“Tuun 5–11. Ioane 14–17: ‘Kam Na Maeka n Tangira,”Reitinako Inanon Au Tangira,’” Nakomai, Iriirai—Ibukin te Reirei n Tabati: Te Nu Tetemanti 2023 (2022)
“Tuun 5–11. Ioane 14–17,” Nakomai, Iriirai—Ibukin te Reirei n Tabati: 2023
Tuun 5–11
Ioane 14–17
“Kam Na Maeka n Tangirau”
Ngkana ko tataro mwaaka ni kamatebwaia Ioane 14–17, iangoia bwa ko na kanga ni kaota am tangira nakoia ake ko reireiniia. Te Tamnei ae Raoiroi e na uoti iango nakon am iango ngkana ko kamatebwai booki aika tabu, Nakomai, Iriirai—Ibukiia n Tatabemaniia ao Utu, ao te kamataata aei.
Kaunga te Tibwatibwa
Koroi nambwa 14 nakon 17 iaon te burakibooti, n tei ibukin mwakoro inanon Ioane ake a wareki kaain te kiraati n te wiiki aei. Tuangiia tabeman kaain te kiraati bwa a na koroi, nako rarikin nambwan mwakoro n tatabeua nako, te kibu are e buokiia te Tamnei ae Raoiroi ni kaotaia ke are a na tangiria ni marooro iaona n te kiraati.
Reirei te Reirei
Ioane 14:16–27; 15:26; 16:7–15
Te Tamnei ae Raoiroi e buokiira ni kakoroi nanon ara kaantaninga ngkai ngaira ana reirei Iesu Kristo.
-
Ni buokiia kaain te kiraati n reiakin taben te Tamnei ae Raoiroi aika kakaokoro, iangoia ni kaoia bwa a na wareka teuana ke e raka riki kibu man booki aika tabu aikai: Ioane 14:16–27; 15:26; ao 16:7–15. A kona ni koroia iaon te burakibooti te bwai ae a reiakinna ibukin te Tamnei ae Raoiroi man kibuntaeka aikai. A kona naba n tarai atatai aika nano ibukin te Tamnei ae Raoiroi inanon booki aika tabu ao rongorongo aika koreaki inanon “Bwaai n Ibuobuoki Riki Tabeua.” E kanga te Tamnei ae Raoiroi ni kakoroi nanon mwioko aikai inanon maiura? Ko kona naba n iangoi bwaai ke ibuobuoki aika ko kona n uoti nakon te kiraati ni buokiia kaain te kiraati n atai tabeua mwioko aikai.
-
Iangoia ni kaoia tabeman kaain te kiraati imwain taina ni kamatebwaia teuana te marooro man te maungatabu ni kabuta ae baireaki inanon “Bwaai n Ibuobuoki Riki Tabeua” (ke te marooro teuana n te maungatabu ae a ataia) iaon te Tamnei ae Raoiroi. Kariaia bwa a na tibwauai ni kakimototoi bwaai aika a tia n reiakin ma kaain te kiraati. Tera bwaai aika a karinaki inanon te rongorongo aei nakon are ti a tia n reiakinna n taekan te Tamnei ae Raoiroi man Ioane 14–16?
The Last Supper, iroun Clark Kelley Price
Ngkai ti maeka iroun Kristo, ti na uoti uaa aika raoiroi ao ni karekea te kimwareirei.
-
Iangoia ni uoti aroka aika uarereke (ke tamnein teuana) nakon te kiraati ao ni kabongana ni buokiia kaain te kiraati ni katamneia n aia iango ana reirei te Tia Kamaiu iaon te kurebe ao mwaangana. Imwiin warekan Ioane 15:1–12 n te kiraati, kam kona ni maroroakina nanon “kam na maeka inanon [Kristot]” (Ioane 15:4). A kona tabeman kaain te kiraati n tibwauaia bwa a kanga n tia ni kunea te kibu ae Ioane 15:5 bwa e koaua. (Taraa naba te rongorongo mairoun Unimwaane Jeffrey R. Holland inanon “Bwaai n Ibuobuoki Riki Tabeua.”)
