“Maati 13–19. Mataio 11–12; Ruka 11: ‘N na Motiki Rawami,’” Nakomai, Iriirai—Ibukin te Reirei n Tabati: Te Nu Tetemanti 2023 (2022)
“Maati 13–19. Mataio 11–12; Ruka 11,” Nakomai, Iriirai—Ibukin te Reirei n Tabati: 2023
Tai Maaku, iroun Michael Malm
Maati 13–19
Mataio 11–12; Ruka 11
“N na Motiki Rawami”
Wareka Mataio 11–12 ao Ruka 11 inanon te wiiki imwain ae ko angareirei. Aio e na anganiko te tai n iango ao ni karekei kaotioti ibukin te bwai are kona boboto iaon n te kiraati.
Kaunga te Tibwatibwa
Karaoi reirei ake ti kunei ni koroboki aika a tabu nakon maiura bon te kawai ae kakawaki n namakina mwaakan ana taeka te Atua. Kaungaia kain te kiraati bwa a na tibwa te bwai are a kunea n aia kamatebwai ni koroboki aika a tabu n te wiiki aei are a kona ni karaoia inanon maiuia. Tibwauan banna ni katoto bwa ko kanga ni kabonganai koroboki aika a tabu e kona ni buokiko ni kaungaia kain te kiraati bwa a na tibwa naba te bwai are a rinanona.
Reirei te Reirei
Iesu Kristo e na motiki rawara ngkai ti katan Irouna.
-
Ni Mataio 11:28–30, te Tia Kamaiu e reirei bwa E na buokiira n uoti uotara aika rawawata ngkana ti butimwaea Ana kakao “Amoa amou I aomi” (kibu 29). Ni buokiia kain te kiraati bwa a na matata raoi n te berita aei, ko kona ni kaota tamnein te amo (tara te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu) ao tibwai koaua n aron aikai: amo a karaoaki bwa a na buokiia maan n uoti uota aika rawawata ke ni katia te mwakuri, ao amo a aki toki ni karaoaki bwa a na tau nakon te man. Tera n taian kabwarabwara aikai ae e karakaa riki ara atatai Mataio 11:28–30? Tera kakao aika ti kunei ni kiibu aikai? Tera berita aika a tia ni beritanaki nakoira? Kona bae naba n tibwa te berita mairoun Beretitenti Russell M. Nelson are e reke n “Bwaai ni Ibuobuoki riki Tabeua.”
-
Ti bane n iai rawawatara ake a kona ni kabebeteaki ni mwaakan Iesu Kristo. Ni kaunga te marooro iaon aei, ko kona ni kaoia kain te kiraati bwa a na wareka ao ni maroroakina Mataio 11:28–30 ma temanna riki kain te kiraati. A kona naba ni karini titiraki n aron aikai n aia maroro: Tera katoto tabeua n rawawatan te aomata ae e uouotia? Tera ae ti riai ni karaoia bwa ti na nakon Kristo? Tera ae e nanonaki n ae ti na katokaa amon te Tia Kamaiu iaora? Ko kanga n tia n namakina kabebetean rawawatam iroun te Tia Kamaiu ngkai ko rairaki Nakoina? Kain te kiraati a kona ni karekei iango riki n ana rongorongo Unimwaane David A. Bednar “Bear Up Their Burdens with Ease” (Riaona, Meei 2014, 87–90).
A Amwarake ana Reirei Iesu n te Wiita n te Tabati, iroun James Tissot
Te Tabati bon te bong ni karaoa ae raoiroi.
-
N aia berita ni kawakinan mimitongin te bong ae te Tabati, Bwaritao a tia ni karaoi tua aika matoatoa ao katei aika mai iroun te aomata, ake n tokina a kamabubua otaia n oin raoi te kantaninga ae koaua ibukin te Tabati. Ni waakinan te maroro bwa bukin tera te Uea e anganiira te bong ae te Tabati, kona bae ni kaoia kain te kiraati bwa a na wareka Mataio 12:1–13 ao Ana Rairairi Iotebwa Timiti, Mareko 2:26–27 (n te Bible appendix). Tera ae a reireiniira rongorongo aikai iaon te kantaninga ibukin te Tabati? Tera riki iango ibukin te Tabati ae ti karekei man Otinako 31:16–17; Itaia 58:13–14; ao Reirei ao Berita aika a Tabu 59:9–13.? E kanga reitakira ma te Tia Kamaiu ni bitaki ngkai ti kataia ni kawakina Ana bong ae tabu?
-
Ngkai Bwaritao a katuruturui kabwarabwara aika mwaiti iaon te tua ni kaineti ma te Tabati, te Tia Kamaiu e reirei te tua ae beebete: “Ma ngaia ae e riai te karaoa ae raoiroi n te tabati” (Mataio 12:12). Tera reirei riki tabeua aika a buokiira ni kawakina mimitongin te bong ae te Tabati? (taraa ana maroro Beretitenti Russell M. Nelson in “Bwaai ni Ibuobuoki riki Tabeua”). Bukin tera e reirei a nakoraoi riki nakon rinanin tua ngkai ti kataia ni karikirakea te toronibwai n te maiu n tamnei?
-
Ana rongorongo Beretitenti Russell M. Nelson “Te Tabati Bon te Bong ni Kakukurei” (Riaona, Meei 2015, 129–32) ao witeo ma ana reirei Unimwaane Jeffrey R. Holland “Bwaai ni Ibuobuoki riki Tabeua” e kona n raona te marooro iaon te bong ae te Tabati.
Bwaai n Ibuobuoki Riki Tabeua
Amoa amom ma Iesu Kristo.
Beretitenti Russell M. Nelson e reirei: “Ko nakon Kristo bwa kona amoa amom ma Ngaia ao ma Mwaakana, bwa e aonga n ae ko aki katika rawawatan te maiu n ti ngkoe. Ko a katitika rawawatan te maiu, n amoia ma te Tia Kamaiu ao te Tia Kabooa te aonaaba, ao n te tai ae tawe am kanganga, e ngae ngke a rang korakora a moanna ni beebete.” (“The Mission and Ministry of the Savior: A Discussion with Elder Russell M. Nelson,” Ensign, Tuun 2005, 18).
“Baikara kanikina aika I tangiri n angan te Atua?”
Beretitenti Russell M. Nelson e reirei: “Ngkana N na karaoa te babaire bwa tao te mwakuri anne e tau ibukin te Tabati ke e aki, I na tii titirakinai, ‘Tera te kanikina ae i tangiria bwa N na angan te Atua?’ Te titiraki anne e karika au rinerine iaon te Tabati bwa e na oota raoi” (“Te Tabati bon te Bong ni Kakukurei,” Riaona, Meei 2015, 130).
Te kakabwaia ni kawakinan te bong ae te Tabati.
N taian witeo aika tenua aika a reireitaki, Unimwaane Jeffrey R. Holland e reirei iaon kakabwaia ibukin kawakinan te bong ae te Tabati: “Upon My Holy Day—Getting Closer to God,” “Upon My Holy Day—Honoring the Sabbath,” and “Upon My Holy Day—Rest and Renewal” (ChurchofJesusChrist.org).
Kanakoraoan Ara Anga reirei
Kaungaa te tibwatibwa. “Aomata nako inanon am kiraati bon taan kakoaua aika kakawaki, n aia atatai, ao n aia taneiai ni maiuakinan te euangkerio. Kaoiia bwa a na tibwatibwa ao ni boutokaiia imarenaia” (Anga Reirei n ana Kawai te Tia Kamaiu, 5).