jarlepju in armej ro rej pād ilo reba eo im raar peptaij ilo reba eo

Raan in Pentecost eo, jān Sidney King

Juļae 3–9

Jerbal 1–5

“Koṃ Naaj Aō Ri Kōnnaan (Rikam̧ool ro)”

Eļan̄n̄e kwoj riiti Jerbal 1–5 im kappukōt tōl eo an Jetōb, kwonaaj bōk imwe eo kōn ta m̧ool ko ilo jepta ko renaaj jipan̄ ro uwaan kūlaaj eo am̧ ļapļo̧k aer pedped ioon Jetōb Kwojarjar eo im erom rikam̧ool ro retiljek an Irooj Jisōs Krasit.

pija ej bōk jikin kwaļo̧k

Kajjitōk bwe ren Kwaļo̧k

Elōn̄ eoon ko im pedped in katak ko reļļap meļeļeier ilo Jerbal 1–5. Juon iaan wāween ko reļļap n̄an lo ewi wōt iaan men kein eļap tata aer aorōk im jetjet n̄an ro uwaan kūlaaj eo am̧ ej n̄an kōtļo̧k bwe ren jiron̄ eok ta eo ekar jenolo̧k tata n̄an er ilo ekkatak eo aer. Ekōjkan am̧ naaj kajjitōk kain kwaļo̧k in? Emaron̄ in ļam waan in wōt ilo am̧ leļo̧k n̄an er jejjo minit ko n̄an pukōt im kwaļo̧k juon eoon jān Jerbal 1–5 me raar en̄jake ainikien Irooj ej kōnono n̄an er.

pija eo ej bōk jikin katakin

Katakin Katak eo

Jerbal1:1–8; 2:37–39; 4:1–13, 31–33

Jisōs Kraist ej tōl Kabun̄ eo An kōn Jetōb Kwojarjar eo.

• Riit kōn̄ en̄jake ko an Rijilōk ro emaron̄ jipan̄ ro uwaan kūlaaj eo am̧ lo ekōjkan aer maron̄ bōk kajoor eo im tōl eo jān Jetōb Kwojarjar ilo kūr ko im ijjitōn̄ ko aer ilo Kabun̄ in. Juon wāween n̄an etale en̄jake ko ilo Jerbal 1–5 naaj jei ioon boot eo Jetōb Kwojarjar eo ekar jipan̄ Rijilōk ro tōl Kabun̄ in kōn: innām kajjitōk ippān ro uwaan kūlaaj eo n̄an etale Jerbal 1:1–8; 2:37–39; im 4:1–13, 31–33, kappukōt wāween ko n̄an kadedeļo̧k jāntōj eo. Innām ro uwaan kūlaaj eo remaron̄ kwaļo̧k en̄jake ko me Jetōb Kwojarjar ekar jipan̄ er ilo wāween kein. Etke Rijilōk ro raar aikuji Jetōb Kwojarjar eo—im etke jej aikuji E?

Jerbal 1:15–26

Rijilōk ro an Jisōs Kraist rej kūr jān Anij kōn revelesōn.

• Ļōmņak in kajjitōk ippān ro uwaan kūlaaj eo n̄an kōmeļeļeik ekōjkan an juon pejnej maron̄ in pukōt juon ribōk jikin juon jerbal in executive. Ta men ko remenin aikuj remaron̄ kappukiti? Kajjitōk ippān ro uwaan kūlaaj eo n̄an keidi wāween in ippān ekōjkan an Rijilōk Matthias kar kūr (lale Jerbal 1:15–26; lale barāinwōt 1 Samuel 16:1–13) im ippān naan ko an Būreejtōn Gordon B. Hinckley ilo “Kein Jipan̄ ko Jet” kōmeļeļeik ekōjkan an Rijilōk ro kūr rainin. Ekōjkan an m̧ōņōkajen eo an Irooj n̄an kāālet ritōl ro jelet tōmak eo ad ilo ritōl ro E ekar kūr? Ro uwaan kūlaaj eo remaron̄ kwaļo̧k ekōjkan aer kar bōk juon kam̧ool bwe rijilōk ro im rikanaan ro rainin rej kūr jān E.

Jerbal 2:37–47

Jetōb Kwojarjar eo ej im̧we kōj n̄an jerbale ta eo jej ekkatak.

