« ថ្ងៃទី ១៩–២៥ ខែ មិថុនា ។ ម៉ាថាយ ២៧; ម៉ាកុស ១៥; លូកា ២៣; យ៉ូហាន ១៩ ៖ ‹ ការស្រេចហើយ › » ចូរមកតាមខ្ញុំ—សម្រាប់ថ្នាក់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ១៩–២៥ ខែ មិថុនា ។ ម៉ាថាយ ២៧; ម៉ាកុស ១៥; លូកា ២៣; យ៉ូហាន ១៩ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២៣

Ecce Homo ( ព្រះយេស៊ូវគ្រីស្ទដែលត្រូវគេធ្វើទុក្ខទោស ) ដោយ អាន់ថូញូ ស៊ីស៊ើរី

ថ្ងៃទី ១៩–២៥ ខែ មិថុនា

ម៉ាថាយ ២៧; ម៉ាកុស ១៥; លូកា ២៣; យ៉ូហាន ១៩

« ការស្រេចហើយ »

សូមចាប់ផ្ដើមការរៀបចំខ្លួនបង្រៀនរបស់បងប្អូន ដោយការអាន ម៉ាថាយ ២៧; ម៉ាកុស ១៥; លូកា ២៣ និង យ៉ូហាន ១៩ ប្រកបដោយការអធិស្ឋាន ។ សូមខិតខំរស់នៅឲ្យស័ក្ដិសមនឹងព្រះវិញ្ញាណ ដើម្បីបងប្អូនអាចថ្លែងជាសាក្សីដ៏មានអានុភាពអំពីព្រះអង្គសង្គ្រោះ និងដង្វាយធួនរបស់ទ្រង់ ។

អញ្ជើញឲ្យចែកចាយ

សូមអញ្ជើញសមាជិកក្នុងថ្នាក់ម្នាក់ៗឲ្យជ្រើសរើសជំពូកមួយមកពីការអាននៅសប្ដាហ៍នេះ ហើយចំណាយពេលពីរបីនាទីមើលវាត្រួសៗ ស្វែងរកពាក្យ ឃ្លា ឬព័ត៌មានលម្អិតមួយ ដែលបង្រៀនពួកគេអំពីអ្វីមួយដែលមានអត្ថន័យអំពីព្រះអង្គសង្គ្រោះ និងបេសកកម្មរបស់ទ្រង់ ។ សូមផ្ដល់ឱកាសដល់ពួកគេឲ្យចែកចាយនូវអ្វីដែលពួកគេរកឃើញ ហើយពន្យល់ថាហេតុអ្វីក៏វាមានអត្ថន័យចំពោះពួកគេ ។

បង្រៀនគោលលទ្ធិ

ម៉ាថាយ ២៧; ម៉ាកុស ១៥; លូកា ២៣; យ៉ូហាន ១៩

ព្រះឆន្ទៈព្រមរងទុក្ខរបស់ព្រះយេស៊ូវគ្រីស្ទ បានបង្ហាញពីសេចក្ដីស្រឡាញ់របស់ទ្រង់ចំពោះព្រះវរបិតា និងចំពោះពួកយើងទាំងអស់គ្នា ។

ដើម្បីជួយសមាជិកក្នុងថ្នាក់របស់បងប្អូនឲ្យយល់អំពីរបៀបដែលការរងទុក្ខ និងការសុគតរបស់ព្រះអង្គសង្គ្រោះនៅលើឈើឆ្កាង បង្ហាញពីសេចក្ដីស្រឡាញ់របស់ទ្រង់នោះ សូមសាកល្បងធ្វើសកម្មភាពដូចនេះ ៖ សូមឲ្យក្រដាសរាងបេះដូងមួយទៅសមាជិកក្នុងថ្នាក់ម្នាក់ៗ ហើយអញ្ជើញពួកគេឲ្យសរសេរនៅលើក្រដាសបេះដូងរបស់ពួកគេនូវឃ្លាមួយចេញមកពី កូរិនថូស ទី១ ១៣:៤–៧ ដែលពិពណ៌នាអំពីសេចក្ដីសប្បុរស ។ បន្ទាប់មកសូមឲ្យពួកគេស្រាវជ្រាវនៅក្នុង ម៉ាថាយ ២៧; ម៉ាកុស ១៥; លូកា ២៣ ឬ យ៉ូហាន ១៩ ហើយសរសេរនៅលើក្រដាសបេះដូងរបស់ពួកគេម្ខាងទៀតនូវខគម្ពីរពីរបីដែលបង្ហាញពីរបៀបដែលព្រះអង្គសង្គ្រោះ បានបង្ហាញសេចក្ដីស្រឡាញ់ដែលបានពិពណ៌នានៅក្នុងឃ្លាដែលពួកគេបានជ្រើសរើសនោះ ។ សូមឲ្យពួកគេចែកចាយនូវអ្វីដែលពួកគេរកឃើញ ។ តើបទពិសោធន៍អ្វីខ្លះដែលបានជួយយើងឲ្យយល់ពីសេចក្ដីស្រឡាញ់របស់ព្រះអង្គសង្គ្រោះ ?

