“17–23 Epril. Matiu 18; Luk 10: ‘?Bambae Mi Mas Mekem Olsem Wanem blong Kasem Laef Ia we I No Save Finis?,’” Kam Folem Mi—Blong Sandei Skul: Niu Testeman 2023 (2022)
“17–23 Epril. Matiu 18; Luk 10,” Kam Folem Mi—Blong Sandei Skul: 2023
Gudfala Man Sameria, i kam long Dan Burr
17–23 Epril
Matiu 18; Luk 10
“?Bambae Mi Mas Mekem Olsem Wanem blong Kasem Laef Ia we I No Save Finis?”
Ridim Matiu 18 mo Luk 10, mo raetemdaon ol filing mo tingting blong yu. Taem yu kasem ol filing ia, yu save askem yuwan, olsem we Elda Richard G. Scott i talem: “?I gat moa samting we mi mas save?” (“To Acquire Spiritual Guidance,” Liahona, Nov. 2009, 8).
Invaetem Ol Memba blong Serem Wanem Oli Gat
Ol japta ia oli holem plante eksampol blong ol tijing blong gospel we i defren long wanem we wol i tijim yumi long hem. Maet ol memba blong klas oli save serem sam eksampol we oli faenem long riding blong olgeta long wik ia. ?Olsem wanem nao Lod i blesem yumi taem yumi praktisim ol tijing blong Hem?
Stap Tijim Doktrin
Yumi mas fogivim ol narawan sapos yumi wantem blong kasem fogivnes long Lod.
-
?Olsem wanem yu save yusum parabol blong wokman we i no gat sore, blong givim insperesen long ol memba blong klas blong oli save gat moa fasin blong save fogiv? Maet yu save raetem ol kwestin olsem olgeta ia long bod mo askem ol memba blong klas blong tingting hevi long olgeta taem wan i talem bakegen parabol ia: ?King i ripresentem huia? ?Wokman we i no gat sore i ripresentem huia? ?Ol nara wokman oli ripresentem huia? ?Kaon i ripresentem wanem? Invaetem ol memba blong klas blong serem wanem mesej nao parabol i gat blong olgetawan. (Luk tu long “Sam Moa Risos.”)
-
Yu save invaetem klas blong oli yusum sam situesen mo ditel blong wol blong yumi tedei mo krietem wan eksampol blong parabol blong wokman we i no gat sore we i tijim semmak lesen abaot fogivnes. (Tingting blong mekem olgeta i wok long hemia long ol grup.) Tokbaot olsem wanem parabol i ansarem kwestin blong Pita abaot, hamas taem hem i mas fogiv.
Jisas i tokbaot mane, blong tij abaot fogivnes.
Blong kasem laef we i no save finis yumi mas lavem God mo ol neba blong yumi.
-
Hemia wan aedia we maet i givim wan niufala lukluk long parabol blong man Sameria: invaetem olgeta blong oli priten se oli stap investigetem wan kes blong man we oli kilim i hafded mo stil long rod bitwin Jeriko mo Jerusalem. Askem sam memba blong klas blong kam long klas rere blong ripresentem defren pipol insaed long parabol mo tokbaot pat blong olgeta insaed long kes ia. Eksampol, ?wanem nao sam risen we i mekem pris mo Livaet oli no stop blong helpem man we i kasem kil i stap? ?From wanem Man Sameria i stop? ?Wanem ol tingting we man blong hotel i ademap? ?Olsem wanem nao man we i kasem kil i filim abaot wanwan long olgeta man ia? Meksua se toktok storian ia i givim insperesen long ol memba blong klas blong oli stap olsem Man Sameria, mo man blong hotel, mo no stap olsem pris mo Man Livae.
-
?Olsem wanem parabol gudfala Man Sameria i ansarem kwestin we oli askem long Jisas long Luk 10:25–29? Invaetem ol memba blong klas blong tokbaot taem we oli bin filim olsem “man we oli kilim” (ves 30) we i nidim help bigwan. ?Help i kam olsem wanem? ?Olsem wanem yumi olsem ol memba blong wod i wok tugeta blong helpem ol narawan, olsem gudfala man Sameria mo man we i lukaot long hotel, i mekem?
Yumi jusum “gudfala samting” we bae i lidim yumi go kasem laef we i no save finis tru ol joes we yumi mekem evri dei.
-
Afta we klas i ridim Luk 10:38–42 yu save askem ol memba blong klas wanem nao olgeta bae oli mekem sapos oli stap long ples blong Mata. ?Olsem wanem eksperiens ia i save helpem olgeta long ol joes we bae i kam yet? ?Olsem wanem bae yumi kam blong save faenemaot wanem samting long laef blong yumiwan we i nidim moa taem blong lukluk long hem? Ol memba blong klas oli save lukaotem long mesej blong Presiden Dallin H. Oaks “Good, Better, Best” (Liahona, Nov. 2007, 104–8) kaonsel we bae i save helpem olgeta.
Sam Moa Risos
Ol kaon long parabol blong wokman we i nogat sore.
Elda Jeffrey R. Holland i givim wan tingting long saed blong ol kaon we i nid blong givim bak, long parabol blong wokman we i nogat sore, i talem:
“I gat sam defren tingting we ol man we oli skul, oli talem abaot valiu blong mane oli tokbaot long ples ia—sore bae mi yusum mane blong U.S. blong mekem matematik i kam isi, sapos smol pat we i smol long olgeta evriwan, sapos pat blong kaon ia we oli no fogivim hem i 100-peni i, olsem, $100 (10,000VT) long taem blong yumi, mekem se kaon blong 10,000-talen we oli fogivim fri nomo, bae i kam kolosap long $1 bilian (100 bilian VT)—o moa!
“Sapos hemia i wan kaon blong yuwan, hemia ia wan bigfala namba tumas—i bitim wanem yumi save andastanem. (!I no gat man i save spendem kaen mane olsem, hemwan!) Nao, stamba tingting blong parabol ia, hem i minim blong no save andastanem; hem i minim blong go bitim wanem yumi save kasem, mo bitim wanem yumi save mekem i kam gud bakegen. Hemia from se i no wan stori abaot tu(2) wokman we tufala i stap raorao long Niu Testeman. Hem i wan stori abaot yumi, famli blong man we i foldaon i stap—yumi ol man blong kaon we yumi save ded, yumi ol man blong mekem sin, mo yumi ol prisena evriwan. Wanwan long yumi i man blong kaon, mo jaj i rul finis se yumi evriwan bae yumi go long prisen. Mo bae yumi go long prisen blong stap; be from gladhat blong wan King nomo we i mekem yumi go fri, from se Hem i lavem yumi mo i ‘gat fulap sore long yumi’ [Doktrin mo Ol Kavenan 121:4]” (“Be Ye Therefore Perfect—Eventually,” Liahona, Nov. 2017, 41).
Kam Antap long Fasin blong Yumi blong Stap Tij
Eksampol blong Sevya Taem yu ridim stori blong tijing blong Sevya long niu testeman, lukaotem ol lesen long eksampol blong Hem we i save helpem yu blong kam wan gudfala tija. Olsem eksampol, long Luk 10:25–37, ?wanem Jisas i bin mekem blong tijim loya abaot olsem wanem blong kasem laef we i no save finis?