“M̧aaj 6–12. Matu 9–10; Mark 5; Luk 9: ‘Rein Jon̄oul im Ruo Jisōs E ar Jilkinḷọk,’” Itok, Ļoor Eō—N̄an Jabōt Jikuuļ: Kallim̧ur Ekāāl 2023 (2022)
“M̧aaj 6–12. Matu 9–10; Mark 5; Luk 9,” Itok, Ļoor Eō—N̄an Jabōt Jikuuļ: 20233
M̧aaj 6–12
Matu 9–10; Mark 5; Luk 9
“Rein Jon̄oul im Ruo Jisōs E ar Jilkinḷọk”
Ilo am̧ riiti Matu 9–10; Mark 5; im Luke 9, pukōt im̧we eo jān Jetōb Kwojarjar kōn aikuj ko an ro kwoj katakin er. Je im̧we ko ilo jetōb am̧ emaron̄ jipan̄ eok m̧aanjabpopo n̄an juon en̄jake eo me enaaj kōjeraam̧m̧an kwe im ro uwaan kūlaaj eo am̧.
Kajjitōk bwe ren Kwaļo̧k
Kwomaron̄ kajjitōk ippān ro uwaan kūlaaj eo n̄an kajjojo je ioon peba juon m̧ool eo raar ekkatak kake jān jeje ko rekwojarjar wiik in, ekoba eoon ko an jeje ko rekwojarjar. Ālkin ain peba ko, kāālet jejjo n̄an riiti n̄an kūlaaj eo. Ekōjkan ad maron̄ kōjerbal m̧ool kein n̄an mour ko ad?
Katakin Katak eo
Kraist ewōr an kajoor n̄an kemour kōj ilo kanniōk im ilo jetōb.
-
Elōn̄ iaan kabwilōn̄lōn̄ in kemour ko an Rilo̧mo̧o̧r eo rej katakin kōn m̧ool ko ilo jetōb. N̄an jipan̄ ro uwaan kūlaaj eo meļeļe menin, kwomaron̄ ajije kūlaaj eo n̄an emen kumi ko im kappeik kajjojo kumi juon iaan eoon kein: Matu 9:2–8; Matu 9:18–19, 23–26; Matu 9:20–22; im Matu 9:27–31. Kajjitōk ippān kajjojo kumi n̄an ekkatak kōn kabwilōn̄lōn̄ eo kar kōmeļeļeik ilo eoon eo aer innām ba ilo tukadu in n̄an kūlaaj eo. Ta m̧ool ko ilo jetōb jemaron̄ ekkatak jān kabwilōn̄lōn̄ kein?
Lōke ilo Irooj, jān Liz Lemon Swindle
Irooj ej leļo̧k n̄an ro Rikarejeran kajoor n̄an kōm̧m̧ane jerbal eo An.
-
Kean̄ eo an Rilo̧mo̧o̧r eo n̄an Rijilōk ro An emaron̄ jipan̄ kōj ilo eddo ko ad kajjojo. Ro uwaan kūlaaj eo emaron̄ wōr aer kōļmenļo̧kjeņ ko n̄an unin kōnono in jān ekkatak eo aer make; n̄an waanjon̄ak, ewōr juon m̧akūtkūt kōn unin kōnono in ilo Itok, Ļoor Eō—N̄an Kajjojo Armej im Baam̧le ko. Kajjitōk ippāer n̄an kwaļo̧k ta eo raar ekkatak ak jerbale ilo kumi ko reddik n̄an kadedeļo̧k m̧akūtkūt eo ilo kulaaj. Kajjitōk ippān ro uwaan kūlaaj eo n̄an kwaļo̧k en̄jake ko ke raar en̄jake kajoor eo an Rilo̧mo̧o̧r eo ilo aer kar kakūrm̧ool kūr ko aer.
-
Ekōjkan an ekkatak kōn kean̄ eo Kraist ekar leļo̧k n̄an Rijilōk ro An ilo Matu 10 maron̄ jipan̄ ro uwaan kūlaaj eo meļeļe jerbal eo an rikanaan ro im rijilōk ro raan kein? Emaron̄ in jipan̄ n̄an keidi kean̄ eo an Rilo̧mo̧o̧r eo n̄an Jon̄oulruo ro n̄an kean̄ eo kar leļo̧k n̄an Doulul eo kein kajuon an Jon̄oulruo Rijilōk ro ilo tōre in iien bōk eddo in, loe ilo “Kein Jipan̄ ko Jet.” Bōlen ro uwaan kūlaaj eo remaron̄ kwaļo̧k ekōjkan aer kar kareel jān jerbal in karejar eo an Rijilōk ro remour. Kwaļo̧k am̧ naan in kam̧ool kōn kūr ekwojarjar eo an rikanaan ro im rijilōk ro remour, im kajjitōk ippān ro uwaan kūlaaj eo n̄an kwaļo̧k naan in kam̧ool ko aer.
