3–9 Epril

Ista

“?E, Ded, Olsem Wanem Yu Save Win?”

Taem yu stap rere blong tij long wik ia, tingting long olsem wanem storian blong klas long Ista Sandei, i save bildim fet long Jisas Kraes mo Atonmen blong Hem.

Invaetem Ol Memba blong Serem Wanem Oli Gat

Askem ol memba blong klas olsem wanem oli save ansa long ol kwestin olsem: “?Wanem i Atonmen blong Jisas Kraes?” mo “?Olsem wanem mi save kasem ol blesing blong Atonmen blong Kraes?” Invaetem olgeta blong serem eni skripja we oli ridim long wik ia we bae i help blong ansarem ol kwestin ia.

Stap Tijim Doktrin

Jisas Kraes i letem yumi go fri long sin mo ded, i mekem yumi kam strong long wanem yumi no strong long hem, mo i kamfotem yumi long ol hadtaem blong yumi.

• Ol memba blong klas blong yu, ?oli andastanem se Jisas i kamfotem yumi long ol hadtaem mo i mekem yumi kam strong from ol samting we yumi no strong long hem, mo i mekem yumi kam fri long sin mo ded? Wan wei blong helpem olgeta faenemaot ol prinsipol ia i blong raetem ol toktok ia long bod: Sin, Ded, Tes, Wiknes. Wanwan memba blong klas i save ridim wan long ol skripja we oli listim i stap long “Sam Moa Risos” mo tingting hevi long olsem wanem Sevya i helpem yumi stanap strong mo winim ol samting ia. Ol memba blong klas oli save raetem wanem oli lanem aot long ol skripja ia andanit long wanwan taetol we i stap mo serem testemoni blong olgeta abaot Sevya mo Atonmen blong Hem.

  

  Taem Oli Hangem Kraes long Kros, i kam long Louise Parker

• Maet wan simpol lesen i save help blong soemaot wanem i defren bitwin fasin blong stap klin mo fasin blong stap stret evriwan: Yu save raetem long bod ol fas laen blong Moronae 10:32, be putum insaed ol mistek long saed blong speling mo grama. Afta invaetem wan memba blong klas blong rapemaot (be i no korektem) ol mistek. ?Hemia, i stretem problem? ?Wanem lesen yumi save lanem long skripja ia mo objek lesen ia, abaot paoa blong atonmen blong Sevya, i save mekem long laef blong yumi? Stetmen we i kam long Presiden Dieter F. Uchtdorf i maet help tu: “Sapos fasin blong sevem man i minim blong rapemaot ol mistek mo ol sin blong yumi nomo, nao—fasin blong sevem man i save gud hamas—i no fufilim wanem Papa i wantem long yumi. Wanem Hem i wantem i moa hae: Hem i wantem ol boe blong Hem mo ol gel blong Hem blong kam olsem Hem” (“The Gift of Grace,” Liahona, May 2015, 108).

• Ol stori mo ol fasin blong komperem samting i save helpem yumi andastanem moa, Atonmen blong Kraes. Maet yu wantem blong serem wan stori o blong komperem long wan long ol mesej blong jeneral konfrens we i stap long “Sam Moa Risos.” O yufala i save wajem tugeta “Handel’s Messiah: Debtor’s Prison” (vidio), ChurchofJesusChrist.org, mo toktok raon long olsem wanem Atonmen blong Jisas Kraes i mekem yumi go fri long ol kalabus blong yumi. Ol memba blong klas oli save serem eni tingting o filing oli gat abaot Sevya mo Atonmen blong Hem from yumi.

Matiu 28:1–10; Luk 24:13–35; Jon 20:1–29; 1 Korin 15:3–8, 55–58

Ol witnes long Niu Testeman oli talemaot testemoni blong olgeta se, Jisas Kraes i winim ded.

• Tingting blong luklukbak long stori ia we i stap insaed long skripja blong fas Ista—Laef Bakegen long Ded blong Jisas Kraes. Yu save invaetem wan memba blong klas blong save talem stori ia bakegen long toktok blong hemwan (luk long Jon 20:1–17). Yu save soem tu, wan Baebol vidio, olsem “He Is Risen” (ChurchofJesusChrist.org).

• Maet klas blong yu bae i save kasem wan andastaning we i moa dip, sapos oli traem blong tingting olsem se olgeta we oli witnes long laef bakegen blong Jisas Kraes oli ol loya mo ol nius ripota we oli stap investigetem pruf ia se Kraes i laef bakegen long ded. Invaetem olgeta blong faenem ol pipol insaed long ol skripja we i save givim seves olsem ol witnes (luk long Matiu 28:1–10; Luk 24:13–35; Jon 20:19–29; 1 Korin 15:3–8, 55–58). Oli save raetem wan sot stori abaot wanem nao ol pipol ia oli save talem taem oli testifae long kot o taem olgeta blong nius ripot oli intaviu olgeta.

• Wan wei blong mekem yumi tangkyu moa abaot Laef Bakegen long Ded blong Sevya i blong tingbaot olsem wanem yumi save eksplenem ol bilif blong yumi long ol narafala man. Olsem wanem ol memba blong klas oli save serem testemoni blong olgeta abaot Jisas Kraes long ol situesen we i stap ia: wan memba blong famli i kasem wan series sik; wan fren i lusum wan we i lavem tumas; wan neba i askem from wanem yu selebretem Ista. Leftemap tingting blong olgeta blong luk long ol skripja (olsem olgeta we oli stap long “Sam Moa Risos”) taem oli stap traem blong faenem ol ansa blong olgeta. Invaetem sam memba blong klas blong serem ol tingting blong olgeta.

Sam Moa Risos

Ol skripja abaot Atonmen mo Laef Bakegen long Ded blong Sevya.

• Aesea 25:8; 53:3–6

• Jon 20:11–17

• Rom 8:31–39

• 2 Nifae 9:5–12

• Mosaea 3:5–10

• Alma 7:10–14; 11:42–44

• 3 Nifae 11:8–17; 27:13–20

• Moronae 7:41

• Doktrin and Ol Kavenan 19:15–19

Ol mesej abaot Atonmen mo Laef Bakegen long Ded blong Sevya.

• Dale G. Renlund, “Tingting long Gudfala Fasin mo Bigfala Paoa blong God,” Liahona, Mei 2020, 41–44

• Gerrit W. Gong, “Gudfala Man blong Lukaot long Sipsip, Smol Sipsip blong God,” Liahona, Mei 2019, 97–100

• Sharon Eubank, “Kraes: Laet Ia We I Stap Saen long Tudak,” Liahona, Mei 2019, 73–76

• Cristina B. Franco, “Hiling Paoa blong Jisas Kraes,” Liahona, Nov 2020, 60–62

Stap Kam Antap long Fasin blong Yumi blong Stap Tij

Stap wan tul blong Spirit. “Stamba tingting blong yu, olsem wan tija, i no blong mekem wan taf presentesen, be i blong helpem ol narawan blong kasem Tabu Spirit we i lidim olgeta—Tabu Spirit ia we i tru tija” (Teaching in the Savior’s Way, 10).