« 17–23 nō ’Ēperēra. Mataio 18 ; Luka 10 : ‘E aha vau e noa’a ai te ora mure ’ore ?’ », Mai, pe’e mai—nō te Ha’api’ira’a Sābati : Faufa’a ’Āpī 2023 (2022)
« 17–23 nō ’Ēperēra. Mataio 18 ; Luka 10 », Mai, pe’e mai—nō te Ha’api’ira’a Sābati : 2023
Te ta’ata maita’i nō Sāmāria, nā Dan Burr
17–23 nō ’Ēperēra
Mataio 18 ; Luka 10
« E aha vau e noa’a ai te ora mure ’ore ? »
’A tai’o i te Mataio 18 ’e Luka 10, ’e ’a pāpa’i i tō ’oe mau fa’a’itera’a pae vārua. ’A fāri’i ai ’oe i te mau fa’a’itera’a, e nehenehe ’oe e ui, mai tā Elder Richard G. Scott i parau, « tē vai atu ā ānei te mau mea e ti’a iā’u ’ia ’ite ? » (« ’Ia fāri’i i te arata’ira’a a te Vārua », Liahona, Novema 2009, 8).
Tītau i te mana’o
Tē vai nei i roto i teie mau pene e rave rahi mau hi’ora’a nō te mau ha’api’ira’a ’evanelia tei ta’a ’ē i tā te ao nei e ha’api’i nei ia tātou. Penei a’e e nehenehe te mau pīahi e fa’a’ite mai i te tahi mau hi’ora’a tā rātou i ’ite mai i roto i tā rātou tai’ora’a i teie hepetoma. Nāhea te Fatu i te ha’amaita’i ia tātou ’ia fa’a’ohipa ana’e tātou i tāna mau ha’api’ira’a ?
Ha’api’i i te ha’api’ira’a tumu
E ti’a ia tātou e fa’a’ore i te hapa a vetahi ’ē mai te mea e hina’aro tātou ’ia fa’aore mai te Fatu i tā tātou hapa.
-
Nāhea ’oe i te fa’a’ohipa i te parabole o te tāvini ’aroha ’ore nō te fa’auru i te mau pīahi ’ia riro ’ei ta’ata fa’a’ore hapa ’ōhie ? Penei a’e te pāpa’ira’a i teie mau uira’a i muri nei i ni’a i te tābula ’ere’ere ’e e ani i te mau pīahi ’ia feruri i te reira ’a fa’ati’a fa’ahou ai te hō’ē pīahi i te parabole : ’O vai tā te ari’i e mono nei ? ’O vai tā te tāvini aroha ’ore e mono nei ? ’O vai tā te taea’e tāvini e mono nei ? E aha te fa’ahōho’ara’a o te mau tārahu ? E ani i te mau pīahi ’ia fa’a’ite mai e aha te mau pōro’i tā te parabole e vai ra nō rātou tāta’itahi. (Hi’o ato’a « Te tahi atu ā mātēria tauturu ».)
-
E nehenehe ’outou e fa’atupu i te hō’ē fa’atanora’a o te parabole nō te tāvini aroha ’ore ’o tē ha’api’i ra i te hō’ē ā mau ha’api’ira’a nō ni’a i te fa’a’orera’a hapa ma te fa’a’ohipa i te mau mea ’e te mau hi’ora’a nō teie mahana. (’A feruri ’ia ’ohipa ia rātou i te reira ’ei pupu.) ’A tāu’a parau e nāhea te parabole i te pāhonora’a i te uira’a a Petero nō ni’a e fea rahira’a taime e ti’a iāna ’ia fa’a’ore i te hapa.
’Ua fa’ahiti Iesu i te moni ’e te tārahu nō te ha’api’i i te parau o te fa’a’orera’a hapa.
Nō te noa’a te ora mure ’ore, e ti’a ia tātou ’ia here i te Atua ’e tō tātou ta’ata tupu.
-
Teie te tahi mana’o ’o te hōro’a i te mau pīahi i te hō’ē hi’ora’a ’āpī nō te parabole o te ta’ata maita’i nō Sāmāria : E ani ia rātou ’ia fa’ahua ē, tē tītorotoro ra rātou i ni’a i te hō’ē ’ohipa tāparahira’a ta’ata ’e te ’eiāra’a i ni’a i te porōmu i rotopū ia Ieriko ’e Ierusalema. E ani i te tahi mau pīahi ’ia haere ineine mai i te piha ha’api’ira’a nō te fa’ahōho’a i te mau ta’ata ta’a ’ē o te parabole ’e ’ia parau mai nō ni’a i tā rātou tufa’a i roto te ’ohipa i tupu. ’Ei hi’ora’a, e aha te tahi mau tumu ’aita te tahu’a ’e te ’āti Levi i fa’aea nō te tauturu i te ta’ata pēpē ? Nō te aha te ta’ata nō Sāmāria i tāpe’a ai ? E aha te mau mana’o tā te ta’ata ha’apa’o fare tīpaera’a e tu’u fa’ahou atu ? E aha tā te ta’ata pēpē i mana’o nō ni’a i te ta’ata tāta’itahi ? ’Ia pāpū ē, e fa’auru te tāu’ara’a parau i te mau pīahi ’ia riro mai te ta’ata maita’i nō Sāmāria ’e te ta’ata ha’apa’o fare tīpaera’a ’e te pāto’ira’a ’ia riro mai te tahu’a ’e te ’āti Levi.
