« 1–7 nō Mē. Luka 12–17 ; Ioane 11 : ‘E ’oa’oa ato’a tātou ; ’ua ’itea ho’i iā’u tā’u māmoe i mo’e ra’ », Mai, pe’e mai—nō te Ha’api’ira’a Sābati : Faufa’a ’Āpī 2023 (2022)
« 1–7 nō Mē. Luka 12–17 ; Ioane 11 », Mai, pe’e mai—nō te Ha’api’ira’a Sābati : 2023
Te tamaiti pūhura, nā Liz Lemon Swindle
1–7 nō Mē
Luka 12–17 ; Ioane 11
« E ’oa’oa ato’a tātou ; ’ua ’itea ho’i iā’u tā’u māmoe i mo’e ra »
’A ha’amata i tā ’oe fa’aineinera’a nā roto i te pure nō te tuatāpapa i te Luka 12–17 ’e te Ioane 11. E aha te « māmoe i mo’e ra » i roto i tā ’oe piha ha’api’ira’a tei tae mai i te ferurira’a ? ’A fa’a’ohipa i te Mai, pe’e mai—nō te ta’ata hō’ē ’e te ’utuāfare ’e teie arata’i ha’api’ira’a ’a ’imi ai ’oe i te arata’ira’a a te Fatu e nāhea ’ia pāhono maita’i atu i te mau hina’aro o tā ’oe mau pīahi, noa atu ’aita rātou e tae mai nei i te piha ha’api’ira’a.
Tītau i te mana’o
Te fa’a’ohipara’a e tuha’a faufa’a mau nō te ha’api’ira’a mai, nō reira e ani i te mau pīahi ’ia fa’a’ite mai e mea nāhea tō rātou mā’itira’a ’ia ora i te tahi mea tā rātou i ’apo mai nā roto mai i te mau pāpa’ira’a mo’a i teie hepetoma.
Ha’api’i i te ha’api’ira’a tumu
’Aore e ’otohera’a e nāva’i nō te pāto’ira’a i te ’evanelia.
-
Nō te tauturu i te mau pīahi ’ia tuatāpapa i te parabole nō te tāmā’ara’a rahi, e ani ’oe ia rātou ’ia haere mai i te hō’ē tāmā’ara’a mana’o-noa-hia, tā ’oe e fa’atupu. E vaiiho ia rātou ’ia fa’a’ite mai i te tahi mau tumu nō te aha rātou e tae mai ai ’aore rā e ’ore e tae mai. ’A tai’o ’āmui i te Luka 14:15–24 ’e ’a tāu’aparau i te mau ’otohera’a tā te ta’ata i parau i roto i te parabole ’a anihia ai rātou ’ia haere mai i te hō’ē tamā’ara’a, tei fa’ahōho’ahia i te mau ha’amaita’ira’a o te ’evanelia. E aha te mau ’otohera’a tā te ta’ata e rave nei i teie mahana, nō te ’orera’a e fāri’i i te mau anira’a a te Fa’aora ’ia fāri’i i te mau ha’amaita’ira’a a te Metua i te ao ra ? Penei a’e, e nehenehe te mau pīahi e fa’a’ite mai i te mau ha’amaita’ira’a tā rātou i fāri’i ’a rave ai rātou i te mau tusia i tītauhia nō te ora i te tahi mau parau tumu o te ’evanelia.
E nehenehe tātou e ’imi i te feiā tei mo’e ’e ’ia ’oa’oa ’e te Metua ’ia ho’i ana’e mai rātou.
-
Nāhea ’oe i te hōro’a i te mau pīahi i te rāve’a nō te fa’a’ite mai, i te mea tā rātou i ’apo mai nō ni’a i nā parabole e toru i roto i te Luka 15 ? ’A feruri e hōro’a i te pīahi tāta’itahi hō’ē o nā parabole nō te hi’o fa’ahou. E nehenehe rātou e ’imi ’e e fa’a’ite mai i te mau pāhonora’a i te mau uira’a mai teie : E aha te mau parau i roto i te parabole tei heheu mai, e aha tā tō tātou Metua i te ao ra e fāri’i ra nō te feiā tei mo’e ? E aha tā te mau parabole e parau nei, e nāhea e ti’a ia tātou ’ia toro i te rima i te mau tamari’i ato’a a te Atua ? ’Ia fa’a’ite mai te mau pīahi, e mea nāhea tō te Fa’aora ’itera’a mai ia rātou ’a mana’o ai rātou ē, ’ua mo’e rātou.
-
E riro te hīmene ’āmuira’a « Auē te aroha rahi o te tīa’i māmoe » (Te mau Hīmene, N°133) i te tauturu atu ā i te mau ha’api’ira’a a teie mau parabole.
