Te Onaroka i Ketetemwane, iroun Derek Hegsted

Tuun 12–18

Ruka 22; Ioane 18

“Akea Au Taeka, Ma E Na Tauaki, Am Taeka”

Iangoa te bwai ae ko na karaoia ni kaoa te Tamnei nakon am kiraati ngkana kam maroroakin bwaai aika tabu aika riki inanon mwakoro aikai. Tataro mwaaka ni kakaei kawai aika ko kona ni buokiia iai kaain am kiraati ni kakorakora aia tangira ibukin te Tia Kamaiu ao aia onimaki Irouna.

Kaunga te Tibwatibwa

Tuangiia tabeman kaain te kiraati bwa a na tibwaua te bwai ae a namakinna n aia tai ni wareware n te wiiki aei ao tera kiibu aika e buokiia ni karekea te namakin n te kawai aei.

Reirei te Reirei

Ruka 22:39–46

Ti riki n aron Kristo ngkana ti rineia ni kanakoi ara kaantaninga nakoia Taama.

• Ana banna ni katooto te Tia Kamaiu ni kanakoi nakon ana kaantaninga te Tama e kona ni buokiia kaain am kiraati ngkana a kainnanoia ni karaoa ae titebo ma anne. Ni moana te marooro, ko kona ni kaoia kaain te kiraati bwa a na tibwauai aia atatai ngkana a kabanea nanoia nakon te bwai ae tangiria te Atua bwa a na karaoia. Tuangiia bwa a na tibwauaia bwa a kanga n ata te bwai ae tangiria te Atua bwa a na karaoia ao a kanga ni kakabwaiakaki ibukin kanakoana nakon Ana kantaninga. Tuangiia kaain te kiraati bwa a na wareka Ruka 22:39–46 ao n taekinna bwa bukin tera iai nanon te Tia Kamaiu ni kanakoa Ana kantaninga nakon Tamana. Ti na kanga n ira ana banna ni katooto te Tia Kamaiu?

• Irarikin ana mwakuri te Tia Kamaiu ni uotia nakon te Atua inanon Ruka 22:42, tera ana banna ni katooto riki tabeua n Ana ongotaeka ae ti kunea inanon Ruka 22 ao Ioane 18? E kanga te Tia Kamaiu ni kanakoa ngaia nakon Ana kaantaninga Tamana inanon Maiuna? Tera ae ti kona ni karaoi bwa ti aonga n riki n ai Arona? E kona te rongorongo mairoun Unimwaane Neal A. Maxwell inanon “Bwaai n Ibuobuoki Riki Tabeua” e na ibuobuoki ni kaungaia kaain te kiraati n iangoia bwa a na kanga ni kona ni kanakoa aia kantaninga nakon te Atua.

Ruka 22:39–46

Iesu Kristo e karaoa te Mwakuri ni kamaiu ae aki totoki ibukira.

• Ruka 22:39–46 e kabwarabwara te bwai ae riki i Ketetemwane. Ni buokiia kaain te kiraati ni kaotaia n aron kakawakin te bwai ae tabu aei, ko kona ni koroia iaon te burakibooti titiraki n aron Tera ae riki i Ketetemwane? ao Bukin tera e kakawaki nakoiu? A kona kaain te kiraati ni kakaei kaeka inanon Ruka 22:39–46; Aramwa 7:11–13; Reirei ao Berita 19:16–19; ao n te witeo “The Savior Suffers in Gethsemane” (ChurchofJesusChrist.org). A kona naba ni kakaei kaeka inanon ana marooro Beretitenti Tad R. Callister “Ana Mwakuri ni Kamaiu Iesu Kristo” (Liahona, Meei 2019, 85–87).