• Ilo an ro uwaan kūlaaj eo ekkatak jeje ko rekwojarjar ilo m̧weo im ippān doon ilo kūlaaj eo kajjojo wiik, emaron̄ emakijkij aer en̄jake “e lel būrueir” (Jerbal 2:37). Kwomaron̄ in en̄jake im̧we n̄an jipan̄ er bar wōnm̧aanļo̧k jidik kōn kajjitōk, “Ta eo jenaaj kōm̧m̧ane?” (Jerbal 2:37). Riiti Jerbal 2:37–47 ippān doon, kajjitōk ippān ro uwaan kūlaaj eo n̄an kappukōt men ko kumi in 3,000 armej ro raar kōm̧m̧ane āinwōt juon tōprak jān kūr eo an Piter. Bōlen remaron̄ barāinwōt kwaļo̧k wāween ko raar jerbalki kōn im̧we eo jān ekkatak eo aer kōn naan an Anij. Innām kwomaron̄ kakoņ jidik iien ilo jem̧ļo̧k in kūlaaj eo n̄an an kajjojo armej kajjitikin er make kajjitōk eo “Ta eo inaaj kōm̧m̧ane?” im rekoote im̧weo ko aer.

Piter ej ettōn̄ dikdik im kwaļo̧k naan kōn kinej ko ilo turin mejān.

Kōjekdo̧o̧ņ an kar kalbuuj im m̧ane, Piter ekar ilo peran kwaļo̧k gospel eo.

Jerbal 3; 4:1–21; 5:12–42

Ilo ad obrak kōn Jetōb Kwojarjar eo, jemaron̄ kwaļo̧k gospel eo kōn peran.

• Ro uwaan kūlaaj eo remaron̄ etale Jerbal 3; 4:1–21; 5:12–42, kappukōt waanjon̄ak ko kōn an Piter kam̧ool ilo peran. Ak remaron̄ alooje juon iaan pija in alooj kein: “Peter Preaches and Is Arrested,” “Peter and John Are Judged,” or “Peter and John Continue Preaching the Gospel” (ChurchofJesusChrist.org). Ta meļeļe in n̄an kōnono “peran rej kwaḷọk naan in Anij”? (Jerbal 4:31). Ekōjkan an Jetōb Kwojarjar jipan̄ kōj kwaļo̧k gospel eo kōn peran? Ekōjkan an kain peran in oktak jān kōm̧m̧an limotak? Ro uwaan kūlaaj eo emaron̄ kar wōr aer en̄jake ko n̄an kwaļo̧k ilo wāween eo er, ak juon eo rejeļā kake, eperan ilo bōbrae ak kam̧ool kōn gospel eo.

pija ej bōk jikin kein jipan̄ ko

Kein Jipan̄ ko jet

Kūr eo an juon membōr in Jon̄oulruo eo.

Gordon B. Hinckley ekar kwaļo̧k kōļmenļo̧kjeņ kein kōn jekjek eo an kūr juon Rijilōk kāāl: “Jekjek eo ejej uwaan n̄an kabun̄ eo an Irooj. Ejjeļo̧k ej jibadōk n̄an opiij, ejjeļo̧k iakikwōj n̄an jea, ejjeļo̧k karrelel n̄an lelōn̄ļo̧k wānōk an juon. Wāween eo an Irooj eoktak ān wāween eo an laļ in. Wāween eo an Irooj ainjuon, ej juon wāween eaenōm̧m̧an, ejjeļo̧k an kalimotak ak ejjeļo̧k wōņāān. Ejjeļo̧k ļōmņak kōn e make, ak utiej bōro ak kōttōpar. Ium̧win karōk eo an Irooj, ro me ewōr aer eddo n̄an kāālet opija ro rej jerbal kōn juon kajjitōk elukkuun in aorōk: ‘Wōn eo Irooj enaaj kar bōke?’ Ewōr juon iien ekōnono aitok emera im eļap kōļmenļo̧kjeņ ie. Im ekanooj in ļap jar n̄an bōk juon kapene jān Jetōb Kwojarjar bwe ej kāālet eo ejim̧we” (“God Is at the Helm,” Ensign, Māe 1994, 53).

Kōkm̧anm̧anļo̧k Ad Katakin

Kajjitōk ippān rūkkatak ro n̄an jerbal. Jetōb Kwojarjar eo emakijkij an im̧we kōj n̄an jerbale ta eo jej ekkatak (lale Jerbal 2:37). N̄e menin ekar waļo̧k n̄an armej ro Piter ekar katakin er, ekar leļo̧k juon kajjitōk (lale Jerbal 2:38). Ļōmņak kōn ekōjkan ami ļoor waanjon̄ak eo an Piter.