“Turai 3–9. Mwakuri 1–5: ‘Kam na Riki Bwa Taan Kaotioti Ibukiu,’” Nakomai, Iriirai—Ibukin te Reirei n Tabati: Te Nu Tetemanti 2023 (2022)
“Turai 3–9. Mwakuri 1–5,” Nakomai, Iriirai—Ibukin te Reirei n Tabati: 2023
Bongin te Bentekota, iroun Sidney King
Turai 3–9
Mwakuri 1–5
“Kam na Riki Bwa Taan Kaotioti Ibukiu”
Ngkana ko wareka Mwakuri 1–5 ao n ukoukora ana kairi te Tamnei, kona karekea te kaungaaki ibukin bwaai aika koaua n te mwakoro aika e na buokiia kain am kiraati ni katan riki iaon te Tamnei ae Raoiroi ao n riki bwa taan kaotioti aika kakaonimaki iroun te Uea Iesu Kristo.
Kaunga te Tibwatibwa
A mwaiti kibuntaeka aika a kakaawaki ao reirei inanon Mwakuri 1–5. Teuana te kawai ae tamaroa ni kunea bwa enga ae moan te kakaawaki ao ni bootau nakoia kain am kiraati bwa kona tuangiia bwa tera ae teke nakoia iai n aia kamatebwai. Kona kanga ni kaunga te aekaki n tibwatibwa aei? E kona n rang beebete n aron anganakiia tabeua te miniti ni kakai ao n tibwai kiibu man Mwakuri 1–5 are a namakina iai bwanaan te Uea n taetae nakoia.
Reirei te Reirei
Mwakuri 1:1–8; 2:37–39; 4:1–13, 31–33
Iesu Kristo e kaira Ana Ekaretia rinanon te Tamnei ae Raoiroi.
-
Warekan te bwai are a rinanona Abotoro e kona ni buokiia kain am kiraati n nooria bwa a kanga ni karekea te mwaaka ao te kairiiri mairoun te Tamnei ae Raoiroi n nakoaia n te Ekaretia ao katabeaia. Teuana te kawai n rinanon taneiai inanon Mwakuri 1–5 bwa e na koreaki iaon te burakibooti Te Tamnei ae Raoiroi e buokiia Abotoro ni kaira te Ekaretia man: ao imwiina kaoia kain te kiraati bwa a na kakaea n Mwakuri 1:1–8; 2:37–39; ao 4:1–13, 31–33, n taratarai kawai ni kabanea te tiententi. Kain te kiraati a kona ngkanne n tibwai taneiai are e buokiia iai te Tamnei ae Raoiroi ni kawai aikai. Bukin tera Abotoro a kainnanoa te Tamnei ae Raoiroi ao bukin tera ti kainnanoia?
Ana Abotoro Iesu Kristo a weteaki iroun te Atua rinanon te kaotioti.
-
Iangoia ni kaoia kain te kiraati bwa a na kabwarabwara bwa e kanga te bitineti n mwakuri ni kakaea onean mwiin te nakoa ni kakoroi mwiin moti. Tera konabwai aika a na taratarai? Tuangiia kain te kiraati bwa a na kabotaua aei ma aron te Abotoro are Matia ngke e weteaki (taraa Mwakuri 1:15–26; taraa naba 1 Tamuera 16:1–13) ao ana taeka Beretitenti Gordon B. Hinckley n “Bwaai ni Ibuobuoki riki Tabeua” ni kabwarabwara bwa a kanga Abotoro ni weteaki ni boong aikai. E kanga ana kawai te Atua ibukin rineaia taan kairiiri n roota ara onimaki irouia taan kairiiri ake E weteia? Kain te kiraati a kona n tibwaia bwa a kanga ni karekea aia kakoaua bwa abotoro ni boong aikai ao burabeti a weteaki Irouna.
Te Tamnei ae Raoiroi e kaungaira bwa tina waaki n te bwai are ti reiakinna.
