Pitit Gason Pwodig la, pa Liz Lemon Swindle

1–7 Me.

Lik 12–17; Jan 11

“Rejwi Avèk Mwen; Paske M Jwenn Brebi M Nan Ki Te Pèdi a”

Kòmanse preparasyon w lan nan etidye nan yon espri lapriyè, Lik 12–17 ak Jan 11. Ki “brebi pèdi” nan klas ou a ki vin nan tèt ou? Itilize Vini, Suiv Mwen—Pou Moun yo ak Fanmi yo ak plan leson sa a pandan w ap chèche direksyon nan men Senyè a pou w konn ki pi bon fason pou w satisfè bezwen manm klas la, menm si yo pa vin nan klas la.

Envite Pataj

Aplikasyon se yon pati enpòtan nan aprantisaj, poutèt sa, envite manm klas la pou yo esplike kijan yo chwazi pou yo viv yon bagay yo te aprann nan ekriti yo semèn sa a.

Anseye Doktrin nan

Lik 14:15–24

Pa gen eskiz ki jistifye pou yon moun rejte levanjil la.

• Pou ede manm klas la etidye parabòl gran soupe a, ou ta gen dwa envite yo nan yon fèt imajinè ke w pral fè. Mande yo pou yo bay kèk rezon ki ta fè yo gen dwa vini oubyen yo ta gen dwa pa vini. Li Lik 14:15–24 ansanm, epi diskite sou eskiz moun nan parabòl yo te bay lè yo te envite yo nan yon fèt ki te reprezante benediksyon levanjil la. Ki eskiz moun yo bay jodi a paske yo pa aksepte envitasyon Sovè a pou yo resevwa benediksyon Pè Selès yo? Petèt, manm klas la ta kapab pale de benediksyon yo resevwa lè yo fè sakrifis nesesè yo pou yo viv kèk prensip levanjil la.

Lik 15

Nou ka chèche moun ki pèdi yo epi rejwi avèk Papa a lè yo retounen.

• Kijan w ap bay manm klas la opòtinite pou yo pataje sa yo te aprann konsènan twa parabòl nan Lik 15? Anvizaje bay chak manm klas la youn nan parabòl yo pou l revize. Yo ta kapab chèche epi pataje repons kesyon tankou sa yo: Ki mo nan parabòl la ki revele kijan Pè Selès la santi konsènan moun pèdi yo? Kisa parabòl yo sigijere sou nou ta dwe lonje men bay tout pitit Bondye yo? Manm klas la ta kapab pataje kijan Sovè a te ede yo lè yo te pèdi.

• Chante kantik “Aux bergers elles sont chères” (Cantiques, no.142) a ansanm ta kapab pote yon adisyon siyifikan lè w ap anseye parabòl sa yo.

• Lè nou revize parabòl pitit gason pwodig la ansanm, manm klas la kapab tire pwofi nan mete aksan sou mo yo, aksyon yo, ak kwayans chak moun nan parabòl la. Kisa nou aprann nan de chak moun? Petèt yo ta kapap ekri yon lòt fason pou fini parabòl la kote atitid pi gran pitit gason an te gen pou frè l la ta diferan. Kisa konsèy papa a nan parabòl la anseye nou sou fason nou ta dwe santi nou konsènan moun ki pèdi ak moun ki retounen nan levanjil la? (Gade pawòl Èldè Jeffrey R. Holland yo tou nan “Resous Adisyonèl.”) Obyen ou ta kapab mande manm klas la pou yo imajine yo se papa a nan parabòl sa a. Ki konsèy adisyonèl yo t ap bay pi gran pitit gason an pou ede l rejwi nan pwogrè ak siksè lòt moun?

Lik 17:11–19

Rekonesans pou benediksyon m yo ap fè m vin pi pre Bondye.

• Envite manm klas la pou yo pataje sa yo te aprann konsènan gratitid nan etid yo sou Lik 17:11–19 ak videyo ki rele “President Russell M. Nelson on the Healing Power of Gratitude (Prezidan Russell M. Nelson sou Pouvwa Gerizon Gratitid)” la nan (ChurchofJesusChrist.org). Kijan lepre rekonesan an te beni poutèt li te eksprime gratitid li? Kijan nou beni lè nou eksprime gratitid nou? Manm klas la ta kapab sigjere fason nou ka montre gratitid nou pou Bondye ak lòt yo.

Jan 11:1–46

Jezikri se Rezirèksyon an ak Lavi a.

• Yon fason pou nou egzamine Jan 11:1–46 se pou mande manm klas la pou yo chak li vèsè yo lè tou pa yo rive epi envite yo pou yo fè yon kanpe pou yo diskite chak fwa yo jwenn prèv lafwa nan Jezikri. Ou ta kapab mande manm klas la tou pou yo konsidere pèspektiv moun ki enplike yo —sa enkli Sovè a, Apot yo, Mat, Mari, al Laza. Kisa nou aprann nan men yo chak? Petèt manm klas la ta kapab pataje eksperyans yo lè lafwa yo nan Jezikri te ranfòse diran yon eprèv

Resous adisyonèl

Aprann nan men lòt anfan pwodig la.

Èldè Jeffrey R. Holland te fè obsèvasyon sa a konsènan gran frè pitit gason pwodig la; “Pitit gason sa a pa tèlman fache poutèt lòt la te vin lakay li a men li te fache poutèt paran l yo te twò kontan pou sa. Li pa t ko posede konpasyon ak mizèrikòd ak charite ki akonpaye vizyon pou l te rann ni kont ke se pa t yon rival ki retounen an. Se frè li. Jan papa l te sipliye l pou l te wè a, se yon moun ki te mouri epi ki te vin vivan kounyeya. Se yon moun ki te pèdi epi yo te jwenn li kounenya” (“Lòt Anfan Pwodig la,” Ensign, Me 2002,63).

Amelyore Ansèyman Nou

Lonje men bay moun ki pèdi a. Tankou bèje ki nan parabòl Sovè a (gade nan Lik 15:4), “ou ka lonje lamen bay moun ki pa vini yo nan klas ou a. Opòtinite pou w anseye ak edifye manm klas yo epi ede yo vin jwenn Kris la ale odela sal klas la ak odela moun ki prezan nan leson w yo” (Anseye nan Fason Sovè a, 8).