“27 Febwari–5 Maj. Matiu 8; Mak 2–4; Luk 7: ‘Bilif blong Yu I Mekem Yu Yu Gud Bakegen,’” Kam Folem Mi—Blong Sandei Skul: Niu Testeman 2023 (2022)
“27 Febwari–5 Maj. Matiu 8; Mak 2–4; Luk 7,” Kam Folem Mi—Blong Sandei Skul: 2023
27 Febwari–5 Maj
Matiu 8; Mak 2–4; Luk 7
“Bilif blong Yu I Mekem Yu Yu Gud Bakegen”
Taem yu stap rere blong tij, statem wetem prea mo stadi Matiu 8; Mak 2–4; mo Luk 7. Kam Folem Mi—Blong Wanwan Man, Woman mo Famli i save mekem stadi blong yu i kam antap mo i givim sam moa aedia blong tij antap long wanem i stap ia finis.
Invaetem Ol Memba blong Serem Wanem Oli Gat
Ol memba blong klas blong yu maet oli faenem sam tingting we i gat paoa long hem taem oli stap stadi abaot ol merikel long ol japta ia (luk long lis blong ol hiling blong Sevya long aotlaen blong wik ia long Kam Folem Mi—Blong Wanwan Man, Woman mo Famli). Tingting blong invaetem ol memba blong klas blong serem wanem oli lanem wetem wan patna o wetem ful klas.
Stap Tijim Doktrin
Merikel i tekples folem tingting blong God mo fet blong yumi long Jisas Kraes.
-
?Olsem wanem nao bae yu yusum storian blong ol merikel blong Sevya blong helpem fet blong ol memba blong klas i kam antap? Maet yu save askem olgeta blong raetem wan lis long bod blong sam long ol merikel blong hiling we i stap long Matiu 8; Mak 2; mo Luk 7. Ol memba blong klas oli save serem olsem wanem ol pipol we oli kam oraet, oli soem fet blong olgeta long Kraes. ?Wanem nao ol skripja ia oli tijim abaot fet mo merikel? Ol memba blong klas oli save serem sam moa trutok abaot fet mo merikel we i stap long Momon 9:15–21; Ita 12:12–16; Moronae 7:27–37; mo Doktrin mo Ol Kavenan 35:8 (luk tu long Bible Dictionary, “Miracles”). ?Wetaem nao yumi bin luk merikel taem yumi putum fet long Jisas Kraes?
-
Storian blong merikel long Mak 2:1–12 i tijim, long medel blong ol nara samting, valiu blong stap wok tugeta long yuniti blong sapotem Sevya blong givhan long olgeta we oli stap long nid long saed blong spirit o long bodi. Tingting blong invaetem ol memba blong klas blong luklukbak long stori we i stap long ol skripja, mo serem sam moa tingting we i kam long mesej blong Elda Chi Hong (Sam) Wong “Rescue in Unity” (Liahona, Nov. 2014, 14–16; luk tu long “Sam Moa Risos”). ?Wanem nao yumi save lanem long Mak 2:1–12 abaot wok tugeta long yuniti blong givim seves long olgeta we oli stap long nid? (luk tu long Mak 3:24–25).
Jisas Kraes i gat paoa blong karem pis i kam long medel blong ol strong win blong laef.
-
Maet yu save sam long ol jalenj we ol memba blong klas blong yu oli stap fesem. From se yumi evriwan i gat ol hadtaem long sam taem long laef blong yumi, luklukbak long storian long Mak 4:35–41 i save leftemap fet blong ol memba se Sevya i save karem pis i kam long olgeta. Givim long wanwan memba blong klas wan pis pepa, mo askem olgeta blong raetem long wan saed, wan hadtaem we oli fesem. Long narasaed, askem olgeta blong raetem samting we i stap long Mak 4:35–41 we i givim insperesen long olgeta blong tanem olgeta i go long Sevya long taem blong ol hadtaem. Leftemap tingting blong olgeta blong serem wan eksperiens blong olgeta we i go wetem wanem we oli ridim sapos oli filim se i stret blong mekem.
-
Hym ia “Master, the Tempest Is Raging” (Hymns, namba 105) i folem stori we i stap long Mak 4:35–41. Maet, ol memba blong klas oli save lukluk long ol toktok blong hym ia, we i go wetem ol sentens insaed long ol skripja. Yu save soem wan pikja tu we i soemaot storian ia (luk Gospel Art Buk, namba 40) mo toktok raon long wanem taem ia blong storian ia, artis i stap putumaot. ?Wanem ol narafala wei we yu save helpem ol memba blong klas blong andastanem mining mo paoa blong merikel ia?
Fraet I Lid i go long Fet, i kam long Howard Lyon
Taem yumi kasem fogivnes from ol sin blong yumi, lav blong yumi long Sevya i gat moa mining.
-
?Wanem yumi save lanem long eksampol blong woman ia, mo aot long ol tijing blong Sevya insaed long Luk 7:36–50 taem yumi stap lukaotem fogivnes from ol sin blong yumi bakegen? ?Olsem wanem fasin blong sakem sin i helpem yumi kam moa kolosap long Jisas Kraes? ?Olsem wanem storian ia i soem long yumi tru long insperesen, ol wei blong lukluk olgeta we oli bin mekem sin?
Sam Moa Risos
“Taem Jisas i luk bilif blong olgeta.”
Elda Chi Hong (Sam) Wong i bin serem tingting ia abaot storian we i stap long Mak 2:1–12:
“Bae mi serem wetem yu wan moa rij samting we i haed insaed long stori blong skripja ia. I stap long ves 5: ‘Taem Jisas i luk bilif blong olgeta’ (oli ademap italik). Mi no bin luk hemia bifo—bilif blong olgeta. …
“?Huia ol man ia we Jisas i tokbaot olgeta? Maet hem i olgeta fofala ia we oli karem sikman we haf bodi blong hem i ded, sikman ia, ol man we oli bin prea from hem, mo olgeta ia evriwan ia we oli stap lisin long prijing blong Jisas mo stap glad long hat blong olgeta from merikel we bae i hapen. Maet i wan hasban o waef, wan papa mo mama, wan boe o wan gel, wan misinari, wan kworom presiden, wan Rilif sosaeti presiden, wan bisop, mo wan fren we i stap longwe tu. Yumi evriwan i save helhelpem wanwan long yumi. Oltaem yumi mas lukaotem wetem strong tingting blong helpem olgeta we oli stap long nid” (“Rescue in Unity,” Liahona, Nov. 2014, 16).
Stap Kam Antap long Fasin blong Yumi blong Stap Tij
Serem testemoni oltaem. Simpol mo tru witnes blong yu abaot wan trutok i save gat paoa blong lidim tingting blong olgeta we yu stap tijim. Witnes blong yu i no nidim ol toktok we i flas, o i longfala. Eksampol, blong gat wan simpol testemoni olsem, merikel blong save gat gospel long laef blong yu.