Pāpode 27–M̧aaj 5.

Matu 8; Mark 2–4; Luk 7

“Am̧ Tōmak Ear Lo̧mo̧o̧ren Eok”

M̧aanjabpopo eo am̧ n̄an katakin ej ijjino ilo am̧ ekkatak ilo jar kōn Matu 8; Mark 2–4; im Luk 7. Itok, Ļoor Eō—N̄an Kajjojo im Baam̧le ko emaron̄ kōkōm̧anm̧anļo̧k ekkatak eo am̧ im im̧we ļōmņak in katakin ko ilo kakobaba n̄an ko kar kwaļo̧k ijin.

Kajjitōk bwe ren Kwaļo̧k

Ro uwaan kūlaaj eo am̧ remaron̄ in kar lo kōļmenļo̧kjeņ ko rekajoor ilo iien ekkatak eo aer make kōn kabwilōn̄lōn̄ ko ilo jepta kein (lale laajrak in kemour ko an Rilo̧mo̧o̧r eo ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko). Ļōmņak in kajjitōk ippān ro uwaan kūlaaj eo n̄an kwaļo̧k kōļmenļo̧kjeņ ko aer ippān juon m̧ōttan ak ippān aolep kūlaaj eo.

Katakin Katak eo

Matu 8; Mark 2; Luk 7

Kabwilōn̄lōn̄ ko rej waļo̧k ekkar n̄an ankilan Anij im tōmak eo ad ilo Jisōs Kraist.

• Ekōjkan am̧ maron̄ kōjerbal bwebwenato ko kōn kabwilōn̄lōn̄ ko an Rilo̧mo̧o̧r eo n̄an jipan̄ ro uwaan kūlaaj eo kōļapļo̧k tōmak eo aer ilo E? Kwomaron̄ kajjitōk ippān n̄an kōllaajrake ioon boot eo jejjo kabwilōn̄lōn̄ in kemour ko jān Matu 8; Mark 2; im Luk 7. Ro uwaan kūlaaj eo remaron̄ ekōnono kōn ekōjkan an armej ro me raar mour kwaļo̧k aer tōmak ilo Kraist. Ta eo bwebwenato kein rej katakin kake kōn tōmak im kabwilōn̄lōn̄ ko? Ro uwaan kūlaaj eo remaron̄ kwaļo̧k m̧ool ko jet kōn tōmak im kabwilōn̄lōn̄ ko jān Mormon 9:15–21; Ether 12:12–16; Moronai 7:27–37; im Katak im Bujen Ko 35:8 (lale barāinwōt Bible Dictionary, “Miracles”). N̄aat eo jaar lo kabwilōn̄lōn̄ ko ilo ad kar kōjerbal tōmak ilo Jisōs Kraist?

• Bwebwenato eo kōn kabwilōn̄lōn̄ ko ilo Mark 2:1–12 ej katakin, ibwilijin men ko jet, aorōk eo an jerbal ippān doon ilo bōro kuk n̄an jipan̄ Rilo̧mo̧o̧r eo ilo jerbal in karejare n̄an ro rej pād ilo aikuj eo ilo jetōb im kanniōk. Ļōmņak in kajjitōk ippān ro uwaan kūlaaj eo n̄an etale bwebwenato eo jān jeje ko rekwojarjar im kwaļo̧k kōļmenļo̧kjeņ ko jet jān ennaan eo an Elder Chi Hong (Sam) Wong “Bōro Kuk ilo Lo̧mo̧o̧r” (Liaona, Nob. 2014, 14–16; lale barāinwōt “Kein Jipan̄ ko Jet”). Ta eo jemaron̄ ekkatak jān Mark 2:1–12 kōn aorōk eo an jerbal ilo bōro kuk n̄an jerbal n̄an ro rej pād ilo aikuj?(lale barāinwōt Mark 3:24–25).

Mark 4:35–41.

Jisōs Kraist ewōr an kajoor n̄an bōktok aenōm̧m̧an n̄an ioļapļap in ļan̄ ko an mour.

