« 24–30 nō ’Ēperēra. Ioane 7–10 : ‘’O vau te tīa’i māmoe maita’i’ », Mai, pe’e mai—nō te Ha’api’ira’a Sābati : Faufa’a ’Āpī 2023 (2022)
« 24–30 nō ’Ēperēra. Ioane 7–10 », Mai, pe’e mai—nō te Ha’api’ira’a Sābati : 2023
E’ita ato’a vau e fa’ahapa ia ’oe, nā Eva Koleva Timothy
24–30 nō ’Ēperēra
Ioane 7–10
« ’O vau te tīa’i māmoe maita’i »
E noa’a ia ’oe ’e i tā ’oe mau pīahi te mau ’ite ’a tai’o ai i te Ioane 7–10 i teie hepetoma. ’A ha’amana’o ē, e riro te mau mana’o i roto i teie arata’i ha’api’ira’a ’ei tauturu noa, ’e’ita rā e mono i te fa’aurura’a tā ’oe e fāri’i nā roto i te tuatāpapara’a i te mau pāpa’ira’a mo’a.
Tītau i te mana’o
’A fa’aha’amana’o i te mau pīahi nō ni’a i te faufa’a rahi ’ia fa’ariro i tō rātou ’utuāfare ’ei ha’apūra’a nō te ha’api’ira’a i te ’evanelia. E ani ia rātou ’ia fa’a’ite mai e aha tā te Vārua Maita’i i ha’api’i ia rātou ’a tuatāpapa ai rātou i te Ioane 7–10 i te fare, ’ei ta’ata hō’ē ’aore rā ’ei ’utuāfare.
Ha’api’i i te ha’api’ira’a tumu
’O Iesu Mesia te Fa’aora o te ao nei.
-
I roto i te Ioane 7–10, ’ua parau te Fa’aora e rave rahi mau fa’ahitira’a nō te tauturu i te mau pīahi ’ia ta’a maita’i i tāna misiōni ’e ’ia ha’afātata atu ā iāna. ’A feruri i te ani i te mau pīahi ’ia tai’o i teie mau pāpa’ira’a mo’a i muri nei ’e ’ia fa’a’ite mai e aha tā te reira e ha’api’i nei nō ni’a i te misiōni hanahana a te Fa’aora. Nāhea tō te Mesia fa’aotira’a i teie mau ti’ara’a i roto i tō tātou orara’a ?
-
Ioane 7:37–39 : Te tumu nō te « pape ora »
-
Ioane 8:12 ; 9:4–5 : « Te māramarama o te ao »
-
Ioane 9:8–10, 35–38 : « Te Tamaiti a te Atua »
-
Ioane 10:7–9 : « Te ’ūputa »
-
Ioane 10:11–14 : « Te tīa’i māmoe maita’i »
-
Māramarama o te ao, nā Howard Lyon
’A ora ai tātou i te mau ha’api’ira’a a Iesu Mesia, e ’ite mai tātou ē e parau mau te reira.
-
’Ia ’ite mai ’outou, te noa’ara’a te hō’ē ’itera’a pāpū ’ua riro mai te fāri’ira’a i te hō’ē ’aravihi—e tītau nā mea e piti i te fa’a’ohipara’a ’e te ’itera’a. Nō te fa’ahōho’a i te reira, e ani ’oe i te mau pīahi e ’aravihi ta’a ’ē tō rātou, mai te ta’ata ’apo pōpō ’aore rā te ta’ata ha’uti i te hō’ē ’upa’upa, nō te fa’ata’a mai mea nāhea tō rātou fa’ananeara’a i tō rātou ’aravihi. Nō te aha ’aita e nava’i ’ia tai’o noa nō ni’a i te ’aravihi ’aore rā te māta’ita’ira’a i te tahi atu ta’ata ’ia rave i te reira ? ’Ei piha ha’api’ira’a, ’a tāu’a parau e nāhea te tauto’ora’a i roto i te fa’a’ohipara’a o te hō’ē ’aravihi e tū’ati ai i te hōho’a pae vārua tā te Fa’aora i fa’a’ite i roto i te Ioane 7:14–17. E aha te ta’a-’ē-ra’a ?
-
Penei a’e e nehenehe te mau pīahi e fa’ati’a mai i te mau ’itera’a, i reira tō rātou orara’a i te hō’ē parau mau nō te ’evanelia tei tauturu ia rātou ’ia noa’a te hō’ē ’itera’a pāpū. ’A hōro’a i te taime i te mau pīahi ’ia feruri i te hō’ē parau tumu o te ’evanelia, ’o tā rātou e hina’aro ’ia fāri’i i te ’itera’a pāpū pāutuutu maita’i, i muri iho ’a fa’aitoito ia rātou ’ia ha’amau i te mau fā pāpū nō te ora mau i taua parau tumu ra.
’Ua parare te aroha o te Fa’aora i te mau ta’ata ato’a ’o tei tātarahapa.
