’Eiaha e mata’u, nā Michael Malm

13–19 nō Māti

Mataio 11–12 ; Luka 11

« E nā’u ’outou e fa’aora »

’A tai’o Mataio 11–12 ’e Luka 11 i roto i te hepetoma hou ’oe ’a ha’api’i ai. E hōro’a te reira ia ’oe i te taime nō te feruri ’e nō te fāri’i i te heheura’a nō ni’a i te mea e rōtahi atu i roto i te piha ha’api’ira’a.

Tītau i te mana’o

Te fa’a’ohipara’a i te mau parau tumu tā tātou i ’ite mai i roto i te mau pāpa’ira’a mo’a i roto i tō tātou orara’a, e rāve’a faufa’a rahi ïa nō te fa’atupu i te ’ite rau nō te mana o te parau a te Atua. E fa’aitoito i te mau pīahi ’ia fa’a’ite mai i te mea tā rātou i ’ite i roto i tā rātou tuatāpapara’a i te pāpa’ira’a mo’a i teie hepetoma ’o tā rātou e nehenehe e fa’a’ohipa i roto i tō rātou orara’a. Te fa’a’itera’a i te hō’ē hi’ora’a e nāhea tō ’oe fa’a’ohipara’a i te mau pāpa’ira’a mo’a, e fa’auru i te mau pīahi ’ia fa’a’ite mai i tō rātou iho mau hi’ora’a.

Ha’api’i i te ha’api’ira’a tumu

Mataio 11:28–30

E hōro’a mai Iesu Mesia i te fa’aorara’a ia tātou, mai te peu e tūru’i tātou i ni’a iāna.

• I roto i te Mataio 11:28–30, ’ua ha’api’i te Fa’aora ē, e tauturu ’oia ia tātou ’ia amo i tā tātou mau hōpoi’a teimaha, mai te peu e fāri’i tātou i tāna anira’a « ’a rave mai i tā’u zugo i ni’a ia ’outou » (’īrava 29). Nō te tauturu i te mau pīahi ’ia māramarama maita’i a’e i teie fafaura’a, e fa’a’ite ’oe i te hō’ē hōho’a nō te hō’ē zugo (hi’o te arata’i ha’api’ira’a nō teie hepetoma i roto Mai, pe’e mai—nō te ta’ata hō’ē ’e te ’utuāfare) ’e ’a fa’a’ite i te mau ’ohipa e tupu mai teie : ’Ua fa’ata’ahia te zugo nō te tauturu i te mau ’ānimara ’ia amo i te mau hōpoi’a teimaha ’aore rā nō te rave i te ’ohipa teimaha, ’e e fa’atanohia te mau zugo i ni’a i te mau ’ānimara. E aha tā teie mau fa’a’itera’a e hōro’a fa’ahou mai nei i tō tātou hāro’aro’ara’a nō ni’a i te Mataio 11:28–30 ? E aha te mau anira’a tā tātou i ’ite mai i roto i teie mau ’īrava ? E aha te mau ha’amaita’ira’a tei fafauhia mai ia tātou ? E fa’a’ite ato’a atu i te fafaura’a a te peresideni Russell M. Nelson e ’itehia i roto « Te tahi atu ā mātēria tauturu ».

• E mau hōpoi’a tā tātou pā’āto’a ’o te nehenehe e ha’amāmāhia nā roto i te mana o Iesu Mesia. Nō te fa’aitoito i te ’āparaura’a nō te reira, e ani ’oe i te mau pīahi ’ia tai’o ’e ’ia ’āparau i te Mataio 11:28–30 ’e te tahi atu ta’ata i roto i te piha ha’api’ira’a. E tu’u atu rātou i te mau uira’a mai teie i roto i tā rātou tāu’ara’a parau : E aha te tahi mau hi’ora’a nō te mau hōpoi’a tā te hō’ē ta’ata e amo nei ? E aha te tītauhia ia tātou ’ia rave nō te haere i te Mesia ra ? E aha te aura’a, te ravera’a i te zugo a te Mesia i ni’a ia tātou ? Nāhea ’oe i te ’itera’a ē, ’ua ha’amāmā te Fa’aora i tā ’oe mau hōpoi’a ’a fāriu ai ’oe i ni’a iāna ? E ’ite mai te mau pīahi i te tahi atu ā mau mana’o i roto i te a’ora’a a Elder David A. Bednar « Fa’a’oroma’i i te mau ’ati ma te paruparu ’ore » (Liahona, Mē 2014, 87–90).

Tē ’amu nei te mau pipi i te sītona i te mahana sābati, nā James Tissot

Mataio 12:1–13

Te sābati e mahana ïa nō te rave i te ’ohipa maita’i.