• Kwomaron̄ kile jet iaan kapan̄pan̄ ko ro uwaan kūlaaj eo am̧ rej jelm̧ae. Kōnke ewōr ad aolep mālijjon̄ ko ilo jet iien ilo mour ko ad, etale bwebwenato eo ilo Mark 4:35–41 emaron̄ kalōk tōmak eo an ro uwaan kūlaaj eo bwe Rilo̧mo̧o̧r eo emaron̄ bōktok n̄an er aenōm̧m̧an. Leļo̧k n̄an kajjojo armej juon m̧ōtta peba, im kajjitōk ippāer n̄an je ilo juon rejet juon mālijjon̄ raar en̄jake. Ilo rejet eo juon, kajjitōk ippāer n̄an je juon men jān Mark 4:35–41 me ej im̧we er n̄an oktakļo̧k n̄an Rilo̧mo̧o̧r eo ilo iien mālijjon̄ ko aer. Kōketak ro uwaan kūlaaj eo n̄an kwaļo̧k ta eo raar je, eļan̄n̄e rej kōņaan kōm̧m̧ane.

• Al eo “Master, the Tempest Is Raging” (Hymns, nō. 105) ej pedped ioon bwebwenato eo ilo Mark 4:35–41. Bōlen ro uwaan kūlaaj eo remaron̄ lo naan ko an al eo ilo al eo me ej iookļo̧k naan ko ilo jeje ko rekwojarjar. Kwomaron̄ barāinwōt kwaļo̧k juon pija ej kwaļo̧k jikin eo (lale Bok in Gospel Pija, nō. 40) im ekōnono kake ta iien eo ripija eo ej pijaik. Ta wāween ko jet kwomaron̄ jipan̄ ro uwaan kūlaaj eo meļeļe kōn meļeļe in im kajoor eo an kabwilōn̄lōn̄ in?

Jān Mijak n̄an Tōmak, jān Howard Lyon

Luk 7:36–50

Ilo ad jeorļo̧k bōd ko ad, iakwe eo ad n̄an Rilo̧mo̧o̧r eo ej m̧wilaļļo̧k.

• Ta eo jemaron̄ ekatak jān waanjon̄ak eo an kōrā eo im katak ko an Rilo̧mo̧o̧r eo ilo Luk 7:36–50 ilo ad pukōt jeorļo̧k bōd n̄an jerawiwi ko ad make? Ekōjkan an ukweļo̧k jipan̄ kepaakļo̧k kōj n̄an Jisōs Kraist? Ekōjkan an bwebwenato in kareel wāween ad kalimjōk ro me raar jerawiwi?

Kein Jipan̄ ko jet

“Ke Jisōs ekar lo tōmak eo aer.”

Elder Chi Hong (Sam) Wong ekar kwaļo̧k kōļmenļo̧kjeņ kein kōn bwebwenato eo ilo Mark 2:1–12:

“Imaron̄ ke kwaļo̧k n̄an kom̧ bar juon men eaorōk ettiņo jej lo ilo bwebwenato in Epād ilo eoon 5: ‘Ke Jisōs ekar lo tōmak eo aer’ (kar kakobabatok). Iaar jab lo men kar moktaļo̧k—tōmak eo aer. …

“Wōn armej ro Jisōs ej kōnono kaki? Emaron̄ kobain ro emān raar kotak ļeo eakā, ļeo emake, armej ro raar jar kake, armej ro raar ron̄jake kwaļo̧k eo an Jisōs im m̧ōņōņō ilo būruweer bwe en m̧ōkaj an waļo̧k kabwilōn̄lōn̄ eo. Emaron̄ bar kobatok eo pāleer, juon jinen ak jemān, juon nejin m̧aan ak kōrā, juon mijenede, juon būreejtōn an doulul, juon būreejtōn an Doulul eo an Kōrā ro, juon bisop, im juon m̧ōttad ettoļo̧k. Jemaron̄ aolep jipan̄ doon. Jej aikuj iien otemjej laudin̄din̄ ilo bōk kuņaad ilo pukōt n̄an lo̧mo̧o̧r ro rej pād ilo aikuj” (“Bōro Kuk ilo Lo̧mo̧o̧ren,” Liaona, Nob. 2014, 16).

Kōkm̧anm̧anļo̧k Ad Katakin

Kōmakijkij am̧ kwaļo̧k naan in kam̧ool eo am̧. Kam̧ool in am̧ epidodo kōn m̧ool ko an jetōb emaron̄ kwaļo̧k juon en̄jake eo ekajoor ioon ro kwōj katakin. Kam̧ool eo am̧ ejjab aikuj in kōjerbal naan ko rem̧m̧an ak raitok. Emaron̄ in, n̄an waanjon̄ak, juon naan in kam̧ool eļem waan kōn kabwilōn̄lōn̄ eo kōn an wōr gospel eo ilo mour eo am̧.