“Maati 6–12. Mataio 9–10; Mareko 5; Ruka 9: ‘E Kanakoia Uaka Tengaun Ma Uoman Iesu,’” Nakomai, Iriirai—Ibukin te Reirei n Tabati: Te Nu Tetemanti 2023 (2022)
“Maati 6–12. Mataio 9–10; Mareko 5; Ruka 9,” Nakomai, Iriirai—Ibukin te Reirei n Tabati: 2023
Maati 6–12
Mataio 9–10; Mareko 5; Ruka 9
“E Kanakoia Uaka Tengaun ma Uoman Iesu”
Ngkana ko wareka Mataio 9–10; Mareko 5; ao Ruka 9, ukoukora te kairi mairoun te Tamnei ae Raoiroi ibukin kainnanoia naake ko reireiniia. E kona korean mwiin am namakin n tamnei ni buokiko ni katauraoi ibukin te taneiai are e na kakabwaiako ao kaain am kiraati.
Kaunga te Tibwatibwa
Ko kona n tuangiia kaain am kiraati n tatabemaniia bwa a na korei iaon te mwakoro ni beba te koaua are a reiakinna man booki aika tabu n te wiiki aei, n raonaki ma kiibu man booki aika tabu. Imwiin rikoan beba, rinei tabeua ni wareki nakon te kiraati. Ti na kanga ni karaoi nanon koaua aikai nakon maiura?
Reirei te Reirei
Iai mwakan Kristo ni kamaiura n rabwatara ao n tamneira.
-
A mwaiti ana mwakuri ni kamaiu te Tia Kamaiu aika kamimi aika a reirei naba koauan te tamnei. Ni buokiia kaain te kiraati ni kaotaia n te bwai aei, tibwaua te kiraati nakon aua te kurubu ao anganiia kurubu n tatabeua nako teuana te mwakoro man booki aikai: Mataio 9:2–8; Mataio 9:18–19, 23–26; Mataio 9:20–22; ao Mataio 9:27–31. Tuangiia kaain kurubu n tatabeua nako bwa a na kamatebwaia te kakai ae kabwarabwaraaki inanon aia mwakoro ao imwiina kakimototoa ibukin te kiraati. Tera koaua n tamnei aika ti reiakin man kakai aikai?
Kakoaua iroun te Uea, iroun Liz Lemon Swindle
Te Uea e angania Ana toro te mwaaka ni karaoa Ana mwakuri.
-
Ana kaetieti te Tia Kamaiu nakon Ana Abotoro e kona ni buokira n tabera n tatabemanira nako. A kona kaain te kiraati n tia ni karekei aia atatai iaon atuun te rongorongo aei rinanon aia kamatebwai bon irouia; te katooto, iai te waaki ni kakukurei iaon atuun te rongorongo aei inanon Nakomai, Iriirai—Ibukiia Aomata n Tatabemaniia ao Utu. Tuangiia kaain te kiraati bwa a na tibwaua te bwai ae a reiakinna ke mwakuri inanon kurubu aika uarereke ni katia te waaki aei inanon te kiraati. Tuangiia kaain te kiraati bwa a na tibwauai aia taneiai ngke a namakina mwakan te Tia Kamaiu ngke a kakoroa nanon nakoaia.
-
E na kanga kamatebwaiakan te kaetieti are e anga Kristo nakoia Ana Abotoro inanon Mataio 10 ni buokiia kaain am kiraati n atai tabeia burabeti ao aboroto ni boong aikai? E na kona n ibuobuoki kabotauan ana kaetieti te Tia Kamaiu nakoia Abotoro nakon te kaetieti ake anganaki te moan Kooram n Abotoro n te Tengaun ma Uoman n te bong aei, ae kuneaki inanon “Bwaai n Ibuobuoki Riki Tabeua.” A kona kaain te kiraati n tibwaia bwa a kanga n tia n anaaki nanoia man aia mwakuri Abotoro aika maiu. Kaota am koaua iaon weteaia ae tabu burabeti ao abotoro aika maiu, ao kaoia kaain te kiraati bwa a na kaota aia koaua.