• Inanon Ana Boki Moomon, Iakobwa e arana Ana Mwakuri ni kamaiu Iesu Kristo bwa “te mwakuri ni kamaiu ae akea tokina” (2 Nibwaai 9:7). Ni buokiia kaain te kiraati n ata nanon te bwai aei, ko kona n tibwauai ana reirei Beretitenti Russell M. Nelson inanon “Bwaai n Ibuobuoki Riki Tabeua” ao tuangiia kaain te kiraati bwa a na koroi kawai ae a kona mwakan Ana karea te Tia Kamaiu ni baireaki bwa a na akea tokiia. A kona naba ni wareki booki aika tabu aikai ao ni karin nakon are a tia ni koroia: Ebera 10:10; Aramwa 34:10–14; Reirei ao Berita aika Tabu 76:24; ao Mote 1:33. Ti na kanga ni kaota ara kakaitau ibukin te bwai ae e a tia ni karaoia te Tia Kamaiu ibukira?

Peter’s Denial, iroun Heinrich Bloch

Ruka 22:54–62

Ti kona ni kakaonimaki nakon Iesu Kristo n aki tarai makura ao mamaarara.

• Ni buokiia membwa ni katamnei bwaai aika riki inanon Ruka 22:54–62, ko kona ni kaota te tamnei n aron Peters Denial (ChurchofJesusChrist.org) ke te witeo ae Jesus Is Tried by Caiaphas, Peter Denies Knowing Him (ChurchofJesusChrist.org). A kona kaain te kiraati n tibwaua te bwai ae a reiakinna man ana taneiai Betero are e kaungaia bwa a na kakaonimaki nakon Iesu Kristo.

Bwaai n Ibuobuoki Riki Tabeua

Uotakirakean ara kantaninga nakon te Tama.

E reirei Unimwaane Neal A. Maxwell: “Ngkana ko anga am kaantaninga nakon te Atua, ko Anganna ti te bwai ae ko kona n Anganna are bon am bwai ae ko na anga. Tai tataninga n te tai ae maan ni kakaea te bao ni karea ke ni moanna ni katuka te bwaintituaraoi iaon am kaantaninga!” (“Remember How Merciful the Lord Hath Been,” Liahona, Meei 2004, 46).

Te Mwakuri ni Kamaiu e Aki Toki.

Beretitenti Russell M. Nelson e anga reirei:

“Ana mwakuri ni kamaiu [Iesu Kristo’s] bon akea tiana—n akea tokina. E bon aki toki naba bukina bwa aonga aomata ni kabane ni kamaiuaki man te mate ae aki kona n toki. E bon aki toki ni kaineti ma Karawawatakina ae korakora. E aki toki n te tai are, e toki iai te anga karea n te man are e a tia ni kakaraoaki ni karokoa te tai anne. E bon aki toki nakon mwaitina—e na karaoaki n te taina ibukiia ni kabane. Ao te nanoanga n te Mwakuri ni kamaiu e rababa nako tiaki ti nakon mwaitiia aomata aika aki kona ni warekaki mwaitiia, ma nakon naba mwaitin te aonaaba ae karaoaki Irouna ae aki kona ni warekaki mwaitiia. Bon akea tokina iaon ana konabwai te aomata ke ana atatai te aomata ae mamate.

“Ti Iesu ae kona n anga te mwakuri ni kamaiu ae akea tokina anne, riki ngkai e bungiaki bwa te tina ae mamate ao te Karo ae aki mamate. Ibukin te aro ni bungiaki anne ae onoti, Iesu bon te Aomata ae aki mamate” (“The Atonement,” Ensign, Nob. 1996, 35).

Kanakoraoan Ara Anga reirei

Ko na riki bwa te bwai ni mwakuri ae nanorinano iroun te Tamnei. “Kantaningaam ngkai te tia reirei ngkoe tiaki karaoan te angareirei ae anainano ma ko na buokiia tabeman bwa a na karekea ana kakairi te Tamnei ae Raoiroi, are bon te tia reirei ni koaua” (Te Reirei n Ana Kawai te Uea,10).