8–14 nō Mē

Mataio 19–20 ; Mareko 10 ; Luka 18

« E aha iho ā tei toe iā’u ? »

’A fa’aineine ai ’oe nō te ha’api’i, ’a feruri nā roto i te pure e nāhea ’oe i te tauturu i te mau pīahi ’ia fa’a’ite mai i te mea tā rātou i ’apo mai ’aore rā i fāri’i i roto i tā rātou iho tuatāpapara’a.

Tītau i te mana’o

E riro e ’ohipa maita’i i te tahi taime ’ia ’āparau i te rahira’a o te mau ’ohipa i tupu i te mau pīahi nō ni’a i te ha’api’ira’a mai i te ’evanelia i fa’atumuhia i ni’a i te ’utuāfare. E aha te mau ’itera’a manuia tā rātou e nehenehe e fa’a’ite mai ? E aha te mau ha’atāfifira’a ’aore rā mau tāmatara’a i fa’aruruhia e rātou ? E aha te mana’o tauturu tā rātou e nehenehe e hōro’a i te tahi ’e te tahi ?

Ha’api’i i te ha’api’ira’a tumu

Mataio 19:3–9

E mea faufa’a te fa’aipoipora’a i rotopū i te tāne ’e te vahine i roto i te fa’anahora’a mure ’ore a te Atua.

• Te rahi noa atu ra, tē fa’ata’a ’ē nei te mau hi’ora’a a tō te ao nō ni’a i te fa’aipoipora’a i te parau mau mure ’ore. Nō te tauturu i tā ’oe mau pīahi ’ia ha’api’i mai nō ni’a i te mau hi’ora’a a te Atua nō ni’a i te fa’aipoipora’a, e ani ’oe ia rātou ’ia tai’o i te Mataio 19:3–9 ’e ’ia pāpa’i i ni’a i te tāpura ’ere’ere te mau parau mau tā rātou e ’ite mai nō ni’a i te fa’aipoipora’a. E nehenehe ato’a rātou e tāpura i te mau parau mau hau atu e ’itehia mai ia rātou i roto teie i muri nei : Genese 1:27–28 ; 1 Korinetia 11:11 ; Te Ha’api’ira’a Tumu’ e te mau Fafaura’a 42:22 ; 49:15–17 ; 131:1–4 ; 132:19 ; ’e Mose 3:18, 21–24. Nāhea teie mau parau mau i te ha’apūaihia i roto i « Te ’Utuāfare : E Poro’i i tō te Ao nei » ? (ChurchofJesusChrist.org).

Mataio 20:1–16

E nehenehe te mau ta’ata ato’a e fāri’i i te ha’amaita’ira’a nō te ora mure ’ore, noa atu ā te taime e fāri’i ai rātou i te ’evanelia.

• E aha te mea e tauturu ai i te mau pīahi ’ia fa’a’ohipa i te mau parau tumu i roto i te parabole o te feiā rave ’ohipa i roto i te ’ō vine ? E nehenehe ’oe e ani i te tahi mau pīahi ’ia fa’aineine mai i te hō’ē ha’utira’a o te parabole nō te fa’a’ite i te piha ha’api’ira’a. I muri mai i te fa’a’ite’itera’a, te mau pīahi tei ha’uti mai i te ti’ara’a o te feiā rave ’ohipa, e nehenehe rātou e fa’a’ite mai i tō rātou mana’o nō ni’a i te ’aufaura’ahia rātou ’e te tumu. E aha tā teie parabole e parau mai nei nō ni’a i te bāsileia o te ra’i ? E aha te tahi atu ā mau fa’a’itera’a e noa’a mai ia tātou nō ni’a i teie parabole nā roto mai i te parau poro’i a Elder Jeffrey R. Holland « Te feiā rave ’ohipa i roto i te ’ō vine » ? (Liahona, Mē 2012, 111–14).

Mataio 19:16–22 ; Mareko 10:17–27

E arata’i te Fa’aora ia tātou ’ia ha’afātata atu iāna ’a ani ai tātou i tāna tauturu.

• Nāhea ’oe i te tauturu i te mau pīahi ’ia ’ite mai ’e ’ia fa’a’ohipa i te mau parau tumu i roto i te ’ā’amu o te ta’ata ’āpī tao’a rahi ? Te hō’ē rāve’a o te anira’a ïa ia rātou ’ia tai’o i te Mareko 10:17–27 ’e ’ia uiui ia ’oe iho, ’ua mana’o a’ena ānei rātou mai te ta’ata ’āpī tao’a rahi. E aha tei tauturu ia tātou ’ia pe’e i te parau a’o a te Fa’aora, noa atu ā e mea fifi roa ? E hina’aro paha te mau pīahi e fa’a’ite mai i te mau ’itera’a rau, i reira tō rātou uira’a « E aha iho ā tei toe iā’u » ? (Mataio 19:20) ’e ’ua fāri’i i te hō’ē fa’a’itera’a e ha’amaita’i atu ā iāna iho. Nō te tauturu i te mau pīahi e ha’aparuparu nei nā roto i te rōtahira’a i ni’a i te mea tei ’erehia e rātou, e nehenehe ’oe e fa’a’ite atu i te fa’ahitira’a parau i roto i « Te tahi atu mau mātēria tauturu ».

