Yu No Stap Fraet, i kam long Michael Malm

13–19 Maj

Matiu 11–12; Luk 11

“Bae Mi Mekem we Yufala I Spel Gud”

Ridim Matiu 11–12 mo Luk 11 truaot long wik, bifo yu tij. Hemia bae i givim taem, blong yu tingting hevi mo blong kasem revelesen abaot wanem blong yu tijim long klas.

Invaetem Ol Memba blong Serem Wanem Oli Gat

Taem yumi laef folem ol prinsipol we yumi faenem insaed long ol skripja, i wan impoten wei blong eksperiensem paoa blong tok blong God. Leftemap tingting blong ol memba blong klas blong serem wanem oli faenem long skripja stadi blong olgeta long wik ia, blong oli save laef folem. Serem wan eksampol blong yu taem yu laef folem ol skripja, we bae i leftemap tingting blong ol memba blong klas blong save serem ol eksampol blong olgeta tu.

Stap Tijim Doktrin

Matiu 11:28–30

Jisas Kraes bae i givim spel long yumi taem yumi dipen long Hem.

• Long Matiu 11:28–30, Sevya i talem se bae Hem i helpem yumi blong karem ol hevi samting blong yumi sapos yumi akseptem invitesen blong Hem “Putum yok blong mi long solda blong yufala” (ves 29). Blong helpem ol memba blong klas oli andastanem gud promes ia, yu save soem wan pikja blong wan yok (luk long aotlaen blong wik ia long Kam Folem Mi—Blong Wanwan Man, Woman mo Famli) mo givim sam eksplenesen olsem: ol yok oli wokem olgeta blong helpem ol animol blong karem ol hevi samting o blong mekem wan wok, mo ol yok oli stap putum oltaem long ol animol. Wanem sam infomesen we i helpem yumi andastanem gud Matiu 11:28–30? ?Wanem ol invitesen we yumi faenem long ol ves ia? ?Wanem ol blesing oli promesem long yumi? Yu maet serem tu promes we i kam long Presiden Russell M. Nelson we i stap long “Sam Moa Risos.”

• Yumi evriwan i gat ol hevi samting we i save kam laet tru long paoa blong Jisas Kraes. Blong leftemap tingting blong toktok raon abaot hemia, yu save invaetem ol memba blong rid mo toktok raon long Matiu 11:28–30 wetem narawan long klas. Oli save toktok raon long ol kwestin olsem: Wanem sam eksampol blong ol hevi samting we wan man i save karem? ?Wanem nao yumi nid blong mekem blong kam long Kraes? ?Wanem i minim blong karem yok blong Sevya long yumi? ?Olsem wanem yu bin filim Sevya i mekem ol hevi samting we yu stap karem i kam laet taem yu tanem yu i go long Hem? Ol memba blong klas oli maet faenem moa save long mesej blong Elda David A. Bednar “Bear Up Their Burdens with Ease” (Liahona, May 2014, 87–90).

Ol Disaepol Oli Kakae Kon long Sabat Dei, i kam long James Tissot

Matiu 12:1–13

Sabat i wan dei blong mekem gud.

• Long loa blong olgeta blong kipim Sabat dei i tabu, ol Farisi oli putum ol rul we i strik mo tradisen blong man, we sloslo i mekem olgeta i kam blaen mo no luksave stamba tingting blong Sabat. Blong statem toktok raon abaot from wanem Lod i givim Sabat dei long yumi, yu maet invaetem ol memba blong klas blong lukluk bak long Matiu 12:1–13 mo Josef Smit Translesen, Mak 2:26–27 (Josef Smit Translesen Apendiks). ?Ol stori ia oli tijim wanem abaot stamba tingting blong Sabat? ?Wanem sam moa save we yumi save kasem abaot Sabat long Eksodas 31:16–17; Aesea 58:13–14; mo Doktrin mo Ol Kavenan 59:9–13? ?Olsem wanem rilesensip blong yumi wetem Sevya i jenis, taem yumi traem blong kipim dei blong Hem i tabu?

• Taem ol Farisi oli putum plante rul abaot Sabat, Sevya i tijim wan simpol prinsipol: “I stret nomo long Loa, blong yumi mekem ol wok blong givhan long Sabat” (Matiu 12:12). Wanem nara prinsipol we i helpem yumi blong kipim Sabat dei i tabu? (Luk toktok blong we i kam long Presiden Russell M. Nelson long “Sam Moa Risos”). ?From wanem wan prinsipol i wok gud moa bitim lis blong ol rul taem yumi stap traehad blong developem indipenden laef long saed blong Spirit?

• Mesej blong Presiden Russell M. Nelson long “The Sabbath Is a Delight” (Liahona, May 2015, 129–32) mo ol vidio wetem toktok blong Elda Jeffrey R. Holland “Sam Moa Risos” maet bae i givim wan nara toktok raon abaot Sabat dei.

Sam Moa Risos

Joen Wetem Jisas Kraes.

Presiden Russell M. Nelson i bin tijim: “Yu kam long Kraes blong putum yok blong joen wetem Hem mo wetem paoa blong Hem, blong mekem se yu no stap pulum hevi laef blong yu, yuwan. Yu joen wetem Sevya mo Ridima blong wol ia tru long yok blong Hem, blong pulum ol hevi samting blong laef, mo kwiktaem, ol problem blong yu nomata oli series olsem wanem, oli kam laet” (“The Mission and Ministry of the Savior: A Discussion with Elder Russell M. Nelson,” Ensign, Jun 2005, 18).

“?Wanem saen nao mi wantem blong givim long God?”

Presiden Russell M. Nelson i bin tijim: “Taem mi gat wan desisen blong mekem abaot sapos wan aktiviti i gud o no long Sabat, mi askem miwan, ‘?Wanem saen bae mi givim long God?’ Kwestin ia i mekem joes blong mi abaot Sabat dei i kam moa klia” (“The Sabbath Is a Delight,” Liahona, May 2015, 130).

Blesing blong Sabat dei, taem yumi obei.

Long tri vidio, Elda Jeffrey R. Holland i bin tijim abaot blesing blong kipim Sabat dei i tabu: “Upon My Holy Day—Getting Closer to God,” “Upon My Holy Day—Honoring the Sabbath,” and “Upon My Holy Day—Rest and Renewal” (ChurchofJesusChrist.org).

Stap Kam Antap long Fasin blong Yumi blong Stap Tij

Leftemap ting blong ol pikinini blong oli serem wanem we oli gat. “Wanwan man o woman insaed long klas blong yu, i wan rij ples blong testemoni, niu tingting, mo eksperiens blong fasin blong laef folem gospel. Invaetem olgeta blong oli serem mo leftemap wanwan long olgeta” (Teaching in the Savior’s Way, 5).