-
Nāhea te parabole nō te ta’ata maita’i nō Sāmāria i te pāhono i te mau uira’a i uihia e Iesu i roto i te Luka 10:25–29 ? E ani i te mau pīahi ’ia parau mai nō ni’a i te mau taime ’a riro ai rātou mai te « hō’ē ta’ata » (’īrava 30) tei hina’aro mau i te tauturu. Nāhea te tauturu i te taera’a mai ? Nāhea tātou, ’ei melo nō te pāroita, e ha’a ’āmui ai nō te tauturu ia vetahi ’ē, mai tā te ta’ata maita’i nō Sāmāria ’e te ta’ata ha’apa’o fare tīpaera’a i rave ?
E mā’iti tātou i « taua mea ti’a ra » nā roto i te ravera’a i te mau mā’itira’a tāmahana ’o te arata’i i te ora mure ’ore.
-
I muri a’e i te tai’o-’āmui-ra’a i te Luka10:38–42 i roto te piha ha’api’ira’a, penei a’e e nehenehe ’oe e ani i te mau pīahi e aha tō rātou huru i ni’a i te a’ora’a a te Fa’aora ’āhani ’o Mareta rātou. Nāhea teie ’itera’a i te fa’atupu mai i ni’a i tā rātou mau mā’itira’a i mua nei ? Nāhea tātou e ’ite ai e aha te mau mea i roto i tō tātou iho orara’a e tītauhia ’ia hōro’a rahi atu i te taime ’e i te tāu’ara’a ? E ’imi te mau pīahi i te parau poro’i a te peresideni Dallin H. Oaks « Maita’i, maita’i a’e, maita’i roa a’e » (Liahona, Novema 2007, 104–8) nō te ’ite mai i te parau a’o ’o te tauturu ia rātou.
Te tahi atu ā mātēria tauturu
Te mau tārahu i roto i te parabole o te tāvini aroha ’ore.
Teie tā Elder Jeffrey R. Holland i parau nō ni’a i te mau tārahu i roto i te parabole o te tāvini aroha ’ore :
« Tē vai nei te mana’o ’e’ē i roto i te mau ’aivana’a nō ni’a i te faufa’a o te moni i fa’ahitihia i’ō nei—fa’a’oroma’i mai ’outou i te fa’a’ohipara’a i te tārā marite—nō te fa’a’ōhie rā i te nūmerara’a, mai te mea e parau tātou i te moni tārahu na’ina’i 100 moni veo, e 100 tārā marite nō teienei, ’ua fātata ïa te 10 000 tārēni tārahu tei fa’a’ore-hua-hia i te 1 mīria—’aore rā hau atu !
’Āhani e tārahu nā tātou, e nūmera rahi roa ïa teie—e’ita e nehenehe e hāro’aro’a. (’Aita e ta’ata e nehenehe e ho’o i ni’a i terā fāito moni !) Nō te tumu o teie parabole, ’ua mana’ohia ïa e’ita te reira e noa’a i te ferurihia ; ’ua mana’ohia e’ita te reira e noa’a i te ’apohia, ’aita ïa vau i paraparau atura nō te ’aufaura’a i te reira. Inaha, e ’ere teie i te ’ā’amu nō nā tāvini e piti e mārō ra i roto i te Faufa’a ’Āpī. E ’ā’amu rā nō ni’a ia tātou, te ’ūtuāfare ta’ata hi’a—te ta’ata tāhuti ’aitārahu, te ta’ata ’ōfati ture ’e te ta’ata mau ’āuri pauroa. E ta’ata ’aitārahu ana’e tātou tāta’itahi, ’e te utu’a, ’o te fare ’āuri ïa nō tātou tāta’itahi. ’E e fa’aea noa ïa tātou i reira maoti rā te aroha o te hō’ē ari’i tei fa’ati’amā ia tātou, nō te mea ’ua here ’oia ia tātou ’e ’ua ‘fa’anu’uhia i roto i te aroha ia tātou nei’ [Te Ha’api’ira’a Tumu ’e te mau Fafaura’a 121:4] » (« ’Ia maita’i roa ho’i ’outou—i te pae hope’a, » Liahona, Novema 2017, 41).
Ha’amaita’ira’a i tā tātou ha’api’ira’a
’A pe’e i te hi’ora’a o te Fa’aora. ’A tai’o ai ’outou i te mau ’ā’amu o te Fa’aora e ha’api’ihia ra i roto i te Faufa’a ’Āpī, ’a hi’o i te mau ha’api’ira’a i roto i tōna hi’ora’a maita’i o te nehenehe e tauturu ia ’outou ’ia riro ’ei ’orometua maita’i a’e. ’Ei hi’ora’a, i roto i te Luka 10:25–37, e aha tā Iesu i rave nō te ha’api’i i te ’auvaha ture e nāhea ’ia noa’a te ora mure ’ore ?