Oktak eo ilo Iaļ eo n̄an Damascus, jān Michelangelo Merisi da Caravaggio

Juļae 10–16

Jerbal 6–9

“Ta Eo Kwoj Kōņaan Bwe In Kōm̧m̧ane?”

Ekkatak Jerbal 6–9 im rekoote im̧weo ko am̧. Menin enaaj jipan̄ eok bōk revelesōn eo kōn ekōjkan jipan̄ ro uwaan kūlaaj eo epaakeļo̧k Jisōs Kraist kōn ekkatak eo aer kōn jepta kein.

Kajjitōk bwe ren Kwaļo̧k

Ioon boot eo, je etan jet iaan armej ro kar kōnono kaki ilo Jerbal 6–9, ro āinwōt Stephen, Saul, Philip, Ananias, Piter, im Tabitha ak Dorcas. Kajjitōk ippān jejjo ro uwaan kūlaaj eo n̄an kwaļo̧k juon men raar ekkatak kake jān juon iaan armej rein ilo ekkatak eo aer ilo wiik in.

Katakin Katak eo

Jerbal 7

Jum̧ae Jetō Kwojarjar emaron̄ tōlļo̧k n̄an kowaan Rilo̧mo̧o̧r eo im ro Rikarejeran.

• Kwomaron̄ jino juon iien ekōnono kōn en̄jake eo an stephen kōn kajjitōk ippān ro uwaan kūlaaj eo n̄an etale naan ko an Stephen ilo Jerbal 7:37–53. Ta kakkōļ ko remaron̄ in ilo naan ko an ewōr kilaer n̄an kōj rainin? Kwomaron̄ pedped ioon ennaan eo an Stephen ilo Jerbal 7:51. Ta meļeļe in n̄an “jum̧ae Jetōb Kwojarjar”? N̄an meļeļe naan kein ilo tum̧wilaļier, ro uwaan kūlaaj eo remaron̄ ekōnono kōn juon ak elōn̄ļo̧k iaan eoon kein: 2 Nipai 28:3–6; 33:1–2; Mosaia 2:36–37; Alma 10:5–6; im Alma 34:37–38. Etke jet iien jej “jum̧ae Jetōb Kwojarjar”? Ta eo jemaron̄ kōm̧m̧ane n̄an kōkōm̧anm̧anļo̧k kile im ļoor im̧we ko an Jetōb Kwojarjar?

Jerbal 8:9–24

Bōro ko būruōd rej aikuj in “jim̧we im̧aan mejān Anij.”

• N̄an ekkatak bwebwenato eo an Simon āinwōt juon kūlaaj, kwomaron̄ je ioon boot eo kajjitōk eo Wōn eo Simon? Ta eo ekar kōņaan? im Ekōjkan an kar kajjieon̄ in bōke? Kappeik kajjojo ro uwaan kūlaaj eo n̄an riiti Jerbal 8:9–24, kappukōt uwaak ko n̄an kajjitōk kein. Ta m̧ool ko Simon ekar jab meļeļe kaki? Ta eo jemaron̄ ekkatak jān en̄jake eo an Simon? Ekōjkan ad maron̄ kanooj lale bwe bōro ko būruōd ren “jimwe im̧aan mejān Anij”? (eoon 21).

• Ilo iien ekkatak eo aer make, jet iaan ro uwaan kūlaaj eo remaron̄ in kile m̧wil ko me Stephen im Philip ekar wōr ippāer im ekar ejjeļo̧k ippān Simon (lale unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko) Eļan̄n̄e aindein, kwomaron̄ kajjitōk ippāer n̄an kwaļo̧k ta eo raar loe. Ro uwaan kūlaaj eo remaron̄ barāinwōt kwaļo̧k waanjon̄ak ko jet jān Jerbal 6–9 kōn armej ro me būruier raar jim̧we im̧aan mejān Anij, ro āinwōt Philip im em̧m̧aan eo jān Ethiopia (lale Jerbal 8:26–40), Saul (lale Jerbal 9:1–22), im Tabitha (lale Jerbal 9:36–39).

  

  Tabitha Ejerkak, jān Sandy Freckleton Gagon

Jerbal 8:26–39

Jetōb Kwojarjar eo enaaj jipan̄ kōj tōl ro jet n̄an Jisōs Kraist.