Tamara are i Karawa ao Iesu Kristo a katiteuanaki n ae kororaoi.
-
Ko aki kona n reirei koaua ni kabane aika kakawaki aika kuneaki inanon Ioane 17 inanon teuana te marooro n te kiraati, ma aio te kawai ni buoka te kiraati ni ukoukori tabeua mai ibuakoia. Koroi ni karinani iaon te burakibooti reirei man Ioane 17, n aron aikai:
-
Ara reitaki ma Iesu Kristo
-
Ana reitaki Iesu Kristo ma Tamana
-
Ara reitaki ma kaain te aonaaba ni kabane
-
Ara reitaki ma ngaira n tatabemaniia bwa Ana reirei
Tuangiia kaain te kiraati n tatabemaniia nako n rinea teuana mai ibuakon tuua aikai ao ni wareka Ioane 17, n ukoukori kiibu aika a irekereke mangaia. Tuangiia kain te kiraati bwa a na tibwaua te bwai are a reiakinna.
A kanga ara reitaki ma te Atua n rota ara reitaki ma ngaira n tatabemaniira nako? A kanga ara reitaki imarenara n rota ara reitaki ma te Atua?
-
Bwaai n Ibuobuoki Riki Tabeua
Te Tamnei ae Raoiroi.
-
Mwakuri 2:37–38; I-Karatia 5:22–23; 1 Nibwaai 10:17–19; 2 Nibwaai 32:3–5; Motiaea 3:19; 3 Nibwaai 27:20; Moroni 8:26; 10:4–5; Reirei ao Berita aika Tabu 8:2–3; 42:17
-
Henry B. Eyring, “Bwa E Aonga ni Memena Tamneina Iroumi,” Riaonba,, Meei 2018, 86–89
-
David A. Bednar, “Receive the Holy Ghost,” Liahona, Nob. 2010, 94–97
-
Michelle D. Craig, “Spiritual Capacity,” Liahona, Nob. 2019, 19–21
Te Maeka Iroun Kristo.
Atakina bwa te taeka ae maeka iai nanona ae teimatoa ao ni motinnanoaki, e reirei Unimwaane Jeffrey R. Holland:
“Nanon raoi te [taeka] aei bwa ko na ‘tiiku—ma tiiku n aki toki.’ … Nakomai, ma nakomai n tiku. Nakomai ma te onimaki ao te teimatoa. …
“E taku Iesu, ‘Kam aki kona te bwai teuana ngkana kam a raure ma Ngai’ [Ioane 15:5]. I kakoaua bwa e bon koaua te Atua. E rangi ni kakawaki Iesu nakoira ao ti na riai ni ‘maeka’ Irouna ni matoa, n aki imanonoaki, n teimatoa, n aki toki. Ibukin uaan te euangkerio aika raraoi bwa a na rikirake ao ni kakabwaiai maiura, ti riai ni kamatoaira nako Ina, te Tia Kamaiu ibukira ni kabane, ao nakon Ana Ekaretia aei, are e katoka iaona Arana ae tabu. Ngaia boni kaaina are bon ngaia moan reken korakorara ao te maiu ae akea tokina. Ti na aki ti teimatoa Irouna ma e na kairoroira ao n katokanikai n te bwai ae tabu aei ae na aki kona ni kabwakaira” (“Abide in Me,” Liahona, Meei 2004, 32).
Kanakoraoan Ara Anga reirei
Kaoa te Tamnei. “Ti kona n riki bwa ana bwai ni mwakuri te Atua ni buokiia Ana ataei n reirei iroun te Tamnei. Ni karaoan aei, ti kaoa ana kairoro te Tamnei inanon maiura ao ni kaungaia naake ti reireiniia abwa a na karaoa naba ae aekan aei. … Katangitang aika tabu, koroboki aika tabu, aia taeka burabeti n taai aikai, kaotan te tangira ao te koaua, ao taai n aki kakarongoa n iango a bane ni kona ni kaoa te Tamnei” (Reirei n Ana Kawai te Tia Kamaiu,, 10).