Bwa Kanuringau, iroun Walter Rane

Meei 29–Tuun 4

Mataio 26; Mareko 14; Ioane 13

“Bwa Kanuringana”

Wareka Mataio 26; Mareko 14; ao Ioane 13, ao iangoi iango ao namakina ake a roko n am iango. Tera rongorongo aika a na kakabwaiaia kain am kiraati?

Kaunga te Tibwatibwa

Kaoia kain te kiraati bwa a na tibwa te bwai are a reiakinna n te wiiki aei are e buokiia ni karekea riki nanon te toa. Tera ae a karaoia ao e kanga n rota aia namakin ni kanakin te toa?

Reirei te Reirei

Mataio 26:20–22

Ti riai n tirobai maiura ni baireia bwa e kanga ana taeka te Uea ni kaineti nakoira.

• Ti ongorai reirein te euangkerio aika a mwaiti inanon maiura, ma n tabetai ti kaririaki n iangoia bwa reirei akanne a kaineti riki nakoia aomata tabeman. Te maroro iaon Mataio 26:20–22 e kona ni buokiira n tokanikai iaon kan karaoan aei. Tera te reirei ae ti kora n reiakinna man aroia ana reirei ni karaoi nanon ana taeka te Tia Kamaiu ibukiia? Ngkana iai kain te kiraati ae wareka taekan Beretitenti Dieter F. Uchtdorf n ana rongorongo “Te Uea, antai Ngai?,” a kona n tibwa aia iango ake a karekei (Riaona, Nobembwa 2014, 56–59).

Mataio 26:26–29

Te toa bon te tai n uring te Tia Kamaiu.

• E na kanga kain te kiraati ni kabwarabwara kakaawakin te otenanti n te toa nakon temanna ae e aki taneiai iai? Tao ko kona ni karaoa te rinan n titiraki n ikotaki are e kona n iai iroun temanna are e kona n titiraki ibukin te toa, n aron “Bukin tera te Tia Kamaiu e anganiira te toa? Bukin tera te kariki ao te ran bon kanikina aika korakora ibukin Iesu Kristo? Tera ae ti berita iai ngkai ti ana te toa? Tera te berita ae ti karekea?” Kain te kiraati a kona n taratarai kaeka inanon booki aikai: Mataio 26:26–29; Reirei ao Berita aika Tabu 20:75–79; ao Gospel Topics, “Sacrament” (topics.ChurchofJesusChrist.org). Kona bae naba n tibwa te iango mairoun Unimwaane D. Todd Christofferson n “Bwaai n Ibuobuoki riki Tabeua.”

  

  Te Toa e buokira ni uringa Iesu Kristo.

• A kona n reke tibwangia kain te kiraati man ongoraia n aia iango imarenaia iaon kona kanga n uringa te Tia Kamaiu n tain te toa ao rinanon nako te wiiki (taraa Ruka 22:19–20; Reirei ao Berita aika Tabu 6:36–37). Tao ko kona ni kaoia bwa a na tibwa tera ae e buokiia ao aia utu n uringa te Tia Kamaiu ao ni kawakin aia berita. A kona naba n tibwa te bwai ae a karaoia ni karaoa te toa bwa te taneiai ae tabu.

Ioane 13:1–17

Te Tia Kamaiu bon ara banna ni katoto ni buokakiia tabeman ma te nanorinano.

• Ni buokaia kain am kiraati n iangoa kakaawakin are Iesu e teboki waeia ana reirei, ko kona ni kaoa kain te kiraati bwa e na karaoa tibwangan Betero ao e na intawiunaki irouia kain te kiraati. Kain te kiraati a kona n taratara Ioane 13:1–17 ao n iangoa titiraki aika kakaawaki are a kona n titirakina Betero bwa a na ata te bwai are e a tia n rinanona. Tera ae ti reiakinna man te rongorongo aei are e kona n rota arora ni buokiia tabeman?

Ioane 13:34–35

Ara tangira nakoia tabeman bon te kanikina bwa ngaira bon ana reirei ni koaua Iesu Kristo.

• Tina kanga ni kaungaia kain te kiraati bwa a na bwaian riki te tatangira? Tao ko kona n tuangiia bwa tera rikiia ae a ataia ngkana a kaitibo ma temanna ae te tia iriira Kristo. Ko kona ni kaoia bwa a na taratara Ioane 13:34–35 n ataia bwa a na kanga ni kina ana reirei ni koaua te Tia Kamaiu. Tera ae ti kona ni karaoia ni karika te tangira bwa kabwarabwaraan anuara n riki bwa ana reirei? Tao ti kona ni maroroakinna bwa e kanga tangirakiia tabeman n riki bwa te kakoaua iroun Iesu Kristo. Tina kanga ni karaoa aei inanon ara utu, iaon te bwai ni kaongora, ao n tabo riki tabeua?

• N te kiraati, ko a tia n reiakina ae mwaiti n taekan maiun te Tia Kamaiu n te ririki aei, n raonaki ma katoto aika mwaiti n arona ni kaota Ana tangira ibukiia tabeman. Teuana aron buokakiia kain te kiraati n iangoa te tua n Ioane 13:34 bon korean As I Have Loved You iaon te burakibooti ao n tuangiia kain te kiraati bwa a na karinani katoto ake a uringi man te Nu Tetamenti are e kabwarabwara ana tangira Iesu. Ngkanne ko kona ni korea Itangitangiri Imarenami iaon te burakibooti ao tuangiia kain te kiraati bwa a na korei rinanin kawai are ti kona n iriira Ana banna ni katoto n te tangira. Kain te kiraati akona ni karekei iango man teuana te witeo n rinanin “Bwaai ni Ibuobuoki riki Tabeua.”

Bwaai n Ibuobuoki Riki Tabeua

“Ni karekerekea inanora raoiroin ao anuan Kristo.”

Unimwaane D. Todd Christofferson e reirei, “Ni katamneia kanakin rabwatan [te Tia Kamaiu] ao nimakin Raraana [nanaona] ni karekerekea inanora raoiroin ao anuan Kristo, ni kanakoa te aro n aomata ao n riki bwa te aomata ae Itiaki ‘rinanon ana mwakuri ni kamaiu Kristo ae te Uea’ [Motiaea 3:19]. Ngkai ti kana te berena n toa ao te ran ni katoa wiiki, ti karaoia n iangoa tabwaninin are ti riai ni karekerekei Anuana ao tein maiuna ae akea kairuana nakon maiura ao arora” (“The Living Bread Which Came Down from Heaven,” Liahona, Nov. 2017, 37).

Witeo iaon te tangira n ChurchofJesusChrist.org.

• “Itangitangiri Imarenami”

• “Utu a Anganano, Anga, ao a Tangira”

• “Ana Katauraoi Thomas S. Monson: E Reiakina te Nanoanga n ana Tai ni Kairake”

Kanakoraoan Ara Anga reirei

Taratara n ana taratara te Atua. Taraia raoi bwa ko taraia kaain am kiraati n ai aron ae e nooria iai te Atua, ao te Tamnei e na kaota nakoim kakawakiia ao aia konabwai. Ngkai ko karaoa aei, ko na kairaki n am kekeiaki ni buokiia (taraa Teaching in the Savior’s Way, 6).