“Maati 20–26. Mataio 13; Ruka 8; 13: ‘Ane Iai Taningana n Ongo, ao Ke E Ongo,’” Nakomai, Iriirai—Ibukin te Reirei n Tabati: Te Nu Tetemanti 2023 (2022)
“Maati 20–26. Mataio 13; Ruka 8; 13,” Nakomai, Iriirai—Ibukin te Reirei n Tabati: 2023
Maati 20–26
Mataio 13; Ruka 8; 13
“Ane Iai Taningana n Ongo, ao Ke E Ongo”
Ngkai ko wareware, iangoi titiraki ake a kona n anga kain am kiraati ni kataia n ota n te rongorongo n te taeka ni kaikonaki. Tera ae e na kona ni kangaanga te ota iai? E na kanga am kamatebwai ni katauraoiko ni kaekaan aia titiraki?
Kaunga te Tibwatibwa
Rinanona ma te kiraati “Iango aika a na Kanakoraoa Am Kamatebwai Ibon Iroum” inanon Nakomai, Iriirai—Ibukiia Aomata n Tatabemaniia ao Utu. Kaoia kain am kiraati bwa a na tibwai kawai ake a kabonganai ni kamatebwai iai Mataio 13 ao Ruka 8; 13.
Reirei te Reirei
Nanora a riai n tauraoi ni butimwaea ana taeka te Atua.
-
Kona kanga ni kabongana te kaikonaki iaon te tia ununiki ni kaungaia kain am kiraati bwa a na katauraoi nanoia ni karekea ana taeka te Atua? Ko kona ni korea Ana Reirei ao Aomata iaon te burakibooti. Kaoia kain te kiraati bwa a na wareka Mataio 13:10–17 ao tarataraia bwa e kanga te Tia Kamaiu ni kabwarabwara te kaokoro imarenaia Ana reirei ao aomata ake a ongo Ana kaikonaki. Ngkanne tuangiia kain te kiraati bwa a na kakai ni kibu 18–23, n taraia bwa tera ae e karika taningara n “ongo maki n tanigaia ” ao a kamaki mataia nakon bwain te tamnei. Baikara kairiiri aika ti karekei n ara bong mairoun te Atua ao ana toro? Tina kanga n ununiki n te “tano ae raoiroi” ni karekea aia kairiiri? (kibu 23).
-
Kona bae ni kaoia tabeman kain te kiraati bwa a na roko n tauraoi n tatabemaniia n reirei iaon teuana te mwakoro man ana rongorongo Beretitenti Dallin H. Oaks “The Parable of the Sower” (Riaona, Meei 2015, 32–35). Tera ae ti karekea riki nakon ara atatai man te rongorongo aei iaon te kaikonaki?
Ana taetae ni kaikonaki Iesu e buokiira n ota iaon te rikirake, bwaai aika ana riki, ao kakawakin Ana Ekaretia.
-
Kona kanga ni buokiia kain am kiraati bwa a na matata n ana koauan te Ekaretia are a reiakinaki n ana taetae ni kaikonaki Iesu n Mataio 13? Ko kona ni karinani tabeua taetae ni kaikonaki iaon te burakibooti (taraa te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu ao Teachings of Presidents of the Church: Joseph Smith [2007], 293–303). Kain te kiraati a kona ni kamatebwaia teuana ke e raka riki taetae ni kaikonaki ibon irouia ke inanon kurubu aika uarereke ao n tibwa te bwai are a reiakinna ibukin te rikirake ao bwaai aika a na riki n ana Ekaretia Kristo.
Abanuean karawa kaanga ai aron ana karaun te tia akawa.
-
Tera ae ti reiakinna ibukin kakaawakin kainakin te Ekaretia man te taetae ni kaikonaki n te kaubwai n te tawaana ao te bwaeao ae bati boona, are e reke n Mataio 13:44–46? Tabeman kain am kiraati (ke aomata ake a kinaia) a kona n tia ni karaoi anganano—aika bubura ke uarereke—n riki bwa kain te Ekaretia. Kaoia kain te kiraati bwa a na tibwa te anganano are a tia ni karaoia ke n nooria tabeman bwa a karaoia bwa aonga ni kaina te Ekaretia. Tera kakabwaia aika a tia n roko imwiin karaoan anne? Kaoia kain te kiraati bwa a na iangoia tera ae a namakinna ae a na anganano iai ibukin te Tia Kamaiu.
N tokin aonaaba, te Uea e na ikotiia aika raoiroi ao e na kamaunaia aika buakaka.
-
Kona kanga ni buoka am kiraati n anai reirei man taetae ni kaikonaki n te wiita ao te titania are e na buokiia bwa a na teimatoa bwa Aomata aika Itiaki ni Boong aika Kaitira aika kakaonimaki? Waaki man kaoaia kain te kiraati bwa a na kakimototoa te taetae ni kaikonaki ao kabwaranakoana. Tera tabeua reirei n te taetae ni kaikonaki aei ibukin ara bong? Bukin tera e kakaawaki bwa kona ataia bwa te Uea e kariaia Ana Aomata bwa a na “uaia n rikirake” (Mataio 13:30) ma aika buakaka ni karokoa bongin te tai? Tina kanga ni kawakin ara onimaki iroun Iesu Kristo bwa a na korakora ngkai e a katobibira te buakaka? E na kanga ni buokiira Kristo? Reirei ao Berita aika a Tabu 86:1–7 ao ana marooro Unimwaane L. Tom Perry n “Bwaai ni Ibuobuoki riki Tabeua” e kona n anga riki iango iaon te kaikonaki aei aika a kona ni karaoaki n taai aikai.
Bwaai n Ibuobuoki Riki Tabeua
Ti riai n ribanaa ae raoiroi.
Unimwaane L. Tom Perry e reirei: “Aia kairiribai ngkoa aomata are Tatan e a tia ni kunei kawai aika bati are e kona n iangoa kabuburaan kamaenakoan te titania. E a tia ni kunea kawaina n ninia kakawakin oin mwengara. Kawain aonaaba ao kawai aika bubuaka a riki n rababanako n taraa n ae akea ae kona ni kamaunainako. A roko man te rerio, intanete, ao terewition ao rinanon te eea ni bwaai ni kaongoraa aika ti karikirakei ibukin reireiakira ao kakukureiara. Te wiita ao te titania a uaia n rikirake. Te aomata are tabena tararuaan te tawaana e riai, ni korakorana ni kabane n ribanaa ae moan te tamaroa ni kakorakora bwa aonga titania aikai n tararaoi n akea kan tarakiia n te mata ke te nano.” (“Finding Lasting Peace and Building Eternal Families,” Riaona, Nobembwa 2014, 44).
Kanakoraoan ara Anga reirei
Kabotoa am anga reirei iaon te taeka n reirei. Kakoaua raoi bwa kaain am kiraati a boboto aia marooro iaon boto n reirei ake ni booki aika tabu. Ko kona ni karaoa aei ngkana ko tuangiia ataei bwa a na kaman wareki koroboki aika a tabu imwain taina, ni kabotoa aia maroro kain am kiraati ioan koroboki aika a tabu, ao n tuangiia bwa a na tibwai aia koaua iaon koauan te reirei. (Taraa Reirei n ana Kawai te Tia Kamaiu, 20–21.)