« ថ្ងៃទី ៦–១២ ខែ មីនា ។ ម៉ាថាយ ៩–១០; ម៉ាកុស ៥; លូកា ៩ ៖ ‹ ព្រះយេស៊ូវទ្រង់ចាត់ពួកដប់ពីរនាក់នេះឲ្យទៅ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ៦–១២ ខែ មីនា ។ ម៉ាថាយ ៩–១០; ម៉ាកុស ៥; លូកា ៩ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២៣

ថ្ងៃទី ៦–១២ ខែ មីនា

ម៉ាថាយ ៩–១០; ម៉ាកុស ៥; លូកា ៩

« ព្រះយេស៊ូវទ្រង់ចាត់ពួកដប់ពីរនាក់នេះឲ្យទៅ »

នៅពេលបងប្អូនអាន ម៉ាថាយ ៩–១០; ម៉ាកុស ៥ និង លូកា ៩ សូមស្វែងរកការបំផុសគំនិតមកពីព្រះវិញ្ញាណ ស្ដីពីតម្រូវការរបស់សមាជិកដែលបងប្អូនបង្រៀន ។ ការកត់ត្រាចំណាប់អារម្មណ៍ខាងវិញ្ញាណរបស់បងប្អូន អាចជួយបងប្អូនឲ្យរៀបចំខ្លួនសម្រាប់បទពិសោធន៍មួយ ដែលនឹងផ្ដល់ពរជ័យដល់បងប្អូន និងសមាជិកក្នុងថ្នាក់របស់បងប្អូន ។

អញ្ជើញឲ្យចែកចាយ

បងប្អូនអាចសូមឲ្យសមាជិកក្នុងថ្នាក់ម្នាក់ៗសរសេរនៅលើក្រដាសមួយសន្លឹក នូវសេចក្ដីពិតមួយដែលពួកគេបានរៀនមកពីព្រះគម្ពីរនៅសប្ដាហ៍នេះ រួមទាំងខគម្ពីរផងដែរ ។ បន្ទាប់ពីប្រមូលក្រដាសហើយ សូមជ្រើសរើសយកក្រដាសបីបួនសន្លឹកមកអានឲ្យដល់សមាជិកក្នុងថ្នាក់ស្ដាប់ ។ តើយើងអាចអនុវត្តសេចក្ដីពិតទាំងនេះនៅក្នុងជីវិតរបស់យើងបានយ៉ាងដូចម្ដេច ?

បង្រៀនគោលលទ្ធិ

ម៉ាថាយ ៩

ព្រះគ្រីស្ទមានព្រះចេស្ដាដើម្បីព្យាបាលយើងខាងរូបកាយ និងខាងវិញ្ញាណ ។

ការព្យាបាលប្រកបដោយអព្ភូតហេតុជាច្រើនរបស់ព្រះអង្គសង្គ្រោះ ក៏បង្រៀនពីសេចក្ដីពិតខាងវិញ្ញាណផងដែរ ។ ដើម្បីជួយសមាជិកក្នុងថ្នាក់ឲ្យយល់ពីការណ៍នេះ បងប្អូនអាចបំបែកថ្នាក់ទៅជាបួនក្រុម ហើយចាត់ឲ្យក្រុមនីមួយៗអានវគ្គបទគម្ពីរដូចតទៅនេះមួយ ៖ ម៉ាថាយ ៩:២–៨; ម៉ាថាយ ៩:១៨–១៩, ២៣–២៦; ម៉ាថាយ ៩:២២–២២ និង ម៉ាថាយ ៩:២៧–៣១ ។ សូមឲ្យក្រុមនីមួយៗសិក្សាអព្ភូតហេតុ ដែលបានពិពណ៌នានៅក្នុងវគ្គបទគម្ពីរនេះ រួចហើយសង្ខេបវាសម្រាប់សិស្សក្នុងថ្នាក់ ។ តើសេចក្ដីពិតខាងវិញ្ញាណអ្វីខ្លះ ដែលយើងអាចរៀនមកពីអព្ភូតហេតុទាំងនេះ ?

ស្ដ្រីឈោងទៅពាល់ព្រះពស្ត្ររបស់ព្រះយេស៊ូវ — ទុកចិត្តលើព្រះអម្ចាស់ ដោយ លីស លេម៉ុន ស្វិនដល

