Te Bitaki, iroun Carl Heinrich Bloch

Eberi 10–16

Mataio 15–17; Mareko 7–9

“Bon te Kristo Ngkoe”

Teuana mai ibuakon am botoniango ngkai te tia reirei bon buokan karikiraean aia onimaki tabeman iroun Iesu Kristo. Katuka te bwai aei n am iango ngkai ko kamatebwai booki aika tabu n te wiiki aio. Tera ae ko kunea ae na kona ni buokia ni kakorakora aia onimaki kaain te kiraati Irouna?

Kaunga te Tibwatibwa

Teuana te kawai ae ko kona ni kaungaia kaain am kiraati ni kamatebwai booki aika tabu ibon irouia ao n aia utu bon man kaoakiia bwa a na tibwauaia bwa e kanga kamatebwaiakan booki aika tabu ni katoa wiiki ni buokiia ni karekei kaotioti ao ni kakabwaiai maiuia. Te katooto, e kanga aia kamatebwai iaon mwakoro aikai ni kakorakora aia rinerine ae a karaoi n te wiiki aei?

Reirei te Reirei

Mataio 16:13–17

Te kakoaua iroun Iesu Kristo e roko n te kaotioti.

• Iai mai ibuakoia kaain am kiraati ae a tia ni kabwarabwara nakon temanna bwa a kanga n ataia bwa e koaua te euangkerio? Inanon Mataio 16:13–17, tera ae reirei te Tia Kamaiu ibukin arora ni karekea te koaua? Ko kona n tibwauaia bwa e kanga Aramwa ni karekea ana koaua (taraa Aramwa 5:45–46) ke tera te bwai ae reireina Oliver Cowdery te Uea ibukin te kaotioti (taraa Reirei ao Berita aika Tabu 6:14–15, 22–23; 8:2–3). Tera n am iango te bwai ae a na taekinna Betero ke Aramwa ke Oliver Cowdery ngkana iai ae titirakiniia bwa a kanga n ataia bwa e koaua te euangkerio?

• E kona n iai aomata man am kiraati aika a tataro ibukin oin aia kaotioti ma aki ataia bwa a na kanga n ataia ngkana e roko. N te HearHim.ChurchofJesusChrist.org, ko kona ni kunei tamnei ake a tibwauaia iai taan kairiiri n te Ekaretia aroia ni kina bwanaan te Uea. Ko kona ni matakuakina teuana ke e raka riki tamnei aikai ma kaain te kiraati ao ni maroroakina te bwai ae a reiakinna man tamnei aikai iaon karekean te kaotioti. Tera reirei riki tabeua ke kiibu aika a kona kaain am kiraati n iangoi ae a na kona ni buoka temanna ni kina te kaotioti ibukiia? (Te katooto, taraa 1 Uea 19:11–12; I-Karatia 5:22–23; Enoti 1:1–8; Reirei ao Berita aika Tabu 6:22–24; 8:2–3; 9:7–9.)

Mataio 16:13–19; 17:1–9

Kiing n te nakoanibonga a kakawaki ibukin kamaiuakira.

• Ni moana am marooro iaon kiing n te nakoanibonga, ko kona ni koroi kiibu n aron aikai iaon te burakibooti: Mataio 16:19; Reirei ao Berita aika Tabu 107:18–20; 128:8–11; 132:18–19, 59; Iotebwa Timiti—Rongorongo 1:72; ao “Kiingin te Nakoanibonga” inanon Kairi Nakon Koroboki Aika Tabu (scriptures.ChurchofJesusChrist.org). Ngkanne kaoia kaain te kiraati bwa a na wareka teuana ke e raka riki kibuntaeka ao n tibwaua te bwai ae a reiakinna maiai iaon kiing n te nakoanibonga. Bukin tera ti kainnanoi kiing n te nakoanibonga?

• Ni buokiia kaain te kiraati ni kakorakorai aia koaua iaon kaokakin kiing n te nakoanibonga ni boong aika kaitira, ko kona n tuangiia iteran te kiraati bwa a na kamatebwaia Mataio 17:1–9 ao iterana are teuana a na kamatebwaia Reirei ao Berita aika Tabu 110. A kona ngkanne n tibwauaia imarenaia te bwai ae a reiakinna ao ni koroi bwaai aika ti tebo imarenan rongorongo aika uoua aikanne. Te witeo “Priesthood Keys: The Restoration of Priesthood Keys” (ChurchofJesusChrist.org) e kona naba n ibuobuoki.

Kiing n te Nakoanibonga bon te kariaia ni babairea kabonganaan te nakoanibonga.

Mareko 9:14–30

Ngkana ko ukoukora riki te onimak, ti moanna man te onimaki ae iroura.

• Unimwane Jeffrey R. Holland e kabongana rongorongon te karo are e ukoukora kamaiuan natina te mwane e kona n reireiniira arora n nakon te Uea ngkana ti namakinna bwa e aki tau ara onimaki (tara “Lord, I Believe,” Riaona, Meei 2013, 93–95). Imwiin warekan Mark 9:14–30 n te kiraati ao kam kona n marooroakina ana taratara ake teniua Unimwane Holland (taraa “Bwaai n Ibuobuoki Riki Tabeua”).

Bwaai n Ibuobuoki Riki Tabeua

Teniua iango aika a na buokiira ni karekei riki ara onimaki.

Imwiin manga taekinan te rongorongo ae kuneaki inanon Mareko 9:14–29, e reirei Unimwaane Jeffrey R. Holland:

“Teuana te reirei man te rongorongo aei bwa ngke e kaitara ma te kangaanga ni karekean te onimaki, te karo e kakoaua moa korakorana ao mai ikanne are e a butimwaea korakorana. Ana moa n taeka e matoatoa ao akea te kararaoma iai: te Uea, I onimaki.’ N na kangai nakoia ni kabane ake a kantaningaa riki te onimaki, uringa te mwaane aei! N taai ni maaku ke n nanououa ke n ni kangaanga, kateimatoa te onimaki are ko a tia ni karikirakea, e ngae ngkana e aki tau te onimaki anne. …

“Te kauoua n iango e kaokoro ma are te moan. Ngkana a roko kangaanga ao a kaoti titiraki, tai taekina bwa mwaitira am onimaki ae akea iroum, ma moanna man am ‘akionimaki.’ … I aki tuangko bwa ko na bakaea ae aongkoa iai am onimaki ma bon akea. I tuangko bwa ko na koaua nakon te onimaki are iai iroum. …

“Kabaneana: Ngkana a roko raraoma ke kangaanga, tai maaku ni bubuti buokam. Ngkana ti tangira te ibuobuoki ma te nanorinano ao te koaua n aron ae karaoia te karo aei, ti kona ni karekea” (“Lord, I Believe,” Liahona, Meei 2013, 93–94).

Kanakoraoan Ara Anga reirei

Tabeki taian titiraki aika a karekei koaua. Titirakinan titiraki aika a na kaungaia kaain te kiraati bwa a na kaota aia kakoaua bon te kawai ae nakoraoi ni kaoan te Tamnei. Te katooto, ngkana ko maroroakina Mataio 16:13–17, ko kona n titiraki, “Tera ae ko a tia n reiakinna ibukin te Tia Kamaiu are e a tia ni kakorakora am koaua Irouna ao iroun te Tia Kamaiu?” (Taraa Anga Reirei n Ana Kawai te Tia Kamaiu, 32.)