Beberuare 6–12

Ioane 2–4

“Kam Riai ni Manga Bungiaki”

Warekan Ioane 2–4 bon te kawai ae raoiroi ni waaki ni katauraoi n angareirei. Korea am namakin ake ko karekei, ao kabongana te baire aio ni kakaei atatai riki tabeua ao iango ibukin te anga reirei.

Kaunga te Tibwatibwa

Korei teniiua atuun maroro iaon te burakibooti: Ioane 2, Ioanen 3, ao Ioane 4. Kain te kiraati a kona n anaa tabeua te miniti n rinanon mwakoro aikai ao imwiina a korei iaaia ni katoai atuun maroro te kibu are e na buokiia n ota n te reirei ao waaki ake a riki iaan te mwakoro anne. Maroroakini kibu ake a korei.

Reirei te Reirei

Ioane 2:1–11

Ana kakai Iesu Kristo “e kaota rokon mimitongina.”

• Te kabwarabwara n te wiiki aei inanon Nakomai, Iriirai—Ibukiia Aomata n Tatabemaniia ao Utu e tangira warekan Ioane 2:1–11 man ana taratara temanna are e mena ikekei ngke Iesu e bita te ran nakon te wain. Tao kain te kiraati a kona n tibwai aia iango ake a karekei man karaoan aei. Tera ae ti reiakinna n rongorongon te Tia Kamaiu man kiibu aikai? E kanga te kakai aei ni kaota mimitongin te Atua? (taraae kibu 11).

Ioane 2:13–22

Ti kona ni katani taabo aika a tabu ao bwaai.

• Ni buokaia kain te kiraati bwa a na reiakinaki man karakinan Iesu ni kanakoia taan rairi mwane man te tembora, ko kona n tuangiia bwa a na iangoi bwaai riki tabeua, n raonaki ma tembora, are e aranna te Uea bwa a tabu. Tina kanga ni buoka kawakinan tabun bwaai aika a tabu aikai?

Ioane 3:1–21

Ti riai ni bwabetitoaki bwa ti aonga ni kona n rin abanuean karawa.

• Tina kanga ni kona ni kabwarabwara nakon temanna n te bwai are e nanonaki n te manga bungiaki? Iangoia ni kaoia kain te kiraati bwa a na kataneiai aroia ni kaeka te titiraki aei ma te aomata ae e tekateka irarikiia. Ngkai a karaoia, a kona ni maroroakin titiraki n aron aikai: Tera ae ti reiakinna man ana taeka Iesu n Ioane 3:3–7? E kanga te rairannano, bwabetito, ao te kamatoa ni buokiira ni manga bungiaki? Te rongorongo inanon “Bwaai ni Ibuobuoki riki Tabeua” e kona ni karekei riki iango nakon te marooro aei.

• Tabeman aomata a kakoaua bwa te aomata e bon aki kona ni bitaki. Nikotemo, n teina, bon te banna ni katoto iroun te aomata ae e bitaki imwiin iriirakin ana euangkerio Iesu Kristo. Ni buokaia kain te kiraati bwa a na noora aei, ko kona ni kaoia bwa a na kakaea n Ioane 3:1–2; Ioane 7:45–52; a Ioane 19:38–40. Tera ae ti reiakinna man rongorongo aikai ibukin anuan Nikotemo ao ana koaua? E kanga ni bitaki n tokin te tai? Tera katoto aika ti kona n tibwai irouia aomata ake a tia ni bitaki ibukin te euangkerio?

Ioane 4:5–34

Iesu Kristo e anganiira “te ran ae maiu” ao te “amwarake” ni karaoan ana mwakuri te Atua.

• Rabwatara a kainnanoa te amwarake ao te ran ni katoabong. Iesu e kaineti naba nakon kainnanon bwain te aonaaba aikai ngke E reirei nakoia ni kauoman te aine ae te Itamaria ao Ana reirei (taraa Ioane 4:5–34). Ni buokiia kain te kiraati bwa a na ota n ana reirei te Tia Kamaiu, ko kona ni katoka tamnein te amwarake ao te ran iaon te burakibooti ao ni kaoia kain te kiraati bwa a na korea iaan tamnei koaua iaon te amwarake n tamnei ao n rang are e reirei iai Iesu. E kanga te Tia Kamaiu ni katoka bakira ao takara n te maiu n tamnei?

  

  Iesu Kristo e anganiira te ran ni kamaiu.

• Kauringa rikiraken ana koaua te aine are te Itamaria iroun Iesu Kristo ni kona ni buokiia kain am kiraati n iangoia bwa a kanga n ataia ae Ngaia te Meetia. N te kiraati, kakaai taeka ake e kabonganai te aine ibukin te Tia Kamaiu n Ioane 4:6–30. Tera ae a kaotaki n taeka aikai ake a kaota ana atata bwa antai Iesu? E kanga n rikirake n ara koaua bwa Ngaia bon Ara Tia Kamaiu?

Bwaai n Ibuobuoki Riki Tabeua

Tera ae nanonaki n te manga bungiaki.

Unimwaane David A. Bednar e reirei: “Te rairaki … e bubura, e aki uarereke—te manga bungiaki nte tamnei ao aan te bwai are ti namakinna ao ti tangiria, te bwai are ti iangoia ao ni karaoia, ao arora ngkai. Ni koaua, bon boton ana euangkerio Iesu Kristo are karekea aan ao te bitaki ni koaua n arora nako are e reke rinanon ara katan iaon ‘aika raoiroi, ma ana nanoanga, ao ana akoi te Mesia ae Tabu’ (2 Nibwaai 2:8). Ngkai ti rineia n iriira te Mwatita, ti rinaeia bwa tina bitaki—ni manga bungiaki n te tamnei” (“Ye Must Be Born Again,” Riaona, Meei 2007, 20).

Beretitenti Dallin H. Oaks e reirei: “Ti a manga bungiaki ngkana ti rin inanon te berita n reitaki ma ara Tia Kamaiu man te manga bungiaki ao te Tamnei ao man katokaan aran Iesu Kristo iaora. Ti kona ni manga kaboua te manga bungiaki anne ni katoa Tabati ngkana ti ana te toa. Aika Itiaki ni Boong aika Kaitira a kamatoa bwa naake a tia ni manga bungiaki n te aro n tamnei bon natin Iesu Kristo mwaane ao aine (taraa Motiaea 5:7; 15:9–13; 27:25). E ngae n anne, n te aro bwa tina ata raoi nanon kakabwaia n te manga bungiaki aei, ti riai ni kawakin ara berita aika a tabo ni karokoa te toki” (“Have You Been Saved?,” Ensign, May 1998, 56).

Kanakoraoan Ara Anga reirei

Te tia reirei e aki nakoraoi riki nakon te tia reiakinaki. Tibwangam n tia reirei e kakaawaki, ma tiaki ngkoe boton te kaunganano inanon te kiraati. Buokiia kaain te kiraati n reiakinna maroun te Tamnei ao n tibwaia imarenaia tera are a tia n reiakinna.