“Eberi 17–23. Mataio 18; Ruka 10: ‘Tera Ae n Na Karaoia Ba e Aonga n Reke I Rou te Maiu Are Akea Tokina?,’” Nakomai, Iriirai—Ibukin te Reirei n Tabati: Te Nu Tetemanti 2023 (2022)
“Eberi 17–23. Mataio 18; Ruka 10,” Nakomai, Iriirai—Ibukin te Reirei n Tabati 2023
Te Itamaria ae Raoiroi, iroun Dan Burr
Eberi 17–23
Mataio 18; Ruka 10
“Tera Ae n Na Karaoia Ba e Aonga n Reke I Rou te Maiu Are Akea Tokina?”
Wareka Mataio 18 ao Ruka 10, ao koroi ami namakin n tamnei. Ngkana ko karekei namakin, ko kona n titiraki, n aron are e taekinna Unimwaane Richard G. Scott, “Iai riki te bwai ae I riai n ataia?” (“To Acquire Spiritual Guidance,” Liahona, Nob. 2009, 8).
Kaunga te Tibwatibwa
A mwaiti katooto inanon mwakoro aikai iaon te anga reirei n te euangkerio aika a kaokoro man te bwai ae reireiniira te aonaaba. A kona kaain te kiraati n tibwauai tabeua katooto aika a kunei n aia wareware n te wiiki aei. E kanga te Uea ni kakabwaiaira ngkana ti kamwakuri Ana reirei?
Reirei te Reirei
Ti riai ni kabwarai aia bure akana bure nakoira ngkana ti na karekei kabwaraan ara bure mairoun te Uea.
-
Ko na kanga ni kabongana te taetae ni kaikonaki ibukin te toro ae e aki nanoanga ni kaungaia kaain te kiraati bwa na rangi ni bwaina te kakabwarabure? Tao ko kona ni koroi titiraki iaon te burakibooti n aron aikai ao tuangiia kaain te kiraati bwa a na iangoi ngke temanna te aomata e manga taekina te taetae ni kaikonaki: Tera ae tei ibukina te uea? Antai ae tei ibukina te toro ae babakaine? Antai ae tei ibukin te toro ae babakaine? Tera ae e tei ibukin te bure? Tuangiia kaain te kiraati bwa a na tibwaua te rongorongo man te taetae ni kaikonaki ae kaineti nakoia. (Taraa naba “Bwaai n Ibuobuoki Riki Tabeua.”)
-
Ko kona ni tuangiia kaain am kiraati bwa a na karaoa te bitaki n te taetae ni kaikonaki iroun te toro ae babakaine are e anga reirei naba iaon te kakabwarabure ni kabonganai bwaai n rabakau ao taekaia n taai aikai. (Iangoia bwa a na mwakuri iaon aei inanon kurubu.) Maroroakinna bwa e kanga te taetae ni kaikonaki ni kaeka ana titiraki Betero bwa mwaitira taai ae e riai ni kabwarabure iai.
E taetae Iesu iaon te mwane ao te tarau n reirei taekan te rairannano.
Karekean te maiu ae akea tokina, ti riai n tangira te Atua ao kaainrarikira.
-
Aio te iango ae e na kona n anganiia kaain te kiraati te taratara ae boou iaon te taetae ni kaikonaki ibukin te Itamaria ae raoiroi: Tuangiia bwa a na mena n ae aongkoa a karaoa te kakaae iaon te kaikoaki ao te iraa n te kawai imarenan Ieriko ao Ierutarem. Tuangiia kaain te kiraati tabeman bwa a na roko nakon te kiraati ao n tauraoi n tei ibukiia aomata aika kakaokoro inanon te taetae ni kaikonaki ao n taetae iaon irekerekeia ma te bwai aei. Te katooto, tera bukina tabeua ae aki katoka iai buokan te mwaane are e ikoaki te ibonga ao Rewi? Bukin tera tabeman Itamaria a katokia? Tera iango ae kona te tia kawakina te autinirua ni karin? E kanga ana namakin te mwaane are ikoaki ibukiia ake tabeman? Kakoaua bwa te marooro e anai nanoia kaain te kiraati bwa a na riki n aron te Itamaria ae raoiroi ao te tia tararua te autinirua ao n totokoia n riki n aron te ibonga ao Rewi.