-
Ngkai kain te kiraati a kamatebwaia koroboki aika a tabu ni mweengaia ao n ikotaki n te kiraati ni katoa wiiki, a kona n tabetai n namakina ewaraki I nanoia (Mwakuri 2:37). Kona bae n namakina te kaungaaki bwa kona buokiia nakon te mwaneka are iaona n titiraki, “Tera ae tina karaoia?” (Mwakuri 2:37). Wareka Mwakuri 2:37–47 n ikotaki, kaoia kain te kiraati bwa a na kakaai bwaai n te kurubu ae 3,000 aomata imwiin ana kakao Betero. Tao a kona naba n tibwai kawai ake a tia ni karaoia iaon te kaungaaki man aia kamatebwai n ana taeka te Atua. Ngkanne kona bae n kawakina te tai n tokin te kiraati ibukiia aomata nako bwa kona titirakiniia te titiraki “Tera ae tina karaoia?” ao n korea aia namakina.
E ngae ngke e kabureaki ao e batiboaki, Betero e ninikoria n tataekina te euangkerio.
Ngkai ti kaonaki n te Tamnei ae Raoiroi, ti kona n tibwa te euangkerio ma te ninikoria.
-
Kain te kiraati a kona ni manga rinanon Mwakuri 3; 4:1–21; 5:12–42, n taratarai banna ni katoto iroun Betero ngke e kakoaua ma te ninikoria. Ke a kona ni matakuakina teuana man witeo aikai: “Peter Preaches and Is Arrested,” “Peter and John Are Judged,” ke “Peter and John Continue Preaching the Gospel” (ChurchofJesusChrist.org). Tera ae e nanonaki n taetaekina “ana taeka te Atua ma te ninikoria”? (Mwakuri 4:31). E kanga te Tamnei ae Raoiroi ni buokiira n tibwa te euangkerio ma te ninikoria? E kanga te aekaki n ninikoria ni kaokoro ma te kanunuun? Kain te kiraati a bae n iai aia taneiai are a na tibwaia are ngaiia, ke temnanna ae a kina, e ninikoria ni katana ke e kakoaua n te euangkerio.
Bwaai n Ibuobuoki Riki Tabeua
Weteakiia kain te Tengauna ma Uoman.
Gordon B. Hinckley e tibwai iango aikai ibukin waakinan te wewete iroun te Abotoro ae boou: “Aron karaoan e kantaningaaki n ana ekaretia te Uea. Akea iai ukoukoran te nakoa, akea te kaiangatoa ibukin te nakoa, akea te anainano ni boutokan raoiroin temanna. E kaokoro ana kawai te Uea ma ana kawai te aonaaba. Ana kawai te Uea e mabu, te kawai ae rau, akea iai bwai ni katangitang ke rekerekena ma te mwane. Te bwai ae akea iai taraakin kakannaton temanna, te kainikatonga ke ni kan tokanikai. Iaan ana baire te Uea, naake iai tibwangaia n rineaki bwa taan mwakuri a tautaekanaki iaan teuana te titiraki ae tatao: ‘Antai ae e na anaia te Uea?’ Iai te iango ae karauaki n iangoaki raoi. Ao e mwaiti te tataro ibukin karekean te kamatoa mairoun te Tamnei ae Raoiroi bwa eti te rinerine” (“God Is at the Helm,” Ensign, May 1994, 53).
Kanakoraoan Ara Anga reirei
Kaoia naake ko reireiniia bwa a na mwakuriia. Te Tamnei ae Raoiroi e aki toki ni kaungaia bwa tina mwakuriia te bwai are ti reiakinna (taraa Mwakuri 2:37). Ngke e riki aei nakoia ana aomata Betero ake e reireiniia, e kanakoa ana kakao (taraa Mwakuri 2:38). Iangoia bwa kona kanga n ira ana banna ni katoto Betero.