-
’A tai’o ’āmui ai ’outou i te parabole nō te tamaiti pūhura, e fāna’o maita’i te mau pīahi ’ia rōtahi rātou i ni’a i te mau parau, te mau ’ohipa ’e te mau ti’aturira’a o te ta’ata tāta’itahi i roto i te parabole. E aha tā tātou i ’apo mai nō ni’a i teie mau ta’ata tāta’itahi ? Penei a’e, e nehenehe tā te mau piahi e pāpa’i i te tahi hope’ara’a ’ē atu nō te parabole, ’o tē fa’a’ite mai i te huru ta’a ’ē o te taea’e matahiapo i ni’a i tōna teina. E aha tā te a’o a te metua tāne i roto i te parabole e ha’api’i nei ia tātou, nō ni’a i tō tātou huru i mua i te feiā tei mo’e ’e te feiā tei ho’i mai i te ’evanelia ? (hi’o ato’a i te fa’ahitira’a parau a Elder Jeffrey R. Holland i roto « Te tahi atu ā mātēria tauturu ».) ’E ’aore rā e ani ’oe i te mau pīahi ’ia feruri ’o rātou te metua tāne i roto i teie parabole. E aha te tahi atu ā a’o tā rātou e hōro’a atu i te tamaiti matahiapo nō te tauturu iāna ’ia ’oa’oa i te haerera’a i mua ’aore rā te manuiara’a o vetahi ’ē ?
E ha’afātata te ’ā’au māuruuru nō tō’u mau ha’amaita’ira’a iā’u i te Atua.
-
E ani i te mau pīahi ’ia fa’a’ite mai e aha tā rātou i ’apo mai nō ni’a i te ’ā’au māuruuru nā roto mai i tā rātou tuatāpapara’a i te Luka 17:11–19 ’e te video « President Russell M. Nelson on the Healing Power of Gratitude [Peresideni Russell M. Nelson nō ni’a i te mana fa’aora o te ’ā’au māuruuru] » (ChurchofJesusChrist.org). Nāhea te lēpera tei ’ī i te māuruuru i te ha’amaita’ira’ahia nō te fa’a’itera’a i tōna ’ā’au māuruuru ? Nāhea tātou i te ha’amaita’ihia ’ia fa’a’ite ana’e tātou i tō tātou ā’au māuruuru ? ’Ia hōro’a mai te mau pīahi te mau rāve’a tātou e nehenehe ai e fa’a’ite i tō tātou ’ā’au māuruuru i te Atua ’e ia vetahi ’ē.
’O Iesu Mesia te ti’afa’ahoura’a ’e te ora.
-
Hō’ē rāve’a nō te hi’o maita’i i te Ioane 11:1–46 ’o te anira’a ïa i te mau pīahi ’ia tai’o i te mau ’īrava te tahi i muri mai i te tahi ’e e ani ia rātou ’ia fa’aea ’e ’ia ’āparau, ’ia ’itehia mai ia rātou te tāpa’o fa’a’ite nō te fa’aro’o ia Iesu Mesia. E ani ato’a i te mau pīahi ’ia feruri i te mau hi’ora’a ātea o te mau ta’ata i roto—’oia ho’i te Fa’aora, te mau ’āpōsetolo, Mareta, Maria ’e o Lazaro. E aha tā tātou e ’apo mai nō ni’a ia rātou tāta’itahi ? Penei a’e, e nehenehe te mau pīahi e fa’a’ite mai i te mau ’itera’a rau, i te taime ’a ha’apūaihia ai tō rātou fa’aro’o ia Iesu Mesia i roto i te tāmatara’a.
Te tahi atu ā mātēria tauturu
Ha’api’ira’a mai nā roto mai i te tahi atu pūhura.
Teie tā Elder Jeffrey R. Holland i parau nō ni’a i te tua’ana o te tamaiti pūhura : « ’Aita teie tamaiti i riri rahi nō te ho’ira’a mai te tahi i te fare, tōna riri rahi, te ’oa’oa rahi o tōna nā metua nō te reira … E ti’a iāna ’ia roa’a ā te ’ā’au aroha ’e te aroha rahi, te ’ā’anora’a o te hi’ora’a ātea nō te ’ite ē e ’ere teie i te ’enemi e ho’i mai ra. E taea’e rā teie nōna. ’Ua tāparu tōna metua tāne iāna ’ia fāri’i ē, ’ua pohe nā ’e i teienei ’ua ora mai. I mo’e na, ’e ’ua ’itea mai nei » (« Te tamaiti pūhura, » Liahona, Mē 2002,63).
Ha’amaita’ira’a i tā tātou ha’api’ira’a
’A toro atu i te rima i taua ta’ata ra. Mai te tīa’i māmoe i roto i te parabole a te Fa’aora (hi’o Luka 15:4), « e nehenehe tā ’outou e toro atu i te rima i te mau pīahi e ’ore e tae mai nei i te piha ha’api’ira’a. Tā ’outou mau rāve’a nō te ha’api’i ’e nō te fa’aitoito i te mau pīahi ’e te tauturura’a ia rātou ’ia haere mai i te Mesia ra, i rāpae atu i te piha ha’api’ira’a ’e i te mau pīahi e tae mai nei i tā ’outou mau ha’api’ira’a » (Ha’api’ira’a mai tā te Fa’aora, 8).