ម៉ាថាយ ១០

ព្រះអម្ចាស់ប្រទានដល់ពួកអ្នកបម្រើរបស់ទ្រង់នូវអំណាចដើម្បីធ្វើកិច្ចការរបស់ទ្រង់ ។

ការអនុញ្ញាតរបស់ព្រះអង្គសង្គ្រោះឲ្យពួកសាវករបស់ទ្រង់ធ្វើកិច្ចការ អាចជួយដល់យើងនៅក្នុងការទទួលខុសត្រូវរបស់យើងផ្ទាល់បាន ។ សមាជិកក្នុងថ្នាក់ប្រហែលជាមានការយល់ដឹងអំពីប្រធានបទនេះ តាមរយៈការសិក្សាផ្ទាល់ខ្លួនរបស់ពួកគេ ។ ឧទាហរណ៍ មានសកម្មភាពមួយអំពីប្រធានបទនេះនៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ សូមអញ្ជើញពួកគេឲ្យចែកចាយអ្វីដែលពួកគេបានរៀន ឬធ្វើការជាក្រុមតូចៗ ដើម្បីធ្វើសកម្មភាពនោះនៅក្នុងថ្នាក់ ។ សូមអញ្ជើញសមាជិកក្នុងថ្នាក់ឲ្យចែកចាយបទពិសោធន៍នានា នៅពេលដែលពួកគេទទួលបានអារម្មណ៍នៃព្រះចេស្ដារបស់ព្រះអង្គសង្គ្រោះ នៅពេលពួកគេបានបំពេញការហៅរបស់ពួកគេ ។
តើការសិក្សាអំពីការអនុញ្ញាតដែលព្រះគ្រីស្ទបានប្រទានដល់ពួកសាវករបស់ទ្រង់នៅក្នុង ម៉ាថាយ ១០ អាចជួយសមាជិកក្នុងថ្នាក់របស់បងប្អូនឲ្យយល់ពីតួនាទីរបស់ព្យាការី និងពួកសាវកសម័យទំនើបតាមរបៀបណា ? វាអាចនឹងមានប្រយោជន៍ដើម្បីប្រៀបធៀបការអនុញ្ញាតរបស់ព្រះអង្គសង្គ្រោះដល់ពួកដប់ពីរនាក់ ទៅនឹងការអនុញ្ញាតដែលត្រូវបានប្រទានឲ្យដល់កូរ៉ុមទីមួយនៃពួកសាវកដប់ពីរនាក់នៅគ្រាកាន់កាប់ត្រួតត្រានេះ ដែលមាននៅក្នុង « ធនធានបន្ថែមទាំងឡាយ » ។ ប្រហែលជាសមាជិកក្នុងថ្នាក់អាចចែកចាយពីរបៀប ដែលពួកគេទទួលឥទ្ធិពលដោយសារការងារបម្រើរបស់ពួកសាវកដែលនៅរស់ ។ សូមថ្លែងទីបន្ទាល់របស់បងប្អូនអំពីការហៅដ៏ទេវភាពរបស់ព្យាការី និងពួកសាវកដែលនៅរស់ ហើយអញ្ជើញសមាជិកក្នុងថ្នាក់ឲ្យថ្លែងទីបន្ទាល់របស់ពួកគេ ។

ម៉ាថាយ ១០:១៧–២០

នៅពេលយើងស្ថិតនៅក្នុងការបម្រើរបស់ព្រះអម្ចាស់ នោះទ្រង់នឹងបំផុសគំនិតយើងឲ្យដឹងពីពាក្យពេចន៍ដែលត្រូវនិយាយ ។

ពេលខ្លះមនុស្សមានអារម្មណ៍ភ័យខ្លាចនៅពេលបង្រៀន ឬនិយាយជាមួយនឹងមនុស្សដទៃទៀតអំពីដំណឹងល្អ ។ ប៉ុន្តែព្រះអម្ចាស់បានសន្យាដល់ពួកសិស្សថា ទ្រង់នឹងជួយពួកគេឲ្យដឹងពីអ្វីដែលត្រូវនិយាយ ។ តើយើងត្រូវធ្វើអ្វីខ្លះ ដើម្បីទទួលបានជំនួយដែលព្រះអម្ចាស់បានសន្យាសម្រាប់ខ្លួនយើង ? សូមអញ្ជើញសមាជិកក្នុងថ្នាក់ឲ្យអាន ម៉ាថាយ ១០:១៩–២០; គោលលទ្ធិ និង សេចក្តីសញ្ញា ៨៤:៨៥ និង គោលលទ្ធិ និង សេចក្តីសញ្ញា ១០០:៥–៨ ដើម្បីរកមើលចម្លើយចំពោះសំណួរនេះ ។ តើព្រះវិញ្ញាណបរិសុទ្ធបានជួយបងប្អូនឲ្យដឹងអ្វីដែលត្រូវនិយាយនៅពេលណា ? បងប្អូនអាចចែកចាយបទពិសោធន៍របស់បងប្អូន ហើយអញ្ជើញសមាជិកក្នុងថ្នាក់ឲ្យចែកចាយបទពិសោធន៍របស់ពួកគេផ្ទាល់ ។

