e ’ia fa’a’ite mai i tō rātou ’itera’a pāpū nō te Fa’aora ’e tāna tāra’ehara.

  

  Fa’asātaurora’a, nā Louise Parker

• Penei a’e e tauturu te hō’ē ha’api’ira’a tao’a ’ōhie i te fa’ahōho’a i te ta’a-’ē-ra’a i roto, ’ia tāmāhia i te hara ’e ’ia maita’i roa : ’A pāpa’i atu i ni’a i te tāpura ’ere’ere i te mau rēni mātāmua nō te Moroni 10:32, ma te tu’u ato’a i te mau hape pīapa ’aore rā te tārame. E ani i muri iho i te hō’ē pīahi ’ia tūmā i te mau hape (’eiaha e fa’a’āfaro). ’Ua tātara ānei te reira i te fifi ? E aha te mau ha’api’ira’a tā tātou i ’apo mai nā roto mai i teie pāpa’ira’a mo’a ’e teie ha’api’ira’a tao’a nō ni’a i te huru tupura’a o te tāra’ehara a te Fa’aora i ni’a ia tātou ? E tauturu ato’a teie fa’ahitira’a parau a te peresideni Dieter F. Uchtdorf : « Mai te peu te aura’a o te fa’aorara’a, o te tumā-noa-ra’a i tā tātou mau hape ’e te mau hara, e’ita te fa’aorara’a―noa atu tōna nehenehe―e fa’atupu i te mau hina’aro o te Metua nō tātou. E mea teitei atu ā tāna tītaura’a : Tē hina’aro nei ’oia ’ia riro mai tāna mau tamaiti ’e tāna mau tamāhine mai iāna ra te huru » (« Te hōro’a o te aroha mau », Liahona, Mē 2015, 108).

• E tauturu te mau ’ā’amu ’e te mau fa’aaura’a ia tātou ’ia ta’a maita’i a’e i te tāra’ehara a te Mesia. E hina’aro paha ’oe e fa’a’ite atu i te hō’ē ’ā’amu ’aore rā te fa’ahōho’ara’a nō roto mai i te hō’ē o te mau a’ora’a o te ’āmuira’a rahi i roto i « Te tahi atu ā mātēria tauturu ». I muri iho e fa’a’ite mai te mau pīahi i te mau mana’o ’aore rā te mau ’āehuehu nō ni’a i te Fa’aora ’e tāna tāra’ehara nō tātou.

Mataio 28:1–10 ; Luka 24:13–35 ; Ioane 20:19–29 ; 1 Korinetia 15:3–8, 55–58

’Ua fa’a’ite pāpū mai te mau ’ite nō te Faufa’a ’Āpi ē, ’ua upo’oti’a Iesu Mesia i te pohe.

• ’A feruri i te hi’o fa’ahou i te ’ā’amu i roto i te pāpa’ira’a mo’a nō ni’a i te pāsa mātāmua—te Ti’afa’ahoura’a o Iesu Mesia. E ani atu i te hō’ē pīahi ’ia fa’ati’a fa’ahou mai i te ’ā’amu mai te au i tāna iho mau parau (hi’o Ioane 20:1–17). E fa’a’ite ato’a atu i te hō’ē video o te Bibilia, mai te « He Is Risen [’Ua ti’afa’ahou mai ’oia] » (ChurchofJesusChrist.org).

• Penei a’e e māramarama maita’i a’e tā ’oe mau pīahi nō ni’a i te faufa’a o te mau ’ite nō te ti’afa’ahoura’a o Iesu Mesia, mai te mea e hāha’anūnui [imaginer] rātou ia rātou iho ’ei mau ’auvaha ture ’aore rā ’ei mau pāpa’i ve’a e tītorotoro ra i ni’a te fa’a’itera’a pāpū ē, ’ua ti’afa’ahou te Mesia. ’A ani ia rātou ’ia ’imi i te mau ta’ata i roto i te mau pāpa’ira’a mo’a ’o te nehenehe e riro ’ei mau ’ite (hi’o Mataio 28:1–10 ; Luka 24:13–35 ; Ioane 20:19–29 ; 1 Korinetia 15:3–8, 55–58). ’Ia pāpa’i ato’a mai rātou i te hō’ē ha’apotora’a nō te mau mea tā teie mau ta’ata e nehenehe e parau, ’a fa’a’ite pāpū ai rātou i mua i te tiripuna ’aore rā ’ia uiuihia rātou nō te hō’ē hōho’a ’itemata.

• Hō’ē rāve’a nō te fa’ahōhonu i tō tātou māuruuru nō te ti’afa’ahoura’a o te Fa’aora ’o te ferurira’a ïa, e nāhea tātou i te ha’amāramarama atu ia vetahi ’ē i tō tātou ti’aturira’a. Nāhea te mau pīahi i te fa’a’ite atu i tō rātou ’itera’a pāpū nō Iesu Mesia i roto i te mau huru hi’ora’a i muri nei : ’ua fāri’i te hō’ē melo o te ’utuāfare i te parau fa’a’ite nō te hō’ē ma’i fifi mau ; ’ua pohe te hō’ē ta’ata herehia o te hō’ē hoa ; ’ua ui mai te hō’ē ta’ata tupu nō te aha ’outou e fa’ahanahana ai i te pāsa. ’A fa’aitoito ia rātou ’ia hi’o atu i te mau pāpa’ira’a mo’a (mai teie i roto i « Te tahi atu ā mātēria tauturu ») ’a fa’aineine ai rātou i tā rātou mau pāhonora’a. E ani i te tahi mau pīahi ’ia fa’a’ite mai i tō rātou mau mana’o.

Te tahi atu ā mātēria tauturu

Mau pāpa’ira’a mo’a nō ni’a i te tāra’ehara ’e te ti’afa’ahoura’a o te Fa’aora.

• Isaia 25:8 ; 53:3–6

• Ioane 20:11–17

• Roma 8:31–39

• 2 Nephi 9:5–12

• Mosia 3:5–10

• Alama 7:10–14 ; 11:42–44

• 3 Nephi 11:8–17 ; 27:13–20

• Moroni 7:41

• Te Ha’api’ira’a Tumu ’e te mau Fafaura’a 19:15–19

Mau pōro’i nō ni’a i te tāra’ehara ’e te ti’afa’ahoura’a o te Fa’aora.

• Dale G. Renlund, « ’A feruri na i te hāmani maita’i ’e te rahi o te Atua », Liahona, Mē 2020, 41–44

• Gerrit W. Gong, « Te tīa’i māmoe maita’i, te Ārenio a te Atua », Liahona, Mē 2019, 97–100

• Sharon Eubank, « Te Mesia : Te māramarama e ’ana’ana i roto i te pōiri », Liahona, Mē 2019, 73–76

• Cristina B. Franco, « Te mana fa’aora o Iesu Mesia », Liahona, Novema 2020, 60–62

Ha’amaita’ira’a i tā tātou ha’api’ira’a

’Ia riro ’ei mauiha’a nō te Vārua. « Tā ’outou fā ’ei ’orometua ha’api’i e ’ere ïa te hōro’ara’a i te hō’ē ha’api’ira’a fa’ahiahia, ’o tē tauturura’a rā ia vetahi ’ē ’ia fāri’i i te mana o te Vārua Maita’i, ’o ’oia ho’i te ’orometua ha’api’i mau » (Ha’api’ira’a mai tā te Fa’aora, 10).