Betero e taetae ma Konenerio

Turai 17–23

Mwakuri 10–15

“Ao E Rikirake Ana Taeka te Atua ao E Kabatiaki”

Kamatebwaiakan Mwakuri 10–15 ma te tataro mwaaka imwain warekan te kamataata aei e na buokiko ni karekei namakin mairoun te Uea. Iango aikai bon ti katautau.

te aikaon ibukin te tibwatibwa

Kaunga te Tibwatibwa

Tuangiia kaain te kiraati bwa a na tibwauaia ma temanna ae tekateka irarikiia te bwai ae reireiniia te Tia Kamaiu ngkana a wareka Mwakuri 10–15. Tuangiia tabeman bwa a na tibwauai aia nonoori ma kaain te kiraati ni kabane.

te aikaon ibukin te anga reirei

Reirei te Reirei

Mwakuri 10; 11:1–18; 15:1–25

Tamara are i Karawa e reireiniira te reirei iaon te reirei rinanon te kaotioti.

• Tabeman kaain te kiraati e kona ni bure aron aia atatai n aron karekean te kaotioti. E kona ni buokiia ni maroroakinna bwa e kanga te kaotioti n roko nakon Betero ao a kanga ni kona ni waaki rake, “n aki nanokokoraki” (Mwakuri 10:20), ngkana a taraa n aki bwanin ke n aki itiaki kaotioti. Iangoia ni korea te rain iaon te burakibooti ao koroia n tokin te rain are teuana E na tataekinaki te euangkerio nakoia Tientaire. Ngkai kaain te kiraati, a rinanon Mwakuri 10 ao 11:1–18, ngkanne koroi kainikoto iaon te rain are e kaotia bwa e kanga te Uea ni karaurau ni kaotia nakon Betero ae e a roko te tai n taekina te euangkerio nakoia Tientaire. Te katooto, ko kona ni moanna ma te tabo are e koreaki iai “Konenerio e nora te bwai teuana n te mi” (Mwakuri 10:1–6) ke ni moanna ma ana taeka te Tia Kamaiu nakoia Ana reirei n nako ni “kakiritianiia botanaomata ni kabaneia” inanon Mataio 28:19. Tera ae ti kona n reiakinna iaon taekan te kaotioti man ana taneiai Betero? Tera ana reirei Nibwaai iaon taekan te kaotioti inanon 2 Nibwaai 28:30 ao reierei mairoun Unimwaane David A. Bednar inanon “Bwaai n Ibuobuoki Riki Tabeua” aika a kabatiai otara?

  te ataeinnaine ngke e wareki booki aika tabu

  N tainako ao a roko ara kaotioti inanon taina rinanon ara beku mwaaka.

• Ko kona ni kamatebwai bwaai aika riki inanon booki aika tabu are e reireiniia iai aomata te Uea te reirei iaon te reirei. N raonaki ma ana taneiai Betero inanon Mwakuri 10, a kona kaain te kiraati n rinanoi ana taneiai Nibwaai (1 Nibwaai 18:1–3); Aramwa (Aramwa 7:8; 16:20); ao Moomon (3 Nibwaai 28:17, 36–40). Tera riki katooto aika a kona kaain te kiraati n iangoi are a kona iai aomata ni karekei kairi n te tamnei “teutana ikai ao teutana ikanne”? (2 Nibwaai 28:30). Bukin tera n tabetai te Uea e rineia bwa E na kaoti bwaai n te kawai aei nakon are kanakoan kaeka ni kabane n teuana te tai? (taraa Reirei ao Berita aika Tabu 50:40; 98:12).

• N tabetai ao membwa iai aia titiraki ke tabeaiangaia iaon bitaki n taian tua ao burokuraem n te Ekaretia. E na kona ni buokiia ni maroroakinna bwa e kanga te kaotioti ni moana tataekinan te euangkerio nakoia Tientaire (taraa Mwakuri 10) n onea mwiin ana kaetieti te Uea nakoia Ana reirei (taraa Mataio 10:1, 5–6). Ko kona ni kaota te witeo ae The Jerusalem Conference (ChurchofJesusChrist.org). E na kanga kaain te kiraati ni kaeka nakon temanna n ana tai Betero iaon te aba are e aki boraoi n iango ma ana kaetieti Betero bukina bwa e kaitarai taneiai ake imwaina? E na kanga te kaotioti inanon Mwakuri 10 ni buokiira n iangoa raoi ana kaotioti te Uea ae reitinako rinanon Ana burabeti?