ធនធានបន្ថែមទាំងឡាយ

សិទ្ធិអនុញ្ញាតមួយដល់ពួកសាវកនៅថ្ងៃចុងក្រោយ ។

នៅពេលសមាជិកដំបូងៗមួយចំនួនក្នុងកូរ៉ុមនៃពួកសាវកដប់ពីរនាក់នៅគ្រាកាន់កាប់ត្រួតត្រានេះ ត្រូវបានហៅ នោះអូលីវើរ ខៅឌើរី បានផ្ដល់សិទ្ធិអនុញ្ញាតមួយដែលស្រដៀងគ្នានឹងសិទ្ធិដែលព្រះយេស៊ូវគ្រីស្ទបានប្រទានឲ្យនៅក្នុង ម៉ាថាយ ១០ ដែរ ។ លោកបានមានប្រសាសន៍ ៖

« ‹ បងប្អូននឹងត្រូវតតាំងនឹងរាល់ភាពលំអៀងនៃគ្រប់ប្រជាជាតិ ។ … ហេតុដូច្នេះហើយ ខ្ញុំសូមព្រមានបងប្អូនឲ្យបណ្ដុះចិត្តរាបសាយ៉ាងខ្លាំង ពីព្រោះខ្ញុំដឹងអំពីអំនួតរបស់ដួងចិត្តមនុស្ស ។ ចូរប្រុងប្រយ័ត្ន ខ្លាចក្រែងពួកអ្នកបញ្ជោនៃលោកិយលើកតម្កើងបងប្អូនឡើង ។ ចូរប្រុងប្រយ័ត្ន ខ្លាចក្រែងសុឆ្ឆន្ទៈរបស់បងប្អូនត្រូវបានទាក់ទាញដោយទ្រព្យសម្បត្តិខាងលោកិយ ។ ចូរដាក់ការងារបម្រើរបស់បងប្អូនដំបូងគេបង្អស់ ។ … [ វា ] គឺជារឿងចាំបាច់ដែលបងប្អូនទទួលបានទីបន្ទាល់មួយមកពីស្ថានសួគ៌សម្រាប់ខ្លួនឯង ដើម្បីបងប្អូនអាចថ្លែងទីបន្ទាល់អំពីសេចក្ដីពិតនោះ ។ …

« ‹ … បងប្អូនត្រូវថ្លែងសារលិខិតនេះដល់អស់អ្នកដែលគិតថា ពួកគេជាមនុស្សឆ្លាត ។ ហើយមនុស្សបែបនេះអាចនឹងបៀតបៀនបងប្អូន ពួកគេនឹងសម្លាប់បងប្អូន ។ មារសត្រូវចង់បានជីវិតរបស់ពួកអ្នកបម្រើរបស់ព្រះជានិច្ច ។ ហេតុដូច្នេះហើយ បងប្អូនត្រូវត្រៀមខ្លួនគ្រប់ពេល ដើម្បីធ្វើពលិកម្មជីវិតរបស់បងប្អូន ដែលព្រះតម្រូវពីពួកគេជាមុន និងការស្ថាបនាបុព្វហេតុរបស់ទ្រង់ ។ …

« បន្ទាប់មក លោកចាប់ដៃពួកគេម្នាក់ម្ដងៗ ហើយពោលថា ‹ តើបងប្អូនមានគោលបំណងពេញលេញក្នុងដួងចិត្ត ដើម្បីធ្វើជាផ្នែកមួយនៅក្នុងការងារបម្រើនេះ ដើម្បីប្រកាសដំណឹងល្អដោយឧស្សាហ៍ព្យាយាមជាមួយនឹងបងប្អូនប្រុសរបស់បងប្អូនទាំងនេះ ស្របតាមន័យ និងចេតនានៃការទទួលខុសត្រូវ ដែលបងប្អូនបានទទួលដែរឬទេ ? › ម្នាក់ៗបានឆ្លើយតបដោយមុតមាំ » ( នៅក្នុង « Minutes and Blessings, 21 February 1835 » Minute Book 1 ទំព័រ ១៥៩–១៦១, ១៦៤ នៅលើគេហទំព័រ josephsmithpapers.org; ការប្រកប និងវណ្ណយុត្តិត្រូវបានធ្វើទំនើបកម្ម ) ។

ការកែលម្អការបង្រៀនរបស់យើង

ថ្លែងទីបន្ទាល់អំពីពរជ័យទាំងឡាយ ។ នៅពេលបងប្អូនធ្វើការអញ្ជើញឲ្យធ្វើសកម្មភាព សូមថ្លែងទីបន្ទាល់ដល់សមាជិកក្នុងថ្នាក់របស់បងប្អូនថា ពួកគេនឹងទទួលបានពរជ័យដែលព្រះបានសន្យា នៅពេលពួកគេធ្វើសកម្មភាពដោយសេចក្ដីជំនឿតាមការបង្រៀនរបស់ទ្រង់ ។ ពរជ័យពុំគួរជាការជំរុញចិត្តដ៏ចម្បងរបស់យើងដើម្បីមានការគោរពប្រតិបត្តិនោះទេ ប៉ុន្តែព្រះវរបិតាសួគ៌មានព្រះរាជបំណងចង់ប្រទានពរដល់កូនចៅរបស់ទ្រង់ទាំងអស់ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ៣៥ ) ។