ពួកទាហាន « ក្រងភួងបន្លាបំពាក់លើព្រះសិរទ្រង់ » ( ម៉ាកុស ១៥:១៧ ) ។
គំនូរអាចជួយសមាជិកក្នុងថ្នាក់ឲ្យមើលឃើញនូវព្រឹត្តការណ៍មួយចំនួន ដែលពួកគេបានអាននៅសប្ដាហ៍នេះ ។ ប្រហែលជាបងប្អូនអាចបំបែកសមាជិកក្នុងថ្នាក់ទៅជាក្រុម ហើយចាត់ឲ្យក្រុមនីមួយៗមានរូបភាពមួយ ( សូមមើល « ធនធានបន្ថែមទាំងឡាយ » សម្រាប់រូបភាពដែលបានស្នើ ) ។ សមាជិកក្នុងថ្នាក់អាចអានខគម្ពីរ ដែលពិពណ៌នាអំពីព្រឹត្តិការណ៍ ដែលបានបង្ហាញនៅក្នុងរូបភាពរបស់ពួកគេ ។ បន្ទាប់មក ពួកគេអាចចែកចាយគំនិត និងអារម្មណ៍របស់ពួកគេអំពីព្រឹត្តិការណ៍ទាំងនេះ—រួមទាំងរបៀបដែលរូបភាពនេះបានជួយពួកគេឲ្យយល់កាន់តែច្បាស់អំពីដង្វាយធួនរបស់ព្រះអង្គសង្គ្រោះ ។ បងប្អូនក៏អាចពិចារណាបង្ហាញវីដេអូ « Jesus Is Condemned before Pilate » និង « Jesus Is Scourged and Crucified » ផងដែរ ( នៅលើគេហទំព័រ ChurchofJesusChrist.org ) ។ សូមលើកទឹកចិត្តសមាជិកក្នុងថ្នាក់ឲ្យថ្លែងទីបន្ទាល់អំពីព្រះអង្គសង្គ្រោះ និងដង្វាយធួនរបស់ទ្រង់ ។

3:19

4:49

ម៉ាថាយ ២៧:១១–៦០

ពួកព្យាការីពីបុរាណបានមើលឃើញជាមុនអំពីការរងទុក្ខ និងការឆ្កាងរបស់ព្រះអង្គសង្គ្រោះ ។

ពួកព្យាការីពីបុរាណបានព្យាករពីព្រឹត្តិការណ៍ជាច្រើនអំពីវេលាចុងក្រោយរបស់ព្រះអង្គសង្គ្រោះ ។ វិធីមួយដើម្បីជួយសមាជិកក្នុងថ្នាក់ឲ្យមើលឃើញការណ៍នេះ គឺត្រូវឲ្យបទគម្ពីរមួយ ឬច្រើននៅក្នុង « ធនធានបន្ថែមទាំងឡាយ » ដល់សមាជិកម្នាក់ៗ ហើយសូមពួកគេឲ្យស្វែងរកខគម្ពីរនៅក្នុង ម៉ាថាយ ២៧ ដែលបង្ហាញពីរបៀបដែលបទគម្ពីរទាំងឡាយត្រូវបានបំពេញ ។ បងប្អូនអាចធ្វើជាតារាងមួយ ដែលផ្គូផ្គងការព្យាករទៅនឹងការបំពេញការព្យាករបាន ។ តើការព្យាករទាំងនេះជួយពង្រឹងសេចក្តីជំនឿរបស់យើងទៅលើព្រះយេស៊ូវគ្រីស្ទដោយរបៀបណា ?

