Kwon Jab Mijak, jān Michael Malm

M̧aaj 13–19

Matu 11–12; Luk 11

“Inaaj Kakkijeik Kom̧,”

Riiti Matu 11–12 im Luk 11 ilo wiik eo m̧okta jān am̧ katakin. Menin enaaj lewaj n̄an eok iien n̄an kejekļo̧kjeņ im n̄an bōk revelesōn kōn ta eo n̄an kalimjōke ilo kūlaaj eo.

Kajjitōk bwe ren Kwaļo̧k

Kōjerbal pedped in katak ko jej loi ilo jeje ko rekwojarjar im n̄an mour ko ad ej juon wāween aorōk n̄an en̄jake kajoor in naan eo an Anij. Kōketak ro uwaan kūlaaj eo n̄an kwaļo̧k ta eo raar loe ilo ekkatak jeje ko rekwojarjar eo aer wiik in me remaron̄ kōjerbale n̄an mour ko aer. Kwaļo̧k juon waanjon̄ak kōn ekōjkan am̧ kar kōjerbal jeje ko rekwojarjar emaron̄ im̧we ro uwaan kūlaaj eo n̄an kwaļo̧k waanjon̄ak ko aer make.

Katakin Katak eo

Matu 11:28–30

Jisōs Kraist enaaj letok n̄an kōj kakkije ilo ad pedped ilo E.

• Ilo Matu 11:28–30, Rilo̧mo̧o̧r eo ekar katakin bwe E enaaj jipan̄ kōj ineek eddo ko ad reddo eļan̄n̄e jej bōk kūr eo An “Bōk Aō ine im ikūte i aerami” (eoon 29). N̄an jipan̄ ro uwaan kūlaaj eo em̧m̧anļo̧k aer meļeļe kallim̧ur in, kwomaron̄ kwaļo̧k juon pija in juon york (lale unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko) im kwaļo̧k m̧ool ko āinwōt kein: york ko rej kōm̧m̧ani n̄an jipan̄ mennin mour ko ineek eddo ko reddo ak n̄an kōm̧m̧an bwe en dedeļo̧k jerbal eo, im yoke ko emakijkij aer kōm̧m̧ani bwe ren jetjet n̄an mennin mour eo. Ta eo dipdik in meļeļe kein rej kobaitk n̄an meļeļe eo ad kōn Matu 11:28–30? Ta kūr ko jej loi ilo eoon kein? Ta kōjeraam̧m̧an ko kar kallim̧uri kōj kaki? Kwomaron̄ barāinwōt kwaļo̧k kallim̧ur eo jān Būreejtōn Russell M. Nelson loe ilo “Kein Jipan̄ ko Jet.”

• Kōjwōj aolep ewōr eddo ko ad me remaron̄ in kōm̧m̧an bwe en meraļo̧k kōn kajoor eo an Jisōs Kraist. N̄an kōketak juon iien ekōnono kōn menin, kwomaron̄ kajjitōk ippān ro uwaan kūlaaj eo n̄an riiti im ekōnono kōn Matu 11:28–30 ippān bar juon ilo kūlaaj eo. Er remaron̄ kobaik kajjitōk ko āinwōt kein ilo iien ekōnono eo aer: Ta jet iaan waanjon̄ak ko kōn eddo ko juon armej emaron̄ ineeke? Ta eo jej aikuj in kōm̧m̧ane n̄an itok n̄an Kraist? Ta meļeļe in n̄an bōk iood make yoke eo an Rilo̧mo̧o̧r eo? Ekōjkan am̧ kar en̄jake an Rilo̧mo̧o̧r eo kar kōmeraikļo̧k eddo ko am̧ ilo am̧ kar oktakļo̧k n̄an E? Ro uwaan kūlaaj eo remaron̄ lo kōļmenļo̧kjeņ ko jet ilo ennaan eo an Elder David A. Bednar “Kotak Eddo ko Aer ilo Ejjelo̧k Pen” (Liaona, Māe 2014, 87–90).

The Disciples Eat Wheat on the Sabbath [Rikaļoor ro rej M̧ōn̄ā Wiit ilo Jabōt], jān James Tissot

Matu 12:1–13

Jabōt ej juon raan n̄an kōm̧m̧an em̧m̧an.