• ’Ua tai’o paha te mau pīahi i te hō’ē parau poro’i nō te ’āmuira’a rahi e tū’ati i teie mau ’īrava mai tei fa’a’itehia i roto i te Mai, pe’e mai—nō te ta’ata hō’ē e te ’utuāfare. E ani ia rātou ’ia fa’a’ite mai e aha tei roa’a ia rātou.

Te telona tātarahapa ’e te pharisea fa’ahua parauti’a i roto i te hiero, nā Frank Adams

Luka 18:9-14

E ti’a ia tātou ’ia ti’aturi i te aroha o te Atua, ’eiaha rā i tō tātou iho huru parauti’a.

• E tauturu te parabole a te Fa’aora e fa’aau ra te pure a te pharisea i te pure a te telona ia ’oe, ’ia fa’ahi’o i te huru tā te Fatu e ani i te feiā e tūtava nei i te pe’e atu iāna. Nō te tauturu i te mau pīahi ’ia fa’a’ohipa i teie parabole i tō tātou nei ’anotau, e ani ’oe ia rātou ’ia pāpa’i fa’ahou i te pure a te pharisea ma te fa’a’ohipa i te mau huru peu nō teie tau, e ’ia fa’ahiti i te hō’ē ā mau huru. E nehenehe rātou e nā reira ato’a i te pure a te telona ’e ’ia fa’a’ite mai i te mea tā rātou i pāpa’i. Nāhea te mau ’īrava 15–17 ’e 18–24 e tū’ati ai i te mea tā te Fa’aora i ha’api’i i roto i teie parabole ? E nehenehe ’oe e hōro’a i teie fa’ahitira’a parau a Elder Dale G. Renlund i muri nei nō ni’a i teie mau ’īrava : « E mea māramarama maita’i te parau poro’i nō tātou : E mea fātata a’e tē ta’ata hara tei tātarahapa i te Atua i te hō’ē ta’ata fa’ahua parauti’a tei fa’ahapa i te ta’ata hara » (« Tō tātou tīa’i māmoe maita’i », Liahona, Mē 2017,31).

Te tahi atu ā mau mātēria tauturu

’Eiaha tātou e māuruuru noa ’aore rā e ha’aparuparu.

’Ua ha’api’i Elder D. Todd Christofferson ē :

« Mai te mea e ani mau tātou, ‘E aha iho ā tei toe iā’u ?’ [E’ita te Atua] e vaiiho ia tātou ’ia ’imi, nā roto rā i te here, e pāhono mai ’oia nō tō tātou ’oa’oara’a. ’E e hōro’a ’oia ia tātou i te tīa’ira’a.

E tūtavara’a ’ū’ana, ’e e mea ri’ari’a mau mai te mea o tātou ana’e i roto i tā tātou tūtavara’a i te ha’amo’ara’a. Te parau mau hanahana, e ’ere ïa ’o tātou ana’e. Tei ia tātou ra te aroha mure ’ore o te Atua, te maita’i o te Mesia, te tāmāhanahanara’a ’e te ’arata’ira’a a te Vārua Maita’i, ’e te auhoara’a ’e te fa’aitoitora’a a te mau hoa feiā mo’a i roto i te tino o te Mesia. Eiaha tātou e māuruuru i te vāhi tei reira tātou, ’eiaha ato’a rā tātou e ha’aparuparu » (« Te pāne ora o tei pou mai mai te ra’i », Liahona, Novema 2017, 39).

Ha’amaita’ira’a i tā tātou ha’api’ira’a

Tē hina’aro nei te Atua i tā ’outou mau tāleni ’e tō ’outou mau ’aravihi ta’a ’ē. E nehenehe tā ’outou e ha’amaita’i i te mau tamari’i a te Atua nā roto i tō ’outou here nō vetahi ’ē, te mau hōro’a tā te Atua i hōro’a ia ’outou, ’e te mau mea i orahia e ’outou. ’A tāvini ai ’outou mā te itoito ’e ’a ’imi ai ’outou i te tauturura’a a te Atua, e fa’arahi ïa ’oia ia ’outou, ’e e tupu tō ’outou ’aravihi ’ia ha’api’i i te ’evanelia mai tā te Fa’aora i ha’api’i » (Ha’api’ira’a mai tā te Fa’aora,, 5).