Mwakuri 10:9–48

“Te Atua e aki nanonano n tarakin aroia aomata.”

• A kona kaain am kiraati ni kabwaia man te marooro iaon taekan nanon “te aki nanonano n tarakin aroia aomata”? Ko kona ni moanna man tuangakiia kaain te kiraati bwa a na wareki booki aika tabu are e reirei bwa te Atua e aki nanonano n tarakin aroia aomata, n aron I-Rom 2:1–11; 1 Nibwaai 17:34–40; 2 Nibwaai 26:32–33; Aramwa 5:33; Moronaai 8:12; ao Reirei ao Berita aika Tabu 1:34–35. Tuangiia kaain te kiraati bwa a na korei nanon “aki nanonano n tarakin aroia aomata,” ae boboto iaon te bwai ae a warekia, ao ngkanne tibwaua te bwai ae a koroia. A kanga bwaai aika riki ao reirei inanon Mwakuri 10:34–48 ni kaotia ae te Atua e aki nanonano n tarakin aroia aomata? A na kanga aika raraoi ni “butimwaeaki” ao “n tangiraki” iroun te Atua e ngae ngke E aki inanonano n tarakin aroia aomata? (taraa Mwakuri 10:34–35; 1 Nibwaai 17:35).

  Ko na bae ni kainanoia ni buokiia kaain te kiraati n ataia ae te riki “n aki nanonano n tarakin aroia aomata” e aki nanonaki n ae te Atua e kakabwaiaia n tii te arona aomata ni kabane n aki tabe ma ara mwakuri. E tangiriia Ana aomata ni kabane bwa a na kariaia Ana euangkerio, ma bwaninin kakabwaia n te euangkerio a kawakinaki ibukiia naake a karaoi ao a kawakin berita aika tabu ma Ngaia.

te aikaon ibukin bwaai n ibuobuoki

Bwaai n Ibuobuoki Riki Tabeua

Karekean te kaotioti n te reirei iaon te reirei.

E reirei Unimwaane David A. Bednar: “A mwaiti mai iroura ae ti taku bwa ti na karekea te kaeka ke te wirikiriki nakon ara tataro ao ara bubuti. Ao ti teimatoa ni kantaningaia ae te kaeka anne ke te wirikiriki e na waekoa n roko ao ni kabane n te tai naba anne. Ngaia ae, ti teimatoa ni kakoaua te Uea bwa e na anganiira te kaeka ae waekoa ao ni kabane n teuana te tai. E ngae n anne, te baeten ae kaokiokaki ni kabwarabwaraaki inanon booki aika tabu a kantaningaia bwa ti na karekea ‘teutana i mwin teutana, te reirei teuana imwin teuana,’ ke n taekana tabeua, kaeka aika mwaiti aika uarereke inanon taina. Kinakin ao ataakin te baeten aei bon te kiing ae kakawaki ni karekean kairi mai ieta ao ibuobuoki mairoun te Tamnei ae Raoiroi” (“Line upon Line, Precept upon Precept,” New Era, Tebetembwa. 2010, 3–4).

Kanakoraoan Ara Anga Reirei

Waaki ma booki aika tabu. Imwain ae ko tarai bwaai n ibuobuoki aika raka, kamatebwai booki aika tabu n taai ake ngkoa ao n taai aikai ma te nanomatoa. Te tataro mwaaka ni kamatebwai ana taeka te Atua e na kariaia te Tamnei ni buokiko ni korea te bwai ae ko a tia n reiakinna ngke ko anga reirei. (Taraa Anga Reirei n Ana Kawai te Tia Kamaiu, 12.)