• Ilo kijejeto eo aer n̄an kōjparok im kōkkwojarjar raan in Jabōt, Pharise ro raar kakijin̄en̄eik kien ko im m̧anit ko kōm̧m̧an in armej, eo ilo jem̧ļo̧kin raar kapok meļeļe eo aer kōn jibadbad eo em̧ool an Jabōt. N̄an jino juon iien ekōnono kōn etke Irooj ekar letok n̄an kōj raan in Jabōt, kwomaron̄ kajjitōk ippān ro uwaan kūlaaj eo n̄an etale Matu 12:1–13 im Josep Smith Ukok, Mark 2:26–27 (ilo Bible appendix eo). Ta eo bwebwenato kein rej katakin kōn jibadbad eo an Jabōt? Ta kōļmenļo̧kjeņ ko jet kōn Jabōt jej būki jān Exodus 31:16–17; Aiseia 58:13–14; im Katak im Bujen Ko 59:9–13? Ekōjkan an kar jemjerā ad ippān Rilo̧mo̧o̧r eo ekar ukōt ilo ad kajjieon̄ in kōjparok raan kwojarjar eo An?

• Ilo an Pharise ro kar kōmejajaik elōn̄ kein ko ilo tipdikier ikkijien Jabōt, Rilo̧mo̧o̧r eo ekar katakin ejja pedped in katak eo wōt: e mālim kōm̧m̧an em̧m̧an ilo raan in Jabōt.” (Matu 12:12). Ta pedped in katak ko jet rejipan̄ kōj kōjparok im kōkkwojarjar raan in Jabōt? (lale ennaan eo jān Būreejtōn Russell M. Nelson ilo “Kein Jipan̄ ko Jet”). Etke pedped in katak ko eļapļo̧k aer wejepedik jān laajrak in kien ko ilo ad kajjieon̄ in kōļapļo̧k un̄are-peid make ilo jetōb?

• Ennaan eo an Būreejtōn Russell M. Nelson “Jabōt Ej juōn Men in Lan̄lōn̄” (Liaona, Māe 2015, 129–32) im pija in alooj ko kōn kapilōk eo an Elder Jeffrey R. Holland ilo “Kein Jipan̄ ko Jet” maron̄ kobaiktok n̄an juon iien ekōnono kōn raan in Jabōt.

Kein Jipan̄ ko jet

York ippān Jisōs Kraist.

Būreejtōn Russell M. Nelson ekar katakin: “Kom̧win itok n̄an Kraist n̄an yoke Ippān im ippān kajoor eo An, bwe kom̧win jab bwilli eddo eo an mour make. Kom̧wij bwilli eddo eo an mour in yoke ippān Rilo̧mo̧o̧r eo im Ripinmuur eo an laļ in, im ilo iien eo em̧ōkaj, inepata ko ami, jekdo̧o̧ņ ewi eļļapier, rej erom meraļo̧k” (“The Mission and Ministry of the Savior: A Discussion with Elder Russell M. Nelson,” Ensign, Juun 2005, 18).

“Ta kakōļļ eo ikōņaan leļo̧k n̄an Anij?”

Būreejtōn Russell M. Nelson ekar katakin: “N̄e ij tin kōm̧m̧ane kālet eo aō n̄an kōm̧m̧ane juon makūtkūt ilo raan in Jabōt, ij kajjitōkin iō make, ‘Ta kakōļļe eo ikōņaan leļo̧k n̄an Anij?’ Kajjitōk in ekar kōm̧m̧an bwe kāālet ko aō kōn raan in Jabōt ren alikkar” (“Jabōt ej juōn men in Lan̄lōn̄,” Liaona, Māe 2015, 130).

Kōjeraam̧m̧an ko kōn kautiej raan in Jabōt.

Ilo juon kōro̧ro in jilu pija in alooj ko, Elder Jeffrey R. Holland ekar katakin kōn kōjeraam̧m̧an ko kōn kautiej raan in Jabōt: “Upon My Holy Day—Getting Closer to God,” “Upon My Holy Day—Honoring the Sabbath,” im “Upon My Holy Day—Rest and Renewal” (ChurchofJesusChrist.org).

Kōkōm̧anm̧anļo̧k Ad Katakin

Kōketak n̄an kwaļo̧k. “Kajjojo armej ilo kūlaaj eo am̧ ej m̧weie kōn jipan̄ kōn juon naan in kam̧ool, im̧we ko, im en̄jake ko ilo mour kōn gospel eo. Kajjitōk ippāer n̄an kwaļo̧k ippān im kotak doon” (Teaching in the Savior’s Way, 5).