-
Nō te feiā e mana’o nei ’ua fa’ahapahia rātou nō tā rātou mau hara, e riro te ’ā’amu o te Fa’aora tei hōro’a i te aroha ’e te tātarahapa i te vahine tei ro’ohia e fa’aturi ra, ’ei tumu nō te fa’aitoitora’a. ’E ’aore rā mai te mea e fa’ahemahia te mau pīahi e fa’ahapa ia vetahi ’ē nō tā rātou mau hara, e riro teie ’ā’amu ’ei fa’aarara’a. E ani atu ’oe ia rātou ’ia tai’o i te Ioane 8:1–11, ma te ’imi i te mau pāhonora’a i te mau uira’a mai teie : E aha tā teie ’ā’amu e ha’api’i nei nō ni’a i te aroha o te Fa’aora ? Nāhea te fāri’ira’a i tōna aroha ’ia hara ana’e tātou, i te tauturu ia tātou i te taime e fa’ahemahia ai e ha’avā ia vetahi ’ē ? (hi’o Alama 29:9–10).
-
Nō te tauturu i te mau pīahi ’ia ’ite mai i te aura’a nō rātou iho i roto i te Ioane 8:1–11, ’a feruri e vāhi i te piha nā roto e toru pupu—hō’ē e fa’atumu i ni’a i te mau parau ’e te mau ’ohipa a te mau pharisea, hō’ē e fa’atumu i ni’a i te mau parau ’e te mau ’ohipa a te Fa’aora, ’e hō’ē e fa’atumu i ni’a i te mau parau ’e te mau ’ohipa a te vahine. ’Ia rave rātou i te reira ma te tai’ora’a i te ’ā’amu ’aore rā te māta’ita’ira’a i te video « Go and Sin No More [’A haere ’e ’eiaha e hara fa’ahou] » (ChurchofJesusChrist.org). E ani i te pupu tāta’itahi ’ia tāpura mai i te mau parau mau pae vārua tā rātou i ’apo mai nā roto mai i te tai’ora’a i te mau tuha’a tāta’itahi o te ’ā’amu.
-
’Aita tātou i te tahi taime, e feruri ra i te huru tātou e ha’avā ai ia vetahi ’ē. Teie te hō’ē ’ātivite nō te tauturu i te mau pīahi ’ia upo’oti’a i ni’a i teie peu : E ani i te tauturu a te mau pīahi nō te tāpura i te mau huru tātou e ha’avā ai i te ta’ata (’ia au i tō rātou hōho’a mata, tō rātou huru, tō rātou orara’a nā mua atu, ’e te tahi atu ā). ’A hōro’a i te mau pīahi te mau ’api parau tāpūpūhia mai te hōho’a o te hō’ē ’ōfa’i, ’e e ani ia rātou ’ia mā’iti i te hō’ē huru nō te ha’avā ia vetahi ’ē ’o tā rātou i mana’o ’ua hape rātou, ’e ’ia pāpa’i te reira i ni’a i te hō’ē ’ōfa’i ’pāpie. E aha tā tātou i ’apo mai nā roto mai i te mau parau a te Fa’aora i te mau pharisea i roto i te Ioane 8:1–11 ? E ani i te mau pīahi ’ia pāpa’i i muri i te ’api parau ’ōfa’i, te tahi mea ’o te fa’aha’amana’o ia rātou ’eiaha e ha’avā (penei a’e te hō’ē pereota i roto i te Ioane 8).
’Ia ha’api’i ana’e mai tātou ’ia ’ite ia Iesu Mesia, e ha’api’i ato’a mai tātou ’ia ’ite i te Metua.
-
E aha tā te mau parau a te Fa’aora e ha’api’i nei i roto i te Ioane 8:18–19, 26–29 nō ni’a i te tū’atira’a i rotopū iāna ’e tōna Metua Tāne ? I muri a’e i te tai’ora’a ’e te tāu’aparaura’a i teie mau ’īrava, e nehenehe te mau pīahi e pāpa’i i ni’a i te tāpura ’ere’ere i te tahi mau mea tā Iesu i rave, i parau, ’aore rā i ha’api’i. E aha tā tātou i ’apo mai nō ni’a i te Atua te Metua nā roto mai i teie mau ’ohipa ?
Ha’amaita’ira’a i tā tātou ha’api’ira’a
’A ora ma te ti’a mā nō te arata’ira’a a te Vārua. ’Ia ora ana’e ’outou i te ’evanelia, ’ua ti’a mā ïa ’outou i te auhoara’a a te Vārua. ’A ’imi ai ’outou i tāna arata’ira’a, e hōro’a mai te Vārua Maita’i ia ’outou te mau mana’o ’e te mau fa’a’itera’a e nāhea ’ia pāhono atu i te mau hina’aro o te feiā tā ’outou e ha’api’i ra. (Hi’o Ha’api’ira’a mai tā te Fa’aora, 5.)