Ngkana ti karaoa ana mwakuri te Uea, E na anganiira iango iaon te bwai ae ti na taekinna.
-
Tabeman aomata a nako nanoia ngkana anga reirei ke n taetae ibukin te euangkerio ma tabeman. Ma e berita te Uea nakoia ana reirei bwa E na buokiia n ata te bwai ae a na taekinna. Tera ae ti kainnanoia ni karaoia bwa e na reke iroura ana ibuobuoki are e berita iai nakoira? Tuangiia kaain te kiraati bwa a na wareka Mataio 10:19–20; Reirei ao Berita aika Tabu 84:85; ao Reirei ao Berita aika Tabu 100:5–8 ni kakaei kaekaan titiraki aikai. N ningai ae e a tia iai te Tamnei ae Raoiroi ni buokiko n ata te bwai ae ko na taekinna? Tibwauai am taneiai ao kaoia kaain te kiraati bwa a na tibwauai oin aia taneiai.
Bwaai n Ibuobuoki Riki Tabeua
Te kaetieti nakoia Abotoro ni boong aika kaitira.
Ngke tabeman moan membwa n te Kooram n Abotoro n te Tengaun ma Uoman n tain te mwioko n tararua aei a weteaki, Oliver Cowdery e na anganiia te kaetieti ae titebo ma are e anga Iesu Kristo inanon Mataio 10. E taku:
“‘Ko na kataia ni kaitara te nano n riribai man aaba ni kabane. … Ngaia, ae, I kauringko bwa ko na karikirakea te nanorinano ae korakora, bwa I ata te kainikatonga ae inanon te aomata. Ko na tarataraiko, bwa mwiina te kamoamoaaki man te aonaaba a na uotiko rake. Ko na tarataraiko bwa mwiina am tangira a bwebwerake ibukin bwaain aon te aba. Karaoa am mwakuri bwa e na moanibwai. … [E] bon riai bwa ko na karekea am koaua mai i Karawa bon ibukimi, bwa kam aonga n taekin ami kakoaua nakon te koaua. …
“‘… Ko na kaota te rongorongo aei nakoia naake a taku n aia iango bwa a wanawana. Ao ibukin anne a kona ni bwainikiriniko; a kona n ana maium. A tia n taainako taan kakaitara n ukoukori maiuia ana toro te Atua. Ngaia ae, kam riai, n tatauraoi n tainako n anga maiumi, ngkana e kainnanoia te Atua ni kawaakan ao katean Ana mwakuri. …
“Imwiina e anai baia n tatabemaniia ao e taku, ‘Iai nanom ae koaua ni kan karaoa te mwakuri aei, n tataekina te euangkerio ma te nanomwaaka ma tarim aikai, ni kaineti ma nanon ao te kantaninga n te mwioko are ko a tia n anganaki?’ Ngaia n tatabemaniia a kaeka n ae koaua” (inanon “Mutes and Blessings, 21 Beberuare 1835,” Minute Book 1, 159–161, 164, josephsmithpapers.org; tibering ao kanikina a kaetaki nakon taai aikai).
Kanakoraoan Ara Anga reirei
Kaota am koaua iaon kakabwai. Ngkana ko kanakoi kakao bwa a na karaoia, kakoaua nakoia taan reiakinaki ae a na karekei kakabwaia ake e a tia te Atua ni beritani ngkana a mwakuri ma te onimaki iaona Ana reirei. A na aki riki kakabwaia bwa ara bwai n anainano ibukin te ongotaeaka, ma Tamara are i Karawa e tangiria ni kakabwaiaia Natina ni kabane. (Taraa Anga Reirei n Ana Kawai te Tia Kamaiu, 35.)