27 Maj–2 Epril

Matiu 14; Mak 6; Jon 5–6

“Yufala I No fraet”

Taem yu stap rere blong tij long Matiu 14; Mak 6; mo Jon 5–6, lukaotem ol mesej we i save helpem klas blong yu. Taem yu mekem hemia, tingting long olsem wanem blong mekem se ol memba blong klas, oli save gat wan eksperiens we i gat mining wetem ol skripja.

Invaetem Ol Memba blong Serem Wanem Oli Gat

Blong statem wan toktok raon, invaetem sam memba blong klas blong oli jusum wanwan japta blong riding we i stap, mo serem wan mesej blong japta ia we i gat mining long olgeta. Taem oli serem, ol nara klas memba oli save askem ol kwestin o ademap ol niu tingting.

Stap Tijim Doktrin

Jon 5:16–47

Jisas Kraes I Stret Pikinini Ia Nomo blong Papa long Heven.

• Long Jon 5, Jisas i givim sam tingting abaot Hemwan, Papa blong Hem, mo rilesensip blong Hem wetem Papa. Blong helpem ol memba blong klas oli faenemaot ol niufala tingting ia, traem seraotem olgeta long ol grup mo givim smol minit long olgeta, blong oli raetemdaon plante trutok we oli save fanem long ol ves 16–47 abaot fasin blong God mo Jisas Kraes mo abaot rilesensip blong Tufala. Invaetem ol grup, wan afta wan, blong ridimaot ol trutok ia long lis blong olgeta. ?Olsem wanem ol trutok ia oli helpem yumi blong save gud Papa long Heven mo Pikinini blong Hem? ?Olsem wanem yumi save folem eksampol blong Jisas Kraes blong obei long Papa?

• Wan aktiviti long aotlaen blong wik ia long Kam Folem Mi—Blong Wanwan Man, Woman mo Famli i givim tingting blong raetemdaon evri taem we Jisas i yusum toktok ia Papa long Jon 5:16–47. Invaetem sam memba blong klas blong serem wanem oli lanem taem oli finisim aktiviti ia. Askem olgeta blong serem sam niu tingting we oli kasem abaot Papa long Heven mo Pikinini blong Hem we Hem i Lavem Tumas.

Matiu 14:15–21; Mak 6:33–44; Jon 6:5–14

Sevya i save mekem i kam bigwan wanem yumi givim long hem wetem tingting i stap daon blong mekem ol stamba tingting blong Hem oli hapen.

• ?Wanem i save helpem ol memba blong klas blong faenem olgetawan, mining blong merikel we Jisas i fidim faef taosen? Maet yu save askem olsem wanem taem oli rid abaot merikel ia, i mekem fet blong olgeta long Sevya i kam antap long janis ia we Hem i save blesem olgeta wanwan. Oli save tokbaot wan taem we oli filim se Sevya i givim moa paoa long olgeta blong mekem wanem we oli ting se oli no save mekem. Mo tu, bifo klas i stat, yu save askem ol memba blong klas blong karem wan pikja i kam long klas, o wan samting we i ripresentem eksperiens blong olgeta.

  

  Tru long merikel, Jisas i fitim faef taosen pipol wetem faef bred mo tu fis.

• Vidio ia “The Feeding of the 5,000” (ChurchofJesusChrist.org) i save helpem ol memba blong klas blong oli tingting hevi long merikel ia we oli tokbaot long ol skripja ia. ?Wanem ol samting insaed long stori ia i we leftemap fet blong yumi long Sevya? ?Long wanem wei Sevya i save fidim yumi long saed blong spirit? ?Wanem taem nao Jisas Kraes i fidim mo sapotem yumi?

Matiu 14:22–33

Jisas Kraes i invaetem yumi blong yumi putum ol fraet mo tu tingting blong yumi long saed, blong mekem se yumi save kam long hem fulwan.

• Stori ia long Matiu 14:22–33 i save helpem ol memba blong klas, blong mekem fet blong olgeta long Sevya mo wantem blong folem Hem, i kam antap. Invaetem ol memba blong klas blong ridim stori ia mo ridim gud ol toktok we i kam long Kraes, Pita, mo ol nara Aposol. ?Long wanem wei nao ol toktok blong Jisas i helpem Pita blong gat fet mo jiam aot long bot mo wokbaot long wota? ?Olsem wanem nao toktok blong Jisas blong “no harem nogud” mo “no fraet” (ves 27) i kam long yumi tedei? ?Wanem nao yumi save lanem long Pita abaot wanem i minim blong stap olsem wan disaepol blong Jisas Kraes mo blong trastem Hem? Maet yu save leftemap tingting blong ol memba blong klas blong tingbaot mo serem eksperiens we, olsem Pita, oli tekem aksen blong folem Sevya, nomata oli no save wanem bae i hapen. Askem olgeta blong serem wanem oli lanem aot long ol eksperiens ia. ?Olsem wanem Jisas Kraes i kam blong helpem yumi long taem blong yumi blong fraet mo fasin blong gat tu tingting?

Jon 6:22–71

Olsem ol disaepol blong Kraes, yumi mas wantem blong bilif mo akseptem trutok, nomata se i had blong mekem.

• Ol samting we i stap hapen long Jon 6 i save kam wan ples blong lukluk long hem, taem we ol pipol oli gat ol kwestin long saed blong doktrin, histri, o polisi blong Jos blong Kraes. ?Blong helpem ol memba blong klas blong yu oli andastanem ol samting we oli stap hapen ia, yu save raetem ol kwestin olsem olgeta ia, long bod blong olgeta oli ansarem: ?Wanem nao ol pipol oli bin stap wantem luk i hapen? (luk long ves 26). ?Be wanem nao Kraes i givim long olgeta? (luk long ves 51). ?Wanem nao ol pipol oli andastanem i rong? (luk long ol ves 41–42, 52). ?Yu save askem ol kwestin olsem olgeta ia blong helpem ol memba blong klas oli yusum stori ia long laef blong olgeta: ?Wanem sam long olgeta wei we yumi save jusum blong wokbaot wetem Kraes nomata we yumi gat ol kwestin mo ol tu (2) tingting? (luk long ves 66). ?Wanem sam long ol doktrin, ol odinens, o ol nara “toktok blong laef we i no save finis” we i stap nomo insaed long Jos Ia blong Kraes we i bin kambak (luk long ves 67–69). Blong kasem ol niu tingting we i kam long wan aposol blong tedei, luk long mesej blong Presiden M. Russell Ballard “To Whom Shall We Go?,” (Liahona, Nov. 2016, 90–92).

Stap Kam Antap long Fasin blong Yumi blong Stap Tij

Lisin. “Blong stap lisin, hem i wan aksen blong lav. … Askem Papa long Heven blong helpem yu blong andastanem wanem nao ol memba blong klas oli gat blong talem. Taem yu lisin gud long ol mesej blong olgeta we oli talem mo hemia we oli no talem, bambae yu kam blong andastanem gud moa nid, wari, mo wanem oli wantem” (Teaching in the Savior’s Way, 34).