• N̄an jipan̄ ro uwaan kūlaaj eo meļeļe ekōjkan aer maron̄ tōl ro jet n̄an Jisōs Kraist (lale Jerbal 831), kwomaron̄ kajjitōk ippān ruo uwaan kūlaaj eo n̄an jijet jujel n̄an doon im riiti kōnono eo an Philip im em̧m̧aan eo jān Ethiopia ilo Jerbal 8:26–39. Eo kein kajilu uwaan kūlaaj eo emaron̄ riiti m̧ōttan ko rejjab an bwebwenato eo. Ta eo jej ekkatak jān waanjon̄ak eo an Philip kōn katakin gospel eo n̄an ro jet?

• N̄an watwate waanjon̄ak ko raan kein kōn bwebwenato eo ilo Jerbal 8:26–39, ro uwaan kūlaaj eo remaron̄ kwaļo̧k en̄jake ko ewōr ippāer kōn kwaļo̧k gospel eo ak kōn kobatok ilo Kabun̄ in. Ekōjkan an Jetōb Kwojarjar eo kar jipan̄ er? Ekōjkan an kar juon jerbal āinwōt aer riaetōl? Kajjitōk ippān ro uwaan kūlaaj eo n̄an kejekļo̧jeņ kōn wōn ro remaron̄ in riaetōl n̄an gospel eo.

Jerbal 9

N̄e jej ajeļo̧k n̄an ankilan Irooj, jemaron̄ erom kein jerbal ko ilo pā ko Pein.

• Ro uwaan kūlaaj eo remaron̄ ekkatak m̧ool ko rekajoor kōn oktak eo aer make jān ekkatak en̄jake eo an Saul, ekoba m̧ool eo bwe aolep remaron̄ ukweļo̧k im oktak eļan̄n̄e rej m̧ōņōņō. Kwomaron̄ kajjitōk ippān ro uwaan kūlaaj eo n̄an keidi en̄jake eo an Saul ippān en̄jake ko an Alma (lale Mosaia 17:1–4; 18; 26:15–21) in ko an Anti-Nipai-Liai (lale Alma 24:7–12). Ta eo Irooj ekar kōm̧m̧ane n̄an jipan̄ armej rein erom rioktak? Ekōjkan aer kar kwaļo̧k m̧ōņōņō eo aer n̄an oktak? Ta ennaan ko jej loi n̄an mour ko ad make jān bwebwenato kein?

• N̄an jino juon iien ekōnono kōn en̄jake eo an Saul, kwomaron̄ kajjitōk ippān jejjo ro uwaan kūlaaj eo n̄an itok ilo aer pojak n̄an kwaļo̧k ta eo rej ekkatak jān kajjojo jākjōn ko ilo ennaan eo an Būreejtōn Dieter F. Uchtdorf’ “Waiting on the Road to Damascus” (Liahona, Māe 2011, 70–77). Ekōjkan ad jet iien kōttar ilo iaļ eo ad make n̄an Damascus? Ekkar n̄an Būreejtōn Uchtdorf, ta eo emaron̄ jipan̄ kōj em̧m̧anļo̧k ad ron̄ ainikin Anij? Kwomaron̄ barāinwōt ļōmņak in alooje pija in alooj eo “The Road to Damascus” (ChurchofJesusChrist.org). Bōlen ro uwaan kūlaaj eo remaron̄ kwaļo̧k en̄jake ko aer kōn kappukōt im ļoor ankilan Anij.

Kōkm̧anm̧anļo̧k Ad Katakin

Kwaļo̧k kam̧ool kōn Jisōs Kraist. Āinwōt juon rūkaki, kwomaron̄ jipan̄ ro uwaan kūlaaj eo kalōk tōmk eo aer ilo Rilo̧mo̧o̧r eo, ejja āinwōt an Philip kar kōm̧m̧ane n̄an em̧m̧aan in Ethiopia eo kōn katakin e jān Aiseia (lale Jerbal 8:26–37). N̄an kōm̧m̧ane menin, ej aikuj wōr ippam̧ en̄jake ko am̧ make kōn kalōk tōmak ilo jeje ko rekwojarjar. Kam̧ool in kwoj kwaļo̧k emaron̄ in juon kajoor ekajoor ilo jipan̄ ro uwaan kūlaaj eo kōkajoorļo̧k naan in kam̧ool ko aer kōn Jisōs Kraist.