Tae-piti-ra’a mai

Te tae-piti-ra’a mai, nā Harry Anderson

22–28 nō Mē

Iosepha Semita—Mataio 1 ; Mataio 24–25 ; Mareko 12–13 ; Luka 21

« E tae mai te Tamaiti a te Ta’ata nei »

’A ha’amana’o i te ha’amata i tā ’oe fa’aineinera’a nō te ha’api’i nā roto i te tai’ora’a nā roto i te pure i te Iosepha Semita—Mataio 1 ; Mataio 24-25 ; Mareko 12–13 ; ’e Luka 21. ’A ’imi i te fa’aurura’a nā roto ia ’oe iho, ’e ’a hi’o fa’ahou i teie fa’anahora’a nō te tahi atu ā mau mana’o tauturu.

ītona fa’a’itera’a

Tītau i te mana’o

’A pāpa’i i ni’a i te tāpura ’ere’ere i te hō’ē tāpura nō te mau parabole a te Fa’aora e ’itehia i roto i te tai’ora’a nō teie hepetoma, mai te tumu suke, te ta’ata maita’i ’e te ta’ata ’ino, te ta’ata fa’aro’o ’e te mau tāvini ’ino, nā pāretenia tino ’ahuru, te mau tāleni, ’e te māmoe ’e te mau pua’aniho. E ani i te mau pīahi ’ia fa’a’ite mai i te parau mau tā rātou i ’apo mai nā roto mai i teie mau parabole ’o te tauturu ia rātou ’ia fa’aineine nō te tae-piti-ra’a mai o te Fatu. E aha tā rātou e rave nō te fa’a’ohipa i teie mau parau mau i roto i tō rātou orara’a ?

ītona ha’api’ira’a

Ha’api’i i te ha’api’ira’a tumu

Iosepha Semita—Mataio 1:21–37

E tauturu te mau tohura’a nō ni’a i te tae-piti-ra’a mai o te Fa’aora ia tātou ’ia fa’aruru i te ’ananahi ma te fa’aro’o.

• E mea fifi paha nō te tahi mau pīahi ’ia ta’a maita’i i te mau tāpa’o o te tae-piti-ra’a mai o te Fa’aora. E tauturu te reira ia rātou ’ia ’ohipa tāpupu ’e ’ia ’imi mai i te mau tāpa’o tā rātou e ’ite mai i roto i te Iosepha Semita—Mataio 1:21–37. E nehenehe ato’a te reira e tauturu ia rātou ’ia ta’a maita’i i te faufa’a rahi o teie mau tāpa’o mai te mea e fa’aau atu rātou i te reira i te mau tāpa’o purūmu. Nō te aha e mea faufa’a rahi te mau tāpa’o purūmu ? Nāhea te mau tāpa’o nō te tae-piti-ra’a mai e tano ai mai te mau tāpa’o purūmu ? E aha te ta’a-’ē-ra’a ? E nehenehe ato’a tā ’oe e hōro’a atu i te mau pupu tāta’itahi i te mau hōho’a ’api parau o te mau tāpa’o purūmu ’e e ani ia rātou ’ia pāpa’i i ni’a iho hō’ē tāpa’o hou te tae-piti-ra’a mai. E vaiiho ia rātou ’ia fa’a’ite mai i te mea tā rātou i ’ite mai, ’e e ani i te mau pīahi ’ia ’āparau mai i te mau ha’apāpūra’a o teie mau tāpa’o i te ao nei i teie mahana.

Iosepha Semita—Mataio 1:26–27, 38–55 ; Mataio 25:1–13

E ti’a ia tātou ’ia vai ineine noa nō te tae-piti-ra’a mai o te Fa’aora.

• E nehenehe te mau parabole i roto i te Iosepha Semita—Mataio1:26–27, 38–55 ’e Mataio 25:1–13 e tauturu i te mau pīahi ’ia ’ite i te faufa’a rahi ’ia vai ineine noa nō te tae-piti-ra’a mai. E ani i te mau pīahi ’ia ’imi mai i roto i teie mau ’īrava ’e ’ia fa’a’ite mai e aha tā rātou e mana’o ra, tē ani mai nei te Fa’aora ia tātou ’ia rave. ’Ua hōro’a mai o Elder David A. Bednar i te hō’ē tātarara’a nō te parabole o nā pāretenia tino ’ahuru ’o te nehenehe e tauturu (hi’o « Te tahi atu ā mau mātēria tauturu »). Nō te aha e ti’a ia tātou iho ’ia ora i tō tātou iho fa’afāriura’a ? Nāhea tātou ’ia rave i te reira ? E aha atu ā tā Te Ha’api’ira’a Tumu ’e te mau Fafaura’a 45:56–57 e hōro’a mai nei i tō tātou hāro’aro’ara’a nō ni’a i teie parabole ?

• ’A ha’api’i mai ai ’oe nō ni’a i te ho’ira’a mai o te Fa’aora, e nehenehe ’oe e tai’o ’aore rā e hīmene ’āmui i te mau hīmene nō ni’a i te tae-piti-ra’a mai (hi’o « Iesu Mesia—Te tae-piti-ra’a mai » i roto i te fa’ahorora’a tumu parau i te hope’a o te buka hīmene).

