“Beberuare 27–Maati 5. Mataio 8; Mareko 2–4; Ruka 7: ‘E Kamaiuko Am Onimaki,’” Nakomai, Iriirai—Ibukin te Reirei n Tabati: Te Nu Tetemanti 2023 (2022)
“Beberuare 27–Maati 5. Mataio 8; Mareko 2–4; Ruka 7,” Nakomai, Iriirai—Ibukin te Reirei n Tabati 2023
Beberuare 27–Maati 5
Mataio 8; Mareko 2–4; Ruka 7
“E Kamaiuko Am Onimaki”
Am katauraoi n anga reirei e moanaki ngkana ko kamatebwaia ma te tataro mwaaka Mataio 8; Mareko 2–4; ao Ruka 7. Nakomai, Iriirai—Ibukiia Aomata n Tatabemaniia ao Utu e kona ni katamaroa am kamatebwai ao ni karekei iango irarikin ake a kaotaki ikai.
Kaunga te Tibwatibwa
A kona kaain am kiraati n tia ni kunei nonoori aika korakora n aia kamatebwai iaon kakai inanon mwakoro aikai (tarai karinanin ana kamaiu te Tia Kamaiu inanon te kamataata n te wiiki aei inanon Nakomai, Iriirai—Ibukiia n Tatabemaniia ao Utu). Iangoia ni kaoia kaain te kiraati bwa a na tibwaua aia nonoori ma toaia ke ma te kiraati ae bwanin.
Reirei te Reirei
A riki kakai ni kaineti ma ana kantaninga te Atua ao n ara onimaki iroun Iesu Kristo.
-
Ko na kanga ni kabongana rongorongon ana kakai te Tia Kamaiu ni kakorakorai aia onimaki kaain te kiraati Irouna? Ko kona ni koroi ni karinani iaon te burakibooti tabeua kamaiu aika kamimi man Mataio 8; Mareko 2; ao Ruka 7. A kona kaain te kiraati ni maroroakinna bwa a kanga aomata ake a kamaiuaki ni kaota aia onimaki iroun Kristo. Tera ae e reiakinaki man rongorongo aikai iaon te onimaki ao kakai? A kona kaain te kiraati n tibwauai aia koaua riki tabeua iaon te onimaki ao kakai man Moomon 9:15–21; Ita 12:12–16; Moronaai 7:27–37; ao Reirei ao Berita aika Tabu 35:8 (taraa naba Bible Dictionary, “Miracles”). Ningai are ti a tia n noori iai kakai ngkai ti a tia ni kamwakura te onimaki iroun Iesu Kristo?
-
Rongorongon te kakai inanon Mareko 2:1–12 e reirei, ibuakon bwaai riki tabeua, kakawakin te uaia ni mwakuri n te nano ae ti teuana n ibuobuoki nakon te Tia Kamaiu ni buokiia naake a kainnanoa te ibuobuoki n tamneia ke n rabwataia. Iangoia ni kaoia kaain te kiraati bwa a na rinanon te rongorongo man booki aika tabu ao n tibwauai nonoori riki tabeua man ana marooro Unimwane Chi Hong (Sam) Wong “Rescue in Unity” (Riaona, Nobembwa 2014, 14–16; taraa naba “Additional Resources”). Tera ae ti kona n reiakinna man Mareko 2:1–12 ibukin kakawakin te mwakuri n te katiteuanaki ni buokiia aika kainnano? (taraa naba Mareko 3:24–25).
Iai iroun Iesu Kristo te mwaaka ni uota te rau n tain te kangaanga ao kakaewenako n te maiu aei.
-
Ko na bae n atai tabeua kangaanga aika a kaitarai kaain am kiraati. Bukina bwa ti bane n rinanoi kakaitara n taai tabetai ni maiura, rinanoakin te rongorongo inanon Mareko 4:35–41 e kona ni karikirakea aia onimaki kaain te kiraati ae te Tia Kamaiu E kona ni uota te rau nakoia. Anganiia aomata n tatabemaniia te mwakoro ni beeba, ao tuangiia bwa a na koreia iaon iteran te beba te kataaki are a tia n rinanona. N iterana are teuana, tuangiia bwa a na korea te bwai teuana man Mareko 4:35–41 are e kaungaia bwa a na rairaki nakon te Tia Kamaiu n aia tai ni kataaki. Kaungaia kaain te kiraati bwa a na tibwaua te bwai ae a koreia, ngkana a namakinna bwa a mwengaraoi ni karaoia.
-
Te anene “Master, the Tempest Is Raging” (Boki n Anene, nambwa. 105) e boboto iaon te karaki inanon Mark 4:35–41. Tao a kona kaain te kiraati ni kakaei mwanewe inanon te anene are e kaeineti ma kibuntaeka inanon booki aika tabu. Ko kona naba ni kaota te tamnei ae e tei ibukin te tamnei (taraa Gospel Art Book, nambwa. 40) ao maroroakina te bwai ae e tei ibukina te tia korotamnei. Tera riki kawai tabeua ae ko kona ni buokiia kaain te kiraati n ata nanon ao mwakan te kakai aei?
Man te Maku nakon te Onimaki, iroun Howard Lyon
Ngkai a kabwaraaki ara bure, ara tangira ibukin te Tia Kamaiu e a kakorakoraaki riki.
-
Tera ae ti kona n reiakinna man ana katooto te aine ao ana reirei te Tia Kamaiu inanon Ruka 7:36–50 ngkai ti ukoukora kabwaraan oin ara bure? E kanga te rairannano ni buokira ni kaniira riki nakon Iesu Kristo? E kanga te rongorongo aei ni buokiia naake a tia ni karaoa te bure?
Bwaai n Ibuobuoki Riki Tabeua
“Ngke e noori aia onimaki Iesu.”
Unimwaane Chi Hong (Sam) Wong e tibwauai atatai aikai iaon te rongorongo inanon Mareko 2:1–12:
“I kona n tibwa nakoimi teuana riki te kaubwai ae karabaaki ae reke man te rongorongo aei n te boki ae tabu. E mena n te kibu 5: ‘Ngke e nora aia onimaki Iesu’ (e kairaki ma katuruturuana). I tuai n noora aei n taai aika nako—aia onimaki. …
“Antai aomata ake e mwanewia Iesu? A kona n ae naake aman ake a uota te mwaane ae te nakibaina, bon te mwaane anne, aomata ake a tataro ibukina, ao naake a mena ikekei n ongoraa n ana kabwarabwara Iesu ao ni kukurei inanoia bwa e a kaan te tai are e nang roko iai te kakai. A kona naba n ae te kainaba, te karo, te nati te mwaane ke te aine, te mitinare, te beretitenti n te kooram, te beretitenti n te Bootaki n Aine, te bitiobi, ao te rao ae raroa nako. Ti kona ni buokira bon iroura. Ti riai n tainako ni katabei nanora n ukoukoriia ni kamaiuia naake iai kainnanoia” (“Rescue in Unity,” Liahona, Nob. 2014, 16).
Kanakoraoan Ara Anga Reirei
Kaota am koaua n taainako. “Am kakoaua ae bebete, mai nanom ibukin koaua ae mai iroun te tamnei e na iai mwiina ae korakora iaoia naake ko reireiniia. E aki kainnanoa te wii kateke ke e na abwaabwaki. E kona, te katooto, n ae te kakoaua ae bebete n te kakai ni karekean te euangkerio inanon maium.