N̄e jej pād ilo jerbal in jipan̄ eo an Irooj, E enaaj im̧we kōj kōn ta eo jej ba.
-
Armej jet iien rej en̄jake ikūm̧kūm̧ n̄e katakin ak kōnono ippān ro jet kōn gospel eo. Bōtaab Irooj ekar kallim̧uri rikaļoor ro bwe E enaaj jipan̄ er jeļā ta eo n̄an ba. Ta eo jej aikuj in kōm̧m̧ane n̄an bōk jipan̄ eo Irooj eaar kallim̧ur kake n̄an kōj make? Kajjitōk ippān ro uwaan kūlaaj eo n̄an riiti Matu 10:19–20; Katak im Bujen Ko 84:85; im Katak im Bujen Ko 100:5–8 n̄an pukōt uwaak ko n̄an kajjitōk kein. N̄aat eo Jetōb Kwojarjar eo ekar jipan̄ eok jeļā ta eo n̄an ba? Kwomaron̄ kwaļo̧k en̄jake ko am̧ im kajjitōk ippān ro uwaan kūlaaj eo n̄an kwaļo̧k ko aer make.
Kein Jipan̄ ko jet
Juon kean̄ n̄an Rijilōk ro ilo raan ko-āliktata.
Ke jet iaan membōr ro m̧oktata an Doulul eo an Jon̄oulruo Rijilōk ro ilo tōre in iien bōk eddo in kar kūr, Oliver Cowdery ekar leļo̧k n̄an er juon kean̄ ainļo̧k wōt eo Jisōs Kraist ekar leļo̧k ilo Matu 10. Eaar ba:
“‘Kom̧ naaj aikuj tariņaik aolep kalijekļo̧k ko an aolep laļ ko. … Kōn menin, ij, kakkōl kom̧ n̄an kōļapļo̧k eļap ettā, bwe ijeļā utiej bōro an būruōn armej. Kom̧in ekkōl, en ejjeļo̧k menin nōbar an laļ en ļōn̄aj kom̧. Kom̧in ekkōl bwe en jab ļapļo̧k kilaan men ko an laļ in. Ami jerbal in karejar en im̧aan tata. … [E] menin aikuj bwe kom̧in bōk juon naan in kam̧ool jān Lan̄ kōn kom̧ make, bwe kom̧in maron̄ kwaļo̧k naan in kam̧ool n̄an m̧ool eo. …
“‘… Komij aikuj kwaļo̧k ennaan in n̄an ro me rej watōk er make māletlet. Im ro rej watōk er māletlet remaron̄ kareel kom̧; remaron̄ kappukōt mour eo ami. Rikapo eo ej aolep iien kappukōt mour eo an ro rikarejeran Anij. Kōn menin, kom̧in, pojak aolep iien n̄an kōm̧m̧ane juon katok in mour ko ami, me Anij ej kajjitōk ippāer im̧aanļo̧k im kalōk jerbal eo An. …
“Innām Ekar bōk er kajjojo iaan kōn pein im kar ba, ‘Kwoj ke kōn jibadbad eo edipio an būruōm̧ bōk koņaan ilo jerbal in karejar in, n̄an kwaļo̧k gospel eo kōn aolep niknik ippān em̧m̧aan rein, ekkar n̄an kappe eo im kōttōpar eo an kappe eo kom̧ kar bōke?’ Eo kajjojo ekar uwaake ilo pen” (in “Minutes and Blessings, 21 February 1835,” Minute Book 1, 159–161, 164, josephsmithpapers.org; spelling and punctuation modernized).
Kōkm̧anm̧anļo̧k Ad Katakin
Kam̧ool kōn kōjeraam̧m̧an ko. N̄e kwoj leļo̧k kūr eo n̄an jerbal, kam̧ool n̄an rūkkatak ro am̧ me renaaj bōk kōjeraam̧m̧an ko Anij ekar kallim̧ur kaki n̄e rej jerbal kōn tōmak ioon katak ko An. Kōjeraam̧m̧an ko rejjab aikuj in ellowetak eo ad eļap tata n̄an pokake, bōtaab Jemedwōj Ilan̄ ej ikdeelel n̄an kōjeraam̧m̧an aolep ajir ro Nejin. (Lale Teaching in the Savior’s Way, 35.)