“20–26 Maj. Matiu 13; Luk 8; 13: ‘Man we I Gat Sora, Hem I Mas Lisin Gud long Tok Ya,’” Kam Folem Mi—Blong Sandei Skul: Niu Testeman 2023 (2022)
“20–26 Maj. Matiu 13; Luk 8; 13,” Kam Folem Mi—Blong Sandei Skul: 2023
20–26 Maj
Matiu 13; Luk 8; 13
“Man we I Gat Sora, Hem I Mas Lisin Gud long Tok Ya”
Taem yu stap rid, tingting long ol kwestin we ol memba blong klas blong yu maet bae oli gat taem oli traem blong andastanem ol mesej blong ol parabol. ?Wanem nao i had blong andastanem? ?Olsem wanem stadi blong yu i rere long yu blong ansarem ol kwestin blong olgeta?
Invaetem Ol Memba blong Serem Wanem Oli Gat
Olsem wan klas, luklukbak long “Sam Aedia blong Kam Antap long Skripja Stadi blong Yuwan” long Kam Folem Mi—Blong Wanwan Man, Woman mo Famli. Invaetem ol memba blong klas blong serem ol wei we oli yusum blong stadi Matiu 13 mo Luk 8; 13.
Stap Tijim Doktrin
Hat blong yumi i mas rere blong kasem tok blong God.
-
?Olsem wanem nao yu save yusum parabol blong man blong sakem sid, blong helpem ol memba blong klas blong yu, blong oli rere long hat blong olgeta blong kasem tok blong God? Yu save raetem Disaepol mo Ol Narawan long bod. Invaetem ol memba blong klas blong ridim Matiu 13:10–17 mo lukaotem olsem wanem Sevya i tokbaot ol disaepol blong Hem oli defren long ol nara man we oli harem ol parabol blong Hem. Afta askem ol memba blong klas blong lukaotem long ves 18–23, wanem nao i save mekem sora blong yumi i “blok blong save harem” o ol ae blong yumi i sat long ol samting long saed blong spirit. ?Wanem daereksen yumi kasem long dei blong yumi we i kam long God mo ol wokman blong Hem? ?Olsem wanem nao bae yumi wok blong mekem “gudfala graon” blong save kasem daereksen blong olgeta? (ves 23).
-
Maet yu save invaetem sam memba blong klas blong oli save rere blong kam tijim wan seksen blong mesej blong Presiden Dallin H. Oaks “The Parable of the Sower” (Liahona, May 2015, 32–35). ?Wanem nao mesej blong hem i ademap long save blong yumi long parabol ia?
Parabol blong Jisas i helpem yumi andastanem valiu, gro, mo weaples bae Jos blong Hem i go kasem.
-
?Olsem wanem yu save helpem ol memba blong klas i andastanem ol trutok abaot Jos, we oli stap insaed long ol parabol we Jisas i tijim long Matiu 13? Yu save mekem lis blong sam long ol parabol long bod (luk long aotlaen blong wik ia long Kam Folem Mi—Blong Wanwan Man, Woman mo Famli, mo Teachings of Presidents of the Church: Joseph Smith [2007], 293–303). Ol memba oli save stadi long wan o moa parabol olgetawan o long wan smol grup mo serem wanem oli lanem, abaot wea ples bae Jos blong Kraes i gro i go kasem.
Kingdom blong heven i olsem net blong fisaman.
-
?Wanem nao yumi lanem abaot valiu blong stap wan memba blong Jos long ol parabol blong bokis mane we i stap long pis graon mo gudfala ston ia perel, we i stap long Matiu 13:44–46? Sam memba blong klas blong yu (o sam man we oli save long olgeta) maet oli mekem sakrifaes—bigwan o smol—blong kam ol memba blong Jos. Invaetem ol memba blong klas blong tokbaot ol sakrifaes we oli bin mekem o oli luk sam man oli mekem blong kam memba blong Jos. ?Wanem blesing nao oli kasem olsem risal blong sakrifaes? Invaetem ol memba blong klas blong tingting hevi long wanem nao oli filim se i gud blong sakrifaesem from Sevya.
Long en blong wol Lod bae i karem ol man we oli stret mo gud i kam wan mo i sakemaot olgeta we oli nogud.
-
?Olsem wanem nao yu save helpem klas blong yu i lanem ol lesen aot long ol parabol blong gudfala sid mo rabis gras we bae i save helpem olgeta blong stap ol fetful Lata-dei Sent? Blong statem, invaetem wan memba blong klas blong talem sot toktok, parabol mo mining blong hem. ?Wanem sam long ol lesen long parabol ia we i blong dei blong yumi? ?From wanem i impoten blong save se Lod i letem blong ol Sent blong Hem oli “gro tugeta” (Matiu 13:30) wetem ol nogud man kasem taem blong karemaot gudfala wan? ?Olsem wanem yumi holemtaet fet blong yumi i strong long Jisas Kraes taem rabis fasin i stap raon long yumi? ?Kraes bae i helpem yumi olsem wanem? Doktrin mo Ol Kavenan 86:1–7 mo sot toktok blong Elda L. Tom Perry long “Sam Moa Risos” i save givim moa klia lukluk long olsem wanem yumi save aplae long parabol ia long ol las dei.
Sam Moa Risos
Yumi mas givim gudfala kaekae long olgeta we oli gud.
Elda L. Tom Perry i bin tijim: “Olfala enemi ia blong evri man i faenem plante tul, folem hamas hem i save tingting long hem, blong saksakem ol rabis gras oli go olbaot long evri ples. Hem i faenem ol niu wei blong mekem ol rabis gras oli kam insaed stret long ol tabu hom blong yumi. Ol nogud rod mo rod blong wol ia oli go stap olbaot mekem se i luk se i no gat wan ril rod blong pulumaot olgeta. Oli kam tru long satelaet mo tru long ea i go long ol stret tul ia we yumi bin krietem blong tijim yumi mo gat gud taem wetem. Ol gud sid mo rabis gras oli gro tugeta wanples. Man ia we i lukaot long garen, i mas, wetem evri paoa blong hem, fidim wanem we i gud mo mekem i kam strong mo naes gogo kasem mak ia we bae rabis gras ia, man i no wantem luk o harem” (“Finding Lasting Peace and Building Eternal Families,” Liahona, Nov. 2014, 44).
Stap Kam Antap long Fasin blong Yumi blong Stap Tij
Mekem tijing blong yu i lukluk nomo long doktrin. Mekemsua se ol storian blong yufala insaed long klas i lukluk nomo long fandesen doktrin ia insaed long ol skripja. Yu save mekem hemia taem yu askem ol memba blong klas blong ridim ol skripja bifo oli kam long klas, toktok raon long ol skripja ia nomo, mo askem ol memba blong klas blong serem ol testemoni blong olgeta abaot tru doktrin. (Luk long Teaching in the Savior’s Way, 20–21.)