Mataio 25:14–46

I te ha’avāra’a hope’a, e fa’a’ite atu tātou i te Fatu i te tuatāpapara’a nō tō tātou orara’a.

• E nehenehe te parabole nō te mau tāleni ’e te parabole nō te mau māmoe ’e te mau pua’aniho e fa’auru ia tātou ’ia feruri i te tuatāpapara’a nō tō tātou orara’a, tā tātou e fa’a’ite atu i te Fatu i te ha’avāra’a hope’a. E tai’o ’āmui i te mau parabole ’e e ani i te pīahi tāta’itahi ’ia fa’a’ite mai i te hō’ē uira’a tā te Fa’aora e nehenehe e ui mai nō ni’a i tō tātou orara’a ’ia ha’avāhia tātou. ’A hōro’a i te taime i te mau pīahi ’ia fa’anaho i te ’ohipa tā rātou e rave, ’ia au i te mau fa’a’itera’a tā rātou i fāri’i i roto i te tāu’ara’a parau.

  te māmoe ’e te mau pua’aniho

  ’Ua fa’a’ohipa te Mesia i te māmoe ’e te mau pua’aniho nō te ha’api’i i te ha’avāra’a hope’a (hi’o Mataio 25:31–33).

• Nō te fa’auru i te tāu’aparaura’a nō ni’a i te Mataio 25:34–40, e ani ’oe i te mau pīahi ’ia parau mai i te mau hi’ora’a o te mau ta’ata tei fa’a’ite i te aroha mai tei fa’ata’ahia i roto i teie mau ’īrava. ’A hōro’a ia rātou i te taime nō te feruri ’o vai ra te hina’aro i tā rātou tāvinira’a. E aha te tahi mau rāve’a ’ōhie tā tātou e rave nō te hōro’a i te mā’a i tei po’ia, e fa’a’ahu i tei vai taha’a, ’e ’ia utuutu i tei ma’ihia ?

ītona mātēria tauturu

Te tahi atu ā mau mātēria tauturu

Te hinu nō te fa’afāriura’a.

’Ua hōro’a mai ’o Elder David A. Bednar i teie tātarara’a o te parabole nō nā pāretenia tino ’ahuru :

« ’A feruri i te hinu ’ei hinu nō te fa’afāriura’a [hi’o Mataio 25:4–9] …

« ’Ua riro ānei nā pāretenia pa’ari e pae ’ei ta’ata pipiri ’e te hina’aro ’ore e hōro’a, ’e ’aore rā tē fa’a’ite ti’a nei rātou ē, e ’ore te hinu nō te fa’afāriura’a e ti’a ’ia tīpe’ehia ? E ti’a ānei i te pūai pae vārua o te hotu nō te ha’apa’o-tāmau-ra’a i te mau fa’auera’a, ’ia hōro’ahia i te tahi ta’ata ’ē atu ? E nehenehe ānei te ’ite tei roa’a mai nā roto i te tai’o-tāmau-ra’a ’e te feruri-hōhonu-ra’a i te mau pāpa’ira’a moa, ’ia hōro’ahia atu i te hō’ē ta’ata e hina’aro ra i te reira ? E nehenehe ānei te hau tā te ’evanelia e hōpoi mai i roto i te feiā mo’a i te mau mahana hope’a tei ha’apa’o, ’ia hōro’ahia i te ta’ata e fārerei nei i te ’ati ’e ’aore rā, i te tāmatara’a rahi ? Te pāhonora’a pāpū i teie mau uira’a tāta’itahi, e’ita ïa.

Mai tā te mau pāretenia pa’ari i ha’apāpū mai, e tītauhia ia tātou tāta‘itahi ‘’ia ho’o mai i tā tātou iho’. ’Aita teie mau vāhine fa’auruhia e fa’a’ite nei i te parau nō te putura’a pae faufa’a ; tē ha’apāpū mai nei rā rātou i tā tātou iho hōpoi’a ’ia tāpe’a ’ama noa i tā tātou lamepa o te ’itera’a pāpū, ’e ’ia vai noa tā tātou hinu nō te fa’afāriura’a. E roa’a teie hinu tao’a rahi hō’ē tōpata i te taime hō’ē—‘fa’aue nā ni’a iho i te fa’aue, [’e] ’ua a’o ’e ’ua nā ni’a iho i te a’o’ (2 Nephi 28:30), ma te fa’a’oroma’i ’e te tāmau māite » (« Fa’afāriuhia i te Fatu », Liahona, Novema 2012,109).

Ha’amaita’ira’a i tā tātou ha’api’ira’a

’A ha’apāpū ē tē ha’api’i ra ’outou i te ha’api’ira’a tumu mau. « ’A ui tāmau noa ia ’outou iho, ’nāhea te mea tā’u e ha’api’i nei i te tauturu i tā’u mau pīahi ’ia patu i te fa’aro’o i te Mesia, ’ia tātarahapa, ’ia rave ’e ’ia ha’apa’o i te mau fafaura’a a te Atua, ’e ’ia fāri’i i te Vārua Maita’i ?’ » (Ha’api’ira’a mai tā te Fa’aora, 20).