-
E kanga te taetae ni kaikonaki ibukin te Itamaria ae raoiroi ni kaekai ana titiraki Iesu ake e tabeki inanon Ruka 10:25–29? Tuangiia kaain te kiraati bwa a na taetae iaon taai ngke a namakinna ae ti tebo ngaia ma “te aomata temanna” (te kibu 30) ae rangi ni kainnanoa te ibuobuoki. E kanga te ibuobuoki n roko? Ti na kanga ngaira kaain te uoote ni bootaki ni mwakuri ni buokiia tabeman, n aron are karaoia te Itamaria ae raoiroi ao te tia kawakina te auti n irua?
Ti rinea te “mwakoro ae raoiroi anne” man karaoan rinerine ni katoabong are e na kairiia nakon te maiu are akea tokina.
-
Imwiin warekan Ruka 10:38–42 n te kiraati, ko na titirakiniia kaain te kiraati bwa a na kanga n tia ni karaoi nanon ana reirei te Tia Kamaiu ngke arona bwa a tia ni mena n ana tabo Mareta. E na kanga te taneiai aei n tia n rota aia rinerine aika a na roko? Ti na kanga n ataia bwa bwaai inanon maiura a kainnanoa riki te tai ao iangoana? A kona kaain te kiraati n rinanon ana rongorongo Beretitenti Dallin H. Oaks “Good, Better, Best” (Liahona, Nob. 2007, 104–8) ni kakaei reirei aika a na kona ni buokiia.
Bwaai n Ibuobuoki Riki Tabeua
Te taarau n ana taetae ni kaikonaki te toro ae babakaine.
N taetae iaon taarau aika taekinaki n ana taetae ni kaikonaki te toro ae babakaine, e taku Unimwaane Jeffrey R. Holland:
“Iai tabeua kaokoro n iango imarenaia taan rabakau ni kaineti ma kakaawakin te mwane are e taekinaki ikai—ti kabongana te U.S. n taekan te mwane ikai—ma ni kabebetea te numera, ngkana te tarau ae e uarereke riki, 100 te bene ae aki kabwaraaki, e, na kangai, $100 n taai aikai, ngkanne 10,000-tarau n te taarena ae e aki kabwaraaki e na tia n roko n te mwaiti ae $1 te birion—ke e nako riki!
“N aron ae bon ara tarau, anne bon te ware ae rang mwaiti—a bane n riaon te kantaninga. (Akea ae kona ni bobwai n te mwaiti anne!) Eng, ibukin te kantaninga n te taetae ni kaikonaki aei, e kantaningaaki bwa e na kangaanga te ota iai; e kantaningaaki bwa e na riaon ara kona n oota iai, n taekinna bwa e riaon ara konaa ni kabwaraa. Anne bukina bwa aio tiaki karakinaia tooro ake uoman ake a kauntaeka inanon te NuTetemanti. Bon rongorongora, te utu n aomata ae bwaka—bure n rabwata, taan riaoa te tua, ao taan kabureaki ni kabane. Ngaira ni kabane ti bane ni bure, ao te moti ibukira n tatabemaniira nako bwa ti na bane ni kabureaki. Ao ti na bane n tiku ikekei ngke ti aki ibukin ana nanoanga te Uea are e kainaomataira bukina bwa e tangiriira ao e ‘ringaki nanom ma te nanoanga nakoira’ [Reirei ao Berita aika Tabu 121:4]” (“Be Ye Therefore Perfect—Eventually,” Liahona, Nob. 2017, 41).
Kanakoraoan Ara Anga reirei
Iriira ana banna ni katooto te Tia Kamaiu. Ngkana ko wareki rongorongon te Tia Kamaiu ngke e anga reirei n te Nu Tetamenti, tarai reirei n Ana katooto aika a na kona ni buokiko n riki bwa te tia reirei ae nakoraoi riki. Te katooto, inanon Ruka 10:25–37, tera ae karaoia Iesu n reireina te tia reireia te tua bwa ko na kanga ni karekea te maiu ae akea tokina?