• I roto i tā rātou tauto’ora’a nō te ha’amo’a i te mahana sābati, ’ua ha’amau te mau pharisea i te mau ture ’eta’eta ’e te mau peu tā te ta’ata i ha’amau, tei ha’apōuri i tō rātou ’ite nō te tumu mau o te sābati. Nō te ha’amata i te hō’ē ’āparaura’a nō ni’a i te tumu te Fatu i hōro’a mai ai ia tātou i te mahana sābati, e ani ’oe i te mau pīahi ’ia hi’o fa’ahou i te Mataio 12:1–13 ’e ’Īritira’a a Iosepha Semita, Mareko 2:26–27 (i roto Parau hi’u Bibilia). E aha tā teie mau ʼāʼamu e ha’api’i nei ia tātou nō ni’a i te faufaʼa rahi o te sābati ? E aha te tahi atu ā mau mana’o nō ni’a i te sābati tei noa’a mai ia tātou nō roto mai i te Exodo 31:16–17 ; Isaia 58:13–14 ; ’e Te Ha’api’ira’a Tumu ’e te mau Fafaura’a 59:9–13 ? Nāhea tō tātou aura’a ’e te Fa’aora i te tauira’a ’a tāmata ai tātou i te ha’amo’a i tōna mahana ?

• ’A fa’atumu noa ai te mau pharisea i te mau ture hu’ahu’a e rave rahi nō ni’a i te sābati, ’ua ha’api’i te Fa’aora i te hō’ē parau tumu ’ōhie : « ’E au maori i te ture ’ia hāmani maita’i i te sābati » (Mataio 12:12). E aha te tahi atu mau parau tumu e tauturu ia tātou ’ia ha’amo’a i te mahana sābati ? (hi’o te fa’ahitira’a parau a te peresideni Russell M. Nelson i roto « Te tahi atu ā mātēria tauturu »). Nō te aha e mea maita’i a’e te mau parau tumu i te mau tāpura o te mau ture ’a tūtava ai tātou i te fa’ananea i te fa’arava’ira’a iāna iho i te pae vārua ?

• E nehenehe te pōro’i a te peresideni Russell M. Nelson « Te sābati e mea hina’arohia » (Liahona, Mē 2015, 129–32) ’e te mau video nō te a’ora’a a Elder Jeffrey R. Holland i roto « Te tahi atu ā mātēria tauturu » e fa’arahi atu ā i te tāu’ara’a parau nō ni’a i te mahana sābati.

Te tahi atu ā mātēria tauturu

Natihia i ni’a ia Iesu Mesia.

’Ua ha’api’i te peresideni Russell M. Nelson : « Tē haere mai nei ’outou i te Mesia ’ia natihia i ni’a iāna ’e i tōna mana, ’ia ’ore ’outou e amo ’outou ana’e i te hōpoi’a o te orara’a nei. Tē huti nei ’outou i te teimaha o te orara’a i raro a’e i te zugo a te Fa’aora ’e te Tāra’ehara o te ao nei, ’e i reira iho tō ’outou mau fifi, noa atu te teimaha rahi o te reira, e māmā ai » (« The Mission and ministry of the Savior : A discussion with Elder Russell M. Nelson », Ensign, Tiunu 2005, 18).

« E aha te tāpa’o tā’u e hina’aro e hōro’a i te Atua ? »

’Ua ha’api’i te peresideni Russell M. Nelson : « ’Ia tītau-ana’e-hia iā’u ’ia fa’aoti e tano ānei te hō’ē ’ohipa nō te sābati, e ui noa vau iā’u iho, e aha te tāpa’o tā’u e hina’aro e hōro’a i te Atua ?’ Nā taua uira’a ra e fa’ariro i tā’u mau fa’aotira’a nō ni’a i te mahana sābati ’ei mau fa’aotira’a māramarama maita’i » (« Te sābati e mea hina’arohia », Liahona, Mē 2015, 130).

Te mau ha’amaita’ira’a nō te ha’apa’ora’a i te mahana sābati.

I roto i nā video e toru, tē ha’api’i nei ’o Elder Jeffrey R. Holland nō ni’a i te mau ha’amaita’ira’a nō te ha’apa’ora’a i te mahana sābati : « I tā’u mahana mo’a—Ha’afātata atu i te Atua », « I tā’u mahana mo’a—Fa’aturara’a i te sābati », ’e « I tā’u mahana mo’a—Fa’afa’aea ’e Fa’a’āpīra’a » (ChurchofJesusChrist.org).

Ha’amaita’ira’a i tā tātou ha’api’ira’a

Fa’aitoito i te fa’a’itera’a. « ’Ua riro te pīahi tāta’itahi i roto i tā ’outou piha ha’api’ira’a ’ei puna rahi nō te ’itera’a pāpū, te mau mana’o ’e te mau ’itera’a rau nō te orara’a i te ’evanelia. ’A ani ia rātou ’ia fa’a’ite mai ’e ’ia turu i te tahi ’e te tahi » (Ha’api’ira’a mai tā te Fa’aora,, 5).