Ecce Homo, iroun Antonio Ciseri

Tuun 19–25

Mataio 27; Mareko 15; Ruka 23; Ioane 19

“Ea Tia”

Waakina am katauraoi n angareirei man tataromwaaka ni wareka Mataio 27; Mareko 15; Ruka 23; ao Ioane 19. Ukoukoria ni maiuakina ae tau n te Tamnei bwa ko aonga ni kona n uota te kakoaua ibukin te Tia Kamaiu ao Ana Mwakuri ni Kamaiu.

Kaunga te Tibwatibwa

Kaoia kain te kiraati bwa a na rineia man te wareware n te wiiki aei ao a na kabanea tabeua te miniti n taraia, n taratarai taeka, kibun taeka, ke kabwarabwara ake a reireiniia te bwai ae uaana ibukin te Tia Kamaiu ao Ana mition. Anganiia aia tai n tibwaua te bwai ae a kunea ao kabwarabwara bwa bukin tera e uaana nakoia.

Reirei te Reirei

Mataio 27; Mareko 15; Ruka 23; Ioane 19

Nanon Iesu Kristo n anganano bwa e na korakai ibukin Ana tangira ibukin te Tama ao ibukira ngaira ni kabane.

• Ni buokiia kain am kiraati n ata aron korakain te Tia Kamaiu ao matena iaon te kaibangaki e kaota Ana tangira, kata te waaki ae aron aei: Anganiia kain te kiraati n tatabemaniia te beeba ae te aati, ao kaoia bwa a na koreia iaon buroia te kibuntaeka man 1 I-Korinto 13:4–7 are e kabwarabwara te tangira ae itiaki. Imwiina tuangiia bwa a na kakaea n Mataio 27; Mareko 15; Ruka 23; ke Ioane 19 ao koreia iaon iteran buroia tabeua te kibu are e kaota aron ana tangira te Tia Kamaiu are e kabwarabwara are a rineia. Anganiia bwa a na tibwauai baike a kunei. Tera te bwai ae a tia n rinanona ae e a tia ni buokiira n ota n ana tangira te Tia Kamaiu?

  

  Tautia “a bira te bau ae te akanta, ao a katoka iaon atuna” (Mareko 15:17).

• Korobanna a kona ni buokiia kain te kiraati ni tamnei tabeua bwaai aika a riki ake a wareki n te wiiki aei. Tao ko kona ni bwenauaia kain te kiraati inanon kurubu ao n anganiia tamnei ni katoai kurubu (taraa “Bwaai ni Ibuobuoki riki Tabeua” ibukin tamnei ake a rineaki). Kain te kiraati akona ni wareki kibu ake a kabwarabwara te bwai ae riki n aia tamnei. A kona ngkanne n tibwai aia iango ao aia namakin ni bwaai aika a riki akanne—n raonaki ma a kanga tamnei akanne ni buokiia ni matata riki n ana Mwakuri ni Kamaiu te Tia Kamaiu. Kona bae naba n iangoia ni kaota te witeo “Jesus Is Condemned before Pilate” and “Jesus Is Scourged and Crucified” (ChurchofJesusChrist.org). Kaungaia kain te kiraati bwa a na kaota aia koaua iroun te Tia Kamaiu ao Ana Mwakuri ni Kamaiu.

Mataio 27:11–60

Burabeti ake rimoa a kaman noora korakain te Tia Kamaiu ao Taurakina n te Kaibangaki.

• Burabeti ake rimoa a kaman taekini angin bwaai aika a riki n ana kabanea n aua te Tia Kamaiu. Teuana te kawai ni buokiia kain te kiraati n noora aei bon anganakiia n tatabemaniia aomata teuana ke e mwaiti riki koroboki aika a tabu n “Bwaai ni Ibuobuoki riki Tabeua” ao n tuangiia bwa a na kakaei kibu ni Mataio 27 ni kaota aron koroboki aika a tabu ni kakoroaki bukiia. Ko na bae ni karaoa te taibora are e bootau ma taeka ni burabeti ao koron bukiia. A kanga taetae ni burabeti aikai ni kakorakorai ara onimaki iroun Iesu Kristo?

Mataio 27:27–49; Mareko 15:16–32; Ruka 23:11, 35–39; Ioane 19:1–5

Te kaitara e aki kona ni katoka ana mwakuri te Atua.

• Ni buokiia kain te kiraati ni kakaonimaki ni kaitarai kakaitara ngkai a maiu ni koaua nakon aia onimaki, ko kona ni kaoia bwa a na wareki kibu ake a kabwarabwaraaki ni bwainikiriinakin te Tia Kamaiu are e kaitarai (taraa Mataio 27:27–49; Mareko 15:16–32; Ruka 23:11, 35–39; Ioane 19:1–5). Tera ae ti reiakinna man ana kaeka te Tia Kamaiu are e buokiira ni kaitarai kakaitara? Tera katoto riki tabeua ni kaitaraan te kaitara ae kona ni buokiira? (Taraa, ibukin te katoto, Rongorongon —Iotebwa Timiti 1:24–25.)

Ruka 23:34–43

Te Uea e anganiira te kantaninga ao te kabwarabure.

• Riki n ana kabanea n tai, te Tia Kamaiu e reitinako n anga te kantaninga ao te kabwarabure. Iangoi kawai ni kaungaia kain te kiraati bwa a na iri Ana banna ni katoto. Te katoto, ko kona n tuangiia iteran te kiraati bwa a wareka Ruka 23:34–38 (n raonaki ma kibu 34, footnote c, are e karekea te iango man ana Raitaeka Iotebwa Timiti) ao are te iterana bwa a na wareka Ruka 23:39–43. Kain te kiraati a kona n tibwa te bwai are a reiakinna ibukin te Tia Kamaiu man aia kibu ake a katabeaki iai. Ti na kanga n ira ana banna ni katooto te Tia Kamaiu?

Bwaai n Ibuobuoki Riki Tabeua

Tamnein bwainikirinakin, korakain, ao maten Iesu.

• Birato ngke E Teboki Baina (ChurchofJesusChrist.org; Mataio 27:11–25)

• Kristo ma ana Bau te Akanta (ChurchofJesusChrist.org; Mataio 27:26–31)

• Iesu Ngke E Uota Ana Kaibangaki (ChurchofJesusChrist.org; Ioane 19:13–18)

• Taurakina n te Kaibangaki (ChurchofJesusChrist.org ao Boki n Tamnei n te Euangkerio, no. 57; Ruka 23:33–46; Ioane 19:23–37)

• Taunakin Iesu (ChurchofJesusChrist.org ao Boki n Tamnei n te Euangkerio, no. 58; Ioane 19:38–42)

Koroboki aika a tabu ake a kaman taekina bairean taekan ao maten Iesu Kristo.

• Itaia 53:5, 7

• 1 Nibwaai 19:9

• Itaia 50:6

• Taian Areru 69:21

• Taian Areru 22:16

• 1 Nibwaai 19:10

• Taian Areru 22:18

• Itaia 53:12

• Taian Areru 22:7–8

• Taian Areru 22:1

• Itaia 53:9

Kanakoraoan Ara Anga Reirei

Karekea korakoram mai iroun te Tia Kamaiu. “Inanon am konabwa ni maiu ao n reirei n aron te Tia Kamaiu, ko na aki bwaka ni kakoroan nanon am kouru inanon te tai. Tai kabwaraa nanom, ma, anga am kairua ma mamaaram nakon te Uea ao te Tia Kamaiu” (Teaching in the Savior’s Way, 14).