ម៉ាថាយ ២៧:២៧–៤៩; ម៉ាកុស ១៥:១៦–៣២; លូកា ២៣:១១, ៣៥–៣៩; យ៉ូហាន ១៩:១–៥

ការផ្ទុយពុំអាចបញ្ឈប់កិច្ចការរបស់ព្រះបានទេ ។

ដើម្បីជួយសមាជិកក្នុងថ្នាក់ឲ្យប្រឈមមុខនឹងការផ្ទុយដោយស្មោះត្រង់ នៅពេលពួកគេរស់នៅតាមសេចក្ដីពិតរបស់ពួកគេយ៉ាងពិតនោះ បងប្អូនអាចអញ្ជើញពួកគេឲ្យអានខគម្ពីរ ដែលពិពណ៌នាអំពីការបៀតបៀន ដែលព្រះអង្គសង្គ្រោះបានជួបប្រទះ ( សូមមើល ម៉ាថាយ ២៧:២៧–៤៩; ម៉ាកុស ១៥:១៦–៣២; លូកា ២៣:១១, ៣៥–៣៩; យ៉ូហាន ១៩:១–៥ ) ។ តើយើងរៀនបានអ្វីខ្លះ មកពីការឆ្លើយតបរបស់ព្រះអង្គសង្គ្រោះ ដែលអាចជួយយើងឲ្យប្រឈមមុខនឹងការផ្ទុយ ? តើមានគំរូផ្សេងទៀតណាខ្លះអំពីការប្រឈមមុខនឹងការផ្ទុយដែលអាចជួយយើងបាន ? ( ឧទាហរណ៍ សូមមើល យ៉ូសែប ស្ម៊ីធ—ប្រវត្តិ ១:២៤–២៥ ) ។

លូកា ២៣:៣៤–៤៣

ព្រះអង្គសង្គ្រោះប្រទានសេចក្តីសង្ឃឹម និងការអភ័យទោសដល់យើង ។

ទោះបីជានៅក្នុងគ្រាចុងក្រោយរបស់ទ្រង់ក្ដី ក៏ព្រះអង្គសង្គ្រោះបានបន្ដប្រទានសេចក្ដីសង្ឃឹម និងការអភ័យទោសដែរ ។ សូមពិចារណាពីរបៀបដើម្បីបំផុសគំនិតដល់សមាជិកក្នុងថ្នាក់ឲ្យធ្វើតាមគំរូរបស់ទ្រង់ ។ ឧទាហរណ៍ បងប្អូនអាចសូមឲ្យសមាជិកពាក់កណ្ដាលថ្នាក់អាន លូកា ២៣:៣៤–៣៨ ( រួមមាន ខទី ៣៤ ដែលផ្ដល់ការយល់ដឹងមកពីការបកប្រែដោយ យ៉ូសែប ស្ម៊ីធ ) ហើយសមាជិកពាក់កណ្ដាលថ្នាក់ទៀតអាន លូកា ២៣:៣៩–៤៣ ។ សមាជិកក្នុងថ្នាក់អាចចែកចាយអ្វីដែលពួកគេបានរៀនអំពីព្រះអង្គសង្គ្រោះ ចេញមកពីខគម្ពីរចាត់តាំងរបស់ពួកគេបាន ។ តើយើងអាចធ្វើតាមគំរូរបស់ព្រះអង្គសង្គ្រោះដោយរបៀបណា ?

ធនធានបន្ថែមទាំងឡាយ

រូបភាពនៃការបៀតបៀន ការរងទុក្ខ និងការសុគតរបស់ព្រះយេស៊ូវ ។

ពីឡាត់លាងដៃរបស់លោក ( នៅលើគេហទំព័រ ChurchofJesusChrist.org; ម៉ាថាយ ២៧:១១–២៥ )
ព្រះគ្រីស្ទគ្រងមកុដបន្លា ( នៅលើគេហទំព័រ ChurchofJesusChrist.org; ម៉ាថាយ ២៧:២៦–៣១ )
ព្រះយេស៊ូវលីឈើឆ្កាងរបស់ទ្រង់ ( នៅលើគេហទំព័រ ChurchofJesusChrist.org; យ៉ូហាន ១៩:១៣–១៨ )
ការឆ្កាង ( នៅលើគេហទំព័រ ChurchofJesusChrist.org និង សៀវភៅរូបភាពដំណឹងល្អ ល.រ. ៥៧; លូកា ២៣:៣៣–៤៦; យ៉ូហាន ១៩:២៣–៣៧ )
ការបញ្ចុះសពព្រះយេស៊ូវ ( នៅលើគេហទំព័រ ChurchofJesusChrist.org និង សៀវភៅរូបភាពដំណឹងល្អ ល.រ. ៥៨; យ៉ូហាន ១៩:៣៨–៤២ )

បទគម្ពីរដែលព្យាករអំពីការសាកល្បង និងការសុគតរបស់ព្រះយេស៊ូវគ្រីស្ទ ។

ការកែលម្អការបង្រៀនរបស់យើង

ទាញយកកម្លាំងមកពីព្រះអង្គសង្គ្រោះ ។ « នៅក្នុងការខិតខំរបស់បងប្អូនដើម្បីរស់នៅ ហើយបង្រៀនឲ្យកាន់តែដូចជាព្រះអង្គសង្គ្រោះ បងប្អូននឹងត្រូវជំពប់ជើងដួលម្ដងម្កាលដោយចៀសពុំរួចនោះទេ ។ ចូរកុំបាក់ទឹកចិត្តឡើយ តែចូរឲ្យកំហុស និងភាពទន់ខ្សោយរបស់បងប្អូន បង្វែរបងប្អូនឲ្យទៅរកព្រះវរបិតាសួគ៌ និងព្រះអង្គសង្គ្រោះវិញ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ១៤ ) ។