Iesu e reirei i mataniwiin te aba

E Reireiniia Aomata Iesu Irarikin Taari, iroun James Tissot

Beberuare 20–26

Mataio 6–7

“E reireiia n Aron ae Temanna ae Mwaaka”

Ngkana ko katauraoiko nakon te anga reirei, moanna man katauraoakim. Wareka Motiaea 6–7, ao koroi ami namakin n tamnei. E na buokiko aei man karekean kaotioti bwa ko na kanga ni kaitara kainnanon am kiraati. Imwiina ao kakaea te kamataata aei ibukin iango n angareirei.

te aikaon ibukin te tibwatibwa

Kaunga te Tibwatibwa

Tuangiia kaain te kiraati bwa a na tibwauaia bwa e nga te kibuntaeka n te Kabwarabwara iaon te Maunga ae a namakinna bwa e rang kainnanoaki riki n te bong aei. Kaungaia kaain te kiraati bwa a na karinii aia iango nakon aia nonori n tatabemaniia nako.

te aikaon ibukin te anga reirei

Reirei te Reirei

Mataio 6–7

Ngkana ti ongo ao ni karaoa nanon ana reirei te Uea, maiura a na kateaki iaon te aa ae matoatoa.

• Tera reirei aika onoti man Mataio 6–7 aika a na rang ni bongana nakoia ake ko reireiniia? Iangoia ni koroia iaon te burakibooti tabeua kibuntaeka man Mataio 6–7 aika a taekin reirei aikai. A kona kaain te kiraati n rinea teuana te kibu ae a na kamatebwaia ao a na koroi iaon te burakibooti koaua n tamnei aika a reiakin. A kanga reirei aikai ni kanakoraoi maiura?

• E motika Ana reirei te tia Kamaiu ma te taetae ni kaikonaki ae na buokiia kaain am kiraati n ata raoi kakawakin maiuakinan ana rierei te Tia Kamaiu (taraa Mataio 7:24–27; taraa naba Ereman 5:12). Ni katamneia te taetae ni kaikonaki, a kona kaain te kiraati ni botaki ni katea te aa ae matoatoa man kabongakin baoki aika uarereke, mwangko, ke bwaai riki tabeua ao a na kakoaua bwa matoara aaia. Tao a kona naba ni korei iaon aia bwai ni kateitei kanne bwaai aika kona ni karaoi ni kabonganai ana reirei te Tia Kamaiu. A kanga karaoan bwaai aikai ni buokiira ni kaitarai angibuakan te maiu aei?

Mataio 6:5–13

Te Tia Kamaiu e reireiniira arora n tataro.

• Reiakinan ana Tataro te Uea e kona ni buokiia kaain te kiraati n ataia bwa a na kanga ni kanakoraoa aia tataro man irakin ana banna ni katooto te Uea. Ko kona n tuangiia bwa a na koroia iaon te burakibooti kibuntaeka man Mataio 6:9–13 (ke Ruka 11:1–4) aika a teke nanoia iai. Ngkai ti iangoa ana taeka te Tia Kamaiu, tera ae ti reiakinna iaon te tataro? E na rin riki te reirei irouia kaain te kiraati ngkana a taekina ni bon oin aia taeka tabeua kibu n taeka are e taekin te Tia Kamaiu bwa mwanewen aia tataro. Te katooto, “Anganiira karara ae ti a tau iai n te bong aei” e kona ntaekinaki n aron “Taiaoka buokai n au kekeiaki ni katauraoi karara ibukiia au utu.”

• Imwiin warekan Mataio 6:5–13 ma kaain te kiraati, kam kona ni maroroakin titiraki n aron aikai: E kanga te tataro ni kakorakora am reitaki ma Tamara are i Karawa? E kanga te tataro n tia ni buokiko n ata ana kantaninga te Atua?

Mataio 7:7–11

Tamara are i Karawa e kaekai tataro.

• Ni buokiia kaain te kiraati ni kakorakoraia n aia onimaki bwa e ongo ao e na kaekai aia tataro te Atua, korea titiraki, ukeuke, ao karebwerebwe iaon te burakibooti. A kona ngkanne kaain te kiraati n kakaea inanon koroboki aika tabu katooto iaoia aomata ake a “titiraki,” “ukeuke,” ao “karebwerebwe” (ibukin katooto, taraa 1 Nibwaai 11:1; Ita 2:18–3:6; Iotebwa Timiti—Rongorongo 1:11–17). Tera ae ti reiakin man taian katooto aikai iaon karekean kaeka nakon ara tataro?

• Tabeua taeka aika kakawaki man Mataio 7:7–11 a kona ni kuneaki inanon Ana Rairairi Iotebwa Timiti n Mataio 7:12–17 (n ana abentekiti te Baibara). Inanon kiibu aikai, ana reirei Iesu a kaman atai tabeua bukina ngkai a rawa aomata n ukoukora te koaua mai iroun Tamara are i Karawa. Tuangiia kaain te kiraati bwa a na iangoia ae iai raoraoia ae e aki waekoa n ukoukori kairi ke kakabwaia mairoun te Uea. Tera ae a na taekinna kaain te kiraati ni kaunga te rao aei? A na kanga ni kabongana ana taeka te Tia Kamaiu n Mataio 7:7–11?

Mataio 7:15–20

Ti kona ni kinaia burabeti aika koaua ao aika kewe man uaaia.

• A bae n tia kaain am kiraati n rinanon iango aika kewe ao aia aninano ni kewe taan kakaitara, iaon te intanete ke man bwaai riki tabeua. A bae n tia n ongo naba aia taeka tabeman ni kabuakakaia ana toro te Tia Kamaiu. Ko na kanga ni buokiia n ataia bwa a na kanga ni kinaia burabeti aika kewe ao aia reirei man ake a bon koaua? Kaoti tabeua mwakoro n uanikai ao titirakiniia bwa tera ae ti kona n taekinna iaon aroka ake a nako mai iai. E kanga te mwakuri aei ni buokiira ni kaotaira n Mataio 7:15–20? Kam kona naba ni botaki ni wareki tabeua rongorongo mairouia burabeti aika maiu. Tera “uaaia” ke mwiia aika reke man irakin aia reirei?

  uanikai

  Ti kona ni kinaia burabeti ni koaua man uaaia.

• Mataio 7:15–20 e kona ni karikirakei aia onimaki kaain te kiraati n ana mition ae tabu te Burabeti Iotebwa Timiti. Tera uaa aika e kakoroi nanoia Iotebwa Timiti n ana mwakuri? Ibukin tabeua iango, taraa ana rongorongo Unimwaane Neil L. Andersen “Iotebwa Timiti” (Liahona, Nobembwa 2014, 28–31). Ti na kanga ni kabongana ana rongorongo te Tia Kamaiu n Mataio 7:15–20 ni kaota ara koaua nakoia raoraora ao ara utu iaon taekan te Beurabeti Iotebwa?

Kanakoraoan Ara Anga reirei

Tai maaku n te kainabwaabu. “Titiraki aika a raraoi a anaa te tai ae maan imwain kaekaaia. A kainnanoa te iango, te ukeuke, ao te kairi mai ieta. Te tai are ko kabanea ni kakantaninga kaekaan te titiraki e kona n riki bwa te tai ae tabu ni iango. Totokoa te kariiri ni waekoa ni katoka te tai aei man kaekaan am titiraki ke ni waaki nakon te bwai teuana are imwina” (Anga Reirei n Ana Kawai te Tia Kamaiu,31).